Kapite 57

Agaʼofa Ki Te Kau Lotomamahi

ʼI TANA ʼosi faka lākahalaʼi te kau Faliseo ʼuhi ko tanatou ʼu talatisio agakovi, neʼe mavae ia Sesu mo tana kau tisipulo. ʼE tou manatuʼi ʼi he kiʼi temi ki muʼa atu neʼe mole feala hana mavae mo nātou ke feala ai hanatou kiʼi mālōlō, koteʼuhi neʼe toe maʼu atu ia nātou e te hahaʼi. Kae ʼi te temi leva ʼaē ʼe ina ʼave tana kau tisipulo ki te ʼu potu fenua ʼo Tile pea mo Sitoni, ʼe tuʼu ʼi te ʼu kilometa ʼe mamaʼo atu ʼi te potu tokelau. ʼE ʼiloga ia ko te folau pe ʼaia e tahi ka ina fai anai mo nātou ki tuʼa atu ʼo te ʼu tuʼakoi ʼo Iselaele.

ʼI tanatou maʼu te ʼapi ke nātou nonofo ai, neʼe ʼui age e Sesu ʼe mole loto ia ke ʼiloʼi te potu ʼaē ʼe nātou nonofo ai. Kae, māʼiape la mo te telituale kehe ʼaia ʼe mole iselaele, neʼe mole feala ke ū tana feʼaluʼaki. Ko te fafine Keleka neʼe tupu ʼi te potu fenua ʼaia, te Fenisia ʼo Silia, neʼe ina maʼu ia ia pea ina kole mamahi age ki ai: “ ʼOfa, mai kia te ʼau, ʼAliki, Foha ʼo Tavite! Ko taku taʼahine kua kovi ʼaupito tona gaohi e temonio.” Ka neʼe mole tali age e Sesu kia te ia he kupu e tahi.

ʼI te ʼosi ʼo te kiʼi temi, neʼe ʼui age e te kau tisipulo kia Sesu: “Fekau ke ʼalu, heʼe mole tuku tana kalaga ʼi ʼotatou tuʼa.” ʼI tana fakamahino age te tupuʼaga ʼo tana mole gū, neʼe ʼui e Sesu: “Neʼe fekauʼi mai pe ʼau ki te ʼu ōvi ʼaē kua hēhē ʼo te ʼapi ʼo Iselaele.”

Kae neʼe mole tuku te kolekole ʼa te fafine. Neʼe fakaōvi age kia Sesu pea tulolo ʼi ʼona muʼa. “ ʼAliki, tokoni mai kia te ʼau!” ko tana kole mamahi age ʼaia.

ʼAki te kole mamahi fakamalotoloto ʼaia neʼe lagi lave kia Sesu! Kae, neʼe ina toe fakatokagaʼi age ko tona maʼua ʼuluaki, ko te tauhi ʼo te hahaʼi ʼa te ʼAtua, ia Iselaele. E lagi neʼe ina fia ʼahiʼahiʼi te tui ʼa te fafine ʼaia, koia neʼe talanoa ai ia ʼo ʼuhiga mo te tonu ʼaē ʼa te kau Sutea ʼe nātou māʼoluga age ʼi te hahaʼi ʼe mole Sutea, ʼo ʼui maʼana: “ ʼE mole lelei ke toʼo te pane ʼa te fānau ʼo laku ki te ʼu kiʼi kuli.”

ʼE mahino ia ko tona leʼo pea mo te agaaga ʼo tona fofoga ʼe hā moʼoni mai ai tona ʼofa kia nātou ʼaē ʼe mole Sutea. Neʼe ina fakamalū te fakatatau ʼo te kau Senitile pea mo te ʼu kuli, ʼo palalau kia nātou ohage ko he “ ʼu kiʼi kuli”. Neʼe mole ʼita te fafine ʼaia, neʼe ina toe fakaʼaogaʼi te palalau ʼa Sesu ʼo ʼuhiga mo te tonu ʼaē ʼa te kau Sutea ʼe nātou māʼoluga ake pea neʼe ina fai age kia te ia te fakatokaga ʼaenī ʼaki te loto fia mālalo: “ ʼIo, ʼAliki, kaʼe ko te ʼu kiʼi kuli ʼe nātou kai foki te ʼu eveeveʼi pane ʼaē ʼe maluku ifo mai te laupapa ʼo tonatou ʼu pule.”

“Ê fafine, ʼe lahi tau tui, ko te tali age ʼaia ʼa Sesu; ke hoko kia te koe ohage pe ko te meʼa ʼe ke loto kiai!” Pea neʼe hoko te meʼa ʼaia! ʼI tana liliu ki tona ʼapi, neʼe maʼu e te fafine ʼaia tana taʼahine ʼe takoto ʼi tona palepale, kua mālōlō lelei ʼosi.

Mai te mata fenua tai ʼo Sitoni, neʼe fakalaka te fagona ʼo Sesu pea mo tana ʼu tisipulo ʼi te fenua ki te potu ʼoluga ʼo Solotane, ʼaia neʼe lagi nātou fakalaka ai ʼi ʼuta ʼi te tai ʼo Kalilea. Neʼe nātou hū ʼatu ai ki te kolo ʼo Tekapole, ʼi te potu hahake ʼo te tai. ʼI te potu ʼaia, neʼe nātou kake ʼi te moʼuga, kae ko te hahaʼi neʼe nātou toe maʼu ia nātou pea nātou ʼaumai ai kia Sesu te ʼu ketu, te ʼu māʼimoa, te ʼu kivi, te hahaʼi ʼalelo mate, pea mo ʼihi ʼatu māʼimoa mo mahahaki tokolahi. Neʼe feala pe ke ʼui neʼe laku atu ia nātou ki ʼona vaʼe, pea ina fakamālōlō ai ia nātou. Neʼe ōfo ai te hahaʼi ʼi tanatou mamata kua palalau te ʼu ʼalelo mate, pea kua haʼele te ʼu ketu, pea kua sisio mo te ʼu kivi; pea neʼe nātou faka kolōlia ai ki te ʼAtua ʼo Iselaele.

Neʼe makehe te tokaga neʼe fai e Sesu ki te tuli neʼe faigataʼa ʼaupito tana palalau. Ko te ʼu tuli ʼe mole lelei he meʼa kia nātou, tāfito la mokā e hahaʼi. ʼI tana lagi tokagaʼi te hoha ʼo te tagata ʼaia, ʼaki tona manavaʼofa, neʼe toʼo kehe age e Sesu. Pea ʼi tanā kua to toko lua, neʼe ina fakahā age te meʼa ka ina fai maʼa ia. Neʼe ina ai tona ʼu tuhi ki tona ʼu taliga pea, ʼi te ʼosi ʼo tana ʼaʼanu, neʼe fāfā ia ki tona ʼalelo. ʼOsi ʼaia, pea sio ia ki te lagi, pea ai tana mānava lahi pea ina ʼui: “Ke ke ava!” ʼI te temi pe ʼaia neʼe ava ai te ʼu taliga ʼo te tagata ʼaia pea kamata ai tana palalau lelei.

ʼI te ʼosi ʼo tanatou sisio ki te ʼu fakamālōlō ʼaia neʼe fai e Sesu, neʼe fakahā e te hahaʼi tanatou loto fakafetaʼi ʼo ʼui maʼa nātou: “Kua ina fai lelei ia meʼa fuli. ʼE ina gaohi ke logo te kau tuli pea ke palalau te hahaʼi ʼalelo mate.” Mateo 15:21-31; Maleko 7:24-37.

▪ He koʼe neʼe mole fakamālōlō atu aipe e Sesu te taʼahine ʼa te fafine keleka?

▪ Neʼe ʼosi ʼaia pea ʼave e Sesu tana ʼu tisipulo kifea?

▪ Neʼe feafeaʼi te fakahā e Sesu tona manavaʼofa ki te tuli ʼaē neʼe faigataʼa ʼaupito tana palalau?