Neʼe Toe Maʼuli Te Kiʼi Taʼahine

Neʼe sio ia Sailusi ki te fakamalolo e Sesu te fafine ʼae neʼe maligi te toto ia ia. ʼE mahino ia, neʼe manatu neʼe toe feala pe ke tokoni ia Sesu ki tona ʼofafine, logo la neʼe kua lagi mate ʼi te lakaga ʼaia. (Mateo 9:18) Kaʼe neʼe kei feala koa ke tokoni ki ai?

ʼI te lolotoga palalau ʼa Sesu ki te fafine ʼae neʼe ina fakamalolo, neʼe ʼomai he ʼu tagata mai te ʼapi ʼo Sailusi ʼo fakaha fenei age: “Kua mate siʼou ʼofafine!” Pea neʼe natou hoko atu fenei: “Tuku la tau fakahohaʼa ki te Tagata Faiako.”—Maleko 5:35.

ʼI logo fakalotomamahi leva! Ko te pule ʼaia, neʼe fakaʼapaʼapaʼi e te hahaʼi, neʼe mole kei ina iloʼi he meʼa ke ina fai. Ko tona ʼofafine ʼulu tokotahi kua mate. Kaʼe neʼe logo ia Sesu ki te fakaha age ʼo te logo, pea neʼe maliu kia Sailusi, ʼo ina fakalotomalohiʼi fenei: “ ʼAua naʼa ke tuʼania kaʼe ke ke tui.”—Maleko 5:36.

Neʼe alu ai ia Sesu mo Sailusi ki tona ʼapi. ʼI tanā tau atu, neʼe nā sisio ai ki te hoha ʼa te hahaʼi. Ko natou ʼae neʼe fakatahitahi ai, neʼe natou fetagihi, mo lauga pea mo tuki fatafata ʼi tonatou lotomamahi. Neʼe ulu Sesu ki loto pea neʼe ina fai te ʼu palalau fakapunamaʼuli ʼaeni: “ ʼE heʼeki mate te tamasiʼi kaʼe ʼe lolotoga moe ia.” (Maleko 5:39) ʼI tanatou logo ki ai, neʼe nukinukiʼi e te hahaʼi ia Sesu. Neʼe natou iloʼi neʼe kua mate moʼoni ia te kiʼi taʼahine. Kaʼe, ʼaki te malohi ʼae neʼe foaki age e te ʼAtua, ʼe fakaha anai e Sesu ʼe feala ki te hahaʼi ʼae kua mamate ke natou toe maʼuʼuli ake, ohage pe ko hanatou ʼaʼala ake mai hanatou mate moea.

Neʼe fakamavae e Sesu te hahaʼi fuli ki tuʼa, gata pe kia Petelo, mo Sakopo, mo Soane pea mo te ʼu matuʼā ʼa te kiʼi taʼahine. Neʼe alu ia Sesu mo te foʼi toko nima ʼaia ki te faʼahi ʼae neʼe takoto ai te kiʼi taʼahine. Neʼe kapa ki tona nima, ʼo ina ui fenei age ki ai: “ ‘Talita kumi,’ ko tona fakaʼuhiga ʼaeni: ‘Kiʼi taʼahine, ʼe au ui atu: “Tuʼu ake!” ’ ” (Maleko 5:41) Neʼe tuʼu ake aipe ʼo kamata haʼele. Fakakaukauʼi age muʼa te toe fiafia lahi ʼa Sailusi pea mo tona ʼohoana, ʼi tanā sisio ki te meʼa ʼaia neʼe hoko. Pea neʼe fakatotonu e Sesu ke foaki age ki te kiʼi taʼahine hana meʼa kai, moʼo fakaha fakalelei kua maʼuli moʼoni.

ʼI muʼa atu, neʼe fakatotonu e Sesu kia natou ʼae neʼe ina fakamalolo ke ʼaua naʼa natou fakaha ki te hahaʼi te meʼa ʼae neʼe ina fai maʼa natou. Neʼe ina toe fai te fakatotonu ʼaia ki te ʼu matuʼā ʼa te kiʼi taʼahine. Kaʼe, ko te ʼu matuʼā lotofiafia ʼaia pea mo ʼihi atu, neʼe natou fakamafola ia te logo “ ʼi te koga fenua katoa.” (Mateo 9:26) Ka na pau la neʼe ke sio ki he tahi neʼe ke ʼofa mamahi ai ʼe tuʼuake mai te kau mate, ʼe mole ke fiafia anai koa ʼo fakamatala te meʼa neʼe hoko? Ko te lua fakamatala ʼaeni ʼo he tahi neʼe fakatuʼuake e Sesu.