Te ʼu Logo ʼo Te Puleʼaga N° 36

Te ʼu Taʼu Foʼou e Afe Koteā ʼAē Ka Hoko Kia Koutou ʼi Te Ka Haʼu?

Te ʼu Taʼu Foʼou e Afe—ʼE Kamata Ai Koa He Temi Foʼou?

ʼI TE māʼupō ʼo te ʼaho 31 ʼo Tesepeli 1999, neʼe fakaʼosi ai te 20 sēkulō.a Neʼe ko he sēkulō neʼe lahi ai te ʼu tokakovi. Kae neʼe ʼi ai foki mo te ʼu meʼa fakapoto foʼou, te ʼu faitoʼo foʼou, te ʼu tuʼuga logo, pea mo te tuputupu vave ʼo te maʼuli faka ekonomika ʼo te malamanei. Koia ko te ʼu taʼu foʼou e afe, ʼe faka ʼuhiga e te tokolahi ʼe ko he fakaʼiloga ʼo te ʼamanaki pea mo te fetogi. Kae ʼe ina fakagata anai koa te tau, te masiva, te ʼulihi ʼo te kele, pea mo te ʼu mahaki?

Ko te tokolahi ʼe nātou fakaʼamu ke hoko feiā. Kae ʼe feala moʼoni koa ki te ʼu taʼu foʼou e afe, ke nātou fakahoko te ʼu fetogi ʼaē ʼe ʼaoga kia koutou—te ʼu fetogi ʼaē ka nātou hāofaki tokotou maʼuli pea mo te maʼuli ʼo tokotou famili? Koʼeni te mafola lahi ʼo ʼihi fihifihia ʼe hoko kia tatou.

Te ʼUlihi ʼo Te Kele

Ko te ʼu fenua ʼaē ʼe lahi ai te ʼu fale gāue ʼe nātou “fakatupu tuʼutāmaki ki te ʼu agaaga ʼo te malamanei katoa, pea ʼe ʼāsili ai te ʼulihi ʼo te kele pea mo te maumau ʼo te natula.” Kapau ʼe hoholo atu te ʼu meʼa ʼaia, pea “ʼe ʼāsili maumau anai te natula.”—“Global Environment Outlook—2000,” United Nations Environment Programme.

Te Mahaki

“ʼI te taʼu 2020, ʼe fakafuafua ʼi te ʼu fenua masiva, ko te toko fitu ʼi te toko hogofulu ʼe nātou mamate anai ʼi te ʼu mahaki ʼaē ʼe mole pikisia ai te hahaʼi, kae ia ʼaho nei ʼe mole aʼu pe la ki tona vaelua.”—“The Global Burden of Disease,” Harvard University Press, 1996.

ʼE ʼui e ʼihi hahaʼi popoto, “ʼi te taʼu 2010, ko te toko 66 miliona hahaʼi [ʼe mamate anai] ʼi te ʼu fenua e 23 ʼuhi ko te ʼu mahaki fakamataku [ʼaē ʼe tupu ko te SITA].”—“Confronting AIDS: Evidence From the Developing World,” ko he sivi ʼo te Fono ʼo Te Eulopa Pea Mo Te Fale Paʼaga Faka Malamanei.

Te Masiva

“Ko te teitei 1,3 miliale ʼo te hahaʼi ʼe mole nātou maʼu he tola e tahi ʼi he ʼaho katoa, pea ko te teitei 1 miliale ʼe mole nātou maʼu te ʼu meʼa ʼaē ʼe ʼaoga tāfito ki tonatou maʼuli.”—“Human Development Report 1999,” United Nations Development Programme.

Te Tau

“ʼE feala ke ʼāsili age te ʼu agamālohi [ʼi te ʼu fenua kehekehe]. Ko te taʼi agamālohi ʼaia ʼaē ka tupu ʼuhi ko [te ʼu maveuveu ʼo] te ʼu lanu, ʼo te ʼu telepi pea mo te ʼu lotu, . . . ʼe ina faʼufaʼu anai ʼi te ʼu taʼu e 25 ʼo te sēkulō ʼaē ka hoa mai, te taʼi agamālohi . . . ʼaē ka mamate ai te toko lauʼi teau afe hahaʼi ʼi te taʼu fuli.”—“New World Coming: American Security in the 21st Century,” U.S. Commission on National Security/21st Century.

Koia, ko te hage ʼe matalelei pea mo fakafiafia ʼo te ʼu taʼu foʼou e afe, ʼe ina fakaū te ʼāsili kovi anai ʼo te ʼulihi ʼo te kele, te mahaki, te masiva pea mo te ʼu tau. ʼE tupu te ʼu fihifihia ʼaia, ʼuhi ko te mānumānu, te mole falala, pea mo te tahi manatu ʼa te hahaʼi kia nātou totonu—pea ʼe mole feala ke pulihi te ʼu agaaga ʼaia e te ʼu kumi ʼo te ʼu meʼa fakapoto lalahi, mo te ʼu masini foʼou, pea mo te ʼu fakatuʼutuʼu faka politike.

Te ʼu Taʼu e Afe ʼAē Ka Tapuakina Ai Te Malamanei

Neʼe tohi fēnei e te tagata faitohi ʼo te temi muʼa: “Ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼE mole maʼu e te tagata te fealagia ʼaē ke ina puleʼi te kele, pea tahi ʼe mole ko ia ʼaē ʼe tonu ke ina fai te faʼahi ʼaia. ʼE ko Sehova ʼAtua tokotahi pe, totatou Tupuʼaga, ʼaē ʼe tonu pea ʼe ina ʼiloʼi peʼe feafeaʼi te fakatokatoka ʼo te ʼu fihifihia ʼo te malamanei.—Loma 11:33-36; Apokalipesi 4:11.

Kae ko ʼafea ʼaē ka ina fai ai te faʼahi ʼaia, pea ʼe ina fakahoko feafeaʼi anai? ʼE lahi te ʼu fakamoʼoni ʼaē ʼe hā ʼaki mai kua tou fakaōvi ki te fakaʼosi ʼo “te u aho fakamuli.” Koutou avahi takotou Tohi-Tapu, ʼo lau ia 2 Timoteo 3:1-5. ʼE ina fakamatala lelei peʼe feafeaʼi anai te ʼu agaaga ʼo te hahaʼi lolotoga te ʼu “temi faigataa” ʼaia. ʼE toe fakamatala e Mateo 24:3-14 pea mo Luka 21:10, 11 “te u aho fakamuli.” ʼI te ʼu koga tohi ʼaia, ʼe talanoa tāfito ai ki te ʼu meʼa ʼaē neʼe hoko talu mai te 1914, ohage ko te tau faka malamanei, te ʼu mahaki, pea mo te lahi ʼo te hoge meʼa kai.

Kae kua vave ʼosi “te u aho fakamuli.” ʼE ʼui fēnei ia Taniela 2:44: “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. . . . ʼE ina laliki anai pea mo fakagata anai te ʼu puleʼaga [fakakelekele] fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.” Ei, neʼe fakakikite ʼe fakatuʼu anai e te ʼAtua he Puleʼaga, moʼo puleʼi te kele. ʼE ʼui ia Apokalipesi 20:4, ko te puleʼaga ʼaia ʼe ina fai anai tana pule ia taʼu e afe! Koʼeni te ʼu fetogi lelei ʼaē ka hoko anai maʼa te malamanei katoa lolotoga te ʼu Taʼu fakafiafia ʼaia e Afe:

Te Maʼuli Faka Ekonomika. “ʼE mahino papau ia, ʼe nātou laga anai ni ʼu fale pea ʼe nātou nofoʼi anai; pea ʼe mahino papau ia ʼe nātou to anai he ʼu fuʼu vite pea mo nātou kai anai tona ʼu fua. ʼE mole nātou laga anai ke nofoʼi e he tahi kehe; pea ʼe mole nātou to anai ke kai e he tahi kehe.”—Isaia 65:21, 22.

Te Mahaki. “ʼI te temi ʼaia ʼe ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli. ʼI te temi ʼaia ko te ketu ʼe kake anai ohage he tia pea ko te ʼalelo ʼo te tagata noa ʼe kalaga fakafiafia anai.” “ʼE mole he tahi ʼe ina ʼui anai: ‘ʼE ʼau mahaki.’”—Isaia 33:24; 35:5, 6.

Te Natula. Ko te ʼAtua ʼe ina “maumauʼi [anai] ia nātou ʼaē ʼe nātou maumauʼi te kele.”—Apokalipesi 11:18, MN.

Te ʼu Felogoi ʼa Te Tagata. “ʼE mole nātou fai anai he meʼa ʼe kovi pea ʼe mole nātou fakatupu anai he maumau ʼi toku moʼuga maʼoniʼoni katoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova.”—Isaia 11:9.

Ko te lauʼi miliona hahaʼi ʼe nātou tui ki te ʼu fakapapau faka Tohi-Tapu ʼaia, pea ʼe nātou falala ki te ka haʼu. Koia, kua faigafua age hanatou kātakiʼi te ʼu faigataʼaʼia pea mo te ʼu fihifihia ʼo te maʼuli. Kae ʼe lava liliu feafeaʼi te Tohi-Tapu ko he takitaki mālohi ʼi tokotou maʼuli?

Te ʼAtamai Mālama ʼAē ʼe Ina Taki Ki Te Maʼuli!

ʼI ʼihi temi ʼe fakaofoofo te ʼu meʼa fakapoto lalahi, pea mo te poto faʼu masini ʼa te tagata. Kae ko te poto ʼa te tagata ʼe mole heʼeki ina ʼaumai te fīmālie pea mo te fiafia ki te tokolahi ʼo te hahaʼi. Ko te ʼatamai mālama pe e tahi ʼaē ʼe feala ke ina fai te faʼahi ʼaia, ʼe talanoa kiai te Tohi-Tapu ia Soane 17:3, ʼo ina ʼui fēnei: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.”

Ko te ʼatamai mālama ʼaia ʼe maʼu ʼi te ʼu pasina ʼo te Tohi-Tapu. Logola ko te tokolahi ʼe nātou fakafihiʼi te tohi taputapu ʼaia, kae ko te tokosiʼi kua nātou vakaʼi tonu te ʼu meʼa ʼaē ʼe tohi ai. Kaeā koutou? ʼE moʼoni, ʼe mole ko he meʼa faigafua te lau ʼo te Tohi-Tapu, kae ʼe ʼaoga anai kia koutou. Ko te Tohi-Tapu ʼe ko te tohi pe ʼaia e tahi “ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu.”—2 Timoteo 3:16, MN.

Kae ʼe koutou lava ʼiloʼi feafeaʼi te Tohi-Tapu? He koʼe ʼe mole koutou tuku ke tokoni atu he Fakamoʼoni ʼa Sehova? ʼE nātou akoʼi te lauʼi miliona hahaʼi ʼi tonatou ʼu ʼapi, pea ʼe mole totogi te ʼu ako ʼaia. Moʼo tokoni atu kia koutou ʼo ʼuhiga mo te faʼahi ʼaia, ʼe nātou fakaʼaogaʼi te ʼu tohi kehekehe ʼe fakatafito ki te Tohi-Tapu, ohage ko te kaupepa Koteā ʼAē ʼe Fakamaʼua Mai e Te ʼAtua Kia Tatou? ʼE maʼu ʼi te kaupepa ʼaia te ʼu tali lelei ki te ʼu tuʼuga fehuʼi ʼaē ʼe lagi koutou fia ʼiloʼi ʼo ʼuhiga mo te Tohi-Tapu, ohage la: Ko ai te ʼAtua? Koteā te fakatuʼutuʼu ʼa te ʼAtua ʼo ʼuhiga mo te kele? Koteā te Puleʼaga ʼo te ʼAtua? ʼE lava hikihiki feafeaʼi e te Tohi-Tapu tokotou maʼuli faka famili?

Kapau ʼe koutou loto ke ʼaʼahi koutou e he Fakamoʼoni ʼa Sehova, pea koutou tohi te kiʼi pepa ʼaē ʼe tuʼu ʼi lalo. ʼE nātou fiafia anai ʼi te akoʼi atu kia koutou he tahi ʼu meʼa ʼo ʼuhiga mo te ʼAfio fakafiafia ʼo Te Puleʼaga ʼo Te ʼAtua ia Taʼu e Afe!

□ ʼE koutou loto ke ʼavatu te kaupepa Koteā ʼAē ʼe Fakamaʼua Mai e Te ʼAtua Kia Tatou?

□ ʼE ʼau loto ke fai haku ako Tohi-Tapu

[Kiʼi nota]