Ako 3
Ko Ai Ia Sesu Kilisito?
He koʼe neʼe fakahigoaʼi ia Sesu ko te ʼAlo “ ʼuluaki tupu” ʼo te ʼAtua? (1)
He koʼe ʼe fakahigoaʼi ko “te Folafola”? (1)
He koʼe neʼe haʼu Sesu ʼo tupu tagata ʼi te kele? (2-4)
He koʼe neʼe ina fakahoko te ʼu milakulo? (5)
Koteā anai te meʼa ʼaē ka fai e Sesu ʼi te temi ka haʼu ʼaē kua ōvi mai? (6)
1. Ko Sesu neʼe ko he laumālie neʼe maʼuli ʼi te lagi ʼi muʼa ʼo tana haʼu ki te kele. Neʼe ko ia te ʼuluaki fakatupu ʼa te ʼAtua, pea ko ia ʼaē neʼe fakahigoaʼi ko te ʼAlo “ ʼuluaki tupu” ʼo te ʼAtua. (Kolose 1:15; Fakahā 3:14) Ko Sesu ʼe ko te Foha ʼaē neʼe fakatupu totonu e te ʼAtua. Neʼe fakaʼaogaʼi e Sehova ia Sesu, ʼi tana nofo ʼaē ʼi te lagi ʼi muʼa ʼo tana tupu tagata, ohage ko hana “tagata gāue faiva” moʼo fakatupu ia meʼa fuli ʼaē ʼi te lagi pea mo te kele. (Tāʼaga Lea 8:22-31; Kolose 1:16, 17) Neʼe toe fakaʼaogaʼi foki ia ia e te ʼAtua ohage ko Tana tagata ʼave folafola tāfito. Ko te tupuʼaga la ʼaia ʼo te fakahigoaʼi ʼo Sesu ko “te Folafola.”—Soane 1:1-3; Fakahā 19:13.
2. Neʼe momoli ifo e te ʼAtua Tona ʼAlo ki te kele ʼo ina tuku tona maʼuli ki te ʼalo ʼo Malia. Koia neʼe mole tupu Sesu mai he tāmai fakatagata. Ko te tupuʼaga la ʼaia ʼo tana mole tupu agahala pea mo tupu heʼe haohaoa. Ko te ʼu tupuʼaga e tolu ʼaē neʼe fekauʼi ai e te ʼAtua ia Sesu ke haʼu ki te kele: (1) Moʼo akoʼi kia tatou te moʼoni ʼo ʼuhiga mo te ʼAtua (Soane 18:37), (2) ke nofo agatonu ʼi tona maʼuli katoa, ʼo ina tuku mai kia tatou he faʼifaʼitaki ke tou muliʼi (1 Petelo 2:21), pea (3) moʼo sakilifisioʼi tona maʼuli ke tou ʼāteaina mai te agahala pea mo te mate. He koʼe neʼe ʼaoga te faʼahi ʼaia?—Mateo 20:28.
3. ʼI tana talagataʼa ʼaē ki te fakatotonu ʼa te ʼAtua, ko te ʼuluaki tagata, ia Atama, neʼe ina fai te meʼa ʼaē ʼe higoaʼi e te Tohi-Tapu, ko te “agahala.” Koia neʼe fakatūʼa ia ia e te ʼAtua ki te mate. (Senesi 3:17-19) Neʼe mole kei feala hana mulimuli ki te ʼu lekula ʼa te ʼAtua, neʼe mole kei haohaoa ia. ʼAki te temi, neʼe liliu ʼo matuʼa pea mate ai. Neʼe foaki e Atama te agahala ki tana ʼu fānau fuli. Ko te tupuʼaga la ʼaia ʼo tatatou liliu ʼo matutuʼa, ʼo mahahaki, pea mo tou mamate. Neʼe lava feafeaʼi ke hāofaki te malamanei?—Loma 3:23; 5:12.
4. Ko Sesu neʼe ko te tagata haohaoa ohage pe ko Atama. Kae, neʼe mole hage ko Atama, he neʼe fakalogo lelei ia Sesu ki te ʼAtua, māʼia mo te ʼahiʼahiʼi lahi ʼaē neʼe hoko kia ia. Koia, neʼe feala ai ke ina sakilifisioʼi tona maʼuli fakatagata haohaoa moʼo totogi te agahala ʼa Atama. Ko te meʼa ʼaia ʼaē ʼe ʼui e te Tohi-Tapu ko te “totogi.” Kua feala ai foki ke ʼāteaina te ʼu fānau ʼa Atama ke nātou ʼāteaina mai te fakatūʼa ki te mate. Ko nātou fuli ʼaē ʼe nātou tui kia Sesu, kua feala ke fakamolemole tanatou ʼu agahala pea mo nātou maʼu te maʼuli heʼegata.—1 Timoteo 2:5, 6; Soane 3:16; Loma 5:18, 19.
5. ʼI tana ʼi te kele, neʼe fakamālōlō e Sesu te kau mahaki, neʼe ina fafaga te hahaʼi ʼaē neʼe pakupaku, pea neʼe ina faka gona te ʼu afā. Neʼe ina toe fakatuʼuake foki mo te kau mate. He koʼe neʼe ina fakahoko te ʼu milakulo ʼaia? (1) Neʼe ʼofa mamahi ki te hahaʼi ʼaē neʼe lotomamahi, pea neʼe fia tokoni kia nātou. (2) Neʼe fakamoʼoni e tana ʼu milakulo ko ia ko te ʼAlo ʼo te ʼAtua. (3) Neʼe fakahā e te ʼu milakulo ʼaia te meʼa ʼaē ka ina fai anai ki te hahaʼi fakalogo ʼi te temi ʼaē ka pule anai ki te kele ʼi tona ʼuhiga Hau.—Mateo 14:14; Maleko 2:10-12; Soane 5:28, 29.
6. Neʼe mate ia Sesu pea neʼe fakatuʼuake ia ia e te ʼAtua ko he laumālie, pea neʼe toe liliu ki te lagi. (1 Petelo 3:18) Talu mai ai, kua fakanofo Hau ia ia e te ʼAtua. Kua ōvi mai te temi ʼaē ka haga ai anai ia Sesu ʼo pulihi katoa te agakovi pea mo te mamahi ʼi te kele.—Pesalemo 37:9-11; Tāʼaga Lea 2:21, 22.
[Paki ʼo te pasina 7]
Ko Sesu ʼi tona minisitelio neʼe fai akonaki, neʼe ina fakahoko te ʼu milakulo, pea mo ina foaki tona maʼuli maʼa tatou