Kapite 17

Neʼe Akonaki e Sesu Ia Nikotemo

ʼI TANA kau ki te Pāsikate ʼo te taʼu 30, neʼe fai e Sesu te ʼu fakaʼiloga peʼe ko te ʼu milakulo fakaofoofo. Ko tana ʼu milakulo ʼaia ʼe nātou uga te hahaʼi tokolahi ke nātou tui kia te ia; neʼe toe lave foki te ʼu milakulo ʼaia kia Nikotemo, ko te tagata ʼe kau ʼi te Sanetualio, te Fono lahi ʼo te kau Sutea. ʼE lahi te ʼu meʼa ʼe fia ʼiloʼi e Nikotemo, ko ia neʼe ʼalu ai kia Sesu. Pea neʼe ʼalu ia ʼi te pōʼuli, heʼe mahino ia e lagi ina tuʼania naʼa ʼiloʼi age ia ʼe he tahi kae koviʼia ia ia e te tahi ʼu pule ʼo te kau Sutea.

“Lapi, ko tana ʼui age ʼaia, ʼe mātou ʼiloʼi ko te tagata fai akonaki koe neʼe fekauʼi mai e te ʼAtua, heʼe mole he tahi ʼe ina faʼa fai te ʼu fakaʼiloga ʼaenī ʼe ke fai, mo kapau ʼe mole kau te ʼAtua mo ia.” Neʼe tali age e Sesu kia Nikotemo, ko te feala ʼo te hū ki te Puleʼaga ʼo te ʼAtua ʼe maʼua ke kita ‘toe tupu’.

E feafeaʼi koa he toe tupu ʼa he tahi? “ ʼE feala koa hana toe hū ki te falega fānau ʼo tana faʼe pea toe tupu mai? ” ko te fehuʼi ʼaia ʼa Nikotemo.

Kailoa, ko te toe tupu mai ʼe mole ko ia ʼaia. “ ʼE mole feala ke hū he tahi ki te puleʼaga ʼo te ʼAtua mokā ʼe mole tupu ia ʼi te vai pea mo te laumālie”, ko te fakamahino age ʼaia ʼa Sesu. ʼI te temi ʼaē neʼe papitemaʼi ai Sesu pea hifo ai te laumālie maʼoniʼoni kia te ia, ko te temi ʼaia neʼe tupu ai “ ʼi te vai pea mo te laumālie”. Pea neʼe toe tala fēnei foki e te ʼAtua mai te lagi ʼi te moʼi temi pe ʼaia: ‘Ko ia nei ko toku ʼAlo, ʼaenī ku ʼau fiafia ʼaupito ia te ia.’ ʼAki te ʼu palalau ʼaia, neʼe fakahā e te ʼAtua kua ina fakatupu tona foha fakalaumālie ʼe ina maʼu te fealagia ʼaē ʼi he ʼaho ke hū ki te Puleʼaga ʼo selo. Pea ki muli age, ʼi te Penikosite ʼo te taʼu 33, ko ʼihi tisipulo ʼaē kua ʼosi papitemaʼi ʼe nātou tali anai te laumālie maʼoniʼoni pea ʼe nātou toe tutupu ai anai ʼaki te meʼa ʼaia ka hoko kia nātou ko te ʼu foha fakalaumālie ʼo te ʼAtua.

Kae ko te gāue ʼa te ʼAlo ʼo te ʼAtua ʼi tona ʼuhiga tagata ʼaē neʼe fekauʼi mai ai ʼe maʼuhiga ʼaupito ia. Neʼe ʼui age e Sesu kia Nikotemo: “Ohage pe ko te hiki ake e Moisese te gata ʼi te toafa, ʼe toe feiā pe mo te Foha ʼo te tagata ʼe tonu ke hiki ake, koteʼuhi ke feala ai ki ʼaē ʼe tui kia te ia ke ina maʼu te maʼuli heʼegata.” ʼIo, ohage pe ko te kau Iselaele ʼaē neʼe uʼusia e te ʼu gat kafokona, ʼo maʼua ai ke nātou sisio ki te gata kapa ʼaē neʼe fakatuʼu e Moisese ke feala ai hanatou maʼuʼuli, ʼe toe feiā aipe mo te hahaʼi fuli, ʼe tonu ke nātou tui ki te ʼAlo ʼo te ʼAtua ke nātou hāo mai te mate ʼaē kua fakatūʼa ia nātou ki ai.

ʼO ʼuhiga mo te ʼofa ʼo Sehova ʼaē neʼe ina fakahā ʼi te faʼahi ʼaia, neʼe toe ʼui age e Sesu kia Nikotemo: “Heʼe ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼegata.” Koʼena te fakahā e Sesu ʼi Selusalemi ʼi te hili pe ʼo māhina e ono ki te kamata ʼo tona minisitelio, neʼe ina fakahā lelei ko ia ko te meʼa gāue ʼaē ʼe fakaʼaoga e Sehova ʼAtua moʼo hāofaki ʼo te malamanei.

Neʼe ina toe fakamahino fēnei age kia Nikotemo: “He neʼe mole fekauʼi e te ʼAtua tona ʼAlo ki te malamanei, ke ina fakamāuʼi te malamanei”, ko tona faka ʼuhiga ʼe mole ko he fai ʼo he fakamāu ki ai, pe ko hona faka lākahalaʼi ke tupu ai he fakaʼauha ʼo te tagata fuli pe, kae, “ke hāofaki te malamanei ʼaki ia ia”.

Ko Nikotemo ʼi tana manavasiʼi, neʼe haʼu kia Sesu ʼi te pōʼuli. Koia neʼe lelei ai ke fakaʼosi te fai palalau ʼa Sesu pea mo ia ʼaki te ʼu palalau ʼaenī: “Koia, koʼeni te tupuʼaga ʼo te fakamāu: ko te mālama [ʼaē ʼe fakatātā e Sesu ʼi tona maʼuli pea mo tana akonaki] neʼe haʼu ki te malamanei, kae ko te tagata neʼe fia fai age ia ki te fakapōʼuli ʼi te mālama, koteʼuhi ko tana ʼu gāue neʼe kovi. Heʼe ko ʼaē ʼe ina fai te ʼu meʼa ʼaē ʼe kovi ʼe fehiʼa ia ki te mālama pea ʼe mole haʼu ia ki te mālama, koteʼuhi ke ʼaua naʼa tapuʼi tana ʼu gāue. Kae ko ʼaē ʼe ina fai te meʼa ʼaē ʼe moʼoni ʼe haʼu ia ki te mālama, koteʼuhi ke fakahā tana ʼu gāue neʼe fai ia ʼo felogoi mo te ʼAtua.” Soane 2:23 ki te 3:21; Mateo 3:16, 17; Gāue 2:1-4; Faka au 21:9.

▪ Koteā te meʼa ʼaē neʼe tupu ai te ʼalu ʼa Nikotemo kia Sesu, pea koteā te tupuʼaga ʼo tana ʼalu ʼi te pōʼuli?

▪ Koteā te faka ʼuhiga ʼo te ‘toe tupu’?

▪ Neʼe fakatā feafeaʼi koa e Sesu te tuʼulaga ʼaē ʼe ina fai ke tou maʼuʼuli ai?

▪ Koteā te faka ʼuhiga ʼo te ʼui ʼaē neʼe mole haʼu Sesu ʼo fakamāuʼi te malamanei?