Kapite 47

Te ʼu Loimata Ki Te Ōfo Lahi

ʼI TANA sio ki te fakamālōlō ʼo te fafine ʼaē neʼe maligi ia ia te toto, neʼe toe lahi age foki te falala ʼa Sailusi ki te mālohi faka milakulo ʼo Sesu. ʼIo, ʼi he kiʼi temi ki muʼa atu ʼo te ʼaho pe ʼaia, neʼe ina kole age kia Sesu ke ina fakamālōlō tona ʼofafine ʼofaina, ʼaē e taʼu 12, heʼe kua vave mate. Kae ʼi te temi leva ʼaē kua hoko te tuʼutāmaki. ʼI te kei lolotoga ʼo te palalau ʼa Sesu ki te fafine, neʼe ʼōmai te ʼu tagata pea neʼe nātou ʼui fakafūfū age kia Sailusi: “Ko tou ʼofafine kua mate! Moʼoā tau toe fakakinakina ki te tagata fai akonaki?”

ʼI logo kovi leva! Koutou fakakaukauʼi muʼa ko te tagata ʼaia, neʼe fakaʼapaʼapa ki ai te hahaʼi fuli ʼo te kolo, pea ʼi te temi leva ʼaē mole kei na lavaʼi he meʼa ʼi tana ʼiloʼi ʼaē kua mate tona ʼofafine. Kae neʼe logo ia Sesu ki te fai palalau; koia neʼe maliu ai ia kia Sailusi pea ina ʼui age te palalau fakaloto mālohi ʼaenī: “ ʼAua naʼa ke manavasiʼi, ka ke tui pe.”

Pea kaugā fagona ai mo te tagata ʼaia kua mamahi ʼi tona loto ki tona ʼapi. ʼI tanatou kaku atu, neʼe nātou maʼu atu te ʼapi katoa kua nofo ʼi te mamahi; ʼe nātou fetagihi fuli pea mo tagilāulau. Tokolahi te hahaʼi neʼe ʼi ai, ʼe nātou tuki fatafata ʼi tonatou mamahi. ʼI tana hū atu, neʼe fehuʼi e Sesu: “He koʼe ʼe koutou fakatupu te logoaʼa pea mo te fetagihi? Ko te kiʼi tamasiʼi ʼe mole heʼeki mate, kae ʼe moe pe ia.”

ʼI tanatou logo ki te ʼu palalau ʼaia neʼe kamata manuki ai te hahaʼi kia te ia; heʼe nātou ʼiloʼi lelei kua mate te kiʼi taʼahine. Kae, neʼe fakamoʼoni age Sesu ʼe moe pe ia. ʼAki te mālohi ʼaē neʼe tuku age e te ʼAtua kia ia, ʼe ʼamanaki ke ina fakahā ʼe feala te fakatuʼuake ʼo te hahaʼi mai te mate ohage pe ko honatou fafagu ʼi hanatou mate moe.

Neʼe fekau e Sesu ki te hahaʼi fuli ke nātou ʼolo ki tuʼa gata pe ko Petelo, Soane, Sake, Sailusi pea mo tona ʼohoana, ʼo fakatahi mo nātou ʼaia, neʼe nātou fakaōvi atu ki te kiʼi taʼahine. Neʼe fā ia ki tona nima, ʼo ʼui maʼana: “Talitha coumi”, ko tona faka ʼuhiga ʼaenī: “Taʼahine, ʼe ʼau ʼui atu kia te koe, tuʼu ake!” ʼI te temi pe ʼaia neʼe tuʼu ake ai te taʼahine pea kamata aipe tana haʼele! ʼI te hoko ʼo te milakulo ʼaia neʼe mole kei ʼiloʼi e tana ʼu mātuʼa he meʼa ke nā fai, ʼi te lahi ʼaupito ʼo tonā fiafia.

ʼI tana ʼosi ʼui age ke ʼaumai he meʼa kai maʼa te kiʼi taʼahine, neʼe fakatotonu age e Sesu kia Sailusi pea mo tona ʼohoana ke vakaʼi naʼa fakamatala ki he tahi te meʼa ʼaenī neʼe hoko. Kae logope tana fakatotonu ʼaia, neʼe mafola atu te logo ʼi te potu fenua katoa ʼaia. Ko te tuʼa lua leva ʼaenī ʼo te fakatuʼuake neʼe fai e Sesu. Mateo 9:18-26; Maleko 5:35-43; Luka 8:41-56.

▪ Ko te logo feafeaʼi ʼaē neʼe fakahā mai kia Sailusi, pea neʼe feafeaʼi tona fakaloto mālohiʼi e Sesu?

▪ ʼI tanatou kaku atu neʼe feafeaʼi te hahaʼi ʼo te ʼapi ʼo Sailusi?

▪ He koʼe neʼe ʼui e Sesu ʼe moe te kiʼi taʼahine ka kua ʼosi mate?

▪ Ko ai te toko nima ʼaē neʼe sio mata ki te fakatuʼuake ʼaia?