Kapite 11

ʼE Teuteuʼi e Soane Te Ala

KO TAʼU e hogofulu-ma-fitu kua hili ki te ʼaho ʼaē neʼe nofo ai Sesu ʼi te fale lotu ʼo fakafehufehuʼi te ʼu tagata fai akonaki ʼi tona taʼu 12. ʼE tou nonofo nei ʼi te fasiga taʼu mātala ʼo te taʼu 29 ʼo totatou temi. Ko te hahaʼi fuli, ʼe ʼiloga mai ʼe nātou palalau kia Soane, te tēhina mataʼi tama ʼo Sesu, ʼaē ʼe fai faka mafola ʼi te ʼu potu fenua ʼe ōvi ki Solotane.

Ko Soane neʼe ko te tagata neʼe mamalu ʼaupito, mai tona agaaga pea mo te meʼa ʼaē ʼe palalau kiai. Ko tona kofu ko te kofu fulufuluʼi kamelo, pea ko te noʼo ʼo tona koga loto ko te kiliʼi pipi. Ko tana meʼa kai, ko te ʼu heʼe pea mo te meli vao. Koʼeni te logo ʼaē neʼe ina fakahā: “Koutou fakahemala, he kua fakaōvi mai te puleʼaga ʼo selo.”

Ko te logo ʼaia neʼe fia logo kiai te hahaʼi. Neʼe tokolahi ia nātou neʼe nātou mahino ʼe ʼaoga kia nātou ke nātou fakahemala, ko tona faka ʼuhiga ke fetogi tanatou aga pea mo līaki tonatou faʼahiga maʼuli ʼāfea ke hage kia nātou ko he meʼa ʼe kovi. Koia neʼe tokolahi ai te hahaʼi neʼe ʼōmai kia Soane; neʼe nātou ʼōmai mai te telituale fuli ʼaē e tafaʼaki ia Solotane, pea mo ʼihi mai Selusalemi. Neʼe papitemaʼi ia nātou e Soane ʼo fakauku ia nātou ʼi te vai ʼo Solotane. Koteā tona tupuʼaga?

Ko te papitema ʼaē neʼe fai e Soane ʼe ina fakatātā peʼe ina fakamoʼoni ko nātou ʼaē ʼe nātou tali te papitema ʼaia, kua nātou fakahemala moʼoni ʼo ʼuhiga mo te ʼu agahala ʼaē neʼe nātou fai ki te Lao ʼa te ʼAtua. Koia ʼi te ʼōmai ʼo niʼihi ʼo te kau Faliseo pea mo te kau Satuseo ki Solotane, neʼe fakalaka halaʼi ia nātou e Soane ʼaki te ʼu palalau ʼaenī: “Faga ʼuhiʼi gata” ko tana ʼui age ʼaia. “Koutou fakatupu te fua ʼaē ʼe gali mo te fakahemala; pea ʼaua naʼa koutou fialahi ʼo ʼui ʼi tokotou loto: ‘Ko tamatou tāmai ia Apalahamo.’ Heʼe ʼau tala atu kia koutou ko te ʼAtua ʼe feala ke ina fakatupu ʼaki te ʼu maka nei he fānau maʼa Apalahamo. Pea koʼeni ia kua tuku te toki ki te tafito ʼo te ʼu ʼakau; pea ko te ʼakau fuli pe ʼe mole fua ʼaki he fua lelei ʼe taʼaga anai ia pea laku ia ki te afi.”

ʼI te lahi ʼaē ʼo te kua tokagaʼi ʼo te gāue ʼa Soane neʼe fekau ai e te kau Sutea te ʼu pelepitelo pea mo te ʼu Levite ke ʼolo ki ai. ʼO nātou fehuʼi atu ki ai: “Ko ai ia koe? ”

“ ʼE mole ko ʼau ko Kilisito”, ko te ʼui age ʼaia ʼa Soane.

“Ka ko ai? ko tanatou fehuʼi age ʼaia. ʼE ko koe koa ko Elia? ”

“Kailoa”, ko tana toe tali age ʼaia.

“ ʼE ko koe koa Te Polofeta? ”

“Kailoa! ”

Koia neʼe nātou fehuʼi fakamālohi age: “Ko ai koa ia koe? ke feala hamatou tali kia nātou ʼaē neʼe nātou fekauʼi mai mātou. Koteā tau tala ʼo ʼuhiga pea mo koe? ”

ʼO fakamahino age ai e Soane: “Ko ʼau, ko te leʼo ʼo te tagata ʼe kalaga ʼi te toafa: ‘Koutou fakatotonu te ala ʼo Sehova’, ohage ko tona ʼui mai e te polofeta ko Isaia.”

“He koʼe ʼe ke fai papitema, ko tanatou fia ʼiloʼi ʼaia, mo kapau ʼe mole ko koe ko Kilisito, peʼe ko Elia, peʼe ko Te Polofeta? ”

“ ʼE ʼau fai papitema ʼi te vai. Kae ʼi te lotolotoiga ʼo koutou ʼe ʼi ai te tahi ʼe mole koutou ʼiloʼi, ia ia ʼaē ʼe muli mai ia te ʼau.”

Neʼe teuteuʼi e Soane te ala ko tona ʼuhiga ʼaē neʼe ina ʼaumai te hahaʼi ki he maʼu ʼo he loto ʼe lelei ki te tali ʼo te Mesia, ʼaē ka liliu anai ko te Hau. Koʼeni tana ʼui age ʼo ʼuhiga mo ia ʼaē ka muli mai: “Ko ia ʼaē ʼe muli mai ia te ʼau ʼe mālohi ake ia ia te ʼau, ia ia ʼaē ʼe mole tau mo ʼau kau toʼo tona ʼu tapugā vaʼe.” Pea koʼeni tana toe ʼui age, “ko ia ʼaē ʼe haʼu ʼi muli ia te ʼau neʼe muʼamuʼa ia ia te ʼau, he neʼe kua maʼuli ia ka heʼeki ʼau tupu”.

Koia, ko te logo ʼaē ʼa Soane ʼo ʼuhiga “mo te kua fakaōvi mai ʼo te puleʼaga ʼo selo”, ʼe ko te fakahā ʼaia ki te hahaʼi fuli kua vave te kamata ʼo te minisitelio ʼa Sesu Kilisito, te Hau ʼaē neʼe fili e Sehova. Soane 1:6-8, 15-28; Mateo 3:1-12; Luka 3:1-18; Gāue 19:4.

▪ Neʼe ko te tagata feafeaʼi koa ia Soane?

▪ He koʼe neʼe fai papitema ia Soane?

▪ He koʼe koa neʼe feala ke ʼui e Soane ko te Puleʼaga kua fakaōvi mai?