Kapite 97

Te Kau Gāue ʼi Te Vite

“E TOKOLAHI ia nātou ʼaē neʼe mumuʼa ʼe nātou mumuli anai, pea ko nātou ʼaē neʼe mumuli ʼe nātou mumuʼa anai.” ʼI tana ʼosi fai te ʼu palalau ʼaia, neʼe fakamatala e Sesu te hisitolia moʼo fakatātā ʼo tana ʼu palalau. “Ko te puleʼaga ʼo selo kua fakatatau ki he tagata, ki he pule ʼo he ʼapi, neʼe ʼalu ka kei hegihegi ko te kumi ʼo ni tagata gāue ke ʼolo ʼo gāue ʼi tana vite.”

Neʼe hoko atu tana palalau: “Pea ʼi tana [te pule ʼo te ʼapi] ʼosi talaga mo te kau gāue ki te tenalio e tahi ʼi te ʼaho, neʼe ina fekauʼi ia nātou ke ʼolo ki tana vite. Pea ʼi tana toe ʼalu atu ʼi te tolu hola, neʼe sio ia ki te tahi kau gāue ʼe tutuʼu noa ʼi te lapalasi fakatauʼaga meʼa kai; pea ʼui maʼana kia nātou ʼaia: ‘ ʼOlo mo koutou ki te vite, pea ʼe ʼau foaki atu anai kia koutou te meʼa ʼaē ʼe totonu.’ Pea nātou ʼolo ai kiai. Neʼe toe ʼalu ʼi te ono hola pea mo te hiva hola, pea neʼe ina toe fai feiā pe. Pea ʼi te hogofulu-ma-tahi hola leva, neʼe toe ʼalu pea ina maʼu te tahi kau gāue ʼe tutuʼu noa ʼi ai, pea ina ʼui atu kia nātou: ‘He koʼe ʼe koutou tutuʼu noa ʼi henī ʼi te ʼaho katoa?’ Neʼe ʼui maʼa nātou kia te ia: ‘Neʼe mole koleʼi ia mātou e he tahi.’ Neʼe ʼui maʼana kia nātou: ‘ ʼOlo mo koutou ki te vite.’ ”

Ko te pule ʼo te ʼapi, ia te tagata pule ki te vite, ko Sehova ʼAtua, pea ko te vite, ko te hahaʼi ʼo Iselaele. Ko te kau gāue ʼaē neʼe fekauʼi ki te vite, ko te hahaʼi neʼe fakahū ki te fuakava ʼo te Lao; tāfito te kau Sutea ʼaē neʼe maʼuʼuli ʼi te temi ʼo te kau ʼapositolo. Neʼe ko te kau gāue pe ʼaē neʼe koleʼi ki te ʼaho katoa ʼaē neʼe fai te talaga mo nātou ki he totogi, ʼaē ko te tenalio e tahi ʼi te ʼaho. Kapau ko te “tolu hola” ʼe ko te hola 9 uhu ʼaia, pea ko nātou ʼaē neʼe pāuiʼi ʼi te tolu hola, mo te ono hola, mo te hiva hola pea mo te hogofulu-ma-tahi hola neʼe nātou gāueʼi pe ia hola e 9, e 6, e 3 pea mo te 1.

Ko te kau gāue ʼaē neʼe gāue ia hola e 12, ʼi te ʼaho katoa, ʼe nātou fakatātā te ʼu pule ʼo te kau Sutea ʼaē neʼe maʼumaʼua tuʼumaʼu pe ʼi te gāue faka lotu, ʼo kehekehe mo te kau tisipulo ʼa Sesu ʼaē, neʼe lahi te temi ʼo tonatou maʼuli, neʼe nātou fakaʼaogaʼi ki te tautai peʼe ko niʼihi ʼatu gāue fakamālama. Neʼe hoki fekauʼi pe e te tagata “pule ʼo te ʼapi” ia Sesu Kilisito ʼi te fasiga taʼu fakatōlau ʼo te taʼu 29 ʼo totatou temi, ke ina fakatahiʼi ia nātou ko hana ʼu tisipulo. Koia neʼe nātou liliu ai ko te kau “mumuli”, te kau gāue ʼo te hogofulu-ma-tahi hola.

Pea, fakaʼosi leva te ʼaho gāue fakatātā ʼaki te mate ʼo Sesu, pea hoko mai ai mo te temi ʼaē ke totogi ai te kau gāue. ʼO kehe mo te agamāhani, neʼe ʼuluaki totogi muʼa ia nātou ʼaē neʼe mumuli mai. Neʼe hoko fēnei: “Pea ʼi te kamata haʼu ʼo te afiafi, neʼe ʼui maʼa te pule ʼo te vite ki tana tagata taupau ʼapi: ‘Pāuiʼi te kau gāue pea ke lī tonatou totogi, ʼo kamata mai ia nātou ʼaē neʼe mumuli kia nātou ʼaē neʼe mumuʼa.’ ʼI te ʼōmai ʼa nātou ʼaē ʼo te hogofulu-ma-tahi hola, neʼe nātou maʼu takitahi te tenalio e tahi. Koia, ʼi te ʼōmai ʼa nātou ʼaē neʼe mumuʼa, neʼe nātou mahalo ʼe nātou maʼu anai he totogi e lahi ake; kae neʼe nātou maʼu takitahi pe mo nātou te tenalio e tahi. ʼI tanatou tali te tenalio, neʼe nātou muhumuhu ki te pule ʼo te ʼapi pea ʼui maʼa nātou: ‘Ko nātou ʼaenī, neʼe mumuli mai, neʼe nātou fai pe te hola gāue e tahi, kae kua ke fakatatau pe koe ia nātou pea mo mātou, ʼaenī neʼe mātou fua te kavega ʼo te ʼaho pea mo te vevela!’ Kae ko ia, ʼi tana tali ki he tahi ʼo nātou, neʼe ʼui maʼana: ‘Kautagata, neʼe mole ʼau fai he meʼa ʼe kovi kia te koe. Neʼe mole ke talaga koa la mo ʼau ki te tenalio e tahi? Toʼo te meʼa ʼaē ʼa koe pea ke ʼalu. ʼE ʼau fia foaki kia ia ʼaenī neʼe muli mai ʼo fakatatau pe mo koe. ʼE mole gafua koa la ia kia te ʼau ke ʼau fai te meʼa ʼaē ʼe ʼau loto kiai ʼaki te meʼa ʼaē ʼa ʼaku? Peʼe agakovi koa tou mata koteʼuhi heʼe ʼau agalelei ʼau?’ ” Pea moʼo fakaʼosi ʼo tana palalau neʼe toe fakamanatuʼi age e Sesu te meʼa ʼaē neʼe ʼuluaki palalau kiai: “ ʼE feiā anai te mumuʼa ʼa nātou ʼaē neʼe mumuli, pea mo te mumuli ʼa nātou ʼaē neʼe mumuʼa.”

Kae ki te tenalio, ʼe mole maʼu anai, ʼi te mate ʼaē ʼo Sesu, kae ʼi te Penikosite ʼo te taʼu 33 ʼo totatou temi, ʼi te tuku ifo e Kilisito, te “tagata taupau ʼapi”, ia te laumālie maʼoniʼoni ki tana kau tisipulo. Ko te ʼu tisipulo ʼaia ʼa Sesu ʼe nātou hage anai ko nātou ʼaē neʼe “mumuli”, te kau gāue ʼo te hogofulu-ma-tahi hola. Ko te tenalio ʼe mole ina fakatātā ia te laumālie maʼoniʼoni totonu, kae ko he meʼa ʼe fakaʼaogaʼi anai e te kau tisipulo ʼi te kele, ko he meʼa ʼe faka fealagia anai kia nātou ke nātou mālo ki tonatou maʼuli, tonatou maʼuli heʼegata. ʼE ko te pilivilesio ʼaē ko te liliu ko he kau Iselaele fakalaumālie, kua fakanofo ke nātou faka mafola te Puleʼaga ʼo te ʼAtua.

Ko nātou ʼaē neʼe ʼuluaki faka gāueʼi ʼe mole fualoa anai pea nātou fakatokagaʼi kua totogi te kau tisipulo ʼa Sesu, pea ʼe nātou sisio anai ki tanatou fakaʼaogaʼi te tenalio fakatātā. Kae ʼe nātou loto anai ki he ʼu meʼa e laka ake ʼi te laumālie maʼoniʼoni pea mo te ʼu pilivilesio ʼe tupu mai ai, ʼaia ʼe pipiki ki te Puleʼaga. Ko tanatou ʼu muhumuhu pea mo tanatou ʼu fakatutuʼu ʼe faka ʼuhiga anai ko he ʼu fakataga ki te kau tisipulo ʼa Kilisito, te kau gāue ʼaē “neʼe fakamuli” tonatou fekauʼi ki te vite.

Ko te lea fakatātā ʼa Sesu neʼe hoko pe koa ia ʼi te ʼuluaki sēkulō? Kailoa, ʼi te 20 sēkulō ko te kau takitaki lotu ʼo te keletiate ʼaki tonatou tuʼulaga pea mo tonatou ʼu maʼua, neʼe “muʼa” tonatou koleʼi ʼaē ke nātou gāue ʼi te vite fakatātā ʼa te ʼAtua. Neʼe hage kia nātou te kau faka mafola ʼaē ʼe gāue tahi mo te Sosiete Watch Tower ko he kau “mumuli” ʼi he maʼu ʼo he fekau maʼuhiga neʼe tuku kia nātou ʼi te tauhi ki te ʼAtua. Kae, ʼe ʼiloga age ia ko nātou ʼaia, ʼaē neʼe manukinukiʼi e te kau takitaki lotu ʼo te keletiate neʼe nātou maʼu te tenalio: ʼaē ko te faka maʼuhiga ʼo nātou ʼi te tuʼulaga ʼaē ko te kau fakafofoga kua fakanofo ʼo te Puleʼaga ʼo te ʼAtua ʼi selo. Mateo 19:30 ki te 20:16.

▪ Koteā ʼaē ʼe fakatātā e te vite? Koteā ʼaē ʼe fakatātā e te pule ʼo te vite, te ʼu tagata ʼaē neʼe gāue ʼi te ʼu hola e 12 pea mo nātou ʼaē neʼe gāue ʼi te hola e 1?

▪ Neʼe fakaʼosi ʼi te temi fea ia te ʼaho fakatātā, pea neʼe foaki te totogi ʼi te temi fea?

▪ Koteā ʼaē ʼe fakatātā ʼaki te totogi ʼo te tenalio?