Ko Ai ʼAē Neʼe Toe Tupu?

ʼE HAKE fuli anai koa te hahaʼi ki te lagi? Tokolahi ʼe nātou ʼio ki te fahaʼi ʼaia, kae ko Sesu neʼe mole ko tana manatu ʼaia. ʼI tana palalau ʼaē ki te pule takitaki ʼaē ko Nikotemo, ʼaē neʼe haʼu fakafūfū ʼo ʼaʼahi ia ia ʼi te pōʼuli, neʼe fēnei te ʼui age ʼa Sesu: “Mole heʼeki he tagata kua hake ki selo.” — Soane 3:13.

Ko Sesu neʼe ina fakahā kia Nikotemo ʼe hoko anai he temi ʼe tuku anai ki ʼihi hahaʼi te fealagia ʼaē ko te hu ki te Puleʼaga ʼo selo. ʼO ʼuhiga mo nātou ʼaia, neʼe fēnei te ʼui ʼa Sesu: “Mo kapau ʼe mole tupu he tahi ʼi te vai pea mo te laumālie, ʼe mole pe feala ke hu ki te puleʼaga ʼo te ʼAtua. Ko te meʼa ʼaē ʼe tupu ʼi te kakano ʼe kakano aipe ia, pea ko te meʼa ʼaē ʼe tupu ʼi te laumālie ʼe laumālie. ʼAua naʼa ke ōfo ʼi te meʼa ʼaenī ʼe ʼau tala atu: ʼe tonu ke koutou toe tupu.” Kae neʼe feʼekeʼaki e Nikotemo pe ʼe feafeaʼi anai he toe tupu ʼa he tahi. — Soane 3:1-9.

Mahalo ʼe koutou feʼekeʼaki pe la mo koutou, pe koteā te ʼuhiga ʼo te palalau ʼa Sesu. ʼE feala koa ke fakaʼaogaʼi te ʼu palalau ʼaia ki te tafoki fakapuna’maʼuli ʼa te tokolahi ʼaē neʼe nātou logoʼi ia nātou te laumālie maʼoniʼoni ʼo te ʼAtua?

Te ʼu loto hoha pea mo te fakakaukau

Ko ʼihi ʼe nātou ʼui ko te meʼa ʼe feala ke ʼiloʼi ai he tahi neʼe toe tupu, ko te maʼuhiga ʼo te logoʼi ʼo te mālohi ʼo te laumālie maʼoniʼoni. Kae ko totatou loto pea mo totatou fakakaukau ʼe feala ke nātou fakahālaʼi tatou, tāfito la mo kapau ʼe mālohi te hoha ʼo te loto. — Selemia 17:9.

Ko William Sargant, ko te tagata neʼe ina kumi te ʼuhiga mo te ʼu fua ʼa te loto hoha ki te fakakaukau, neʼe ina fakatokagaʼi mai “ke tou tokaga ki te ʼu faʼahiga akonaki tāfito ʼi te lakaga ʼaē ʼe hake te ʼu meʼa ʼi totatou ʼu loto pea ʼe haga totatou ʼatamai ʼo kakaʼi ai tatou”. Koʼeni te fakamatala ʼa Sargant, ko te fua ʼaia ʼo te akonaki ʼo te toe tupu pea mo te mataku ʼaē ʼi te tautea ʼi te afi kakaha ʼo te ʼifeli. Ko ai ʼaē ʼe mole toe fia tupu ke feala ai hana hake ki selo mo kapau la ko te tahi ikuʼaga ko te mamahi ʼo heʼegata ʼi te luo kakaha? ʼE toe ʼui e Sargant ʼi te lakaga ʼaia ʼe hoko ai te ʼu loto hoha, “ko te fakakaukau lelei kua tuku kehe ia, ko to kita ʼatamai lelei ʼe mole kei gāue ia kua mapunusia ia, koia ko te ʼu fakakaukau foʼou pea mo te ʼu akonaki foʼou kua tali gafua pe ia”. — The Mind Possessed.

Koia, ʼe feafeaʼi ki he tahi ke ina ʼui ko te tui ʼaē ki te toe tupu ʼe ko he meʼa ia ʼe “tali lelei” (neʼe mole fakafihiʼi)? Ko te ʼaluʼaga ʼo te poto moʼoni ʼe ko te mulimuli ki te ʼu meʼa fuli ʼaē neʼe ʼeke e te laumālie maʼoniʼoni ki te ʼu hahaʼi faitohi ʼo te Tohi-Tapu ke nātou fakamatala. ʼE fakaloto mālohiʼi te kau kilisitiano ke nātou tauhi ki te ʼAtua ʼaki ‘tonatou ʼatamai’ pea mo vakaʼi peʼe ko meʼa fuli ʼaē ʼe nātou faka tui ki ai ʼe moʼoni. — Loma 12:1, 2; 1 Tesalonika 5:21.

Ko te toe tupu ko he pilivilesio maʼuhiga ʼaupito ʼi te ʼu pilivilesio ʼaē neʼe kua tuku ki te tagata. ʼE ʼi ai tona pikipikiga mo te tuputupu makehe ʼi te fakapapau fakatalakitupua ʼo te ʼAtua. Logope la ko te ʼu meʼa fuli ʼaia ʼe moʼoni, kae ʼe ʼi ai te ʼu fehuʼi ʼe malaga ohage la ko te ʼu fehuʼi ʼaenī: Ko ai ʼaē ʼe toe tupu? Pea ʼe feafeaʼi te fakahoko ʼo te ʼu meʼa ʼaia? Koteā te ʼu ʼamanaki ʼe maʼu anai e te faʼahiga hahaʼi ʼaia? Pea ʼe ko nātou pe koa ʼaia ʼaē ka hāofaki?

[Paki ʼo te pasina 3]

Neʼe feʼekeʼaki e Nikotemo pe ʼe feafeaʼi ʼāpe he toe tupu ʼa he tahi.