Kapite 77

Ko He Fehuʼi ʼo ʼUhiga Mo He Tofiʼa

ʼE ʼILOGA mai ia, neʼe ʼiloʼi e te hahaʼi neʼe ʼalu ia Sesu ʼo kai ʼi te ʼapi ʼo te Faliseo. Neʼe nātou fakatahitahi ʼo lauʼi afe ʼo ōvi ki te ʼapi ʼaia ʼo talitali ai ki ai. Ko te kehekehe ʼaē mo te kau Faliseo ʼaē neʼe fakafeagai kia Sesu pea mo nātou loto ke nātou maʼu hana hala, neʼe fagono te hahaʼi ki ai ʼaki te loto katoa pea mo te loto fakafetaʼi.

ʼI tana palalau muʼa ki tana kau tisipulo, neʼe ʼui age e Sesu: “Koutou tokaga ki te meʼa fakatupu ʼa te kau Faliseo, ʼaē ko te malualoi.” Ohage ko tona kua fakahā ʼi te lolotoga ʼo te kai, ko te lotu ʼa te kau Faliseo ʼe fonu ia ko te malualoi. Tatau aipe peʼe ū tanatou agakovi ʼaki he vanisi ʼo he aga faka lotu, ʼe fakamulimuli pe anai ia ʼo hā. “ ʼE mole ʼi ai he meʼa ia neʼe fakaʼeteʼete tona fufū, ko te ʼui age ʼaia ʼa Sesu, ʼe mole tonu anai ia ke fakahā, pe ko he meʼa fakalilolilo ʼe mole ʼiloʼi anai ia.”

Neʼe toe fai age e Sesu te ʼu fakaloto mālohi ʼaē neʼe ina fai ki te toko hogofulu-ma-lua ʼi tana fekauʼi ʼaē ia nātou ke nātou ʼolo ʼo fai faka mafola ʼi Kalilea. Neʼe ina ʼui age: “ ʼAua naʼa koutou manavasiʼi kia nātou ʼaē ʼe nātou matehi te sino, pea ʼosi ia pea mole feala ke nātou toe fai atu he tahi meʼa.” Neʼe fakamoʼoni age ia Sesu ki tana ʼu tisipulo ko te ʼAtua, ʼaē ʼe mole ina galoʼi māʼiape la mo he misi e tahi, ʼe mole ina galoʼi anai ia nātou. Neʼe ina tala age: “Ka ʼave anai koutou kia muʼa ʼo he ʼu fakatahi ʼa te hahaʼi, pea mo he kau gāue ʼo te puleʼaga, pea mo te ʼu puleʼaga, (...) ko te laumālie maʼoniʼoni ʼe ina akoʼi atu anai kia koutou ʼi te hola pe ʼaia te palalau ʼaē ʼe tonu ke fai.”

Pea fokifā pe te tagata ʼe palalau ake ʼi te lotolotoiga ʼo te hahaʼi. “Faiako, ko tana kole ake ʼaia, ʼui age ki toku tēhina ke ina vahe te tofiʼa mo ʼau.” Neʼe fakahā lelei e te Lao ʼa Moisese ko te foha ʼaē neʼe muʼa ʼe tonu ke ina maʼu he ʼu vahe e lua ʼo te tofiʼa; koia neʼe mole tonu ai ke ʼi ai he fihi. Kae, ʼe ʼiloga mai ia ʼe loto te tagata ʼaia ke laka tona vahe ʼi te meʼa ʼaē ʼe tonu ke ina maʼu.

Koia, neʼe fakafisi ai ia Sesu ke kau mo he tahi. “Tagata, ko ai ʼaē neʼe ina fakanofo ʼau ko he tuʼi fakamāu peʼe ko he tagata vahe meʼa kia koutou?” ko tana tali age ʼaia. ʼOsi ʼaia pea ina fai age ki te hahaʼi te fakatokaga mālohi ʼaenī: “Avahi ʼokotou mata pea ke koutou taupau ia koutou mai te ʼu faʼahiga mānumānu kehekehe, heʼe tatau aipe peʼe nofo he tahi ʼi te mahu, ko tona maʼuli ʼe mole haʼu mai te ʼu meʼa ʼaē ʼe ina maʼu.” ʼIo, heʼe tatau aipe peʼe lahi peʼe veliveli tona ʼu koloā, ko te tagata ʼe tonu anai ke mate pea ʼe ina tuku fuli anai tona ʼu koloā. Neʼe fakaʼaogaʼi e Sesu te lea fakatātā moʼo fakahā ʼaki ʼo te moʼoni ʼaia pea mo fakahā te manatu vale ʼa he tahi ʼe lotonoa anai ki te faigaʼi ke lelei tona maʼuli ia muʼa ʼo te ʼAtua. Koʼeni te lea fakatātā ʼaia:

“Ko te ʼu kele ʼo te tagata maʼu koloā neʼe fua ʼo lahi ʼaupito. Koia neʼe fēnei leva tana fakakaukau ʼi tona loto, ʼo ʼui maʼana: ‘Koteā ʼapē te meʼa ka ʼau fai, ʼi te temi nei ʼi te mole kei ʼi ai ʼo he faʼahi ke tānaki kiai taku ʼu magisi?’ Pea ina ʼui fēnei: ‘Koʼeni te meʼa ʼaē ka ʼau fai: ʼe ʼau maumauʼi toku ʼu faleoko pea ʼe ʼau toe laga niʼihi e lalahi ake, pea ʼe ʼau tānaki fuli anai kiai taku ʼu magisi pea mo taku ʼu meʼa lelei fuli; pea ʼe ʼau ʼui age anai ki toku nefesi: “Toku nefesi, e lahi ʼaupito tau ʼu meʼa lelei kua tāʼofi ki he ʼu taʼu e lahi; mālōlō koe, kai, ʼinu, pea mo ke fakafiafia.” ’ Kae neʼe ʼui age e te ʼAtua ki ai: ‘ ʼAē tagata vale, ʼi te po pe ʼaenī ʼe kumi atu anai kia te koe tou nefesi. Pea ko te ʼu meʼa ʼaē neʼe ke tānaki, ko ai anai ka ina maʼu?’ ”

Pea neʼe fakaʼosi fēnei te palalau ʼa Sesu: “ ʼE feiā anai ki te tagata ʼaē ʼe ina tānaki he ʼu koloā maʼa ia totonu, kae ʼe mole maʼu koloā ki te ʼAtua.” Logope ko te kau tisipulo ʼe feala ke mole nātou tō ki te holi ki te tānaki ʼo he ʼu koloā, kae ʼe faigafua anai ʼuhi ko te ʼu lotohoha ʼaē ʼe nātou maʼu ʼi te ʼaho fuli ki te ʼu meʼa ʼo te maʼuli, ke mole nātou tauhi kia Sehova ʼaki tonatou nefesi katoa. Koia neʼe puke ai e Sesu te faigamālie ʼaia moʼo fakamanatuʼi age kia nātou te tokoni lelei ʼaupito ʼaē neʼe ina fai ʼi muʼa atu kua ʼosi kiai te taʼu katoa vaelua ʼi tana Akonaki ʼi te moʼuga. ʼI tana maliu kia nātou, neʼe ina ʼui age:

“Koia ʼe ʼau ʼui atu ai kia koutou: Tuku takotou hoha ki tokotou maʼuli, pe koteā anai he meʼa ke koutou kai, peʼe ki tokotou sino, pe koteā anai he meʼa ke koutou kofuʼi. (...) Koutou vakaʼi ko te ʼu kāleva ʼe mole nātou tūtū pea ʼe mole nātou tānaki taʼukai pea ʼe mole ʼi ai hanatou ʼu faleoko peʼe ko hanatou ʼu fale koloā kae ko te ʼAtua ʼe ina fafaga ia nātou. (...) Koutou vakaʼi peʼe feafeaʼi te tuputupu ʼo te ʼu lilio; ʼe mole nātou kinakina pea ʼe mole nātou fai filo; kae, ʼe ʼau tala atu kia koutou, māʼiape la mo Salomone, ʼi tona kolōlia katoa, neʼe mole feiā hona teu ke hage ko he tahi ia nātou. (...)

“ ʼAua takotou toe kumi te meʼa ka koutou kai anai peʼe ko te meʼa ka koutou ʼinu anai, pea ʼaua takotou toe nofo ʼi te tuʼania; heʼe ko te ʼu meʼa fuli ʼaia ʼe kumi ʼaki te holi fakavale e te ʼu puleʼaga ʼo te malamanei, kae ko takotou Tāmai ʼe ina ʼiloʼi ʼe ʼaoga kia koutou te ʼu meʼa ʼaia. Koia, ke koutou haga kumi tona puleʼaga, pea ko te ʼu meʼa fuli ʼaia ʼe toe foaki atu anai kia koutou.”

Ko te ʼu palalau ʼaia ʼa Sesu ʼe ʼaoga ke vakavakaʼi lelei ʼi te ʼu temi faigataʼa faka ekonomike. Ko ʼaē ʼe hoha fakavale ki te ʼu meʼa fakakoloa ʼaē ʼe ʼaoga kia ia pea mo ina kamata tuku mamalie tana faʼa kātaki ʼi te faʼahi fakalaumālie ʼe mole feʼauga tana tui ki te lavaʼi ʼaē e te ʼAtua te foaki ʼo te ʼu meʼa ʼaē ʼe ʼaoga ki tana ʼu kaugana. Luka 12:1-31; Teutalonome 21:17.

▪ ʼI tona ʼiloga mai, he koʼe neʼe kole age e te tagata kia Sesu ke ina fakatokatoka te faʼahi ʼaē ʼo ʼuhiga mo te tofiʼa, pea koteā te fakatokaga neʼe fai e Sesu?

▪ Ko te lea fakatātā fea neʼe fakaʼaogaʼi e Sesu, pea ʼe faka ʼuhiga kiteā?

▪ Ko te tokoni fea koa ʼaē neʼe toe fai age e Sesu, pea he koʼe ʼe feʼauga lelei?