ʼE Koutou Fia Mahino Lahi Koa Ki Te Tohi-Tapu?

He Koʼe ʼe Tonu Ke Tou Lau Te Tohi-Tapu?

ʼE KEHE ʼaupito te Tohi-Tapu mo te tahi ʼu tohi—heʼe maʼu ai te ʼu akonaki ʼofa mai te ʼAtua. (1 Tesalonika 2:13) Kapau ʼe koutou maʼuliʼi te ʼu meʼa ʼaē ʼe akoʼi atu e te Tohi-Tapu, pea ʼe lahi anai tona ʼu fua lelei kia koutou. ʼE tuputupu anai tokotou ʼofa ki te ʼAtua pea mo koutou felogoi lelei mo ia, ia Ia ʼaē ʼe ina foaki “te faiofa taulekaleka fuape mo meaofa lelei fuape.” (Sakopo 1:17) ʼE koutou ʼiloʼi anai peʼe feafeaʼi hakotou fakaōvi kia te ia ʼi te faikole. ʼI te ʼu temi faigataʼa, ʼe koutou logoʼi anai te tokoni ʼa te ʼAtua kia koutou. Kapau ʼe ʼalutahi tokotou maʼuli pea mo te ʼu lekula ʼaē ʼe tuʼu ʼi te Tohi-Tapu, pea ʼe foaki atu anai e te ʼAtua te maʼuli heʼegata.—Loma 6:23.

ʼE maʼu ʼi te Tohi-Tapu te ʼu moʼoni ʼe nātou foaki mai te mahino. Ko nātou ʼaē ʼe nātou maʼu te ʼatamai mālama ʼo te Tohi-Tapu, ʼe faka ʼāteaina nātou mai te ʼu manatu hala ʼaē ʼe tui kiai te lauʼi miliona hahaʼi. Ohage la, ko tatatou ʼiloʼi te moʼoni ʼo ʼuhiga mo te meʼa ʼaē ʼe hoko kia tatou mokā tou mamate, ʼe ina faka ʼāteainaʼi tatou mai te mataku ʼaē naʼa fai mai e te kau mate he meʼa ʼe kovi, peʼe ko te manatu ʼaē ʼe maʼuli mamahi totatou ʼu kāiga peʼe ko totatou ʼu kaumeʼa ʼaē kua mamate kae neʼe tou ʼofa mamahi ai. (Esekiele 18:4) Ko te akonaki ʼo te Tohi-Tapu ʼo ʼuhiga mo te fakatuʼuake, ʼe ina fakaloto fīmālie te hahaʼi ʼaē kua mate he tahi neʼe nātou ʼofa mamahi ai. (Soane 11:25) Ko te ʼiloʼi ia te moʼoni ʼo ʼuhiga mo te kau ʼaselo agakovi, ʼe ina fakatokagaʼi mai tatou ʼo ʼuhiga mo te ʼu tuʼutāmaki ʼo te faifakalauʼakau, pea mo tokoni mai ke tou mahino pe koʼe ʼe lahi ʼaupito te ʼu fihifihia ʼi te kele.

Ko te ʼu pelesepeto ʼo te ʼAtua ʼaē ʼe tuʼu ʼi te Tohi-Tapu, ʼe ina fakahā mai te faʼahiga maʼuli ʼaē ka fua lelei kia tatou ʼi te faʼahi fakasino. Ohage la, ko te “fakapotopoto ʼi tatatou ʼu aga māhani” ʼe tokoni mai ke mole tou mahahaki. (1 Timoteo 3:2, MN ) Kapau ʼe tou ‘fakamaʼa ia tatou mai te meʼa ʼuli fuli pe ʼo te kakano pea mo te laumālie,’ ʼe mole fua kovi anai kia tatou. (2 Kolonito 7:1) Ko te maʼuliʼi ʼo te ʼu tokoni ʼa te ʼAtua ʼaē ʼe tuʼu ʼi te Tohi-Tapu, ʼe toe lagolago foki ki te fiafia ʼo te nofo ʼohoana pea mo te fakaʼapaʼapa kia kita.—1 Kolonito 6:18.

Kapau ʼe koutou maʼuliʼi te Folafola ʼa te ʼAtua, pea ʼe koutou fiafia anai. Ko te ʼiloʼi ʼo te Tohi-Tapu ʼe tokoni mai ke tou maʼu he loto tokalelei pea mo he maʼuli fakafeauga pea ʼe ina foaki mai he ʼamanaki. ʼE tokoni kia tatou ke tou maʼu te ʼu kalitate lelei ohage ko te loto manavaʼofa, mo te ʼofa, mo te fiafia, mo te tokalelei, mo te agaʼofa, pea mo te tui. (Kalate 5:22, 23; Efeso 4:24, 32) Ko te ʼu kalitate ʼaia ʼe ina fakaliliu kita ko he tagata peʼe ko he fafine ʼohoana lelei, he tāmai peʼe ko he faʼe lelei, he foha peʼe ko he ʼofafine lelei.

Kua koutou feʼekeʼaki koa la ʼo ʼuhiga mo te ka haʼu? ʼE fakahā mai e te ʼu lea faka polofeta ʼo te Tohi-Tapu ʼe maʼuhiga te ʼu temi ʼaē ʼe tou maʼuʼuli ai. ʼE fakamatala e te ʼu lea faka polofeta ʼaia te ʼaluʼaga ʼo te malamanei ʼi te temi nei, kae ʼe nātou toe fakahā mai kua vave fakaliliu e te ʼAtua ia te kele ko he palatiso.—Apokalipesi 21:3, 4.

ʼE Tokoni Mai Ke Tou Mahino Ki Te Tohi-Tapu

Neʼe lagi koutou faiga ke koutou lau te Tohi-Tapu kae neʼe faigataʼa takotou mahino kiai. Lagi mole koutou ʼiloʼi peʼe feafeaʼi te maʼu ʼi te Tohi-Tapu te ʼu tali ki takotou ʼu fehuʼi. Tokolahi ʼe nātou feiā. ʼE ʼaoga kia tatou fuli he tokoni ke tou mahino ai ki te Folafola ʼa te ʼAtua. Ko te kau Fakamoʼoni ʼa Sehova, ia fenua e 235, ʼe nātou fai te ako Tohi-Tapu ʼa te lauʼi miliona hahaʼi. ʼE nātou fiafia anai ʼi te tokoni atu kia koutou.

ʼI te agamāhani, ʼe lelei ke koutou ako māmālie te Tohi-Tapu, ʼo koutou kamata ʼaki te ʼu akonaki tāfito. (Hepeleo 6:1) ʼI te hoko atu ʼo takotou ako, ʼe feala anai ke koutou toʼo te “meakai fefeka”—ʼaē ʼe ko te ʼu moʼoni loloto. (Hepeleo 5:14) ʼE tonu ke tou mulimuli ki te Tohi-Tapu. Ko te ʼu tohi ʼaē ʼe fakatafito ki te Tohi-Tapu, ohage ko te kaupepa lahi Koteā ʼAē ʼe Fakamaʼua Mai e Te ʼAtua Kia Tatou?, ʼe tokoni atu anai ke koutou mahino ki te ʼu vaega faka Tohi-Tapu ʼi he ʼu akonaki kehekehe.

ʼE Koutou Fia Fakaʼaogaʼi Koa Hokotou Temi ʼi Te Vāhaʼa Fuli Ke Koutou Mahino Ki Te Tohi-Tapu?

ʼI te agamāhani, ʼe feala ke fai te ako Tohi-Tapu ʼi te temi pea mo te koga meʼa ʼaē ʼe koutou loto kiai. Tokolahi ʼe nātou fai tanatou ako ʼi tonatou ʼapi. Ko ʼihi ʼe fai tanatou ako ʼi te telefoni. Ko te fakatuʼutuʼu ʼo te ako, ʼe mole fai mo he hahaʼi tokolahi, kae ʼe fai mo he tokotahi ke feala ke mulimuli ki tokotou ʼaluʼaga, ʼo kau kiai takotou mahino pea mo takotou ako. ʼE mole fai he sivi moʼo fakafuafua tokotou poto, pea ʼe mole koutou ufiufi anai. ʼE tali anai ki takotou ʼu fehuʼi ʼo ʼuhiga mo te Tohi-Tapu, pea ʼe koutou ako anai peʼe feafeaʼi hakotou fakaōvi ki te ʼAtua.

ʼE mole totogi te ako Tohi-Tapu ʼaia. (Mateo 10:8) ʼE fai te ako ʼaia ki te hahaʼi ʼo te ʼu lotu fuli pe, pea mo nātou ʼaē ʼe mole hanatou lotu kae nātou loto moʼoni ke lahi age tanatou mahino ki te Folafola ʼa te ʼAtua, pea ʼe mole totogi te ako ʼaia.

Ko ai ʼaē ʼe lava kau ki te fai palalau? Tokotou famili katoa. Hokotou ʼu kaumeʼa ʼe koutou fia fakaafe kiai. Peʼe kapau ʼe koutou loto kiai, ʼe feala ke fai te ako mo koutou pe.

Ko te tokolahi ʼe nātou fakaʼaogaʼi he hola katoa ʼi te vāhaʼa fuli moʼo ako te Tohi-Tapu. Kapau ʼi te vāhaʼa fuli ʼe feala hakotou fakalaka ʼi te hola katoa, peʼe mole koutou fealagia ʼi he hola katoa, pea ʼe faigaʼi anai e te kau Fakamoʼoni ʼa Sehova ke nātou tokoni atu kia koutou.

ʼE Fakaafe Koutou Ke Koutou Ako

ʼE mātou fakaafe atu koutou ke koutou felogoi mo te kau Fakamoʼoni ʼa Sehova. ʼE feala ke koutou fai te faʼahi ʼaia ʼo koutou faitohi ʼo faka tuʼasila ki he tuʼasila ʼe tuʼu ʼi lalo. ʼE fai anai he ʼu fakatuʼutuʼu ke fai e he tahi takotou ako Tohi-Tapu.

□ Koutou momoli mai te kaupepa Koteā ʼAē ʼe Fakamaʼua Mai e Te ʼAtua Kia Tatou?

□ Koutou fakahā mai ke fai haku ako Tohi-Tapu.

Ko te ʼu vaega ʼo te ʼu Tohi Faka Keleka Faka Kilisitiano ʼe toʼo mai te Tauhi Foou Fakaʼuvea “ad experimentum.” Ko te tahi ʼu vaega, ʼe toʼo mai te Tohi-Tapu Les Saintes Écritures—Traduction du monde nouveau, MN.