Kapite 108

Neʼe Mole Nātou Maʼu He Hala Ia Sesu

KO TE ʼosi pe ʼaenī ʼo te fai akonaki ʼa Sesu ʼi te fale lotu, ʼaia neʼe ina fai ai ki tona ʼu fili te ʼu lea fakatātā e tolu ʼo fakahā ai tonatou agakovi. Neʼe kovi te ʼiʼita ʼo te kau Faliseo, ʼonatou fono ke nātou faka palalauʼi ke maʼu hana hala ke feala ai hona puke. ʼI te ʼosi ʼo tanatou fakakaukauʼi te puleʼaki, neʼe nātou fekauʼi ai tanatou kau tisipulo pea mo ʼihi ʼe kau kia Helote ke nātou faigaʼi ke faka lākahalaʼi ia Sesu.

“Faiako, ko te ʼui age ʼaia ʼa te kau tagata ʼaia, ʼe mātou ʼiloʼi ʼe ke moʼoni pea ʼe ke akonakiʼi te ala ʼo te ʼAtua ʼaki te moʼoni, heʼe mole ke sioʼi te agaaga ʼaē ʼe hā mai ʼi tuʼa ʼo te tagata. Koia ke ke tala mai kia mātou: Koteā tau manatu kiai? ʼE gafua koa peʼe kailoa te totogi ʼo te tukuhau ʼa te takitokotahi kia Sesale?”

Neʼe mole pulipuli kia Sesu tanatou palalau fakalapulapu ʼaia. ʼE ina ʼiloʼi kapau ʼe ina ʼui age: ‘Kailoa, ʼe mole gafua pea mo tonu ke totogi te tukuhau ʼaia’, ʼe hala anai ia pea mo fakafeagai ki te puleʼaga Loma. Pea, kapau ʼe ina tala age: ‘Ei ʼe tonu ke totogi te tukuhau ʼaia’, ko te kau Sutea, ʼaē ʼe fehiʼa ki te puleʼaga Loma, ʼe nātou fehiʼa anai kia ia. Neʼe ina tali fēnei age: “He koʼe ʼe koutou ʼahiʼahiʼi ʼau, kau malualoi? Fakahā mai kia te ʼau te paʼaga ʼo te tukuhau ʼa te takitokotahi.”

Neʼe nātou ʼavage kia ia te foʼi piesi, pea fehuʼi age e Sesu kia nātou: “Ko te paki ʼaenī ʼo ai, pea mo te meʼa ʼaē ʼe tohi ai?”

“ ʼO Sesale”, ko tanatou ʼui ʼaia.

“Koutou liufaki te ʼu meʼa ʼa Sesale kia Sesale, kae ko te ʼu meʼa ʼa te ʼAtua ki te ʼAtua.” ʼI tanatou logo ki te tali fakaofoofo ʼaia ʼa Sesu, neʼe nātou punamaʼuli fuli ai. Pea nātou ʼolo ai ʼo nātou tuku ai ia ia.

ʼI tanatou sisio ʼaē neʼe mole lava he meʼa ʼa te kau Faliseo kia Sesu, ko te kau Satuseo, ʼaē ʼe nātou ʼui ʼe mole ʼi ai he fakatuʼuake, neʼe nātou ʼolo kia ia pea nātou fai age te fehuʼi ʼaenī: “Faiako, neʼe ʼui e Moisese: ‘Kapau ʼe mate he tagata ka mole hana fānau, ko tona tēhina ʼe tonu anai ke ina ʼohoanaʼi tona ʼohoana pea ke ina fakatupu he hāko ki tona tēhina.’ Kaʼe neʼe ia mātou te faga tautehina e toko fitu; pea ko te ʼuluaki neʼe ʼohoana, pea mate ia, pea ʼi te mole maʼu ʼaē ʼo hona hāko, neʼe ina tuku tona ʼohoana ki tona tēhina. Pea neʼe toe feiā pe mo te lua, pea mo te tolu, ʼo kaku ki te fitu. Pea ko te fakamuli ʼo nātou fuli, ko te fafine neʼe mate. ʼI te tuʼuake, ko ai anai ʼi te toko fitu ʼaia e ko te ʼohoana ʼo te fafine? Koteʼuhi he neʼe nātou maʼu fuli ia ia.”

Neʼe tali e Sesu ʼo ʼui maʼana kia nātou: “ ʼE mole ko te tupuʼaga la ʼaia ʼo takotou nonofo ʼi te faihala, koteʼuhi heʼe mole koutou ʼiloʼi te ʼu Tohi pea mo te mālohi ʼo te ʼAtua? Heʼe, ʼi te tuʼuake, ʼe mole ʼohoana te hahaʼi tagata pea ʼe mole foaki te hahaʼi fafine ke ʼohoanaʼi, kae nātou hage ko he kau ʼaselo ʼi te lagi. Pea ʼo ʼuhiga mo te kau mate, pea mo te ʼui ʼaē ʼe nātou tuʼuake, neʼe mole heʼeki koutou lau koa la ʼi te tohi ʼa Moisese, ʼi te fakamatala ʼaē ʼo ʼuhiga mo te ʼulu ʼakau, pe neʼe feafeaʼi te ʼui age ʼa te ʼAtua kia ia: ‘Ko ʼau ko te ʼAtua ʼo Apalahamo, pea ko te ʼAtua ʼo Isaake, pea ko te ʼAtua ʼo Sakopo’? Koia ʼe mole ko he ʼAtua, ʼo te kau mate, kae ʼo nātou ʼaē ʼe maʼuʼuli. ʼE koutou nonofo ʼi te faihala ʼaupito.”

ʼI te meʼa ʼaia neʼe hoko, neʼe toe ōfo ai te hahaʼi ʼi te tali ʼaē ʼa Sesu. Māʼia foki mo ʼihi ʼi te kau sekelipa neʼe nātou ʼui fēnei: “Faiako, neʼe lelei tau palalau.”

ʼI tanatou sisio ʼaē ki te pupunu e Sesu te gutu ʼo te kau Satuseo, neʼe ʼōmai fakakaugā te kau Faliseo kia te ia. Ko te toe ʼahiʼahiʼi ʼo ia, koia neʼe fai age ai e te Sekelipa te fehuʼi ʼaenī: “Faiako, ko te folafola fea ʼaē e lahi tokotahi ʼo te Lao?”

Neʼe tali age e Sesu: “Ko te ʼuluaki ʼaenī: ‘Fagono mai, ê Iselaele, ko Sehova, totatou ʼAtua, ʼe ko te Sehova pe e tahi, pea ʼe tonu ke ke ʼofa kia Sehova tou ʼAtua, ʼaki tou loto katoa, pea mo tou nefesi katoa, pea mo tou laumālie katoa pea mo tou mālohi katoa.’ Koʼeni tona lua: ‘Ke ke ʼofa ki tou kāiga ohage pe ko koe totonu.’ ʼE mole ʼi ai he tahi folafola ʼe lahi ake ʼi te ʼu folafola ʼaia e lua.” Pea ina toe ʼui age: “Ki te ʼu folafola ʼaia e lua ʼe tautau kiai te Lao katoa, pea mo te kau Polofeta.”

“Faiako, ko te fakamoʼoni ʼaia ʼa te sekelipa, kua ke ʼui tonu e koe te meʼa ʼaē ʼe moʼoni: ‘ ʼE ko Ia Tokotahi pe, pea ʼe mole ʼi ai he tahi age ia te Ia’; pea ko te ʼofa ʼaē kia te ia ʼaki te loto katoa, pea mo te ʼatamai katoa, pea mo te mālohi katoa, pea mo te ʼofa ʼaē ki te kāiga ohage pe ko kita totonu, ʼe maʼuhiga ake ia ʼi te ʼu holokoseta fuli pea mo te ʼu sakilifisio fuli.”

ʼI te sio ʼaē ʼa Sesu, ki te tali tonu ʼa te sekelipa, neʼe ʼui maʼana: “ ʼE mole ke mamaʼo ʼi te puleʼaga ʼo te ʼAtua.”

Kua katoa nei ʼaho e tolu — te ʼahotapu, te mōnite pea mo te feliatolu — mo te fai akonaki ʼa Sesu ʼi te fale lotu. Neʼe fagono te hahaʼi kiai pea neʼe nātou leleiʼia tana ʼu palalau, ka ko te kau takitaki lotu neʼe nātou fia matehi ia ia, kae neʼe mole heʼeki lava tanatou ʼu faiga ʼaia. Mateo 22:15-40; Maleko 12:13-34; Luka 20:20-40.

▪ Koteā te hele ʼaē ʼe fakatuʼutuʼu e te kau Faliseo ke nātou fai kia Sesu? Koteā ʼaē ka fakatupu anai e he tali ʼe maʼua ke totogi te tukuhau? pea mo he tali ʼe mole maʼua?

▪ Neʼe feafeaʼi te fakanoaʼi e Sesu te hele ʼa te kau Satuseo?

▪ Koteā te meʼa ʼaē neʼe toe ʼahiʼahiʼi e te kau Faliseo moʼo faka lākahalaʼi ʼo Sesu, pea koteā tona ikuʼaga?

▪ Lolotoga tona minisitelio fakaʼosi ʼi Selusalemi, ko ʼaho e fia neʼe nofo ai ia Sesu ʼo fai akonaki ʼi te fale lotu, pea neʼe koteā te fua ʼo tana fai akonaki?