Neʼe Teuteuʼi e Soane Patita Te Ala

Kua hili taʼu ʼe 17 talu mai te faifehuʼi ʼa Sesu ki te kau faiako ʼi te fale lotu, ʼi tona taʼu 12. ʼI te kamataʼaga ʼo te taʼu 29 H.T.S. tokolahi neʼe natou talanoa ʼo ʼuhiga mo te kaiga ʼo Sesu, ko Soane, ʼae neʼe faifakamafola ʼi te ʼu koga fenua fuli ʼae ʼi te potu uesite ʼo te Vai Tafe ʼo Solotane.

Neʼe tokagaʼi e te hahaʼi ia Soane ʼuhi ko tona faʼahiga teu pea mo ʼana palalau. Neʼe tui e Soane ia he teu fuluʼi kamelo pea neʼe ina ʼai he kiliʼi pipi ʼi tona koga loto. Ko tana meʼa kai neʼe ko te ʼu heʼe pea mo te meli. Pea kotea te logo ʼae neʼe ina tala? “Kotou fakahemala, he ʼe kua ovi mai te Puleʼaga ʼo selo.”—Mateo 3:2.

Ko natou ʼae neʼe ʼomai ʼo fagono kia Soane, neʼe natou fiafia ʼuhi ko te logo ʼae neʼe ina tala. Neʼe mahino ki te tokolahi neʼe tonu ke natou fakahemala, ko tona fakaʼuhiga, ke natou fetogi ʼanatou aga, ʼo liakī tonatou maʼuli ʼafeā ʼae ʼe kovi. Neʼe ʼomai ia natou ʼaia mai “Selusalemi mo Sutea katoa pea mo te ʼu koga fenua fuli ʼo te ʼu tafaʼaki ʼo te Vai Tafe ʼo Solotane.” (Mateo 3:5) Tokolahi ia natou neʼe natou fakahemala. Pea neʼe ina papitemaʼi natou, ʼo ina fakauku ʼi te vai tafe. Kotea tona tupuʼaga?

Ko te papitema ʼae neʼe fai e Soane neʼe ina fakata peʼe fakamoʼoni te lotofakahemala ʼa te hahaʼi ʼuhi ko tanatou agahala ki te Lao ʼa te ʼAtua. (Gaue 19:4) Kaʼe neʼe mole ko natou fuli ʼae neʼe tuha mo te papitema ʼaia. ʼI te ʼomai ʼa ʼihi kau takitaki lotu, ia te kau Faliseo mo te kau Satuseo, kia Soane, neʼe ina fakahigoaʼi natou ko he “faga ʼuhiʼi gata kafokona.” Pea neʼe ina ui fenei age: “Kotou fakaha he ʼu fua ʼe tuha mo te fakahemala. ʼAua naʼa kotou ui fenei ʼi ʼokotou loto: ‘Ko tamatou tamai ia Apalahamo.’ He ʼe au ui atu kia koutou, ʼe feala pe ki te ʼAtua ke ina fakatupu he ʼu fanau maʼa Apalahamo mai te ʼu maka ʼaeni. Kua tuku te toki ʼi te ʼu tafitoʼi ʼakau. Pea ko te ʼu fuʼu ʼakau fuli ʼae ʼe mole fua lelei, ʼe tuʼusi pea mo laku anai ki te afi.”—Mateo 3:7-10.

Neʼe lahi te tokagaʼi ʼo Soane e te hahaʼi, ʼo feia mo te malave ʼo tana logo ki tonatou maʼuli, pea mo tana papitemaʼi te hahaʼi tokolahi. Koia neʼe ʼomai ai te kau pelepitelo pea mo te kau Levite ʼo fehuʼi fenei age ki ai: “Ko ai ia koe?”

Neʼe ui fenei e Soane: “ ʼE mole ko au ia Kilisito.”

Neʼe natou fehuʼi fenei age: “ ʼE ko koe koa te polofeta ko Elia?”

Neʼe ina tali fenei: “Kailoa ia.”

Neʼe natou fehuʼi fenei age: “ ʼE ko koe koa te Polofeta?” Neʼe natou manatu ki te Polofeta lahi ʼae neʼe ui e Moisese ʼe tonu ke haʼu.—Tetelonome 18:15, 18.

Neʼe tali fenei e Soane: “Kailoa ia.”

Kaʼe neʼe hoko atu tanatou fia iloʼi, ʼo natou ui fenei: “Ko ai ia koe? Fakaha mai ke feala hamatou foaki he tali kia natou ʼae neʼe natou fekauʼi mai matou. Kotea ʼae ʼe ke ui ʼo ʼuhiga mo koe?” Neʼe ui fenei e Soane: “Ko au ia ia ʼae ʼe kalaga fenei ʼi te toafa: ‘Kotou fakatokatoka te ala ʼo Sehova,’ ohage ko tona ui e te polofeta ko Isaia.”—Soane 1:19-23.

Pea neʼe natou fehuʼi fenei leva: “Pea he koʼe ʼe ke faipapitema mo kapau ʼe mole ko koe ia Kilisito peʼe ko Elia peʼe ko te Polofeta?” Neʼe ina fakamahino fenei age: “ ʼE au faipapitema ʼaki te vai. ʼE nofo ia koutou he tahi ʼe mole kotou iloʼi, ia ia ʼae ʼe muli mai ia au.”—Soane 1:25-27.

Koia, neʼe ui e Soane ko tana gaue neʼe ko he tokoni ki te hahaʼi ke natou maʼu te manatu ʼae ʼe lelei, ke feala hanatou tali ia te Mesia ʼae neʼe fakakikite mai, ʼae ka liliu ko he Hau. Neʼe ui fenei e Soane ʼo ʼuhiga mo te Mesia: “Ko ia ʼae ʼe muli mai ʼe malohi age ia ia au, pea ʼe mole tuha mo au ke au veteki ʼona taka.” (Mateo 3:11) Pea neʼe toe ui fenei e Soane: “Ko ia ʼae ʼe muli mai ia au kua muʼamuʼa ia ia au, koteʼuhi neʼe kua maʼuli ia kaʼe neʼe heʼeki au tupu.”—Soane 1:15.

Koia, neʼe lelei ke tala e Soane te logo ʼaeni: “Kotou fakahemala, he ʼe kua ovi mai te Puleʼaga ʼo selo.” (Mateo 3:2) Koteʼuhi neʼe ko te fakatokaga ʼaia ki te hahaʼi kua vave kamata pe ia te minisitelio ʼa Sesu Kilisito, te Hau ʼa Sehova ʼae ka haʼu.