ʼE Fakapapau Mai e Te ʼAtua Ia He Mālama Foʼou
KO TE Tohi-Tapu, ia te Folafola ʼa te ʼAtua ʼe ina foaki mai ia te ʼamanaki ʼaenī kiā tātou: “Ohagē ko tana fakapapau mai, ʼe tou talitali ki te ʼu lagi foʼou pea mo te kele foʼou ʼaē ʼe tonu ke nofo ai te faitotonu.”—2 Petelo 3:13.
Koteā te faka ʼuhiga ʼo te kupu te “ ʼu lagi foʼou”? Ko te Tohi-Tapu ʼe ina faka ʼuhiga te lagi ki te takitaki. (Gāue 7:49) Ko te “ ʼu lagi foʼou” ʼe ko he puleʼaga foʼou kā ina takitaki anai te kele. ʼE foʼou te lagi ʼaia heʼe ina fetogi anai te kau takitaki ʼo te tuʼu ʼaenī; pea ko he tahi fetogi foʼou ʼo ʼuhiga mo te fakahoko ʼo te fakatuʼutuʼu ʼa te ʼAtua. ʼE ko te Puleʼaga ʼaia ʼaē neʼe akoʼi mai e Sesu kiā tātou ke tou faikole kiai. (Mateo 6:10) Mai tona ʼaluʼaga ʼaē ko te ʼAtua tona Tupuʼaga pea ʼe nofo ia ʼi te lagi, koia ʼaē ʼe higoaʼi ai ko “te puleʼaga ʼo selō.”—Mateo 7:21.
Koteā te faka ʼuhiga ʼo te kupu “kele foʼou”? ʼE mole ko he foʼi kele foʼou, mai tona ʼaluʼaga ʼaē ʼe fakahā lelei ʼi te Tohi-Tapu ko te kele ʼe nofoʼi anai ʼo talu ai. Ko te kupu “kele foʼou” ko tona faka ʼuhiga ʼe ko he faʼahiga hahaʼi kua fetogi tanatou aga. ʼE foʼou heʼe kua fakaʼauha ia te kau agakovi ʼaē neʼe māʼuʼuli ʼi ai. (Tāʼaga Lea 2:21, 22) Ko nātou ʼaē kā māʼuʼuli anai ʼi te kele, ʼe natou faka maʼuhigaʼi anai te Tupuʼaga, pea mo natou fakalogo ki ai pea mo mulimuli ki tana ʼu pelesepeto. (Pesalemo 22:27) ʼE fakaafe ia te ʼu hahaʼi mai te ʼu puleʼaga kehekehe ke natou ako te ʼu pelesepeto ʼaia pea mo fakaʼaogaʼi ʼi tonatou maʼuli ʼi te temi nei. ʼE kotou lolotoga fai koa ia te faʼahi ʼaia?
ʼI te mālama foʼou ʼa te ʼAtua, ʼe fakaʼapaʼapa anai te hahaʼi fuli ki Tana takitaki. Ko tokotou ʼofa ʼaē ki te ʼAtua ʼe ina uga koa koutou ke kotou fakalogo kiā te ia? (1 Soane 5:3) ʼE hā koa takotou fakalogo ki te ʼu fakatotonu ʼa te ʼAtua, ʼi tokotou loto fale, ʼi tokotou fale gāue peʼe ʼi te faleako, ʼi takotou faʼahiga fakaʼaogaʼi ʼo tokotou maʼuli?
ʼI te mālama foʼou, ʼe logo tahi anai te mālamanei ʼi te tauhi ki te ʼAtua moʼoni. ʼE kotou tauhi koa ki te ʼAtua ʼaē neʼe ina fakatupu ia te lagi pea mo te kele? Ko takotou tauhi, ʼe ina faka fealagia atu koa ke kotou logo tahi mo tokotou ʼu tehina mo tuagaʼane ʼo te ʼu puleʼaga fuli, mo te ʼu lanu fuli, pea mo te ʼu lea fuli?—Pesalemo 86:9, 10; Isaia 2:2-4; Sofonia 3:9.
[Talanoa ʼo te pasina 17]
Te ʼAtua ʼAē ʼe Ina Fai Ia Te ʼu Fakapapau ʼAia
ʼE ko ia te Tupuʼaga ʼo te lagi mo te kele, ʼaē neʼe fakahigoaʼi e Sesu Kilisito ko “te ʼAtua moʼoni e tahi.”—Soane 17:3.
Tokolahi te hahaʼi ʼe natou faka kolōliaʼi te ʼu ʼatua ʼaē neʼe natou faʼu. Ko te ʼu toko lauʼi miliona hahaʼi ʼe natou tulolo iā muʼa ʼo te ʼu fakatātā mate. Ko ʼihi ʼe natou faka kolōliaʼi te ʼu kautahi fakatagata, mo te ʼu filosofia fakakoloa, peʼe ko tonatou ʼu holi. Māʼiapē lā mo nātou ʼaē ʼe natou ʼui ʼe natou fakaʼaogaʼi te Tohi-Tapu, ʼe mole natou faka maʼuhigaʼi te huafa ʼo ia ʼaē ʼe faka higoaʼi ʼi te Tohi-Tapu ko “te ʼAtua moʼoni.”—Teutalonome 4:35.
ʼE ʼui fēnei e te Tupuʼaga ʼo ʼuhiga mo ia totonu: “Ko au Sehova. Ko toku huafa ʼaia.” (Isaia 42:5, 8) ʼE tuʼa 7 000 ia tatatou maʼu ia te higoa ʼaia ʼi te ʼu ʼuluaki lea ʼaē neʼe tohi ʼaki te Tohi-Tapu. Neʼe akoʼi e Sesu Kilisito ki tana kau tisipulo ke natou faikole fēnei: “Ko tamatou Tamai ʼe ʼi selō, ke tapuhā tou huafa.”—Mateo 6:9.
ʼE feafeaʼi ia te ʼAtua moʼoni? ʼE ina ʼui ʼo ʼuhiga mo ia totonu, ʼe ko he ʼAtua “manavaʼofa pea mo agaʼofa, tuai ʼi te ʼita pea mo mohu ʼi te lotoʼofa pea mo te moʼoni” kae kapau ʼe maumauʼi e he tahi tana ʼu fakatotonu pea ʼe ina fakatūʼā moʼoni anai ia ia ʼaia. (Ekesote 34:6, 7) ʼE fakamoʼoni e te fakamatala ʼo tana ʼu felōgoi mo te tagata, ia te totonu ʼo te vaega ʼaia.
Ko te ʼAtua pea mo tona huafa ʼe tonu ke tapuhā, ke faka ʼuhiga ʼe māʼoniʼoni. ʼI tona ʼuhiga Tupuʼaga pea mo Tuʼi Pule ʼo Te ʼAtulaulau, ʼe tāu mo Sehova ke tou fakalogo kiā te ia pea mo tou tauhi ʼāteaina pē kiā te ia. ʼE kotou fakalogo koa pea mo kotou tauhi ʼāteaina pē koa kiā te ia?
[Talanoa/Paki ʼo te pasina 18]
Ko Te ʼu Fetogi Fea ʼe Fakahoko Anai e “Te ʼu Lagi Foʼou Pea Mo Te Kele Foʼou”?
Kua liliu te kele ko he Palatiso Luka 23:43
Ko he foʼi fāmili faka mālamanei kua Soane 13:35;
logo tahi ai ʼaki te ʼofa ia te hahaʼi Fakahā 7:9, 10
ʼo te ʼatu puleʼaga kehekehe, mo te ʼu
lanu kehekehe pea mo te ʼu lea kehekehe
Ko te tokalelei ʼi te kele kātoa, Pesalemo 37:10, 11;
ko he fīmālie moʼoni ki te hahaʼi fuli Mikea 4:3, 4
Ko he gāue ʼe leleiʼia, pea mo he meʼa Isaia 25:6;
kai ʼe mahu 65:17, 21-23
Kua pulihi te mahaki, te lotomamahi Isaia 25:8;
pea mo te mate Fakahā 21:1, 4
Ko he mālama kua logo tahi ʼi te Fakahā 15:3, 4
tauhi ki te ʼAtua moʼoni
[Talanoa/Paki ʼo te pasina 19]
ʼE Kotou Kau Ai Anai Koa?
ʼE mole feala ki te ʼAtua ke loi!—Tito 1:2.
ʼE ʼui fēnei e Sehova: “[Ko] taku folafola . . . ʼe mole toe liliu mai anai kiā te au kae mole hona ʼu fua, kae ʼe mahino papau ia ʼe ina fai anai te meʼa ʼaē kua au leleiʼia, pea ʼe lava lelei anai te meʼa ʼaē neʼe au fekauʼi kiai.”—Isaia 55:11.
Kua lolotoga fakatupu e Sehova ia ‘te ʼu lagi foʼou pea mo te kele foʼou.’ Kua kamata te gāue ʼa te puleʼaga ʼi selō. Pea kua ʼosi tuku ia te fakatafitoʼaga o te “kele foʼou.”
ʼI te ʼosi talanoa ʼaē ki ʼihi ʼaluʼaga ʼo te ʼu ʼaluʼaga taulekaleka ʼaē kā foaki mai anai ki te mālamanei e “te lagi foʼou pea mo te kele foʼou,” ʼe ʼui mai e te Fakahā ia te ʼu palalau ʼaenī ʼa te Tuʼi Pule Faʼitaliha ʼo Te ʼAtulaulau: “Koʼenī! ʼE au lolotoga fai ia meʼa foʼou fuli pē.” Pea neʼe ina toe ʼui fēnei: “Haga ʼo tohi, heʼe ko te ʼu folafola ʼaenī ʼe agatonu pea mo moʼoni.”—Fakahā 21:1, 5.
Ko te fehuʼi maʼuhiga ʼe tonu ke tou fai: ʼE tou lolotoga fetogi koa totatou maʼuli ke tāu mo feʼauga ke tou kau ki te “kele foʼou” ʼaē kā takitaki anai e te “ ʼu lagi foʼou”?