ʼE Kei Hoko Koa Te ʼu Fakamālōlō Faka Milakulo?

“TUI kia Sesu pea ʼe fakamālōlō anai koe!” Ko te faʼahiga palalau ʼaia neʼe ina uga ia Alexandre, ʼaē neʼe kau ki te ʼēkelesia ʼo te Evaselio, ke tui ko tana toʼo te ʼu meʼa faitoʼo moʼo fakamālōlō ʼo tona mahaki, ʼe hā ai anai ʼe mole feʼauga tana tui. Neʼe tui mālohi ʼe hoki feala anai ke fakamālōlō ia ia ʼaki pe tana tui. Ko Benedita, ko te fafine Katolika, neʼe malave ʼaupito ki tona loto tana logo ki te ʼu fakamālōlō faka milakulo ʼaē neʼe hoko ʼi te sagatualio ʼo Aparecida do Norte, ʼi te potu fenua ʼo São Paulo, ʼi Pelesile. ʼI tana fakaʼaogaʼi te ʼu palalau fakalauʼakau ʼaē neʼe akoʼi age e te tēhina ʼo tana faʼe kia ia, neʼe faikole ia Benedita ki te Notre-Dame ʼo Aparecida, mo Sagato Atonio, pea mo te tahi ʼu “sagato,” ke nātou foaki age kia ia te mālohi ʼaē moʼo fakamālōlō ʼo te ʼu mahaki.

Māʼiape la ʼi te 20 sēkulō ʼaenī, ʼe hage ʼe kei lahi te hahaʼi ʼaē ʼe nātou tui ki te ʼu fakamālōlō faka milakulo​—kae koteā tona tupuʼaga? ʼE lagi lotomamahi te tahi ʼu hahaʼi mokā ʼe mole feala ki te kau tōketā ke nātou fai he meʼa ke siʼisiʼi tonatou ʼu mahaki, tonatou ʼu lavea, pea mo te ʼu mamahi ʼo nātou ʼaē ʼe nātou ʼoʼofa ki ai, tāfito la tanatou ʼu tamaliki. Ko nātou ʼaē ʼe tau mo he mahaki kovi ʼe nātou manatu, ʼuhi ko te totogi kovi ʼo te ʼu meʼa faitoʼo ia ʼaho nei, ʼe mole kovi hanatou kumi he faʼahiga fakamālōlō ʼe fai ʼaki te tui. ʼE sio ʼihi ʼi te televisio ki te ʼu ʼēkelesia pea mo te ʼu tagata kehekehe ʼaē ʼe nātou fakahāhā te ʼu faʼahiga fakamālōlō ʼo te SITA, te lotohoha, te kosea, te mahaki faka ʼuluvale, te hake ʼo te tosio, pea mo te tahi ʼu mahaki. Tatau aipe peʼe tui te hahaʼi peʼe kailoa ki te ʼu milakulo ʼaia, kae ʼe nātou maliu ki te ʼu faʼahiga fakamālōlō ʼaia mokā mole fua lelei he tahi ʼu meʼa faitoʼo. Kae ʼe ʼi ai ʼihi ʼe nātou manatu ʼe nātou mahamahaki ʼuhi ko te ʼu laumālie kovi, pea ʼe mole feala ki te kau tōketā ke nātou tokoni kia nātou.

ʼI te tahi faʼahi, ʼe ʼi ai te hahaʼi ʼaē ʼe nātou fakafeagai mālohi, pea mo nātou fakafisi ki te manatu ʼo te ʼu fakamālōlō faka milakulo ʼaē ʼe fai e te kau “sagato” ʼaē kua mamate, peʼe ko he ʼu tagata faifakalauʼakau. ʼO mulimuli ki te meʼa ʼaē ʼe ʼui e te nusipepa Jornal da Tarde, ʼe manatu te tōketā ko Dráusio Varella, ko te tui ki te ʼu meʼa ʼaia ʼe ina “kākāʼi te tui ʼo ia ʼaē ʼe mole nofo tokaga pea mo ia ʼaē ʼe mole hana ʼamanaki.” ʼE ina toe ʼui fēnei: “ ʼI tanatou ʼamanaki ki te ʼu milakulo, ʼe lahi te hahaʼi neʼe nātou tuku tanatou toʼo te ʼu faitoʼo ʼaē ʼe maʼuhiga kia nātou ʼuhi ko te ʼu hahaʼi kākā ʼaia.” Pea ʼe fakamahino fēnei e te tohi The New Encyclopædia Britannica: “Ki muʼa atu, ko te ʼu fakamālōlō faka pagani neʼe pipiki ki te ʼu potu taputapu pea mo te ʼu toʼotoʼoga faka lotu, pea ʼe manatu te kau tagata popoto ko te ʼu fakamālōlō ʼaia neʼe fai ʼo fakamoe te hahaʼi mo fakaneke nātou ke nātou manatu kua lelei tonatou mahaki, pea neʼe fai ʼi he ʼu ʼaluʼaga faigamālie.” Kae ʼe tokolahi te hahaʼi ʼaē ʼe nātou manatu, neʼe fakamālōlō moʼoni nātou ʼaki he milakulo. ʼI tanatou manatu, neʼe fua lelei te fakamālōlō ʼaia kia nātou!

Ko nātou ʼaē kua nātou ʼiloʼi te Tohi-Tapu, ʼe nātou ʼiloʼi neʼe lahi te ʼu lakaga ʼaē neʼe fakamālōlō ai e Sesu te kau mahaki, ʼo ina fai te faʼahi ʼaia ʼaki te “mālohi . . . ʼo te ʼAtua.” (Luka 9:​42, 43) Koia, ʼe lagi nātou fai anai te fehuʼi ʼaenī, ‘ ʼE kei gāue koa te mālohi ʼo te ʼAtua pea mo fakatupu te ʼu fakamālōlō faka milakulo ʼaia ia ʼaho nei?’ Kapau koia ʼaia, he koʼe ʼe mole maʼu e ʼihi te ʼu fua lelei ʼo tanatou faiga ʼaē ke nātou maʼu he fakamālōlō? Ko tona tupuʼaga koa ko te mole feʼauga ʼo te tui ʼo ia ʼaē ʼe mahaki, peʼe koteʼuhi ʼe mole feʼauga tona ʼu meʼa ʼofa ʼaē ʼe ina foaki? ʼE lelei koa ki he Kilisitiano ke maliu ki te ʼu fakamālōlō faka milakulo mokā hoko ki ai he mahaki kovi ʼe mole feala hona faitoʼo? Pea ʼe toe hoko anai koa te faʼahiga fakamālōlō faka milakulo ʼaē neʼe fai e Sesu? ʼE feala hakotou maʼu te ʼu tali ki te ʼu fehuʼi maʼuhiga ʼaia ʼi te alatike ʼaē ka hoa mai.