Tonu

Ko He Tokoni Ki Te ʼu Komite ʼo Te Kolesi Pule

Ko te toko 12 kau Fakamoʼoni ʼa Sehova kei nātou fakafofoga nei te Kolesi pule, kei nātou haga fakahoko aipe tonatou faitotonu ʼo ʼuhiga mo ʼanatou ʼu maʼua. ʼE nātou fakafetaʼi ʼaupito kia nātou ʼo te “hahaʼi tokolahi”, ʼo ʼuhiga pea mo tanatou lagolago fakamalotoloto (Fakahā 7:9, 15). ʼO ʼuhiga leva pea mo te tuputupu fakatalakitupua ʼe hoko ʼi te malamanei katoa, kua mahino mai leva kia tatou te maʼua ʼaē ke tou lagolago te Kolesi pule. ʼO ʼuhiga leva mo te fahaʼi ʼaia, neʼe fakatuhatuha ke fakaafe he kauga mālie, tokolahi ia nātou ʼe haʼu mai te hahaʼi tokolahi, ke nātou kau ki te ʼu fono takitokotahi ʼa te atu ʼu komite ʼo te Kolesi pule, ko te Komite ki te hahaʼi gāue, ko te Komite ki te fai ʼo te ʼu tohi, ko te Komite ki te selevisi, ko te Komite moʼo fai ʼo te ʼu akonaki pea mo te Komite ki te ta ʼo te ʼu tohi. Koia, ko te hahaʼi ʼonatou ʼaia ʼe kau ki te ʼu fono takitokotahi ʼo te atu ʼu komite ʼaia ʼe maʼu ānai he toko fitu pe ʼe ko he toko valu. ʼAki te takitaki ʼonatou ʼe nātou faʼufaʼu te ʼu komite ʼo te Kolesi pule, ko nātou ānai ʼaē neʼe fakaafe ki ai ʼe feala ānai tanatou kau ki te ʼu talaga pea mo nātou fakahoko te atu ʼu maʼua ʼe foaki ānai kia nātou ke nātou fakahoko e te ʼu komite. Ko te fakatuʼutuʼu foʼou ʼaia ʼe kamata ānai ʼi te ʼaho 1 ʼo maio 1992.

Talu mai fualoa, ko te hahaʼi ʼonatou kau Fakamoʼoni ʼa Sehova ʼo te kiʼi faga ōvi ʼe hifohifo pe ia, kae ʼo ʼuhiga leva mo nātou ʼo te hahaʼi tokolahi ʼe hake ʼaupito ia ki ʼoluga (Isaia 60:22). Ko he fakafetaʼi lahi ia kia Sehova ʼo ʼuhiga pea mo te tuputupu lahi ʼaia! Te temi neʼe tali ai te higoa foʼou ʼaenī ʼo te kau Fakamoʼoni ʼa Sehova ʼi te 1931, ko te hahaʼi ʼa nātou ʼe gāue faka mafola ʼo ʼuhiga mo te Puleʼaga neʼe ko tona hahaʼi ko te 39 372, pea ko ʼihi ia nātou ko te ʼu tēhina ʼo Sesu Kilisito neʼe fakanofo (Isaia 43:10-12; Hepeleo 2:11). Hili ki ai taʼu e onogofulu, ko te taʼu 1991 ʼaia, te hahaʼi ʼo te malamanei neʼe ko te 4 278 820 kau fai faka mafola, kae ko te toko 8 850 pe ʼāteaina ʼe ʼui ko te ʼu hahaʼi neʼe fakanofo. Ohage ko tona mahino mai te Tohi-Tapu ko te “hahaʼi tokolahi” ʼe fakalaka ʼaupito ia ʼaho nei ia nātou ʼe ʼui ko te kiʼi faga ōvi ʼo fakatā ki te fakalaka ʼi te 480 ki te 1 (Luka 12:32; Fakahā 7:4-9). Ko te toega ʼo te kiʼi faga ōvi ʼe ʼaoga ʼaupito kia nātou ke lagolago nātou e te hahaʼi tokolahi ke feala hanatou fakahoko ʼo faka au te ʼu lelei ʼo te Puleʼaga.

Ohage ko tona fakamatalatala mai e te numelo ʼo te Tule Leʼo, ʼe ʼi ai te kaugā hahaʼi ʼe gāue ʼi te tafa ʼo te Iselaele fakalaumālie, ʼe feala tatatou fakatā te kaugā hahaʼi ʼaia ki te kau Netinime pea mo te ʼu foha ʼo te ʼu tagata neʼe kaugana kia Salomone neʼe nātou liliu mai ʼi tanatou haʼisia ʼi Papilone ʼaki ia nātou ʼaē ko te kau sutea; ko te hahaʼi ʼaia neʼe mole ko he kau Iselaele neʼe hahaʼi age nātou ʼi te kau Levite ʼi tanatou liliu mai (Esitalasi 2:40-58; 8:15-20). Ko te ʼu “kau foaki” ʼe kau ki te hahaʼi ʼo te tokolahi ʼo totatou temi ko te ʼu tēhina matutuʼa ʼi te tui pea mo faiva foki ʼi te ʼu maʼua ʼonatou, ko te leʼoleʼohi ʼo te ʼu filiale, pea mo te ʼu gāue faka misionea ʼi te atu ʼu kokelekasio ʼaenī e 66 000 ʼe tuʼu ʼi te malamanei katoa.

Ko te ʼu Ako ʼo te minisitelio ʼo te Puleʼaga neʼe fakahoko ʼi te malamanei katoa moʼo teuteuʼi ʼo nātou kau taupau pea mo nātou tagata faifekau faka minisitelio lagolago kia nātou. ʼI Amelika ʼāteaina pe, ko te toko 59 420 kau taupau neʼe nātou kau ki te ʼu fono ʼaia. Ko te ʼu “tagata ʼāfea” ʼaia neʼe teuteuʼi nātou ke feala tanatou fakahoko ʼo lelei age ʼonatou ʼu maʼua. — 1 Petelo 5:1-3; vakaʼi Efesi 4:8, 11.

ʼI te nofoʼaga ʼo te kau Fakamoʼoni ʼa Sehova ʼi Brooklyn, ko ʼihi “foaki” neʼe kaugana talu mai fualoa ʼi ai. Ko te kau taupau matutuʼa ʼi te tui ʼe tou maʼu ia nātou ʼaia, ʼe kau ki te hahaʼi tokolahi, ʼe ia nātou te faiva maʼuhiga ʼaupito. Ko te Kolesi pule neʼe ina hinoʼi ʼihi ʼi te kau taupau ʼaia ke nātou kau ki te ʼu fono ʼo te ʼu komite ʼo te Kolesi pule. ʼE mole fili ʼāteaina pe nātou ʼuhi ko tonatou gāue ʼi ai talu mai fualoa. Ko te fahaʼi ʼaē ʼe kumi ko te ʼu hahaʼi matutuʼa ʼi te tui, hahaʼi faiva, pea ko hanatou ʼu kalifikasio ʼe ʼaoga ʼaupito ʼi te ʼu faʼahiga ʼaluʼaga totonu. ʼO ʼuhiga leva pea mo te ʼaluʼaga ʼaē neʼe hinoʼi nātou ke nātou gāue pea mo lagolago ʼaki te komite ʼe mole makehe ai nātou. Neʼe ʼui fēnei e Sesu ʼo ʼuhiga mo tana kau tisipulo: “ ʼE koutou tau tēhina fuli.” (Mateo 23:8). Kae, ʼe foaki lahi ānai ki te ʼu tagata ʼaia, pea, ʼe toe “fakamaʼua lahi” pe ānai kia nātou. — Luka 12:48.

ʼE mātou fiafia ʼaupito ʼi tamatou sisio ki te ʼaluʼaga ʼo te fakatuʼutuʼu ʼo te kautahi ʼa Sehova ia ʼaho nei. ʼI te ʼu taʼu ʼaenī e hogofulu kua hili atu, neʼe mātou mamata ki te ʼaluʼaga ʼo te hiki, ko te teau ki te teau ʼo ʼuhiga pea mo te hahaʼi ʼe nātou fai faka mafola, ʼo mulimuli ki te ʼu palalau faka polofeta neʼe talanoa ʼo ʼuhiga pea mo te Tavite Lahi, ia Sesu Kilisito: “Ko tona ʼafio ʼe mafola ānai ʼo lahi, pea ko te tokalelei ʼaē ka ina fakahoko ʼe mole hona gata aga ānai.” (Isaia 9:7, Saci). Ohage pe ko te gāue ʼa te kau Nitinime ia tafa ʼo te kau pelepitelo moʼo toe faʼu ʼo te ʼu kaupā ʼo Selusalemi, ʼe toe feiā pe ānai ia ʼaho nei ʼo ʼuhiga mo te talanoa faka polofeta ʼo ʼuhiga mo te kautahi ʼa Sehova: “ ʼE faʼu ānai tau ʼu kaupā e he ʼu matāpule.” (Isaia 60:10; Nehemia 3:22, 26). ʼE feala te fakapale ʼo te kau Nitinime ʼo te temi ʼo tatou ʼo ʼuhiga pea mo tonatou lotomālohi ʼi tanatou fakahā tanatou kau ki te fakatuʼutuʼu ʼo te tauhi maʼa ʼo tokoni “ki te kau pelepitelo ʼa Sehova”, ʼo tatau aipe pe ʼe koteā he gāue ʼe foaki age kia nātou ʼi te kautahi faka malamanei ʼa Sehova. — Isaia 61:5, 6.