Neʼe Tupu Koa Ia Sesu ʼi Tesepeli?

ʼE MOLE fakahā mai ʼi te Tohi-Tapu pe ko ʼanafea ʼaē neʼe tupu ai ia Sesu. Kae ʼe tou mahino ʼaki te Tohi-Tapu, ko Sesu neʼe mole tupu ʼi te māhina ʼo Tesepeli.

Tou talanoa muʼa ki te agaaga ʼo te temi ʼi Petelehemi, te kolo ʼaē neʼe tupu ai Sesu. ʼI te kaletalio Sutea, ko te māhina ko Kislev (Novepeli mo Tesepeli) neʼe ko te māhina momoko pea mo ʼua. Ko te māhina ʼaē neʼe hoa mai kiai ko Tébeth (Tesepeli mo Sānualio), neʼe momoko kovi, pea neʼe nive ʼi te ʼu moʼuga. Tou vakaʼi age muʼa peʼe koteā ʼaē ʼe ʼui ʼi te Tohi-Tapu ʼo ʼuhiga mo te agaaga ʼo te temi ʼi te potu fenua ʼaia.

ʼE ʼui e te tagata faitohi ʼo te Tohi-Tapu ko Esitalasi, neʼe momoko pea mo ʼua te māhina ko Kislev. ʼI tana ʼosi talanoa ʼo ʼuhiga mo te hahaʼi tokolahi ʼaē neʼe fakatahi ʼi Selusalemi “ ʼi te hiva māhina [Kislev], ʼi te ʼuafulu ʼaho ʼo te māhina,” ʼe ʼui e Esitalasi ko te hahaʼi neʼe nātou “mōkosisia . . . ʼuhi ko te ʼu ʼua lalahi ʼaia.” ʼO ʼuhiga mo te agaaga ʼo te temi ʼi te māhina ʼaia, ko te hahaʼi ʼaē neʼe fakatahitahi neʼe nātou ʼui: “Ko te māhina ʼua ʼaenī, ʼe mole feala ke tou nonofo ʼi tuʼa.” (Esitalasi 10:​9, 13; Selemia 36:22) ʼE mahino ia, ʼi Tesepeli, ko te kau tauhi ōvi pea mo tanatou ʼu faga manu ʼo te ʼu potu fenua ʼaia neʼe mole kei nātou nonofo ʼi tuʼa ʼi te pōʼuli!

Kae ʼe ʼui ʼi te Tohi-Tapu, ʼi te pō ʼaē neʼe tupu ai Sesu, ko te kau tauhi ōvi mo tanatou ʼu faga ōvi neʼe nātou nonofo ʼi tuʼa. Pea ʼe ʼui e te tagata faitohi ʼo te Tohi-Tapu ko Luka, ʼi te temi ʼaia ʼo ōvi atu ki Petelehemi, ko te kau tauhi ōvi neʼe nātou “nonofo ʼi tuʼa ʼo nātou leʼoleʼo tanatou ʼu faga ōvi ʼi te pōʼuli.” (Luka 2:​8-12, MN ) ʼE koutou tokagaʼi ʼe nonofo ʼo māʼuʼuli moʼoni ia te kau tauhi ōvi ʼi te ʼu gāueʼaga, ʼe mole feʼoloʼaki pe nātou ʼi tuʼa lolotoga te ʼaho. Pea tahi ʼaē, ko ʼanatou faga ōvi ʼe nonofo ʼi tuʼa lolotoga te pōʼuli. Ko te fakamatala ʼaia ʼo tanatou nonofo ʼi tuʼa, ʼe ʼalutahi koa mo te ʼu agaaga ʼo te temi momoko pea mo ʼua ʼo Petelehemi ʼi Tesepeli? Kailoa. Koia, ʼe ʼasi mai ʼi te ʼu meʼa ʼaē neʼe hoko ʼi te temi ʼaē neʼe tupu ai Sesu, ʼe mole feala ke ʼui neʼe tupu ʼi Tesepeli.a

ʼE fakahā lelei mai ʼi te Folafola ʼa te ʼAtua te temi ʼaē neʼe mate ai Sesu, kae ʼe mole lahi te ʼu fakamatala ʼo ʼuhiga mo te temi ʼaē neʼe tupu ai. Koia ʼe tou manatuʼi ai te ʼu palalau ʼaē neʼe fai e te Hau ko Salomone: “ ʼE maʼuhiga age he higoa ʼi he lolo magoni, pea ʼe lelei age te ʼaho ʼo te mate ʼi te ʼaho ʼaē neʼe kita tupu ai.” (Tagata Tānaki 7:1) Koia ʼaē ʼe mahino ai kiā tatou pe koʼe ʼe lahi te ʼu fakamatala ʼi te Tohi-Tapu ʼo ʼuhiga mo te minisitelio pea mo te mate ʼa Sesu, kae mole lahi tana ʼu fakamatala ʼo ʼuhiga mo te temi ʼaē neʼe tupu ai.