Kapite 106

Kua Nātou Hā Lelei ʼAki Te ʼu Lea Fakatātā ʼo Te Vite

ʼI TE fale lotu, ko te hoki ʼosi pe ʼaē ʼo te fakalainoaʼi e Sesu te kau takitaki lotu ʼaē neʼe nātou fia ʼiloʼi pe ko te pule fea ʼaē ʼe ina fai ai niʼihi faʼahiga meʼa. Neʼe mole heʼeki fualoa mo te fehuʼi age ʼa Sesu kia nātou: “Koteā takotou manatu ki te meʼa ʼaenī?” Pea, ʼaki te lea fakatātā, neʼe ina fakahā age kia nātou tonatou ʼuhiga moʼoni.

ʼE fakamatala e Sesu: “Ko te tagata neʼe ʼi ai ʼona foha e lua. ʼI tana fakaōvi ki te ʼuluaki, neʼe ʼui maʼana: ‘Foha, ʼalu ʼi te ʼaho nei ʼo gāue ʼi te vite.’ Neʼe tali e ia nei ʼo ʼui maʼana: ‘ ʼE ʼau ʼalu kiai, ʼaliki’, kae neʼe mole ʼalu ia. ʼI tana fakaōvi ki te lua, neʼe toe lea feiā pe ki ai. Neʼe tali e ia nei ʼo ʼui maʼana: ‘ ʼE mole ʼau loto kiai.’ Ki muli age, neʼe fakahemala ia pea ʼalu ia kiai. Ko ai ia nāua ʼaē neʼe ina fai te finegalo ʼo tana tāmai?”

“Ko te lua”, ko te tali age ʼaia ʼo tona ʼu fili.

Pea fai age e Sesu kia nātou te fakamahino ʼaenī: “ ʼE ʼau tala moʼoni atu kia koutou, ko te kau tānaki tukuhau pea mo te kau fafine paomutu ʼe nātou mumuʼa ia koutou ki te puleʼaga ʼo te ʼAtua.” ʼE moʼoni ia, ko te kau tānaki tukuhau pea mo te kau fafine paomutu neʼe ko te hahaʼi, ʼi te kamataʼaga, neʼe nātou fakafisi mole nātou kaugana ki te ʼAtua. Pea ki muli age, ohage ko te lua foha, neʼe nātou fakahemala pea neʼe nātou fia kaugana kia te ia. Kae, ko te kau takitaki lotu ohage ko te ʼuluaki foha, neʼe ʼui maʼa nātou ʼe nātou kaugana ki te ʼAtua; kae neʼe ʼui maʼa Sesu: “Ko Soane [Patita] neʼe haʼu kia koutou ʼi te ala ʼo te faitotonu, ka neʼe mole koutou tui kia te ia. Kae ko te kau tānaki tukuhau pea mo te kau fafine paomutu neʼe nātou tui kia te ia, pea ko koutou, logope la takotou mamata ki te meʼa ʼaia, neʼe mole koutou fakahemala ki muli age, ke koutou tui ai kia te ia.”

ʼOsi ʼaia, neʼe fakahā age e Sesu ko te hala ʼa te kau takitaki lotu ʼaia neʼe mole gata ʼaki pe ʼi tanatou mole kaugana ki te ʼAtua, kae, neʼe kovi age ia, heʼe nātou aga fakalialia, mo agakovi. Neʼe hoko atu tana palalau: “Neʼe ʼi ai te tagata, te pule ʼo te ʼapi, neʼe ina to te vite, pea ina takatakai ʼaki te ʼā, pea ina keli ai te meʼa tatauʼaga vite pea mo laga te tule; ʼosi ʼaia pea ina lue te vite ki te kau tagata gāue kele pea ʼalu ia ki te tahi fenua. ʼI te hoko mai ʼo te temi taʼukai vite, neʼe ina fekauʼi ʼana tagata kaugana ki te kau tagata gāue kele ke ina maʼu te ʼu fua ʼo tana vite. Kaʼe neʼe puke e te kau tagata gāue kele tana ʼu tagata kaugana, ʼo nātou tā te tahi, matehi tona lua, pea taumakaʼi tona tolu. Neʼe ina toe fekauʼi foki te tahi kau tagata kaugana, ʼo tokolahi ake ia nātou ʼaē neʼe mumuʼa, ka neʼe nātou toe fai feiā aipe kia nātou.”

Ko te kau “tagata kaugana” ko te kau polofeta ʼaē neʼe fekauʼi e “te pule ʼo te ʼapi”, ia Sehova ʼAtua, ki te “kau tagata gāue kele” ʼo tana “vite”. Ko te kau tagata gāue kele ʼaia ʼe nātou fakatātā te kau takitaki ʼo te puleʼaga ʼo Iselaele, te “vite” ʼa te ʼAtua ʼi te Tohi-Tapu.

ʼI te fakatagaʼi pea mo te matematehi e te “kau tagata gāue kele” te kau “tagata kaugana”, koʼeni te meʼa neʼe fai e te tagata pule ʼo te vite: “Pea fakamuli leva, neʼe ina fekauʼi tona foha kia nātou, ʼo ʼui maʼana: ‘ ʼE nātou fakaʼapaʼapa anai ki toku foha.’ Kaʼe, ʼi tanatou sisio ki te foha, neʼe feʼuiʼaki e te kau tagata gāue kele: ‘Koʼeni ia ia ʼaē ka ina maʼu te tofiʼa! ’Ōmai, pea tou matehi ia ia, pea ke tou maʼu tona tofiʼa!’ Pea neʼe nātou puke ai foki ia ia, pea neʼe nātou lī ki tuʼa ʼi te vite pea nātou matehi ai.”

Pea, ʼi tana palalau ki te kau takitaki lotu, neʼe fehuʼi age e Sesu kia nātou: “Ka haʼu anai te pule ʼo te vite, koteā anai te meʼa ka ina fai ki te kau tagata gāue kele ʼaia?”

Pea neʼe tali age e te kau takitaki lotu: “ ʼI te kovi ʼaē ʼo nātou, ʼe ina faka haʼu anai kia nātou te fakaʼauha kovi pea ʼe ina lue anai te vite ki niʼihi tagata gāue kele kehe ʼaia ka nātou ʼavage anai kia te ia te ʼu fua ʼo te vite ʼi tona temi taʼukai.”

ʼAki tanatou mole mahino, neʼe nātou tala te tūʼa kia nātou totonu, koteʼuhi ʼe nātou kau ki te kau “tagata gāue” vite iselaele ʼo te “vite” ʼa Sehova, te puleʼaga ʼo Iselaele. Ko te fua ʼaē neʼe loto ki ai Sehova mai te kau tagata gāue vite ʼaia ʼe ko te tui ki tona ʼAlo, te Mesia moʼoni. ʼI tanatou mole fakatupu ia te fua ʼaia, neʼe fakatokaga fēnei age Sesu: “Neʼe mole heʼeki koutou lau koa la ʼi te Tohi [ia Pesalemo 118:22, 23]: ‘Ko te maka ʼaē neʼe līaki e te kau tufuga, ʼe ko ia ia ʼaē kua liliu ko te maka tāfito ʼo te tuliki. Neʼe fai te meʼa ʼaia ko te gāue ʼa Sehova, pea ʼe ko he meʼa fakatalakitupua ia ki ʼotatou mata’? Koia ʼe ʼau tala atu ai kia koutou: Ko te puleʼaga ʼo te ʼAtua ʼe toʼo anai ia koutou pea ʼe foaki anai ia ki he hahaʼi ka nātou fakatupu anai hona ʼu fua. Pea tahi foki, ko ʼaē ʼe tō anai ki te maka ʼaia ʼe mapā anai ia. Kae ko ʼaē ka tō anai ki ai te maka, ʼe ina momosi anai ia ke efuefu.”

 Ko te kau sekelipa pea mo te kau pelepitelo pule kua hoki mahino leva kia nātou neʼe palalau ia Sesu ʼo ʼuhiga mo nātou, pea ʼe nātou fia tāmateʼi ia ia, ʼaē, ʼe tonu ke ina maʼu te “tofiʼa”. Koia ko te puleʼaga ʼo Iselaele ʼe toʼo anai ia nātou te pilivilesio ʼaē ko te hau ʼi te Puleʼaga ʼo te ʼAtua, pea ʼe fakatupu anai he puleʼaga foʼou ʼo he kau ‘tagata gāue vite’, ko he puleʼaga ʼe ina fakatupu anai te ʼu fua ʼaē ʼe ʼaoga.

ʼI te manavasiʼi ʼa te kau takitaki lotu ki te hahaʼi, ʼaē ʼe nātou ʼui ko Sesu ko te polofeta, neʼe mole nātou faigaʼi ai ke matehi ia ia ʼi te temi ʼaia. Mateo 21:28-46; Maleko 12:1-12; Luka 20:9-19; Isaia 5:1-7.

▪ Ko ai ʼaē ʼe fakatātā e te ʼu foha e lua ʼo te ʼuluaki lea fakatātā ʼa Sesu?

▪ ʼI te lua lea fakatātā, ko ai ia te “pule ʼo te ʼapi”, te “vite”, te kau “tagata gāue vite”, te kau “kaugana” pea mo ia ʼaē ʼe ina maʼu te “tofiʼa”?

▪ Koteā anai te meʼa ka hoko ki te kau ‘tagata gāue vite’, pea ko ai anai ʼaē ka ina fetogi ia nātou?