Te ʼu Fakapapau ʼo Te Puleʼaga​—ʼE Ina Fakafoʼou Anai Ia Meʼa Fuli

FAKAKAUKAUʼI muʼa ʼe ke toliʼi ia he foʼi ʼapo pea ʼe ke fafaʼo ki he kato kua fonu ai te ʼu ʼapo. Kua fualoa tau gaue, kaʼe ʼe kei ke logo malohi pe moʼo hoko atu te gaue. ʼE gaue tau faʼe ʼo ovi atu, ʼe fiafia pea mo faipalalau mo ʼou kaiga pea mo ʼou kaumeʼa ʼae ʼe tokoni atu ki te toli ʼo te ʼu foʼi ʼapo. ʼE ke sio ki tona kua toe finemui, ohage pe ko te temi ʼae neʼe kei ke veliveli ai kua fualoa ki ai ni taʼu. ʼI te malama ʼafeā ʼae kua puli atu, neʼe ke sio ai ki tana liliu ʼae ʼo finematuʼa, mo mahaki pea mo tau tagi ʼi ʼona tafa ʼi tana mate. Kaʼe kua toe maʼuli ake pea mo toe malohi ʼo feia mo te tokolahi.

ʼE tou tui papau ʼe hoko anai te ʼu aluʼaga ʼaia. ʼE tou tui papau ki ai koteʼuhi ʼe hoko tuʼumaʼu pe ia te ʼu fakapapau ʼa te ʼAtua. ʼI te faʼahi 7 ʼaeni, ʼe tou vakaʼi pe hoko feafeaʼi anai ʼihi fakapapau ʼo te Puleʼaga ʼi muʼa ʼo te hoko mai ʼo Halamaketone. ʼE tou toe vakaʼi anai ʼihi fakapapau taulekaleka ʼo te Puleʼaga ʼae ka hoko anai hili te tau ʼaia. ʼE tou fiafia lahi anai ʼi tatatou sisio ki te takitaki e te Puleʼaga ʼo te ʼAtua ia te kele katoa, pea mo tana fakafoʼou ia meʼa fuli.