“Ke ʼAua Naʼa Kotou Tō Ki He Fakahala”
“Kotou nonofo ʼalaʼala pea ke kotou faikole tuʼumaʼu, ke ʼaua naʼa kotou tō ki he fakahala.”—MATEO 26:41.
ʼI TANA ʼamanaki mate, neʼe felāveʼi ia Sesu Kilisito, ia te ʼAlo ʼo te ʼAtua, mo he hoha lahi neʼe mole heʼeki hoko kiā te ia ʼi muʼa atu. Kua fakaovi mai te fakaʼosi ʼo tona maʼuli ʼi te kele. Neʼe ʼiloʼi e Sesu kua vave puke ia ia, ʼo fakatūʼā ki te mate, pea mo tutuki ki he pou fakamamahi. Neʼe mahino kiā ia, ʼe malave anai ki te huafa ʼo tana Tamai ia te ʼu tonu fuli pea mo te ʼu gāue ʼaē kā ina fai. Neʼe toe mahino kiā Sesu neʼe fakalogo kiā te ia te ʼu tapuakina ʼo te kā haʼu ʼo te mālamanei. ʼI tana logoʼi ia te hoha lahi ʼaia, koteā ʼaē neʼe ina fai?
2 Neʼe ʼalu ia Sesu mo tana ʼu tisipulo ki te ʼōloto ʼo Setesemane. Neʼe ko he koga meʼa neʼe leleiʼia e Sesu. Neʼe ʼai tana kiʼi fakamamaʼo atu mai tana kau tisipulo, pea ʼi tana kua tokotahi, neʼe haga ai leva ki tana Tamai ʼaē ʼe ʼi selō, ʼo tagi mamahi ki ai pea mo kole ki ai ke ina foaki age hona mālohi, pea neʼe mole faikole tuʼa tahi pē kae neʼe tuʼa tolu tana faikole ʼaia ki tana Tamai. Logolā te haohaoa ʼaē ʼo Sesu, kae neʼe ina ʼiloʼi ʼe mole feala ke ina lavaʼi tokotahi te kātakiʼi ʼo te ʼu meʼa ʼaē kā hoko.—Mateo 26:36-44.
3 ʼI te temi nei, mo tātou foki ʼe tou tau mo te ʼu faigataʼaʼia. ʼI te kamataʼaga ʼo te kaupepa ʼaenī, neʼe tou vakaʼi te ʼu fakamoʼoni ʼo ʼuhiga mo tatatou māʼuʼuli ʼaē ʼi te ʼu ʼaho fakamuli ʼo te tuʼu agakovi ʼaenī. Kua toe lēsili age te mālohi ʼo te ʼu ʼahiʼahi pea mo te ʼu fakahala ʼo te mālama ʼa Satana. Pea ʼe toe tō ki te huafa ʼo te ʼAtua moʼoni ʼaē ʼe tou ʼui ʼe tou tauhi ki ai, ia te ʼu tonu pea mo te ʼu gāue ʼaē ʼe tou fai, ʼo fēia mo tatatou ʼu fakaʼamu takitokotahi ki totatou kā haʼu ʼi te mālama foʼou. ʼE tou ʼoʼofa kiā Sehova. ʼE tou fia ‘faʼa kātaki ʼo aʼu ki te fakaʼosi,’ peʼe ki te gataʼaga ʼo totatou maʼuli peʼe ki te fakaʼosi ʼo te tuʼu ʼaenī. (Mateo 24:13) Kae ʼe feafeaʼi hatatou manatuʼi tuʼumaʼu ia te maʼuhiga ʼo totatou temi pea mo tou haga nonofo ʼalaʼala?
4 Neʼe ʼiloʼi e Sesu ko tana ʼu tisipulo ʼi te ʼuluaki sēkulō pea mo totatou temi ʼe natou tau anai mo te ʼu faigataʼaʼia, koia neʼe ina fai ai te fakaloto mālohi ʼaenī: “Kotou nonofo ʼalaʼala pea ke kotou faikole tuʼumaʼu, ke ʼaua naʼa kotou tō ki he fakahala.” (Mateo 26:41) Koteā te faka ʼuhiga ʼo te ʼu palalau ʼaia kiā tātou iā ʼaho nei? Koteā te fakahala ʼaē ʼe tau nei mo koutou? Pea ʼe feafeaʼi hakotou lava “nonofo ʼalaʼala”?
Koteā Te Fakahala ʼAia?
5 ʼI te ʼaho fuli pē, ʼe fakahalaʼi tātou ke tou higa ki “te hele ʼa te Tēvolo.” (2 Timoteo 2:26) ʼE fakatokagaʼi mai ʼi te Tohi-Tapu, ko Satana ʼe ina faigaʼi ke ina fakahalaʼi tāfito te kau ʼatolasio ʼa Sehova. (1 Petelo 5:8; Fakahā 12:12, 17) He koʼē ʼe ina fai ia te faʼahi ʼaia? ʼE mole ina fakatuʼutuʼu ke ina matehi tātou, heʼe kapau ʼe tou mamate agatonu maʼa te ʼAtua, pea ʼe mole faka ʼuhiga anai kiā ia ko he mālo. Pea ʼe ʼiloʼi e Satana, ko Sehova ʼi tona temi totonu ʼe ina pulihi anai te mate ʼaki te toe fakatuʼuake ʼo nātou ʼaē kua mamate.—Luka 20:37, 38.
6 Ko te meʼa ʼaē ʼe faigaʼi e Satana ke ina maumauʼi ʼe maʼuhiga ʼaupitō age ia ʼi totatou maʼuli ʼo te temi nei: ko tatatou agatonu ʼaē ki te ʼAtua. ʼE ina faigaʼi ʼaupitō ke ina fakahā ʼe ina lava fakamamaʼo ia tātou mai ia Sehova. Koia kapau ʼe ina lava maumauʼi tatatou agatonu, ke mole tou toe faka mafola ia te logo lelei peʼe ke tou talagataʼa ki te ʼu pelesepeto faka Kilisitiano, ʼe ko he mālo lahi ia ʼa Satana! (Efesi 6:11-13) Ko te tupuʼaga lā ʼaia ʼo te fakatupu e ‘Satana’ ia te ʼu fakahala kiā tātou.’—Mateo 4:3.
7 ʼE lahi “te ʼu kākā” ʼa Satana. (Efesi 6:11, Beaumont) ʼE feala ke ina fakahalaʼi tātou ʼaki te loto mānumānu ki te ʼu koloa, mo te mataku ki te tagata, mo te lotolotolua, peʼe ko te kumi ʼo te ʼu fakafiafia. Kae ʼi tana ʼu mahafu ʼaē ʼe ina fakaʼaogaʼi moʼo fakahalaʼi ʼo tātou, ʼe ʼi ai te mahafu ʼe faiva ai, ʼaē ko te fakaloto vaivaiʼi ʼo tātou. Ko te ʼāselo faiva kākā ʼaia, ʼe ina ʼiloʼi ko te lotovaivai, ʼe ina fakagaʼegaʼe ia tātou, ʼo faigafua ai hotatou fakahalaʼi. (Tāʼaga Lea 24:10) Pea ʼi te temi tāfito ʼaē ʼe tou ‘lotomamahi’ ai, ʼe ina fakahalaʼi ai tātou ke tou liʼaki ia te moʼoni.—Pesalemo 38:8.
8 ʼI tatatou fakaovi ki te fakaʼosi ʼo te ʼu ʼaho fakamuli, ʼe hagē ia ʼe lēsili age te ʼu faʼahi ʼaē ʼe feala ai ke tou lotovaivai, pea ʼe mole he tahi iā tātou ʼe hao mai ai. (Vakaʼi te fakamatala ʼaē ʼe ʼātakai “He ʼu Tupuʼaga ʼo Te Lotovaivai.”) Logolā peʼe koteā te tupuʼaga ʼo tatatou lotovaivai, kae ʼe ko he faʼahi ʼe feala ke tou gaʼegaʼe ai ʼi te tauʼi ʼo totatou ʼu fihifihia. Kapau ʼe kotou gaʼegaʼe ʼi te faʼahi fakasino, mo te faʼahi ʼo te ʼatamai pea mo lotohoha, ʼe lagi mata faigataʼa anai hakotou ‘totogi he temi faigamālie’ moʼo ako ia te Tohi-Tapu, moʼo kau ki te ʼu fono pea mo kau ki te fai faka mafola. (Efesi 5:15, 16) Kotou manatuʼi ko Satana ʼe ina loto ke kotou tuku takotou tauhi ʼaē ki te ʼAtua. Koia ʼaua naʼa kotou fakasiʼisiʼi takotou gāue peʼe kotou galoʼi te maʼuhiga ʼaupitō ʼo totatou temi! (Luka 21:34-36) ʼE feafeaʼi hakotou tekeʼi tana ʼu fakahala pea mo kotou nonofo ʼalaʼala? Koʼenī te ʼu tokoni e fā ʼe ʼaoga atu anai kiā koutou.
“Ke Kotou Faikole Tuʼumaʼu”
9 Kotou falala kiā Sehova ʼaki te faikole. Kotou manatuʼi te faʼifaʼitaki ʼaē neʼe tuku mai e Sesu ʼi te ʼōloto ʼo Setesemane. Koteā ʼaē neʼe ina fai ʼi te temi ʼaē neʼe hoha lahi ai? Neʼe haga kiā Sehova ʼo kumi tokoni ki ai, pea ʼi te ʼāsili fakamālotoloto ʼo tana faikole “neʼe liliu [ai] tona kakava ohagē ko he ʼu toʼi toto ʼe hali ki te kele.” (Luka 22:44) Kotou fakakaukauʼi age muʼa: neʼe ʼiloʼi lelei e Sesu ia Satana, he neʼe sio ifo mai te lagi ki te ʼu fakahala fuli ʼaē neʼe fai e Satana moʼo kākāʼi ia te ʼu kaugana ʼa te ʼAtua. Kae neʼe mole manatu ia ʼe faigafua anai hana tekeʼi ia te ʼu fakahala fuli ʼaē kā fai anai e Satana kiā te ia. Kapau lā ko te ʼAlo ʼo te ʼAtua ʼaē neʼe haohaoa, neʼe ina logoʼi ʼe tonu ke faikole ki tana Tamai ke tokoni age kiā te ia pea mo faka mālohiʼi ia ia, pea ʼe feafeaʼi age lā ia tātou!—1 Petelo 2:21.
10 Kotou toe manatuʼi ʼi te ʼosi tokoniʼi e Sesu tana kau tisipulo ke natou “faikole tuʼumaʼu,” neʼe ina ʼui fēnei: “Ko te laumālie, ʼe moʼoni, ʼe mālohi ia, kae ko te kakano ʼe vaivai.” (Mateo 26:41) Ko te kakano ʼo ʼai ʼaē neʼe talanoa kiai ia Sesu ʼi te vaega ʼaenī? ʼE mahino ia neʼe mole talanoa ia Sesu ki tona kakano haohaoa, ʼaē neʼe mole ʼi ai he meʼa ʼe vaivai. (1 Petelo 2:22) Kae neʼe mole tatau tona ʼuhiga mo ʼaē ʼo tana ʼu tisipulo, he neʼe natou heʼe haohaoa pea mo kakano agahala, koia neʼe ʼaoga tāfito ai kiā nātou he tokoni ke feala hanatou tekeʼi ia te fakahala. (Loma 7:21-24) Koia neʼe ina fakaloto mālohiʼi ai ia nātou, pea mo te kau Kilisitiano moʼoni fuli ki muli age, ke natou faikole ke feala hanatou maʼu he tokoni moʼo fakafeagai ki te ʼu fakahala. (Mateo 6:13) Pea ʼe tali e Sehova ia te ʼu taʼi faikole ʼaia. (Pesalemo 65:2) ʼO ina tali feafeaʼi? ʼE ina tali iā faʼahiga ʼaluʼaga e lua.
11 ʼUluaki, ʼe tokoni mai Sehova ke tou sisio ki te ʼu fakahala. ʼE hagē te ʼu fakahala ʼa Satana ko he ʼu hele ʼe ina tuku ʼi he ala foufou ʼe mole mālamagia. Kapau ʼe mole kotou tokagaʼi, pea ʼe lagi feala hakotou tō ki tana ʼu hele ʼaia. Ko Sehova ʼaki ia te Tohi-Tapu pea mo te ʼu tohi faka Tohi-Tapu, ʼe ina fakahā lelei mai ia te ʼu hele ʼa Satana, ke ʼaua naʼa tou tō kiai. Lolotoga ni ʼu taʼu, neʼe fai tuʼumaʼu mai ia te ʼu fakatokaga ʼi te ʼu tohi faka Tohi-Tapu pea mo te ʼu fakatahi lalahi, ke feala hatatou tekeʼi ia te ʼu tuʼutāmaki ohagē ko te mataku ki te tagata, te ʼu felāveʼi fakasino heʼeʼaoga, te mānumānu koloa, pea mo ʼihi age fakahala ʼa Satana. (Tāʼaga Lea 29:25; 1 Kolonito 10:8-11; 1 Timoteo 6:9, 10) ʼE mole kotou fonu koa lā ʼi te loto fakafetaʼi kiā Sehova ʼi tana fai mai ia te ʼu fakatokaga ʼo ʼuhiga mo te ʼu kākā ʼa Satana? (2 Kolonito 2:11) Ko te ʼu fakatokaga fuli ʼaia, ʼe ko he tali ʼaia mai ia Sehova ki takotou ʼu faikole, ke tokoni atu moʼo tekeʼi ia te ʼu fakahala.
12 Lua, ʼe tali mai e Sehova tatatou ʼu faikole, ʼo ina foaki mai ia te mālohi ʼaē ʼe ʼaoga ke feala hatatou kātakiʼi ia te ʼu fakahala. ʼE ʼui fēnei mai ʼi tana Folafola: “Ko te ʼAtua . . . ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe kotou lava tali, kae ʼaki te fakahala ʼe ina toe foaki atu anai mo he faigamālie ke kotou hao ai.” (1 Kolonito 10:13) Kapau ʼe tou haga tuku tatatou falala ki te ʼAtua, pea ʼe mole ina tuku anai ki he fakahala ke liliu ʼo faigataʼa fau, ke mole kei tou maʼu ai te mālohi fakalaumālie moʼona tekeʼi. ʼE feafeaʼi hana ‘foaki mai he faigamālie ke tou hao’ mai te fakahala? ʼE ina ‘foaki ia te laumālie māʼoniʼoni kiā nātou ʼaē ʼe natou kole age kiā te ia.’ (Luka 11:13) Ko te laumālie ʼaia ʼe tokoni mai ke tou manatuʼi ia te ʼu pelesepeto faka Tohi-Tapu ʼaē ʼe feala ke tou lotomālohi ai moʼo fai ia te meʼa ʼaē ʼe lelei pea mo fai he ʼu tonu ʼe lelei. (Soane 14:26; Sake 1:5, 6) ʼE lava tokoni mai ke tou maʼuliʼi ia te ʼu kalitātē ʼaē ʼe ʼaoga kiā tātou moʼo tekeʼi ia te ʼu holi kovi ʼo totatou kakano. (Kalate 5:22, 23) ʼE toe feala pē foki ki te laumālie ʼo te ʼAtua ke ina uga totatou ʼu tehina ke natou liliu ‘maʼa tātou ko he tokoni ʼe fakaloto mālohi.’ (Kolose 4:11) ʼE mole kotou loto fakafetaʼi koa lā kiā Sehova ki tona ʼofa ʼaia ʼo tali atu ki te ʼu faikole ʼaē neʼe kotou fai ke tokoni atu kiā koutou?
Ke Fakapotopoto Takotou ʼu Fakaʼamu
13 Ke feala hatatou nonofo ʼalaʼala, ʼe tonu ke fakapotopoto tatatou ʼu fakaʼamu. ʼUhi ko te ʼu faigataʼaʼia ʼo te maʼuli, ʼi ʼihi temi ʼe tou logoʼi ai kua tou fiu. Kae tou manatuʼi ko te ʼAtua neʼe heʼeki ina fakapapauʼi mai kiā tātou he maʼuli ʼe mole hona ʼu fihifihia ʼi te tuʼu ʼaenī. ʼI te temi muʼa pē lā, neʼe felāveʼi te ʼu kaugana ʼa te ʼAtua mo te ʼu fihifihia, ohagē ko te ʼu fakataga, mo te maʼuli masiva, mo te lotovaivai, pea mo te mahaki.—Gāue 8:1; 2 Kolonito 8:1, 2; 1 Tesalonika 5:14; 1 Timoteo 5:23.
14 ʼI te temi ʼaenī, ʼe tou toe felāveʼi mo tātou mo te ʼu fihifihia. ʼE lagi ko he fakataga, pe ko he ʼu fihifihia faka paʼaga, he lotovaivai, he mahaki, peʼe ko he tahi age ʼu mamahi. Kapau lā ʼe tonu ke puipui faka milakulo tātou e Sehova mai te ʼu fihifihia fuli ʼaia, ʼe mole koa lā ko he faigamālie ʼaia kiā Satana ke ina fakalaga fihi kiā Sehova? (Tāʼaga Lea 27:11) Koia ʼaē ʼe tuku ai e Sehova ke fakahalaʼi pea mo fakatagaʼi tana ʼu kaugana, pea ʼi ʼihi temi ʼe ina tali ke matehi ia nātou e tonatou ʼu fili.—Soane 16:2.
15 Koteā ʼaē neʼe fakapapauʼi mai e Sehova? Ohagē ko te faʼahi neʼe kua tou talanoa kiai, neʼe ina fakapapauʼi mai ʼe ina foaki mai anai ia te mālohi ke feala ai hatatou tekeʼi ia te ʼu fakahala fuli, kae ʼe tonu ke tou falala kātoa age kiā te ia. (Tāʼaga Lea 3:5, 6) ʼAki tana Folafola, mo tona laumālie, pea mo tana kautahi, ʼe ina puipui tātou ʼi te faʼahi fakalaumālie, pea mo tokoni mai ke tou felōgoi lelei tuʼumaʼu mo ia. ʼAki te ʼu taʼi felōgoi lelei ʼaia mo ia, tatau aipē peʼe tou mamate, kae tou mālo. ʼE mole ʼi ai he meʼa māʼiapē lā mo te mate, ʼe ina lava tāʼofi te ʼAtua ke ina fakapale tana ʼu kaugana agatonu. (Hepeleo 11:6) Pea ʼi te kua ovi mai ʼo te mālama foʼou, ʼe fakahoko moʼoni anai e Sehova tana ʼu fakapapau taulekaleka fuli kiā nātou ʼaē ʼe ʼoʼofa kiā te ia.—Pesalemo 145:16.
Kotou Manatuʼi Te ʼu Faʼahi ʼAē Neʼe Fakafihiʼi
16 Ke feala hatatou faʼa kātaki ʼo aʼu ki te fakaʼosi, ʼe tonu ke tou manatuʼi tuʼumaʼu ia te ʼu faʼahi tāfito ʼaē neʼe tupu ai te fakagafua e te ʼAtua ia te agakovi. Kapau ʼe hagē ʼi ʼihi temi ʼe mole kei tou lava kātakiʼi hotatou fihifihia pea kua tou fiu ʼi tona tauʼi, ʼe tonu ke tou manatuʼi ko Satana neʼe ina fakafihiʼi ia te matatonu ʼo te pule ʼa Sehova ʼo te ʼatulaulau. Ko te ʼĀselo Kākā neʼe ina toe fakafihiʼi mo te agatonu pea mo te ʼofa ʼa te kau ʼatolasio ʼa te ʼAtua pea mo tanatou pipiki ki te ʼAtua. (Sopo 1:8-11; 2:3, 4) Ko te ʼu fakafifihi ʼaia pea mo te faʼahiga fakatuʼutuʼu ʼa Sehova ke ina fakatokatoka ia te ʼu ʼaluʼaga ʼaia, ʼe maʼuhiga age ia ʼi totatou maʼuli. ʼO feafeaʼi?
17 ʼI te fakagafua faka temi e te ʼAtua ia te agakovi, neʼe ina tuku he temi feʼauga ke tali e niʼihi ia te moʼoni. Tou manatuʼi, neʼe mamahi ia Sesu ke feala ai hatatou maʼu ia te maʼuli. (Soane 3:16) ʼE mole tou loto fakafetaʼi koa lā ki te fakatuʼutuʼu ʼaia? Kae ʼe tou tali anai koa ke tou kātakiʼi he ʼu faigataʼaʼia ʼi he temi loaloaga ke feala ai ki niʼihi ke natou maʼu ia te maʼuli? Ke feala hatatou faʼa kātaki ʼo aʼu ki te fakaʼosi, ʼe tonu ke tou fakamoʼoni ko te poto ʼo Sehova ʼe māʼoluga age ʼi totatou poto. (Isaia 55:9) ʼE ina fakagata anai te agakovi ʼi te temi ʼaē kā feʼauga lelei ai moʼo fakatokatoka ʼo talu ai ia te ʼu faʼahi ʼaē neʼe fakafihiʼi pea mo totatou maʼuli heʼegata. ʼE mole ʼi ai he tahi puleʼaki ʼe lelei age ʼi te puleʼaki ʼaē kua ina fakatuʼutuʼu ʼo ʼuhiga mo te faʼahi ʼaia. ʼE mole ʼi ai he aga heʼe faitotonu ʼi te ʼAtua!—Loma 9:14-24.
“Kotou Fakaovi Ki Te ʼAtua”
18 Ke feala hatatou manatuʼi tuʼumaʼu te maʼuhiga ʼo totatou temi, ʼe tonu ke tou ovi kiā Sehova. ʼAua naʼa galo kiā tātou, ʼe faiga tuʼumaʼu ia Satana ke ina maumauʼi tatatou ʼu felōgoi lelei ʼaē mo Sehova. ʼE ina fia fakaneke ia tātou ke tou manatu ʼe mole hoko mai anai te fakaʼosi ʼo te tuʼu ʼaenī, pea ʼe mole he ʼuhiga ʼo te faka mafola ʼo te logo lelei peʼe ko te maʼuliʼi ʼo te ʼu pelesepeto ʼo te Tohi-Tapu. Kae ‘ ʼe gutuloi ia, pea ʼe ko te tamai ʼo te loi.’ (Soane 8:44) ʼE tonu ke tou faiga mālohi ke tou “fakafeagai ki te Tēvolo.” ʼAua naʼa tou meʼa noaʼi tatatou ʼu felōgoi mo Sehova. ʼE fai mai ʼi te Tohi-Tapu ia te fakaafe ʼofa ʼaenī: “Kotou fakaovi ki te ʼAtua, pea ʼe fakaovi atu anai kiā koutou.” (Sake 4:7, 8) ʼE feafeaʼi hakotou fakaovi kiā Sehova?
19 ʼE maʼuhiga ke tou faikole pea mo metitāsio. Kā kua hagē kua tou mafasia ʼi te ʼu fihifihia ʼo te maʼuli, tou fakahā kiā Sehova totatou mamahi. Kapau ʼe tou fakahā fakahagatonu ki te ʼAtua ia te ʼu meʼa ʼaē ʼe tou mamahi tāfito kiai, pea ʼe tou mahino lelei anai ki te tali mai ʼa te ʼAtua ki tatatou ʼu faikole. ʼE lagi neʼe mole kotou ʼamanaki ki te tali ʼaia neʼe foaki atu e Sehova, kae kapau ʼe kotou fia faka kolōliaʼi ia ia pea mo nofo agatonu kiā te ia, pea ʼe ina foaki atu anai te tokoni ʼaē ʼe ʼaoga kiā koutou moʼo kātakiʼi tokotou fihifihia. (1 Soane 5:14) Pea ʼi takotou sio anai ki tana takitaki ʼaia ʼi tokotou maʼuli, ʼe kotou fia fakaovi ai anai kiā te ia. ʼE toe maʼuhiga foki ke tou lau ia te Tohi-Tapu pea mo metitāsioʼi te ʼu kalitātē pea mo te ʼu gāue ʼa Sehova. Ko te taʼi metitāsio ʼaia, ʼe tokoni atu ke kotou ʼiloʼi lelei ia ia; ʼe malave ki tokotou loto pea mo ina fakatuputupu tokotou ʼofa ʼaē kiā te ia. (Pesalemo 19:14) ʼE ko te ʼofa ʼaia ʼaē kā tokoni atu anai iā meʼa fuli, ke kotou tekeʼi te ʼu fakahala pea mo kotou nonofo ʼalaʼala.—1 Soane 5:3.
20 Ke tou felōgoi lelei mo Sehova, ʼe toe maʼuhiga foki ke tou toe felōgoi lelei mo totatou ʼu tehina mo tuagaʼane. ʼE tou vakaʼi anai te faʼahi ʼaia ʼi te kāpite fakaʼosi ʼo te nusipepa ʼaenī.
TE ʼU FEHUʼI ʼO TE AKO
• Koteā ʼaē neʼe fai e Sesu ʼi muʼa ʼo tana mate ʼi te temi ʼaē neʼe lotohoha ʼaupitō ai, pea koteā ʼaē neʼe ina fakaloto mālohiʼi ai tana ʼu tisipulo ke natou fai? (Pal. 1-4)
• He koʼē ʼe faigaʼi tāfito e Satana ke ina fakahalaʼi te kau ʼatolasio ʼa Sehova, pea ʼe ina fakahalaʼi feafeaʼi ia nātou? (Pal. 5-8)
• Ke feala hatatou tekeʼi te fakahala, he koʼē ʼe tonu ke tou faikole tuʼumaʼu (Pal. 9-12), ke fakapotopoto tatatou ʼu fakaʼamu (Pal. 13-15), ke tou manatuʼi te ʼu faʼahi ʼaē neʼe fakafihiʼi (Pal. 16, 17), pea ke tou “fakaovi ki te ʼAtua” (Pal. 18-20)?
[Talanoa ʼo te pasina 25]
He ʼu Tupuʼaga ʼo Te Lotovaivai
Te mahaki peʼe ko te kua mātutuʼa. ʼE feala ke fakatupu lotovaivai te kua faka tuʼakoi ʼaē ʼo tatatou ʼu gāue moʼo tauhi ki te ʼAtua ʼuhi ko te kua mātutuʼa peʼe ko he mahaki kua fualoa.—Hepeleo 6:10.
Te ʼu faʼahi ʼe tou lotomamahi ai. ʼE feala ke tou lotomamahi mo kapau ʼe mole ʼi ai he fua ʼo tatatou faka mafola te Folafola ʼa te ʼAtua.—Tāʼaga Lea 13:12.
ʼE mole lelei te ʼu manatu ʼaē ʼe tou maʼu ʼo ʼuhiga mo kita totonu. ʼE feala ki he tahi neʼe gaohi koviʼi lolotoga ni ʼu taʼu ke manatu ʼe mole ʼofainaʼi ia ia e hina tahi, māʼiapē lā mo Sehova.—1 Soane 3:19, 20.
Te ʼu lavea ʼo te matagafua. Kapau ko he Kilisitiano neʼe lotomamahi ʼuhi ko he hala age ʼo hona tehina, ʼe feala ki te lahi fau ʼo tona lotomamahi ke tupu ai hana mole kei fia kau ki te ʼu fono, pea mole kei fia fai faka mafola.—Luka 17:1.
Te fakataga. ʼE feala ki ʼihi ʼaē ʼe mole lotu tahi mo koutou ke natou fakafeagai, peʼe natou fakatagaʼi peʼe natou manukiʼi koutou.—2 Timoteo 3:12; 2 Petelo 3:3, 4.
[Paki ʼo te pasina 26]
Neʼe fakaloto mālohiʼi ia tātou e Sesu ke tou “faikole tuʼumaʼu” ke tou maʼu ai he tokoni ki tatatou tau ʼaē ki te ʼu fakahala