Tou Taupau Te Fia Logo ʼAē Neʼe Tupu ʼAki Te ʼu Logo ʼo Te Puleʼaga N° 36
1 Neʼe koutou tufa fuli koa takotou ʼu kiʼi pepa lotu Te ʼu Logo ʼo Te Puleʼaga N° 36? Moʼo uga te fakakaukau ʼa te hahaʼi, ʼe fai ai te fehuʼi ʼaenī ʼaē ʼe faka ʼuhiga ki totatou temi: “Te ʼu Taʼu Foʼou e Afe—Koteā ʼAē Ka Hoko Kia Koutou ʼi Te Ka Haʼu?” ʼI te temi ʼaē neʼe tou fakaōvi ai ki te taʼu 2 000, neʼe kehekehe ʼaupito te ʼu ʼamanaki ʼo ʼuhiga mo te ʼu meʼa ka hoko ʼi te ʼu taʼu foʼou ʼaia e afe. ʼE talanoa Te ʼu Logo ʼo Te Puleʼaga N° 36 ki te ʼu ʼamanaki ʼaia, pea mo ina fakamanatuʼi mai, ʼe mole feala ke tou falala ki te ka haʼu ʼuhi ko te ʼu ʼaluʼaga ʼo te mālama. Ko te ʼu taʼu e afe ʼaē ka maʼu ai anai te tokalelei pea mo te fīmālie ʼaē ʼe fakaʼamu kiai te hahaʼi tokolahi, ʼe ko te ʼu Taʼu pe e Afe ʼo te ʼAfio ʼo Kilisito Sesu. Ko tatatou falala ki te ʼuhiga moʼoni ʼo tona Puleʼaga, neʼe ina uga ai tatou ke tou tufa Te ʼu Logo ʼo Te Puleʼaga N° 36 ki te hahaʼi tokolahi.
2 Te Tali ʼa Te Hahaʼi Ia Te ʼu Logo ʼo Te Puleʼaga: Ko te tufa ʼo Te ʼu Logo ʼo Te Puleʼaga ʼaē ʼi muʼa atu, neʼe ko he fakaloto mālohi ʼaia kia tatou ʼi tatatou gāue. ʼO ʼuhiga mo Te ʼu Logo ʼo Te Puleʼaga N° 35, neʼe tohi fēnei e te filiale ʼo Kanata: “Ko te gāue makehe ʼaia neʼe lagolago fakafiafia kiai te ʼu kaugā fagona pea mo te ʼu pionie ʼi te faka mafola, pea neʼe hoko ki te tokolahi te ʼu fakaloto mālohi.” ʼE mahino ia neʼe koutou fakahā he fiafia feiā ʼi takotou tufa Te ʼu Logo ʼo Te Puleʼaga N° 36.
3 Ko te tufa ʼo Te ʼu Logo ʼo Te Puleʼaga, ʼe fakatuʼutuʼu ke fakaʼosi ʼi te ʼaho 17 ʼo Novepeli 2 000. Neʼe kua gāueʼi katoa koa te ʼu telituale ʼo tokotou kokelekasio? Kapau mole heʼeki fai katoa, pea ʼe feala ke kole atu e te ʼu tagata ʼāfea ke hoko atu te gāue ʼaia ʼo aʼu ki te fakaʼosi ʼo Novepeli.
4 Neʼe tali feafeaʼi e te hahaʼi ʼo tokotou telituale te tufa ʼo Te ʼu Logo ʼo Te Puleʼaga N° 36? ʼE tokosiʼi anai te hahaʼi ʼaē ka nātou tohi te kiʼi pepa ʼaē ʼe kita kole ai he kaupepa Fakamaʼua peʼe ko he ako Tohi-Tapu. Kae tokolahi te hahaʼi ʼaē ʼe nātou fia ʼiloʼi pe koteā te ʼu taʼu e afe, ʼe hoki nātou fai he puleʼaki mokā ʼaʼahi nātou e he Fakamoʼoni ʼa Sehova. Ko te hahaʼi ʼaē ʼe nātou fia ʼiloʼi te faʼahi ʼaia ʼe tonu ke ʼaʼahi nātou. Ko te temi fea ʼaē ʼe lelei ai ke tou ʼaʼahi nātou? ʼE tonu ke tou foimo fai.
5 Koutou tokagaʼi te ʼu meʼa ʼaenī neʼe hoko ʼi te ʼaʼahi ʼo nātou ʼaē neʼe tuku ki ai Te ʼu Logo ʼo Te Puleʼaga N° 35. Ko te pionie ʼi Ilelani neʼe ina tuku te kiʼi pepa lotu ʼaia ki te fafine ʼe ʼi ai tona fale kai. Neʼe leleiʼia e te fafine te logo ʼaia pea neʼe ina kole ki te tuagaʼane ke toe liliu age. Neʼe toe liliu te tuagaʼane hili ʼaho e lua, pea neʼe kamata ai te ako Tohi-Tapu. ʼI Danemark, neʼe tuku te kiʼi pepa lotu Te ʼu Logo ʼo Te Puleʼaga ʼi te ʼapi neʼe lāvaki. ʼI te ʼaho pe ʼaia, ko te fafine ʼo te ʼapi neʼe ina momoli te pepa ʼaia ki te filiale, pea neʼe toe momoli ki te kokelekasio. Neʼe mole heʼeki ʼosi te vāhaʼa, neʼe ʼolo te ʼu tuagaʼane e lua ʼo ʼaʼahi te fafine, ʼo nā fakatuʼutuʼu te ako, pea neʼe kau te fafine ki tana ʼuluaki fono ʼi te Fale ʼo Puleʼaga.
6 He ʼu Palalau Ke Fai ʼi Takotou ʼAʼahi: ʼE feala ke faigafua te fai ʼo te ʼu ʼaʼahi kia nātou ʼaē neʼe tou tuku ki ai Te ʼu Logo ʼo Te Puleʼaga, pea ʼe ko he koga fakafiafia ʼo totatou minisitelio. Ka koutou fai te ʼu ʼaʼahi, pea ʼe lelei ke ʼi ai hakotou pepa ʼo Te ʼu Logo ʼo Te ʼu Puleʼaga N° 36, naʼa meʼa pe ʼe mole he pepa ʼa ia ʼaē ʼe koutou ʼaʼahi. ʼE feala ke koutou ʼahiʼahiʼi te ʼu tokoni ʼaenī.
7 ʼI te ʼosi fakamanatuʼi age ʼo tokotou higoa, ʼe feala ke koutou ʼui fēnei:
◼ “Neʼe ʼau tuku atu te pepa ko tona kupu tāfito ‘Te ʼu Taʼu Foʼou e Afe—Koteā ʼAē Ka Hoko Kia Koutou ʼi Te Ka Haʼu?’ Neʼe mole koutou lotomālohi koa ʼi takotou lau ʼaē kua vave kamata te ʼAfio ʼa Kilisito Sesu ia Taʼu e Afe, ʼaē ka ina fakatuʼu ai te ʼu ʼaluʼaga faka Palatiso ʼi te kele? [Fakahā age te ʼu paki ʼo te Palatiso ʼi Te ʼu Logo ʼo Te Puleʼaga N° 36.] ʼI te pasina fakamuli, ʼe fakaafe atu koutou ke koutou kole te kaupepa Koteā ʼAē ʼe Fakamaʼua Mai e Te ʼAtua Kia Tatou?” Fakahā age te kaupepa, ʼo fuli ki te ako 5, pea koutou lau te ʼuluaki fehuʼi pea mo te palakalafe 1 pea mo te 2, pea koutou kole age ke ina fakahā atu tana manatu. Koutou lau pea mo fai palalau ki he vaega e tahi peʼe lua. Kapau ʼe feala, pea koutou vakaʼi he tahi fehuʼi pea mo he palakalafe, pea koutou fakatuʼutuʼu ke koutou toe liliu mai ʼo hoko te fai palalau.
8 Mai tona ʼaluʼaga ʼaē ʼe tufa anai ʼi Novepeli te kaupepa “Fakamaʼua” peʼe ko te tohi “Te ʼAtamai Mālama,” koia ʼe feala ke koutou ʼui fēnei:
◼ “ ʼI taku ʼaʼahi fakamuli, neʼe ʼau tuku atu te kiʼi pepa lotu ‘Te ʼu Taʼu Foʼou e Afe—Koteā ʼAē Ka Hoko Kia Koutou ʼi Te Ka Haʼu?’ ʼE fakaafe ai koutou ke koutou ako te Tohi-Tapu. Neʼe ʼau toe liliu mai mo te tohi ʼaē ʼe mātou fakaʼaogaʼi ki te ako. [Fakahā age te kaupepa Fakamaʼua, pea mo te paki ʼo te tuʼa kaupepa; peʼe koutou fakahā age te tohi Te ʼAtamai mālama, ʼo fuli age ki te ʼu pasina 188 pea mo 189.] Ko te ʼu Taʼu e Afe ʼaē ʼe talanoa kiai te Tohi-Tapu, ʼe hoko ai anai te ʼu ʼaluʼaga ʼaē ʼe koutou sio kiai ʼi te paki. Ke feala hatatou maʼuʼuli ʼi te Palatiso, ʼe tonu ke tou maʼu te ʼatamai mālama ʼo ʼuhiga mo te ʼAtua. ʼE ʼau fia fakahā fakanounou atu peʼe feafeaʼi tamatou ako te Tohi-Tapu.”
9 Ko te tufa ʼo Te ʼu Logo ʼo Te Puleʼaga N° 36, neʼe ina uga tatou ke tou kau ʼaupito ki te minisitelio, ke hoko ai he fai faka mafola lahi. ʼI te telituale, neʼe toe lahi foki mo te hahaʼi ʼaē neʼe nātou fia ʼiloʼi te ʼuhiga ʼo te kiʼi pepa ʼaia. Ko tatatou faiga fakatahi moʼo taupau te fia logo ʼaia ʼa te hahaʼi, ʼe iku anai ʼaki te tokoni ʼa Sehova, ki tatatou fiafia ʼi te maʼu ʼo he ʼu hahaʼi ʼe tokolahi ʼe nātou hage ko he ʼu ōvi.—Mat. 10:11; Gaue 13:48, 49, 52.