Kapite 46
Neʼe Fāfā Ia Ki Tona Kofu
KO TE logo ʼo ʼuhiga mo te liliu mai ʼa Sesu mai te Tekapole kua aʼu mai ki Kapenaume, pea ko te tokolahi kua fakatahitahi mai ki te matatai ko tona talitali. Neʼe lagi logo te hahaʼi ki tana faka gona te afā pea mo tana fakamālōlō te ʼu tagata ʼaē neʼe ulusino ai te laumālie kovi. ʼI te temi leva ʼaenī, ʼi tana hifo ifo ʼi te vaka, ʼe ʼā takai ia ia e te hahaʼi, ʼaki te loto pea mo te falala.
Ia nātou ʼaē neʼe holi ʼaupito ke felāveʼi mo Sesu, neʼe ʼi ai te tagata ko Sailusi, ko he tahi ʼi te ʼu pelesitā ʼo te sinakoka. Neʼe tō kia vaʼe ʼo Sesu pea mo kole mamahi age ki ai ʼo tuʼa lahi: “Ko toku ʼofafine kua vave mate, fakalelei tou loto ka ke haʼu ʼo hili ʼou nima ki ai, ke mālōlō ai pea ke maʼuli.” Neʼe kehe te ʼofa mamahi ʼo Sailusi ki te tamasiʼi ʼaia, heʼe ko tona ʼofafine ʼulu tokotahi pea ʼe kei taʼu hogofulu-ma-lua pe.
Neʼe muliʼi atu aipe e Sesu ia Sailusi ki tona ʼapi, pea neʼe muli mai ai mo te hahaʼi ia ia. Tou fakakaukauʼi muʼa te gatutu ʼa te hahaʼi, ʼi tanatou ʼamanaki ʼaē ʼe ʼi ai te milakulo foʼou ka hoko. Ia nātou ʼaia, neʼe ʼi ai te fafine neʼe manatu pe muʼa ia ʼi te moʼi temi ʼaia ki te kovi ʼo tona mahaki.
Kua katoa leva ia taʼu loaloaga e 12, mo tana mamahi ʼi te ʼalu ʼo te toto ia te ia. Neʼe feʼaluʼaki ʼi te ʼu tōketā, ʼo puli fuli ai tona ʼu koloā ʼi te ʼu faitoʼo neʼe fai. Kae neʼe mole ʼi ai hona fua; neʼe toe ʼāsili age te kovi ʼo tona mahaki.
Ohage pe ko takotou mahino lelei ki te faʼahi ʼaia ʼe fakatupu vaivai tona mahaki pea mo fakafitaʼa pea mo fakalainoa. ʼI te agamāhani, ʼe mole kita talanoa ki te taʼi mahaki ʼaia. Pea tahi, ʼi te Lao faka moisese, ʼe heʼemaʼa te fafine mokā maligi te toto ia ia, pea ko ʼaē ʼe fāfā ki ai, peʼe ko tona ʼu mutuʼi meʼa ʼaē kua pulepule, ʼe tonu ke maʼanu pea ke nofo heʼemaʼa ʼo aʼu ki te afiafi.
Neʼe logo te fafine ʼaia ki te fakamatala ʼo te ʼu milakulo ʼa Sesu; pea koʼeni foki kua ina maʼu ia ia. ʼUhi ko tona heʼemaʼa, neʼe fakahaohao fakaʼeteʼete ʼi te hahaʼi ke ʼaua naʼa tokagaʼi, ʼo ina ʼui fēnei ʼi tona loto: “Kapau ʼe ʼau lava ʼo fāfā ki tona ʼu kofu, pea ʼe ʼau toe mālōlō ai anai.” Ko te meʼa ʼaia neʼe ina fai; ʼi te temi pe ʼaia, neʼe ina logoʼi ai kua malū te maligi ʼo te toto.
“Ko ai ʼaē neʼe fāfā mai kia te ʼau?” ʼI meʼa fakapuna’maʼuli leva ki te fafine ʼi tana logo ki te fehuʼi ʼa Sesu! Neʼe ina ʼiloʼi feafeaʼi? ‘Faiako, ko te tali age ʼaia ʼa Petelo, ko te hahaʼi ʼe nātou ʼōposi pea mo fakaʼefihiʼi koe, ka ke ʼui mai koe: pe “Ko ai ʼaē neʼe fāfā mai kia te ʼau?” ’
ʼI tana fakasiosio ʼo kumi te fafine ʼi te hahaʼi, neʼe fakamahino fēnei e Sesu: “Neʼe ʼi ai te tahi neʼe fāfā mai kia te ʼau, he neʼe ʼau logoʼi te mālohi neʼe mavae atu ia te ʼau.” ʼIo, ko te fāfā ʼaia ʼe mole tatau mo te tahi ʼu fāfā, heʼe ko te fakamālōlō ʼaē neʼe tupu mai ai ʼe ina toʼo tona mālohi ʼi te mālohi ʼo Sesu.
ʼI tana sio ʼaē neʼe tokagaʼi te meʼa ʼaē neʼe ina fai, neʼe haʼu te fafine ʼaia ʼo tō kia vaʼe ʼo Sesu, neʼe mataku pea neʼe tetetete. Ia muʼa ʼo te hahaʼi, neʼe ina fakahā fakahagatonu age te ʼuhiga ʼo tona mahaki pea mo tona faʼahiga fakamālōlō.
ʼI tona lave ʼaē kia ia ʼo tana fakahā age te meʼa ʼaē neʼe hoko, ʼaki tona manavaʼofa neʼe fakaloto fīmālieʼi e Sesu: “ ʼOfafine, kua fakamālōlō koe e tau tui. ʼAlu ʼi te fīmālie, pea ke ke mālōlō ʼi tou mahaki.” ʼE ko he meʼa lelei te ʼiloʼi neʼe fili e te ʼAtua he tagata agalelei lahi, mo manavaʼofa lahi ke ina takitaki te kele, ʼe tokaga ki te hahaʼi pea mo ina maʼu te mālohi ke tokoni kia nātou! Mateo 9:18-22; Maleko 5:21-34; Luka 8:40-48; Levitike 15:25-27.
▪ Ko ai ia Sailusi, pea koteā te tupuʼaga ʼo tana haʼu kia Sesu?
▪ Koteā te meʼa ʼaē neʼe tokaga ki ai te fafine, pea koteā ʼaē neʼe faigataʼa ai kia ia tana ʼalu ʼo kole kia Sesu?
▪ Neʼe feafeaʼi te fakamālōlō ʼo te fafine ʼaia, pea neʼe feafeaʼi tona fakaloto fīmālieʼi e Sesu ke puli tona mataku?