ʼE Tou Maʼu Te Ako Mai Ia Nikotemo
“KAPAU e i ai he tahi e fia haù o mulimuli mai ia te au, ke fakafisi kia te ia totonu, ke ina too tona [“pou fakamamahi,” MN ] i te aho fuape pea ke mulimuli mai ia te au.” (Luka 9:23) Neʼe tali lelei te fakaafe ʼaia e te kau tautai agavaivai pea mo te tagata tānaki tukuhau neʼe fehiʼaʼinaʼi. Neʼe nātou situʼa kia meʼa fuli kae nātou muliʼi ia Sesu.—Mateo 4:18-22; Luka 5:27, 28.
Ko te fakaafe ʼa Sesu ʼe kei fai pe ia ʼaho nei, pea tokolahi neʼe nātou tali kiai. Kae ko ʼihi ʼaē ʼe nātou leleiʼia tanatou ako mo te kau Fakamoʼoni ʼa Sehova, ʼe kei faigataʼa hanatou ‘fakafisi kia nātou totonu pea mo toʼo tonatou pou fakamamahi.’ ʼE mole heʼeki nātou fia tali te gāue ʼaia pea mo te pilivilesio lahi ʼaē ke nātou liliu ko he ʼu tisipulo ʼa Sesu.
He koʼe ʼe mole foimo tali e ʼihi te fakaafe ʼa Sesu pea mo foaki tonatou maʼuli kia Sehova ʼAtua? ʼE moʼoni, ko nātou ʼaē ʼe mole nātou ʼiloʼi te ʼu akonaki faka Kilisitiano Sutea ʼo ʼuhiga mo he ʼAtua pe e tahi, ʼe lagi ʼaoga anai kia nātou ʼaia he temi loaloaga ʼi muʼa ʼo hanatou mahino katoa ki te maʼuli ʼo he Tupuʼaga māfimāfi. Kae tatau aipe mo kapau kua nātou fakamoʼoni ʼe maʼuli moʼoni te ʼAtua ʼaia, kae ko ʼihi ʼe mole heʼeki nātou fia mulimuli ia Sesu. ʼE lagi nātou tuʼaniaʼi tonatou ʼu kāiga pea mo tonatou ʼu kaumeʼa mo kapau ʼe nātou liliu ko he ʼu Fakamoʼoni ʼa Sehova. Ko ʼihi ʼe mole nātou tokagaʼi kua nounou te temi ʼaē ʼe tou maʼuʼuli ai, pea ʼe nātou faiga ke ʼiloa nātou pea mo maʼu meʼa. (Mateo 24:36-42; 1 Timoteo 6:9, 10) Tatau aipe peʼe koteā tona ʼaluʼaga, kae kia nātou ʼaē ʼe mole heʼeki fia liliu ko he ʼu tisipulo ʼa Sesu, ʼe ʼi ai te ako ʼe tou maʼu ʼi te hisitolia ʼo Nikotemo, neʼe ko te Sutea maʼu meʼa ʼi te temi ʼo Sesu.
Ko Te ʼu Fealagia Taulekaleka
Hili pe māhina e ono ki te kamata ʼo te minisitelio ʼa Sesu ʼi te kele, neʼe mahino kia Nikotemo ko Sesu neʼe ‘ko te tagata faiako neʼe haʼu mai te ʼAtua.’ Neʼe malave kia ia te ʼu milakulo ʼaē neʼe heʼeki faʼa fualoa neʼe fai e Sesu ʼi te Pāsikate ʼo te taʼu 30 ʼo totatou temi ʼi Selusalemi, pea neʼe haʼu ʼi te pōʼuli kia Sesu he neʼe tui kia te ia pea neʼe ina fia ʼiloʼi he tahi age ʼu meʼa ʼo ʼuhiga mo te tagata faiako ʼaia. Neʼe fakahā age e Sesu ʼi te temi ʼaia kia Nikotemo te moʼoni loloto ʼaē ke “[toe] tupu,” ke feala hana hū ki te Puleʼaga ʼo te ʼAtua. ʼI te ʼaluʼaga ʼaia, neʼe toe ʼui e Sesu te ʼu palalau ʼaenī: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli.”—Soane 3:1-16.
ʼI ʼamanaki taulekaleka neʼe tuku age kia Nikotemo! Neʼe lava liliu ko he kaugā gāue ʼa Sesu, pea mo sio tonu ki te ʼu faʼahi kehekehe ʼo te maʼuli ʼo Sesu ʼi te kele. Ko Nikotemo neʼe ko te takitaki ʼo te kau Sutea pea mo te tagata faiako ʼo Iselaele, pea neʼe ina ʼiloʼi lelei te Folafola ʼa te ʼAtua. Neʼe toe mahino lelei kia ia ʼi tana sio kia Sesu neʼe ko te tagata faiako neʼe fekauʼi mai e te ʼAtua. Neʼe fia mahino ia Nikotemo ki te ʼu meʼa fakalaumālie, pea neʼe agavaivai ia. Neʼe ko he meʼa faigataʼa ki he tahi ʼe kau ʼi te telepinale lahi ʼo te kau Sutea, hana fakamoʼoni neʼe ko te foha ʼo te tagata tufuga ʼakau ʼaē neʼe fekauʼi mai e te ʼAtua! Ko te ʼu kalitate fuli ʼaia neʼe ʼaoga moʼo liliu ko he tisipulo ʼa Sesu.
Neʼe lahi te fia mahino ʼa Nikotemo ki te tagata ʼaia mai Nasaleti. Hili taʼu e lua vaelua, ʼi te Lafeti ʼo Te ʼu Fale Lau, neʼe kau Nikotemo ʼi te fono ʼi te Sanetualio. ʼI te temi ʼaia, ko Nikotemo “neʼe [kei] kau ia nātou.” Ko te kau pelepitelo pule pea mo te kau Faliseo neʼe nātou fekauʼi te ʼu tagata fekau moʼo puke ia Sesu. ʼI tanatou liliu mai neʼe ʼui maʼa nātou: “ ʼE mole heʼeki ʼi ai he tahi age tagata kua palalau feiā.” Neʼe kamata laukovi te kau Faliseo kia nātou: “ ʼE kua toe kau koa ia mo koutou ʼi te fakahēʼi? ʼE ʼi ai koa la he tahi ʼi te kau pule pe ko he tahi ʼi te kau Faliseo ʼe tui kia te ia? Kae ko te hahaʼi ʼaenā ʼaē ʼe mole nātou ʼiloʼi te Lao, ʼe ko te kau malaʼia!” Neʼe mole kei feala he nofo fakalogologo ʼa Nikotemo, pea neʼe lea fēnei: “Ko tatatou lao ʼe ina fakamāuʼi koa he tagata ka heʼeki fakalogo muʼa ia ia pea mo ʼiloʼi te meʼa ʼaē ʼe ina fai?” Pea neʼe fatufatuʼi ia ia e te kau Faliseo: “ ʼE ke toe haʼu koa la koe, mo koe, mai Kalilea? Vakaʼi pea ke sio ai ʼe mole he polofeta ʼe tuʼu ake anai mai Kalilea.”—Soane 7:1, 10, 32, 45-52, MN.
Hili māhina e ono, ʼi te Pāsikate ʼo te taʼu 33 ʼo totatou temi, neʼe kau ia Nikotemo ki te toʼo ifo ʼo te sino ʼo Sesu ʼaē neʼe tautau ʼi te pou fakamamahi. Ko ia mo Sosefo ʼo Alimatea ko te tahi tagata ʼo te Sanetualio, neʼe nā teuteuʼi te sino ʼo Sesu ki tona ʼavaifo. Moʼo fai te faʼahi ʼaia, neʼe haʼu ia Nikotemo mo “he mile kua huʼi pea mo te aloese” ʼe teitei paona teau ʼi te falā Loma, ko tona fakatatau ko paona e 72 ʼi te falā Pilitania. ʼE ko he toe falā lahi. Neʼe tonu foki ke toe lototoʼa heʼe sio anai te kau Faliseo kia ia pea mo Sesu, ʼaē neʼe nātou ʼui ʼe ko te “tagata kaka.” Neʼe nā foimo teuteuʼi te sino ʼo Sesu ki tona ʼavaifo, pea neʼe nā tuku ki te falemaka foʼou neʼe tuʼu ōvi mai. Kae māʼiape la mo te temi ʼaia, neʼe heʼeki fakahā e Nikotemo ko ia ko he tisipulo ʼa Sesu!—Soane 19:38-42; Mateo 27:63; Maleko 15:43.
He Koʼe Neʼe Lotolotolua
Neʼe mole fakahā e Soane ʼi tana evaselio pe koʼe neʼe mole foimo tali e Nikotemo ‘ke ina toʼo tona pou fakamamahi’ pea mo muli ia Sesu. Kae neʼe ina fakahā mai te ʼu ʼaluʼaga ʼe lagi feala ai ke tou mahino ki te lotolotolua ʼa te Faliseo ʼaia.
ʼUluaki, neʼe ʼui e Soane neʼe “alu [te pule Sutea] i te pouli kia Sesu.” (Soane 3:2) ʼE ʼui fēnei e te tagata fai Tohi-Tapu: “Neʼe mole mataku ia Nikotemo ʼi tana haʼu ʼaē ʼi te pōʼuli, kae ko tana mole loto ʼaē ke tāʼofi e te hahaʼi tana fai palalau mo Sesu.” Kae neʼe talanoa ia Soane kia Nikotemo ʼo ina ʼui ʼe ko “te tagata ʼaē neʼe kua haʼu ʼi muʼa atu kia [Sesu] ʼi te pōʼuli” pea ʼi te koga tohi pe ʼaia, ʼe toe palalau kia Sosefo ʼo Alimatea ʼo ina ʼui neʼe “ko te tisipulo fakafūfū ʼa Sesu, ʼuhi ko tana mataku ki te kau Sutea.” (Soane 19:38, 39, MN ) Koia lagi neʼe ʼalu ia Nikotemo kia Sesu ʼi te pōʼuli he neʼe “[mataku] ki te kau Sutea,” ohage pe ko ʼihi ʼi te temi ʼaia neʼe nātou tuʼania naʼa maʼu nātou mo Sesu.—Soane 7:13.
ʼE mole heʼeki koutou fia liliu koa ko he tisipulo ʼa Sesu ʼuhi heʼe koutou tuʼania tokotou famili, peʼe ko tokotou ʼu kaumeʼa, peʼe ko tokotou ʼu kaugā gāue? ʼE ʼui e te tāʼaga lea: “Ko te mataku ki te tagata, koʼena te meʼa ʼaē ʼe liliu ko he hele.” ʼE koutou lava tauʼi feafeaʼi te mataku ʼaia? ʼE toe ʼui e te tāʼaga lea: “Kae ko ia ʼaē ʼe falala kia Sehova ʼe puipui anai ia.” (Tāʼaga Lea 29:25) Kapau ʼe koutou loto ke mālohi takotou falala kia Sehova, pea ʼe tonu ke koutou mahino lelei ko te ʼAtua ʼe lagolago anai kia koutou. Koutou faikole kia Sehova, pea koutou kole ke ina foaki atu te lototoʼa moʼo fai ʼo ni ʼu tonu, tatau aipe mo kapau ʼe mole faʼa maʼuhiga te ʼu tonu ʼaia ʼo ʼuhiga mo takotou tauhi lotu. ʼAki te temi, ʼe tuputupu anai takotou tui pea mo takotou falala ʼaē kia Sehova, ʼo lava ai hakotou fai he ʼu tonu maʼuhiga ʼe ʼalutahi mo te finegalo ʼo te ʼAtua.
ʼI te tahi faʼahi, lagi neʼe mole fakafisi ia Nikotemo kia ia totonu ʼuhi ko tona tuʼulaga pea mo tona ʼiloa ʼi tona ʼuhiga pule. ʼI te temi ʼaia, lagi neʼe kei pipiki fau ki tona tuʼulaga ʼaē ʼi te Sanetualio. ʼE faigataʼa koa hakotou liliu ko he tisipulo ʼa Kilisito heʼe koutou matataku naʼa puli tokotou tuʼulaga māʼoluga ʼi te tuʼu ʼaenī peʼe ko he ʼu fealagia ʼe koutou lava maʼu ai? Ko te ʼu meʼa ʼaia ʼe mole lava fakatatau mo te maʼuhiga ʼo te pilivilesio ke koutou tauhi ki te ʼAtua Māʼoluga ʼo te ʼatulaulau, ʼaē ʼe lotolelei ke ina fakahoko takotou ʼu kole ʼaē ʼe ʼalutahi mo tona finegalo.—Pesalemo 10:17; 83:18; 145:18.
Ko te tahi tupuʼaga ʼo te holomuli ʼa Nikotemo, ʼe lagi ko tona ʼu koloā. ʼI tona ʼuhiga Faliseo lagi neʼe mulimuli ki te manatu ʼa ʼihi, ʼaē neʼe “manumanu paaga.” (Luka 16:14) ʼE ʼiloga tana maʼu koloā ʼi te ʼu meʼa ʼofa totogi kovi ʼaē neʼe ina foaki, ohage ko te takaiga mila pea mo te aloesi. Ko ʼihi ia ʼaho nei ʼe nātou tuku ki he tahi temi ia tanatou fakahoko te ʼu meʼa ʼaē ʼe kole ki he Kilisitiano, ʼuhi heʼe nātou tuʼaniaʼi fau tonatou ʼu koloā. Kae neʼe fakaloto mālohiʼi fēnei e Sesu tana kau tisipulo: “Tuku takotou hoha ki tokotou nefesi, pe koteā anai he meʼa ke koutou kai pe ko he meʼa ke koutou ʼinu, peʼe ki tokotou sino, pe koteā anai he meʼa ke koutou kofuʼi. . . . [Heʼe] ʼiloʼi pe e takotou Tāmai ʼaē ʼe ʼi selo, ʼe ʼaoga kia koutou te ʼu meʼa fuli ʼaia. Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kia koutou.”—Mateo 6:25-33, MN.
Neʼe Lahi Te ʼu Meʼa Neʼe Mole Ina Maʼu
Tou fakatokagaʼi ko te hisitolia ʼo Nikotemo ʼaē ʼe talanoa tokotahi pe kiai te Evaselio ʼo Soane, ʼe mole ina ʼui pe neʼe liliu ko he tisipulo ʼa Sesu. ʼE ʼui e te talatisio, neʼe liliu ia Nikotemo ko te tisipulo ʼa Sesu pea neʼe papitema, pea neʼe gaohi koviʼi e te kau Sutea, pea neʼe fakahifo ʼi tona tuʼulaga, pea neʼe kapu leva ʼi Selusalemi. Tatau aipe pe koteā ʼaē neʼe hoko, kae ko te meʼa ʼaē ʼe tou ʼiloʼi papau: Neʼe lahi te ʼu meʼa neʼe mole ina maʼu ʼuhi he neʼe mole ina foimo muliʼi ia Sesu ʼi tana kei maʼuli ʼi te kele.
Kanapaula neʼe kamata muliʼi e Nikotemo ia Sesu ʼi te temi ʼaē neʼe ʼuluaki felāveʼi ai mo te ʼAliki, neʼe feala pe ke liliu ko he tisipulo ʼofainaʼi ʼa Sesu. ʼAki te mahino ʼa Nikotemo, pea mo tana sio mamaʼo, pea mo tana agavaivai, pea mo tana ʼiloʼi te ʼu meʼa ʼaē ʼaoga kia ia ʼi te faʼahi fakalaumālie, neʼe feala pe ke liliu ko he tisipulo makehe. Ei neʼe feala ke logo ki te ʼu akonaki fakaofoofo ʼa te Tagata Faiako Lahi, ke ina maʼu he ʼu ako maʼuhiga mai te ʼu lea fakatātā ʼa Sesu, ke sio ki te ʼu milakulo fakaofoofo ʼaē neʼe fai e Sesu, pea mo maʼu he mālohi ʼi te ʼu tokoni fakaʼosi ʼaē neʼe fai e Sesu ki tana kau ʼapositolo. Kae neʼe mole ina maʼu te ʼu pilivilesio fuli ʼaia.
Neʼe lahi te ʼu meʼa neʼe mole maʼu e Nikotemo ʼuhi ko tona lotolotolua. ʼI te ʼu meʼa ʼaia neʼe kau ai te fakaafe ʼofa ʼaenī ʼa Sesu: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau toho pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau toho ʼe mālū pea ko taku kavega ʼe maʼamaʼa.” (Mateo 11:28-30, MN ) Neʼe mole maʼu e Nikotemo te pilivilesio ʼaē ke ina maʼu fakahagatonu te fakafimālie ʼaē mai ia Sesu!
Kae e Feafeaʼi Kia Koutou?
Talu mai te 1914, kua tou ʼiloʼi ko Sesu Kilisito kua Hau ʼi te Puleʼaga ʼo te ʼAtua ʼi selo. ʼI tana fakakikite te ʼu meʼa ʼaē ka hoko anai ʼi tana ʼi henī, neʼe ina ʼui fēnei: “Pea ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.” (Mateo 24:14) ʼI muʼa ʼo te fakaʼauha, ʼe tonu anai ke fakahoko te gāue fai faka mafola ʼi te malamanei katoa. ʼE fiafia ia Sesu Kilisito ʼi tana sio ki te ʼu hahaʼi heʼe haohaoa ʼe nātou muli ia te ia. ʼE feala mo koutou ke koutou kau ki te gāue ʼaia.
Neʼe mahino kia Nikotemo ko Sesu neʼe haʼu mai te ʼAtua. (Soane 3:2) ʼI takotou ako te Tohi-Tapu, ʼe lagi feiā mo koutou. Lagi neʼe koutou fai he ʼu fetogi ʼi tokotou maʼuli ke ʼalutahi mo te ʼu fakatuʼutuʼu ʼa te Tohi-Tapu. ʼE lagi koutou kau ki te ʼu fono ʼa te kau Fakamoʼoni ʼa Sehova moʼo fakaloloto ia takotou mahino ki te Tohi-Tapu. Pea ʼe fakavikiviki ki takotou ʼu faiga ʼaia. Kae neʼe toe ʼaoga kia Nikotemo ke mole gata pe ki tana mahino ko Sesu neʼe fekauʼi mai e te ʼAtua. Neʼe tonu “ke fakafisi ia kia ia totonu pea ke ina toʼo tona pou fakamamahi ʼi te ʼaho fuli pe, pea ke muli tuʼumaʼu ia [Sesu].”—Luka 9:23, MN.
Tou fakalogo ʼaki totatou loto katoa ki te meʼa ʼaē ʼe ʼui mai e te ʼapositolo ko Paulo. Neʼe ina tohi fēnei: “ ʼI tamatou gāue fakatahi mo ia, ʼe mātou toe kole mamahi atu kia koutou ke ʼaua naʼa ʼalunoa takotou tali ia te ʼofa makehe ʼo te ʼAtua. Heʼe ina ʼui fēnei: ‘Neʼe ʼau fagono kia te koe ʼi te temi faigamālie, pea ʼi te ʼaho ʼo te hāofaki neʼe ʼau tokoni kia te koe.’ Koʼeni! Ko te temi ʼaenī ʼe faigamālie tāfito. Koʼeni! Ko te temi ʼaenī ʼe ko te ʼaho ʼo te hāofaki.”—2 Kolonito 6:1, 2, MN.
ʼI te temi ʼaenī, koutou fakatuputupu te tui ʼaē ʼe ina uga anai koutou ke koutou muliʼi ia Sesu. Ke feala hakotou fai te faʼahi ʼaia, koutou metitasioʼi te ʼu meʼa ʼaē ʼe koutou lolotoga ako ʼi te Tohi-Tapu. Koutou faikole kia Sehova, pea mo koutou kole ke tokoni atu ke koutou maʼu te taʼi tui ʼaia. ʼAki takotou sio ki tana tokoni, ʼe uga ai anai koutou e tokotou loto fakafetaʼi pea mo tokotou ʼofa kia te ia, ‘ke koutou fakafisi kia koutou totonu pea mo koutou toʼo tokotou pou fakamamahi ʼi te ʼaho fuli pe pea mo koutou muliʼi tuʼumaʼu ia Sesu Kilisito.’ ʼE koutou fai anai koa te meʼa ʼaia?
[Paki ʼo te pasina 9]
ʼI te kamata, neʼe lototoʼa ia Nikotemo ʼo fakamoʼoni kia Sesu
[Paki ʼo te pasina 9]
Logola te ʼu fakafeagai, kae neʼe kau ia Nikotemo ki te teuteuʼi ʼo te sino ʼo Sesu ki tona ʼavaifo
[Paki ʼo te pasina 10]
Ko te ako pea mo te faikole ʼe nā fakamālohiʼi koutou ke koutou muliʼi ia Sesu
[Paki ʼo te pasina 10]
ʼE koutou tali anai koa te pilivilesio ʼaē ke koutou gāue ʼo fakalogo ki te takitaki ʼa Sesu Kilisito?