Ko Ai Ia “Papiloni Lahi”?

ʼI TE tohi ʼo Apokalipesi ʼe tou maʼu ai te ʼu palalau fakatātā. (Apokalipesi 1:1) Ohage la, ʼe talanoa ai ʼo ʼuhiga mo te fafine ʼe tohi ʼi tona laʼe ia te higoa ko “Papiloni Lahi.” ʼE ʼui ko te fafine ʼaia ʼe heka ki “te ʼu hahaʼi tokolahi, te ʼu puleʼaga.” (Apokalipesi 17:​1, 5, 15, MN ) ʼE mole feala ki he fafine moʼoni ke ina fai ia te faʼahi ʼaia, koia ko te kupusiga palalau Papiloni Lahi ʼe ko he palalau fakatātā. Kae koteā ʼaē ʼe fakatātā e te fafine paomutu ʼaia?

Iā Apokalipesi 17:18 (MN ), ʼe ʼui ai ko te fafine fakatātā ʼaia ʼe ko “te kolo lahi ʼaē ʼe ʼi ai tona puleʼaga ʼe pule ki te ʼu hau ʼo te kele.” Ko te kupu “kolo” ʼe faka ʼuhiga ki he kautahi. Kapau ko te “kolo lahi” ʼaia ʼe ina puleʼi “te ʼu hau ʼo te kele,” pea ko te fafine ʼaē ʼe higoa ko Papiloni Lahi ʼe ko te kautahi mālohi ʼe pule ʼi te malamanei kātoa. Koia ʼaē ʼe fakahigoaʼi ai ko te kautahi faka malamanei. Koteā te faʼahiga kautahi ʼaia? Ko te kautahi faka lotu. ʼAki te tahi ʼu vaega ʼi te tohi ʼo Apokalipesi, ʼe tou maʼu ai te mahino ʼaia.

Ko he kautahi ʼe feala ko he kautahi faka politike, faka koloā, peʼe faka lotu. Kae ko te fafine ʼaē ʼe higoa ko Papiloni Lahi ʼe mole ko he kautahi faka politike, koteʼuhi ʼe ʼui ʼi te Folafola ʼa te ʼAtua ko “te ʼu hau ʼo te kele,” peʼe ko te ʼu kautahi faka politike ʼo te malamanei, ʼe nātou “fai folonikasio” mo ia. Ko tana folonikasio ʼe ko te ʼu fuakava ʼaē neʼe ina fai mo te kau takitaki ʼo te kele, ko te tupuʼaga la ʼaia ʼo tona fakahigoaʼi ko “te fafine paomutu lahi.”​—Apokalipesi 17:​1, 2, MN; Sakopo 4:4.

Ko Papiloni Lahi ʼe mole feala ke ʼui ʼe ko he kautahi ʼe gāue fai koloā, koteʼuhi ko te “kau fakatau koloā feʼoloʼaki ʼo te kele,” ʼaē ʼe nātou fakatā te ʼu gāue fai koloā, ʼe nātou putu anai ʼi te temi ʼaē ka fakaʼauha ai. Ei, ko te ʼu hau pea mo te kau fakatau koloā ʼe ʼui ʼe nātou tutuʼu anai mai “mamaʼo” ʼo sioʼi ia Papiloni Lahi. (Apokalipesi 18:​3, 9, 10, 15-17, MN ) Koia, ʼe tonu tatatou ʼui ʼaē ko Papiloni Lahi, ʼe mole ko he kautahi faka politike peʼe gāue fai koloā, kae ʼe ko he kautahi faka lotu.

Ko te tahi fakamoʼoni ʼaē ko Papiloni Lahi ʼe ko te kautahi faka lotu, ʼe ko tana fakahēhē ia te ʼu puleʼaga fuli ʼaki tana ʼu ‘meʼa faifakalauʼakau.’ (Apokalipesi 18:23) Ko te ʼu meʼa faifakalauʼakau fuli ʼe ko he ʼu meʼa faka lotu pea mo fakatemonio, koia ʼaē ʼe fakahigoaʼi ai ʼi te Tohi-Tapu ia Papiloni Lahi, ʼe ko “he nofoʼaga ʼo te kau temonio.” (Apokalipesi 18:​2, MN; Teutalonome 18:​10-12) Ko te kautahi ʼaia ʼe toe ʼui ʼe fakafeagai mālohi ki te tauhi moʼoni, heʼe ina fakatagaʼi te kau “polofeta” pea mo te “kau maʼoniʼoni.” (Apokalipesi 18:​24, MN ) Ei, ʼe fehiʼa ʼaupito ia Papiloni Lahi ki te tauhi moʼoni, koia ʼaē ʼe ina fakatagaʼi mālohi ai pea mo ina fakapogi “te kau fakamoʼoni ʼa Sesu.” (Apokalipesi 17:​6, MN ) Koia, ko te fafine ʼaia ko Papiloni Lahi, ʼe ina fakatātā lelei te kautahi faka malamanei ʼo te ʼu lotu hala, ʼaē ʼe faka ʼuhiga ki te ʼu lotu fuli ʼaē ʼe nātou fakafeagai kiā Sehova ʼAtua.