ʼE Feafeaʼi He Tokoni ʼa Te Tui Ki He Tahi ʼe Mahaki

KO TE ʼu fakamatala ʼo te ʼu fakamālōlō faka milakulo ʼaē ʼe tou maʼu ʼi te Tohi-Tapu ʼe tou ʼiloʼi papau ai te meʼa ʼaenī: ko te ʼAtua ʼe tokaga ki totatou maʼuli fīmālie, pea ʼe toe fakahā mai ai foki tana lavaʼi ʼaē te fakamālōlō. Kapau ko te ʼu fakamālōlō faka milakulo ʼaia ʼe nātou faka kolōliaʼi te ʼAtua pea mo fakatupu ʼaki ai he maʼu ʼo he fiafia, pea ʼe mata tonu ia ke kita fai te fehuʼi ʼaenī: ko te lavaʼi ʼaē ʼo te fakamālōlō ʼaki te laumālie maʼoniʼoni ʼe kei feala koa ke hoko ia ʼaho nei?

Kailoa ia, ko te tali ʼaia ʼe feala ai ke puna’maʼuli ai niʼihi. Ko te ʼu fakamālōlō ʼaē neʼe hoko ʼi te ʼuluaki sekulo kua nātou kaku ki te meʼa ʼaē neʼe fakatuʼutuʼu ia nātou ki ai. Ko te Dictionnaire illustré de la Bible (fakapilitānia), ʼe fakahā lelei mai ai: “Ko te ʼuhiga ʼo te ʼu faitoʼo faka milakulo neʼe ko he ʼuhiga faka teolosia ia kae mole hona ʼuhiga faka tōketā.” Koteā he tahi ʼu faka ʼuhiga faka teolosia neʼe feala ke ʼaoga ki ai te ʼu milakulo ʼaia?

ʼUluaki pe muʼa, ko te ʼu fakamālōlō faka milakulo ʼaē neʼe fai e Sesu neʼe tokoni ki te hahaʼi ke nātou ʼiloʼi ko ia ko te Mesia. Pea ʼi te hili ʼo tona mate, ko te ʼu milakulo ʼaia neʼe nātou fakahā ko te tapuakina ʼa te ʼAtua ʼe tuku pe ki te kokelekasio faka kilisitiano ʼaē neʼe hoki faʼufaʼu (Mateo 11:2-6; Hepeleo 2:3, 4). Pea tahi, neʼe fakahā ʼaki ko te fakapapau ʼaē ʼa te ʼAtua ke fakamālōlō te hahaʼi fuli ʼi te mālama foʼou ʼe hoko moʼoni anai ia. Pea ʼe nātou fakamālohi tatatou tui ʼaē ʼe hoko moʼoni mai anai te temi ʼaē “ ʼe mole toe ʼui anai ʼe hina tahi: ‘ ʼE ʼau mahaki’. Ko te hahaʼi ʼaē ʼe nonofo ʼi te fenua ʼe nātou mamata anai ki te fakamolemole ʼo tanatou agahala”. (Isaia 33:24.) ʼI te kua lava ʼo te ʼu fakatuʼutuʼu ʼaia ʼi te ʼuluaki sekulo, ko te ʼu milakulo neʼe mole kei ʼi ai honatou ʼaoga.

Tou fakatokagaʼi ko te kau tisipulo ʼa Sesu ʼi te ʼuluaki sekulo neʼe nātou maʼu mo nātou te ʼu mahaki ka neʼe mole fakamālōlō faka milakulo ia nātou. ʼE ko he tahi ʼaia fakamoʼoni ko te gāue ʼa Sesu mo tana kau tisipulo ʼaē ko te fakamālōlō faka milakulo neʼe fakaʼaoga ia moʼo akonaki ʼo te ʼu moʼoni maʼuhiga, kae mole ko he fai ia ʼo he tokoni faka tōketā. Kia Timoteo ʼaē tautau puke ko tona kete, neʼe ʼui age e Paulo ki ai ke ina fakaʼaoga he kiʼi moʼi vino ohage he faitoʼo ka neʼe mole ina fai ki ai he fakamālōlō faka milakulo. Māʼia mo Paulo, ʼaē neʼe ina fai te ʼu fakamālōlō faka milakulo, neʼe mole maʼu hona fīmālie ʼuhi ko “te tala ʼaē ʼe ʼi te kakano” ʼaē ʼe ina ‘huki’ tuʼumaʼu tona sino. — 2 Kolonito 12:7; 1 Timoteo 5:23.

Ko te fealagia ʼaē ki te fai ʼo te fakamālōlō faka milakulo neʼe puli pe mo te mamate ʼa te kau ʼapositolo. Ko Paulo tonu ʼaē neʼe ina fakahā te meʼa ʼaia. Neʼe ina fakatatau te kokelekasio faka kilisitiano ki he kiʼi toe, neʼe ʼui fēnei e Paulo: “ ʼI taku kei veliveli, neʼe ʼau palalau ohage he kiʼi toe, neʼe ʼau manatu ohage he kiʼi toe, neʼe ʼau fakakaukau ohage he kiʼi toe; kae ki te temi leva ʼaenī ku ʼau liliu ai ʼo tagata, kua līaki te ʼu agaaga ʼo te kiʼi toe.” Ko te faka ʼuhiga ʼo te fakatā ʼaia ʼa Paulo ko he fakahāhā ko te ʼu fealagia faka milakulo ʼo te laumālie ʼe kau ia ki te kei tamasiʼi ʼo te kokelekasio faka kilisitiano. Neʼe ko te ʼu “agaaga ʼo te kiʼi toe”. Koia, neʼe ina fakahā ai: “Ko nātou [te ʼu fealagia faka milakulo] ʼe pulihi anai ia.” — 1 Kolonito 13:8-11.

ʼE feala koa ke tokoni kia tatou te tui mokā tou mahahaki?

Tatau aipe pe ʼe mole tou falala ki te ʼu fakamālōlō faka milakulo, ʼe lelei ia ke tou faikole ki te ʼAtua ke tokoni mai kia tatou mokā tou mahahaki. Pe ʼe mole kovi ia te faikole ʼa niʼihi maʼa tatou. Kae ko te ʼu faikole ʼe tonu ke moʼoni pea ke ʼalu tahi mo te finegalo ʼo te ʼAtua (1 Soane 5:14, 15). Ko te Tohi-Tapu ʼe mole ina ʼui mai ʼi he faʼahi ke tou faikole ki he fakamālōlō faka milakuloa. ʼE tou faikole tatou ke tuku mai e Sehova tana tokoni ʼofa lolotoga ʼo te ʼu temi faigataʼa ʼaē ʼe fakatupu ʼe te mahaki.

Ko te Tohi-Tapu ʼe ina fakahā te meʼa ʼaē ʼe feala ke kole ʼe te kau agatonu ʼi tanatou ʼu faikole mokā nātou mahahaki; ʼe ʼui fēnei: “Ko Sehova totonu ʼe tokoni anai ki ai ʼi tona takotoʼaga mahaki; lolotoga tona mahaki ʼe ke fetogi moʼoni anai tona moeʼaga katoa.” (Pesalemo 41:3). Ko te metitasio ki te Folafola ʼa te ʼAtua ʼe tokoni anai kia nātou ʼe nātou maʼu te ʼu mahaki ʼe fakatupu ai te lotovaivai. Neʼe tohi fēnei e te tagata tohi pesalemo: “Ko tou manavaʼofa, e Sehova, neʼe ina fakaloto mālohiʼi tuʼumaʼu pe ʼau. Ka lahi taku ʼu manatu fakatuʼania ia te ʼau, pea ko tau ʼu fakafimālie ʼe nātou alaala toku nefesi.” — Pesalemo 94:18, 19; toe vakaʼi Pesalemo 63:6-8.

Pea tahi foki, ʼe tonu ke tou fakapotopoto ʼo uhiga mo totatou maʼuli, pea ko te Tohi-Tapu ʼe ina tuku mai kia tatou te ʼu tokoni ki te fahaʼi ʼaia. ʼE lelei age te maʼuli ʼo ʼalu tahi mo te ʼu lekula ʼo te Tohi-Tapu ʼi he toloke, suluka, ʼinu kava, pe ko he kai fakavale, pea ka hoko mai te mahaki, pea haga ai leva ki te ʼu fakamālōlō faka milakulo ʼi te mole kei ʼiloʼi he tahi faitoʼo. ʼI hata faikole ke hoko he milakulo mokā kita mahaki, ʼe lelei age pe hata aga fakapotopoto ke kita hāo mokā ʼe feala ʼi te mahaki; ohage la ko hata kai he ʼu meʼa kai lelei ʼe aoga ki tota sino mo kapau ʼe maʼu, pe ʼe ko he kumi ʼo he tokoni faka tōketā poto mo kapau ʼe feala.

Ko te Folafola ʼa te ʼAtua ʼe ina ʼekenaki tatou ke tou taupau maʼu he ʼu ʼatamai ʼe lelei, ʼaē ʼe feala ai ke lelei ki totatou maʼuli fakasino. Koʼeni te tokoni ʼe fai mai e te Tāʼaga Lea: “Ko he loto fakatokatoka ko he maʼuli ia ʼo te kakano, ka ko te maheka ʼe ko he meʼa popo ia ki te ʼu hui.” “Ko he loto ʼe fiafia ko he meʼa lelei ia ohage ko he faitoʼo, kae ko he laumālie kua vaivai ʼe ina fakamoamoa te ʼu hui.” (Tāʼaga Lea 14:30; 17:22). Ko te faikole ki te laumālie maʼoniʼoni ke ina fakatupu ia tatou he loto fakatokatoka mo fiafia ʼe feala aipe ke maʼu ai he ʼu fua lelei ki totatou maʼuli fakasino. — Filipe 4:6, 7.

Kae feafeaʼi te ʼu fakamālōlō faka milakulo?

ʼE moʼoni foki, māʼia mo he tahi ʼe faiga ke maʼuli lelei, ʼe feala aipe ke mahaki. Koteā te meʼa ʼe tonu ke fai? ʼE feala koa ke kovi kia kita ʼi hata ʼalu ki he tahi ʼe faifaitoʼo ʼaki he fakaʼamu ke kita lelei ai? Ei. ʼE tahitahiga te ʼu tagata faifaitoʼo ʼaki te faikole ʼi te temi nei ʼe fai faitoʼo noa. Pea ʼe feala ke puli lahi ai, ʼi ha kita foaki he falā neʼe feala ke fakaʼaoga moʼo totogi ʼaki he ʼu faitoʼo faka tōketā. Pea tahi ʼaē meʼa, koteā te ʼuhiga ʼo te foaki ʼo he falā ki he taʼi hahaʼi ʼe maʼuli ki te hoko tui ʼa te hahaʼi?

Kae ʼui anai ia ʼe ʼihi: ‘ ʼE moʼoni ko te faifaitoʼo faka milakulo ʼe ʼi ai pe tona ʼaoga logo aipe pe ʼe toko siʼi ia nātou ʼaē neʼe ʼolo ki te ʼu “hahaʼi faifaitoʼo” he neʼe nātou maʼu tonatou fīmālie.’ Kae ʼe feala pe ke tou ʼeke pe ʼe ko te ʼu hahaʼi faifaitoʼo ʼaia ʼe nātou tuku moʼoni koa he fīmālie ki he tahi ke talu ai. Ko te Encyclopédie britannique ʼe ina tala fēnei: “Toko siʼi te ʼu kumi neʼe fai ʼo uhiga mo te meʼa lahi ʼe heʼeki ʼiloʼi ʼaē ʼe hu ki te hoko ʼo te ʼu fakamālōlō faka milakulo.”

Tatau aipe pe neʼe ʼi ai he hahaʼi toko siʼi neʼe hage ia kua nātou mālōlō, ʼe mole ko he fakamoʼoni ia ko te gāue ʼa te laumālie maʼoniʼoni. ʼI tana akonaki ʼi te moʼuga, neʼe ʼui fēnei e Sesu: “Tokolahi ʼe nātou ʼui mai anai kia te ʼau ʼi te ʼaho ʼaia: ‘ ʼAliki, ʼAliki, neʼe mole koa la mātou lea faka polofeta ʼaki tou huafa, pea mo kapu te ʼu temonio ʼaki tou huafa, pea mo fai te ʼu gāue mālohi ʼaki tou huafa?’ Kae hoki ʼau fakahā age anai leva kia nātou: “Neʼe heʼeki ʼau ʼiloʼi ʼau ia koutou! Koutou fakamamaʼo atu ia te ʼau, ia koutou ʼaē ʼe gāue ohage ko he ʼu tagata ʼe nātou manuki ki te lao.” (Mateo 7:22, 23). Neʼe toe ʼui foki e Sesu ko ʼihi hahaʼi, logope ʼe mole leleiʼia nātou e te ʼAtua, ʼe nātou fai fakatokaga anai kia nātou ʼaki he ʼu fakaʼiloga: “Heʼe tuʼu ake anai he ʼu kilisito loʼi pea mo he ʼu polofeta loʼi, ʼo nātou fai anai te ʼu fakaʼiloga lahi pea mo te ʼu meʼa fakamanamana, ke faka he ʼaki, mokā ʼe feala, ia te kau fakanofo.” (Mateo 24:24). ʼE feala pe ke tou fakaʼaoga te ʼu palalau ʼaia ki te faitoʼo ʼo te temi nei ʼaki tanatou ʼu gaoʼi, tanatou ʼu tānaki paʼaga ʼe fai tuʼumaʼu pea mo tanatou ʼu fakamālōlō faka milakulo ʼaē ʼe nātou lau.

Ko te ʼu taʼi hahaʼi ʼaia ʼe mole nātou faʼifaʼitaki kia Sesu. Kae ko ai koa ʼaē ʼe nātou faʼifaʼitaki ki ai? Ko te ʼapositolo ko Paulo neʼe ina tuku mai te fakaʼiloga ʼi tana ʼui fēnei: “Ko Satana totonu pe ʼe ina fakaliliu tuʼumaʼu aipe ia ia ko he ʼaselo ʼo te mālama. ʼE mole ko he meʼa fakapuna’maʼuli ia mo kapau ko tana kau minisi ʼe nātou fakaliliu tuʼumaʼu aipe ia nātou ko he ʼu minisi ʼo te faitotonu. Kae ko tanatou ikuʼaga ʼe fakalogo pe ki tanatou ʼu gāue.” (2 Kolonito 11:14, 15). Kapau ʼe mole fai e te ʼu hahaʼi faifaitoʼo te ʼu fakamālōlō ʼaē ʼe nātou ʼui, pea ʼe ko te ʼu hahaʼi loʼi ia nātou, ʼo nātou haʼele ʼi te ala ʼo Satana, ia ia “ ʼaē ʼe ina kakaʼi te kele katoa”. (Fakahā 12:9.) Kae, ʼe feafeaʼi mo kapau ʼe nātou fai he ʼu fakamālōlō, logope tona mole lahi? ʼE mole tonu koa la ke tou ʼui ko te ʼui ʼaia ko tanatou ʼu “gāue mālohi” ʼe fai ʼaki te mālohi ʼo Satana pea mo tana kau temonio? Ei, ko te meʼa pe ʼaia ʼe hoko!

Te temi ʼo te ʼu fakamālōlō moʼoni

Ko te ʼu fakamālōlō faka milakulo ʼaē neʼe fai e Sesu neʼe fai ia ʼaki te tokoni ʼo te laumālie maʼoniʼoni ʼo te ʼAtua. Neʼe fakahā ʼaki ko te fakatuʼutuʼu ʼa te ʼAtua ko te fakamālōlō ʼo te ʼu mahaki ʼo te tagata ʼi te temi ʼaē ʼe ʼaoga ai. Neʼe fakapapau e Sehova ki “te fakamālōlō ʼo te ʼu puleʼaga”. (Fakahā 22:2.) Pea ʼe mole gata ʼaki pe anai tana fakamālōlō te ʼu mahaki kae ʼe ina haga anai ʼo pulihi mo te mate. Ko Soane neʼe ina fakamahino mai ko Sesu neʼe haʼu “koteʼuhi ko ʼaē ʼe haga tui kia te ia ke ʼaua naʼa faka ʼauha, kae ke ina maʼu te maʼuli heʼe gata”. (Soane 3:16.) ʼE ko he fakamālōlō taulekaleka anai ia ka hoko! Ko Sesu ʼe ina toe fai anai te ʼu fakamālōlō ko tona fakamatala ʼi te Tohi-Tapu kae ʼo lahi age leva ia. ʼE inā fakatuʼuake anai mo te ʼu mate (Soane 5:28, 29)! Ko ʼafea koa ʼaē ka hoko ai te meʼa ʼaia?

Mokā fakatuʼu te mālama foʼou ʼo te ʼAtua, ʼaē ʼe ʼiloga mai, kua vave tona hoko. Ko te mālama foʼou ʼaia, ʼaē ʼe fakatuʼu anai ʼi te hili ʼo te puli ʼo heʼe gata ʼo te agakovi ʼaē ʼe fakaʼiloga ʼaki te ʼu faʼahiga meʼa ʼo te tuʼu ʼaenī, ko he tapuakina moʼoni anai ia ki te hahaʼi fuli ʼe totonu tonatou loto. ʼE mole toe ʼi ai anai he mamahi ʼi te mālama ʼaia. “Ko te [ʼAtua] ʼe ina holoholoʼi anai te loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagi laulau, he mamahi. Ko te ʼu meʼa ʼafea kua puli ia.” (Fakahā 21:4). Koʼena he meʼa ʼe mole ʼalu tahi mo te meʼa ʼe tou mamata ki ai ia ʼaho nei!

Kapau ʼe koutou mahaki, koutou faikole ki te ʼAtua ke tokoni kia koutou. Pe ʼe tou mālōlō pe ʼe tou mahaki, koutou ako pe ʼe feafeaʼi anai ʼo he maʼuli heʼe gata mole kita toe mahaki ai. Fakamālohiʼi takotou tui ki te fakapapau ʼaia ʼa te ʼAtua ʼaē ʼe ina fai mai kia tatou ʼo tou ako te ʼu koga lahi ʼo te Tohi-Tapu ʼe talanoa ki ai. Koutou ako pe ʼe feafeaʼi te kua vave fakatuʼu ʼo te tuʼu ʼa Sehova ʼi te fahaʼi ʼaia ʼo fai pe ki te temi ʼaē kua ina fakatotonu. ʼAua naʼa koutou mahalohalo, heʼe ko te Folafola ʼa te ʼAtua ʼe ina tuku mai kia tatou te fakapapau ʼaenī: “ ʼE ina faka ʼauha lelei anai te mate ke talu ai, pea ʼe ko totatou ʼAliki Tuʼi ʼaē ko Sehova ʼe ina haga anai ʼo holoholoʼi te ʼu loʼimata ʼi te ʼu fofoga fuli pe.” — Isaia 25:8.

[Nota ʼi te lalo pasina]

[Paki ʼo te pasina 7]

Ko te ʼu fakamālōlō faka milakulo ʼaē neʼe fai e Sesu kua nātou kaku ki te meʼa ʼaē neʼe fakatuʼutuʼu ki ai.

[Paki ʼo te pasina 8]

Ko Sesu ʼe ina toe fai anai mo ta liliuga te ʼu fakamālōlō faka milakulo.