Tou ʼAʼahi Ia Nātou ʼAē Neʼe Tou Tuku Ki Ai Te ʼu Logo ʼo Te Puleʼaga
1 Lolotoga te ʼu vāhaʼa kua hili, neʼe tou maʼu te pilivilesio ʼaē ko te tufa ʼo Te ʼu Logo ʼo Te Puleʼaga N° 35, ʼaē ko tona kupu tāfito “ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?” ʼE faiga te ʼu kaugā fai faka mafola ʼi te ʼu potu fuli ke nātou maʼu te ʼu hahaʼi ʼaē ʼe tau mo ʼaoga ke tuku kia nātou te pepa lotu Te ʼu Logo ʼo Te Puleʼaga. (Mat. 10:11) Logope la ko te tufa ʼaia ʼe fakatuʼutuʼu ke fakaʼosi ʼi te ʼAhotapu, ʼaho 16 ʼo Novepeli, kae kapau ʼe kei ʼi ai he telituale ʼe mole heʼeki tufa ai te pepa lotu, pea ʼe lagi kole atu anai e te ʼu tagata ʼāfea ke hoko atu takotou tufa Te ʼu Logo ʼo Te Puleʼaga N° 35 mo kapau ʼe kei toe te ʼu pepa lotu ʼo te kokelekasio.
2 Ko te pepa lotu Te ʼu Logo ʼo Te Puleʼaga neʼe uga ai te fia logo ʼa te tokolahi. ʼE nātou tokagaʼi ʼi te agamāhani kua puli te ʼofa ʼo te hahaʼi pea koia la ʼaē ʼe nātou feʼekeʼaki ai pe koteā te meʼa ka hoko ʼi te temi ka haʼu. (2 Tim. 3:3) ʼE tonu ke tou ʼaʼahi ia nātou ʼaē neʼe nātou fia logo.
3 ʼE Tou Maʼu He ʼu Fua Lelei ʼi Te Tufa ʼo Te ʼu Logo ʼo Te Puleʼaga: Lolotoga te tufa ʼo Te ʼu Logo ʼo Te Puleʼaga ʼi te taʼu 1995, ko te fafine neʼe ina maʼu te pepa lotu ʼaia, neʼe haʼu ʼo fono ʼi te Fale ʼo te Puleʼaga, he neʼe lahi te ʼu meʼa neʼe ina fia ʼiloʼi ʼo ʼuhiga mo te ʼu meʼa ʼaē ʼe tui kiai te kau Fakamoʼoni ʼa Sehova. ʼI te fono ʼaia neʼe ina tali ai ke fai hana ako Tohi-Tapu pea ki muli age neʼe haʼu tuʼumaʼu ki te ʼu fono. ʼOsi ʼaia, pea faitohi ki tona ʼēkelesia, ʼo fakahā ai kua mavae ia mai ai!
4 ʼI te temi nei, ko te lauʼi teau hahaʼi ʼi totatou telituale kua nātou lau te logo ʼo Te ʼu Logo ʼo Te Puleʼaga N° 35. Kae koteā tanatou manatu ʼo ʼuhiga mo te pepa lotu ʼaia? Tatau aipe pe neʼe nātou leleiʼia te meʼa ʼaē neʼe nātou lau, kae ko te tokolahi ʼe hoki nātou fai anai he puleʼaki mokā toe liliu age he ʼu Fakamoʼoni ʼa Sehova ʼo ʼaʼahi ia nātou. Kua koutou fakatuʼutuʼu koa ke koutou toe liliu ʼo ʼaʼahi ia nātou? Ko tatatou tokaga ʼaki te ʼofa ki te hahaʼi, ʼe ina uga anai tatou ke tou fai te meʼa ʼaia. ʼE tonu ke tou toe ʼaʼahi ia nātou fuli ʼaē neʼe nātou fia lau ia te pepa lotu Te ʼu Logo ʼo Te Puleʼaga.
5 Koteā Te Meʼa Ka Koutou ʼUi Anai ʼi Takotou Fai Te ʼAʼahi? ʼE feala ke koutou palapalalau ʼo ʼuhiga mo te logo ʼe tuʼu ʼi Te ʼu Logo ʼo Te Puleʼaga ʼaē ʼe tau mo feʼauga mo totatou temi, pea koutou fai age he fehuʼi ʼe tupu ai tana fia logo. Koutou fakalogo fakalelei ki ai mokā ʼe palalau atu, ke feala ai hakotou ʼiloʼi tana manatu. ʼOsi ʼaia pea koutou fakatokagaʼi ki ai he puani ʼe ʼaoga ʼi te kaupepa Fakamaʼua, ʼaē neʼe talanoa kiai Te ʼu Logo ʼo Te Puleʼaga. Kapau ʼe ina tali lelei, pea koutou vakaʼi peʼe feala hakotou kamata atu aipe he ako Tohi-Tapu.
6 Koʼeni he ʼu manatu ʼe feala ke koutou fakaʼaogaʼi mokā koutou ʼaʼahi anai ia nātou ʼaē neʼe nātou fia lau “Te ʼu Logo ʼo Te Puleʼaga” N° 35:
◼ “ ʼE lagi kei ke manatuʼi te pepa ʼaē neʼe ʼau tuku atu kia koe ʼi taku haʼu talu mai ai. Ko te logo ʼaē ʼe tuʼu ʼi te kiʼi pepa ʼaia, ʼe ʼi ai hona pikipikiga mo te fehuʼi maʼuhiga ʼe mole logo tahi ai te malamanei—ko te puli ʼo te ʼofa ki te hahaʼi.” Koutou fakatokagaʼi ia ia ki te fakamoʼoni ʼaē ʼe tuʼu ʼi te pasina 2 ʼo Te ʼu Logo ʼo Te Puleʼaga ʼi te kupu tāfito “Kua Momoko Te ʼOfa Ki Te Kāiga.” Pea koutou fehuʼi age, “ ʼI tau manatu neʼe loto koa te ʼAtua ke maʼuli feiā te hahaʼi?” Koutou tuku ke ina fai atu hana tali. Koutou fuli age te ako 5 ʼo te kaupepa Fakamaʼua, pea koutou faigaʼi ke koutou kamata he ako Tohi-Tapu.
◼ “ ʼI tatā ʼuluaki felāveʼi, neʼe ʼau tuku atu te pepa lotu ko tona kupu tāfito ‘ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?’ ʼI tau manatu ʼe feala anai koa ke ʼi ai he mālama feiā?” Koutou tuku ke ina fai atu hana tali. Koutou fuli age te ako 6 ʼo te kaupepa Fakamaʼua, pea koutou lau age te palakalafe 6. ʼOsi ʼaia pea koutou lau age te fakapapau ʼa te ʼAtua ʼaē ʼe tuʼu ia Mikea 4:3, 4. Kapau ʼe koutou fakatokagaʼi ʼe ina fia ʼiloʼi te ʼu meʼa ʼaē ʼe koutou fakahā age, pea koutou tuku age ki ai te kaupepa pea mo koutou ʼui age ʼe feala ke fai hana ako Tohi-Tapu.
◼ “ ʼI taku ʼaʼahi talu mai ai, neʼe ʼau tuku atu te pepa lotu ko tona kupu tāfito ‘ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?’ ʼE fakahā ai ʼe feala ke fai hakotou ako Tohi-Tapu. Koia, neʼe ʼau toe liliu mai ʼo fakahā atu te tohi ʼaē ʼe mātou fakaʼaogaʼi moʼo fai te ako Tohi-Tapu ʼaia. [Fakahā age te tohi Te ʼAtamai Mālama.] Ko te tohi ʼaia ʼe ina fakamahino lelei mai pe ko te temi fea ʼaē ka feʼofaʼofani ai anai te hahaʼi fuli, pea ʼe lahi te tahi ʼu fehuʼi ʼe tali kiai, ohage la: He koʼe ʼe tou matutuʼa pea tou mamate? He koʼe koa ʼe fakagafua e te ʼAtua ia te ʼu mamahi? Koteā te meʼa ʼe hoko ki te ʼu mate ʼaē ʼe tou ʼoʼofa mamahi ai?” Pea koutou fehuʼi fēnei age ki ai, “ ʼE feala koa ke ʼau fakahā atu peʼe feafeaʼi te ako ʼo te tohi ʼaenī?” Kapau ʼe fakafisi atu, pea koutou ʼui age ki ai peʼe mole ina fia lau te tohi ʼaia pea koutou tuku age ko tona totogi fakaʼofa ko te 150. ʼOsi ʼaia pea koutou fakatuʼutuʼu ke koutou toe liliu ʼo ʼaʼahi ia ia.
7 Kapau kua ʼosi tufa te pepa lotu Te ʼu Logo ʼo Te Puleʼaga N° 35 ʼi te telituale katoa, pea ʼe lagi feala anai ke tou tufa te tohi Te ʼAtamai Mālama ʼi te ʼu ʼaho fakaʼosi ʼo te māhina. ʼE lahi te ʼu faʼifaʼitaki moʼo fakahā ʼo te tohi ʼaia, ʼe koutou maʼu ʼi te pasina fakaʼosi ʼo Te Minisitelio ʼo Te Puleʼaga ʼo Malesio, Sūnio, pea mo Novepeli 1996; pea mo Malesio, Sūnio mo Sepetepeli 1997.
8 Ko te tufa makehe ʼaia ʼo Te ʼu Logo ʼo Te Puleʼaga ʼe tonu ke ina uga ia tatou fuli, ke tou fakamālohiʼi tatatou ʼu faiga ʼi te gāue fai faka mafola. ʼAki te tokoni ʼa Sehova, tou falala ʼe fua lelei anai te tufa ʼaia, ʼo tokoni anai ki te hahaʼi ke nātou ʼiloʼi te meʼa ʼaē ka fai anai e te ʼAtua ke feʼofaʼofani ai te hahaʼi ʼo te malamanei katoa. ʼOfa pe ke hoko atu te tapuakina e Sehova tatatou ʼu faiga mālohi moʼo ʼaʼahi ʼo nātou ʼaē neʼe tou tuku ki ai Te ʼu Logo ʼo Te Puleʼaga.