Kapite 62

Ko Te Ako Mai ʼo Te Agavaivai

ʼI TANA ʼosi fakamālōlō te tūpulaga ʼaē neʼe ulusino ai te temonio ʼi te koga meʼa ʼo Sesalea ʼo Filipo, neʼe fia liliu ia Sesu ki tona ʼapi ʼi Kapenaume. Pea, ʼe fia fagona pe ia mo tana ʼu tisipulo ke feala ai hana teuteuʼi nātou ki tona mate pea mo te ʼu maʼua ka nātou fai anai ki muli age. Neʼe ina fakamahino age kia nātou: “Ko te Foha ʼo te tagata ʼe tonu ke tuku ia ki te ʼu nima ʼo te tagata, pea ʼe nātou matehi anai ia ia, kae ka ʼosi matehi anai pea ʼe toe tuʼuake anai ia ʼi te tolu ʼaho.”

Neʼe kua ʼosi palalau ia Sesu ʼo ʼuhiga mo te faʼahi ʼaia, pea neʼe sio mata te ʼu ʼapositolo e tolu ki tana fetogi ʼaia ʼaē neʼe fai ai te fai palalau ki tana “mavae”; kae, neʼe mole mahino lelei tana ʼu tisipulo kiai. Logope neʼe mole he tahi ia nātou neʼe fakafisi, ohage ko Petelo ʼi muʼa atu ki te ʼiloʼi ʼaē ʼe matehi anai ia Sesu, neʼe nātou manavasiʼi tona fakafehuʼi ʼo ʼuhiga mo te faʼahi ʼaia.

Koʼeni ia nātou kua aʼu ki Kapenaume, ko te kolo ʼaia neʼe tau tuʼumaʼu kiai ia Sesu lolotoga tona minisitelio pea, ʼe haʼu foki ia Petelo mai te kolo ʼaia, ohage ko te tokolahi ʼi te kau ʼapositolo. ʼI te temi ʼaia, ko te ʼu tagata ʼaē ʼe nātou tae te tukuhau ʼo te fale lotu neʼe nātou ʼunuʼunu age kia Petelo pea mo lagi kumi he lākahala ʼa Sesu ki te faʼahi ʼaia, neʼe nātou fehuʼi age: “ ʼE mole koa la totogi ia e tokotou tagata fai akonaki te tukuhau ʼo te ʼu talame ʼaē e lua [ʼo te fale lotu]?”

“Ei”, ko te tali ʼaia ʼa Petelo.

ʼI tana hū ki te fale ʼi he lagi kiʼi temi siʼi age pe, neʼe ʼiloʼi e Sesu ko te meʼa ʼaia neʼe hoki hoko age pe. Koia neʼe mole heʼeki palalau age ia Petelo ki te faʼahi ʼaia ka kua fehuʼi age e Sesu ki ai: “Koteā tau manatu kiai, Simone? ʼE maʼu maifea e te ʼu hau ʼo te kele ia te ʼu tukuhau peʼe ko te tukuhau ʼa te tagata takitokotahi? Mai tonatou ʼu foha peʼe mai te hahaʼi kehe?”

“Mai te hahaʼi kehe”, ko te ʼui age ʼaia ʼa Petelo.

“Pea ta ʼe hāo moʼoni te ʼu foha ʼi te totogi ʼo te ʼu tukuhau”, ko te fakatokagaʼi age ʼaia ʼa Sesu. Koia, kapau ko te Tāmai ʼa Sesu ʼe ko te Hau ʼo te ʼatulaulau, Ia ia ʼaē ʼe atolasioʼi ʼi te fale lotu, pea ʼe ko te ʼAlo ʼo te ʼAtua ʼe mole fakamaʼua ia e te lao ke ina totogi te tukuhau ʼo te fale lotu. “Kae, neʼe ʼui age e Sesu, ke ʼaua naʼa tou faka tūkia ia nātou, ʼalu ki te tai, ʼo lī te mataʼu, pea ke toʼo te ʼuluaki ika ʼaē ka maʼu; pea ka ke avahi anai tona gutu, pea ʼe ke maʼu ai anai te setatele e tahi [talame e fā]. Haga ʼo toʼo ʼo ʼavage kia nātou, maʼaku pea mo koe.”

ʼI te fakatahitahi ʼa te kau tisipulo, lagi ʼi ʼo Petelo, ʼi tanatou liliu mai Kapenaume, neʼe nātou fai te fehuʼi ʼaenī: “Ko ai moʼoni ʼaē ʼe lahi tokotahi ʼi te puleʼaga ʼo selo?” ʼE ʼiloʼi lelei pe e Sesu te meʼa ʼaē ʼe nātou hoha kiai, he neʼe mole puli kia te ia tanatou fai palalau ʼaē neʼe nātou fai ʼi tanatou haʼele ʼaē ʼi muli ia te ia ʼi tanatou liliu mai Sesalea ʼo Filipo. Neʼe ina fehuʼi age kia nātou: “Koteā te meʼa ʼaē neʼe koutou palalau kiai ʼi te ala?” Neʼe mole fegūfi te kau tisipulo, kua nātou umiuminoa, he neʼe nātou fepalalauʼaki ko tanatou fia ʼiloʼi pe ko ai ʼaē ia nātou ʼe lahi tokotahi.

ʼE mole koa la mata faigataʼa te hoko ʼo te taʼi kē ʼaia ʼi te kau tisipulo, heʼe ko nātou ʼaia kua teitei taʼu tolu tonatou ako e Sesu? ʼO hā ʼaki mai ai ko te heʼe haohaoa fakatagata pea mo te ʼu lotu ʼaē neʼe kau ai ʼe mālohi ʼaupito tanatou gāue ki te tagata. Ko te kau tisipulo neʼe ako ia nātou ʼi te lotu faka sutea, ʼaē ʼe ina tuku ki muʼa te tuʼulaga peʼe ko te ʼaluʼaga ʼo kita ʼi te ʼu faʼahi fuli. Pea, tahi e lagi neʼe kua ia Petelo he manatu ʼe māʼoluga age ia talu mai te temi ʼaē neʼe fakapapau age ai e Sesu ʼe ina foaki age anai ki ai te “ ʼu kalavi” ʼo te Puleʼaga. E lagi neʼe toe manatu feiā pe ia mo Sake pea mo Soane koteʼuhi he neʼe nā mamata ki te kolōlia ʼo Sesu ʼi tana fetogi ʼi te moʼuga.

Kae tatau aipe pe koteā te mafuliʼaga ʼo te ʼu meʼa, neʼe fai e Sesu kia nātou te faʼifaʼitaki ʼe lave moʼo fakatonutonuʼi ʼo tanatou manatu. Neʼe ina pāuiʼi ai te kiʼi tamasiʼi ke ʼalu age kia te ia, pea ina fakatuʼu ʼi lotomalie ia nātou, pea ina ʼaofi ʼaki ʼona nima pea ina ʼui: “Kapau ʼe mole koutou maliu ia koutou pea mo koutou liliu ohage he ʼu kihiʼi tamaliki liliki, pea ʼe mole feala tuʼa tahi ke koutou hū ki te puleʼaga ʼo selo. Ko ʼaē ʼe ina fakamālalo anai ia ia ohage ko te kiʼi tamasiʼi ʼaenī, ko ia ia ʼaē ka lahi tokotahi ʼi te puleʼaga ʼo selo; pea ko ʼaē ʼe ina tali ʼuhi ko tana fakaʼapaʼapa ki toku huafa he kiʼi tamasiʼi ohage ko te kiʼi tamasiʼi ʼaenī, ʼe ina toe tali ia, pea mo ʼau.”

ʼI faʼahiga fakatonutonuʼi taulekaleka leva ʼo tana ʼu tisipulo! Neʼe mole ʼita ia Sesu kia nātou, pea neʼe mole ina talaʼakiʼi nātou ʼo ina ʼui ʼe nātou fia matamuʼa, mo mānumānu peʼe nātou fialahi. Kailoa, neʼe ina fai age kia nātou te ako ʼo ina fakatā ʼaki te faʼifaʼitaki ʼo te ʼu kihiʼi tamaliki, ʼaē ʼe nātou agavaivai pea ʼe mole nātou fialahi pea ʼe mole nātou fakatuʼutuʼu he ʼu tuʼulaga ia nātou. Neʼe fakahā ai foki e Sesu ʼe ʼaoga ke gāueʼi e tana ʼu tisipulo te ʼu kalitate ʼaē ʼe maʼu e te ʼu kihiʼi tamaliki agavaivai. Neʼe ina fakaʼosi ʼaki te ʼu palalau ʼaenī: “Ko ʼaē ia koutou fuli ʼe hage ko he kiʼi tamasiʼi, ʼe ko ia ia ʼaē ʼe lahi.” Mateo 17:22-27; 18:1-5; Maleko 9:30-37; Luka 9:43-48.

▪ ʼI te liliu ki Kapenaume, koteā te meʼa ʼaē neʼe fakamanatuʼi age e Sesu, pea koteā te fua ʼo tana ʼu palalau ʼaia?

▪ He koʼe neʼe mole maʼua ia Sesu ke ina totogi te tukuhau ʼo te fale lotu, kae koteā te tupuʼaga ia ʼo tana totogi?

▪ Koteā te meʼa ʼaē neʼe kau ki te fakatupu ʼo te kē ʼa te kau tisipulo pea neʼe feafeaʼi tonatou fakatonutonuʼi e Sesu?