Ke Koutou Haʼele ʼAki Te Lototahi

“Akoʼi ʼau (...) ê Sehova! (...) Gaohi ke tahi toku loto ke ʼau manavasiʼi ki tou huafa.” — Pesalemo 86:11.

1. ʼE fakapale feafeaʼi e Sehova tana kau kaugana agatonu?

‘Ê SEHOVA, ʼe ke ʼAtua, ia koe tokotahi.’ (Pesalemo 86:8, 10). Neʼe faikole ia Tavite ki te ʼAtua ʼaki he loto ʼe fonu ʼi te fakafetaʼi. ʼO toe feiā aipe mo Tavite ʼi muʼa ʼo tona fakanofo hau ki te Iselaele katoa, neʼe hāofaki ia ia e Sehova mai ia Saulo pea mo te kau Filisitine. Koia ʼaē neʼe feala ke ina hiva ʼo fēnei: “Ko Sehova ʼe ko toku maka, pea mo toku kolo tau, pea ko Ia ʼaē ʼe ina fakahāo ʼau. Mo ia ʼaē ʼe agatonu ʼe ke agatonu anai ki ai.” (2 Samuele 22:2, 26). Neʼe taupau e Sehova tana tagata kaugana agatonu ʼi te ʼu fihifihia lahi. Neʼe feala pe ke tuku e Tavite tana falala ki tona ʼAtua agatonu, kae neʼe ʼaoga kia ia ke taki e te ʼAtua. ʼI te temi ʼaia neʼe fēnei te kole ʼa Tavite ki te ʼAtua: “Akoʼi ʼau ki tou ala, ê Sehova!” — Pesalemo 86:11.

2. Koteā te meʼa neʼe foaki mai e Sehova ke tupu ai hotatou akoʼi e ia?

² Neʼe mole fia pipiki ia Tavite ki te ʼu manatu pea mo te ʼu filosofia ʼo te malamanei. Neʼe loto ia ia ke “akoʼi e Sehova”, ohage ko te ʼui ʼa te polofeta ʼa te ʼAtua ki muli age (Isaia 54:13). ʼE lagi neʼe feala pe ke metitasio ia Tavite ki te ʼu tohi peʼe mo te ʼu hiva ʼo te Tohi-Tapu ʼaē neʼe ina maʼu ʼi tona temi. Koia, ko te ako ʼaia mai ia Sehova neʼe maʼuhiga kia te ia! ʼI te ʼaluʼaga ʼaē ʼo totatou akoʼi e Sehova, ʼe feala ke tou uʼa kai ki te ʼu tohi fuli e 66 ʼo te Tohi-Tapu, feiā aipe mo te ʼu tuʼuga tohi faka tohi-tapu ʼaē ʼe tufa mai e te “tagata kaugana agatonu mo poto”. (Mateo 24:45.) Ohage ko Tavite, tou fetapā kia Sehova, ko tona laumālie ʼaē ʼe feala ke ina tokoniʼi tatou ke tou kumi “te ʼu meʼa ʼaē neʼe teuteuʼi e te ʼAtua maʼa nātou ʼaē ʼe ʼoʼofa kia te ia, (...) feiā aipe mo te ʼu meʼa loloto ʼa te ʼAtua”. — 1 Kolonito 2:9, 10.

3. Ko te ʼu faʼahi fea ʼaē ʼe feala ke lelei ai kia tatou te ako ʼo te Tohi-Tapu?

³ ʼE maʼu e te Tohi-Tapu te ʼu tali ki te ʼu faʼahiga fehuʼi pea mo te ʼu fihifihia ʼe feala ke felāveʼi mo tatou ʼi totatou maʼuli. “Heʼe ko te ʼu meʼa fuli pe ʼaē neʼe tohi ʼi te temi muʼa neʼe tohi ia moʼo ako ʼo tatou, koteʼuhi ke tou maʼu ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu ia te falala.” (Loma 15:4). Ko te fakaʼaogaʼi ʼo te ako mai ia Sehova ʼe ina fakamālohiʼi anai tatou ke tou faʼa kātakiʼi te ʼu faigataʼaʼia, pea mo fakafimālieʼi tatou ʼi te ʼu temi mamahi, pea mo taupau fakamālohi aipe te falala ki te Puleʼaga ʼi totatou ʼu loto. ʼE feala ke tou fiafia ʼi tatatou lau te Folafola ʼa te ʼAtua pea mo metitasioʼi “ ʼi te ʼaho mo te po”, ke liliu te poto ʼaē ʼe maʼu mai te Tohi-Tapu “ko he fuʼu ʼakau ia ʼo te maʼuli ʼo nātou ʼe nātou tapiki ki ai, pea ko nātou ʼaē ʼe nātou puke maʼu ʼe tonu ke kalagaʼi nātou ko he hahaʼi fiafia”. — Pesalemo 1:1-3; Tāʼaga Lea 3:13-18; vakaʼi ia Soane 17:3.

4. ʼO ʼuhiga mo ʼatatou ʼu gāue, koteā te faʼifaʼitaki neʼe tuku e Sesu kia tatou?

⁴ Ko te ʼAlo ʼo te ʼAtua, ko Sesu, ʼe toe fakahigoaʼi foki ko te “ ʼAlo ʼo Tavite”, neʼe ina kumi tuʼumaʼu te ako ʼa Sehova (Mateo 9:27)a. ʼE ina ʼui fēnei: “Ko te ʼAlo ʼe mole feala hana fai he meʼa ʼi tona loto faʼitaliha, kae ʼe ina fai pe te meʼa neʼe sio ʼe fai e te Tāmai. He ko meʼa fuli ʼaē ʼe fai ʼe Ia ʼaenī, ko ia ʼaē ʼe toe fakatatau ki ai te ʼAlo.” (Soane 5:19; 8:28). Neʼe tuku e Sesu te faʼifaʼitaki kia tatou ke tou “mulimuli fakalelei tona ʼu ala”. (1 Petelo 2:21.) Koutou fakakaukauʼi age muʼa! Kapau ʼe tou ako ohage ko tona fai ʼaē e Sesu, ʼi te ʼu ʼaluʼaga fuli pe ʼe feala anai ke tou fai te meʼa ʼaē ʼe loto ki ai ia Sehova ʼo ʼuhiga mo tatou. Ko te ala ʼa Sehova e ko te ala pe ʼaia tuʼumaʼu ʼe totonu.

5. Koteā te “moʼoni”?

⁵ ʼE toe ʼui e Tavite: “ ʼE ʼau haʼele anai ʼi tou moʼoni.” (Pesalemo 86:11). Hili ki ai te ʼu taʼu ʼe lauʼi afe, neʼe fēnei te fehuʼi ʼa Pilato ki te ʼAlo ʼo Tavite ko Sesu: “Koteā te moʼoni?” Neʼe fēnei te tali ʼa Sesu ki te fehuʼi ʼaia, ʼo ʼui maʼana kia Pilato: “Ko toku Puleʼaga ʼe mole kau ki te malamanei, ko koe tonu ʼe ke ʼui ʼe ʼau hau. Neʼe ʼau tupu ko te potu ʼaenī, pea neʼe ʼau hau ki te malamanei ko te potu ʼaenī: ko te fakamoʼoni ki te moʼoni.” (Soane 18:33-38). ʼAki tana ʼu palalau ʼaia neʼe fakahā e Sesu ko te maʼuhiga ʼo te moʼoni ko te Puleʼaga faka mesia. ʼIo, ʼe talanoa tāfito te Tohi-Tapu ki te tāpuhā ʼo te huafa ʼo Sehova ʼaki te Puleʼaga. — Esekiele 38:23; Mateo 6:9, 10; Fakahā 11:15.

6. Moʼo haʼele ʼi te moʼoni, koteā te meʼa ʼe tonu ke tou tokaga anai kiai?

⁶ Koteā te faka ʼuhiga ʼo te haʼele ʼi te moʼoni? Ko tona faka ʼuhiga ke tokagaʼi tāfito ʼi totatou maʼuli te falala ʼaē ki te Puleʼaga. ʼE tonu ke tou maʼuliʼi te moʼoni ʼo te Puleʼaga. ʼE tonu ke tou fakamuʼamuʼa tāfito te ʼu meʼa ʼo te Puleʼaga, ʼo faiga fakamalotoloto ʼi te ʼu fealagia ʼaē ʼe tou maʼu moʼo tala te moʼoni ʼo te Puleʼaga, ohage ko te faʼifaʼitaki ʼa Sesu (Mateo 6:33; Soane 18:37). ʼE mole feala ke tou haʼele fakapikopiko ʼi te moʼoni, ʼo kita fai he faʼahiga gāue moʼo fakaʼiloga te faʼahi ʼaia kae ʼe tou leleiʼia age tatou te ʼu mālōlō peʼe mo fai he gāue ʼe fakamaʼua kiai totatou temi peʼe “tauhi (...) te Koloā ohage he kau kaugana”. (Mateo 6:24.) ʼE feala ke tou hēhē ki te ʼu ala ʼaia, ʼo mole toe feala tatatou maʼu te ‘ala lauveliveli ʼaē ʼe fakatau ki te maʼuli’. ʼAua naʼa tou mamaʼo ʼi te ala ʼaia (Mateo 7:13, 14)! ʼAki tana Folafola pea mo tana kautahi, ko totatou Tagata Faiako Lahi ko Sehova, ʼe ina fakamālama te ala, ʼo ina ʼui fēnei: “ ‘Koʼeni te ala. Koutou haʼele ai’, kapau ʼe koutou ʼolo ki te faʼahi mataʼu, peʼe koutou ʼolo ki te faʼahi hema.” — Isaia 30:21.

Ko te manavasiʼi ʼe tau

7. ʼE feafeaʼi koa hatatou “faka lototahi” ʼo totatou ʼu loto?

⁷ ʼE toe ʼui e te faikole ʼa Tavite ʼi te vaega 11: “Gaohi ke tahi toku loto ke ʼau manavasiʼi ki tou huafa.” Ohage ko Tavite, ʼe tou loto anai ke tahi totatou loto, ke katoa, ʼo ʼuhiga mo te fai ʼo te finegalo ʼo te ʼAtua. ʼE felogoi te meʼa ʼaia mo te tokoni ʼaenī ʼa Moisese: “Pea ʼi te temi nei, ê Iselaele, koteā ʼaē ʼe kole atu kia te koe Sehova, tou ʼAtua, ke ke manavasiʼi kia Sehova, tou ʼAtua, koteʼuhi ke ke haʼele ʼi tona ʼu ala fuli, pea mo ʼofa kia ia, pea mo gāue kia Sehova, tou ʼAtua, ʼi tou loto katoa pea mo tou nefesi katoa; ke ke taupau te ʼu folafola ʼa Sehova pea mo tana ʼu fakatuʼutuʼu ʼe ʼau fakatotonu atu ʼi te ʼaho nei ke ke fīmālie?” (Teutalonome 10:12, 13). ʼIo, ke tou maʼu te fīmālie ʼe tonu ke tou uga totatou loto pea mo totatou nefesi ke tauhi kia Sehova. ʼE tou fakahā te manavasiʼi ʼe tau mo tona huafa māfimāfi. Ko te faka ʼuhiga ʼo te huafa ʼo Sehova, “ ʼe ina fakahoko”, tāfito la ʼo ʼuhiga mo te fakahoko ʼaē ʼo tana ʼu fakatuʼutuʼu lahi. ʼE toe fakatā tona pule māʼoluga ki te ʼatulaulau katoa. ʼO ʼuhiga mo te tauhi fakaʼapaʼapa ki te ʼAtua ʼaliki, ʼe mole tou hē ia anai ʼi te manavahe ʼaē ki te tagata kelekele. Ko totatou loto ʼe mole lotolotolua anai ia. Kae ʼe tou manavasiʼi anai ʼi te fai ʼo he meʼa ʼe mole leleiʼia anai e Sehova, te Tuʼi Fakamāu Māʼoluga pea mo te ʼAliki, ʼaē ʼe fakalogo kia ia totatou maʼuli. — Isaia 12:2; 33:22.

8, 9. a) Koteā te faka ʼuhiga ʼo te talanoa ʼaē ko te “mole kau ki te malamanei”? b) Koteā te ʼu meʼa ʼe tonu anai ke tou fai koteʼuhi ʼe sioʼi tatou e te hahaʼi?

⁸ Māʼia pe hatatou felāveʼi mo he ʼu fakakovi pea mo he ʼu fakataga, ʼe tou muliʼi anai te faʼifaʼitaki ʼa Sesu ʼo tou lototoʼa ke ʼaua naʼa tou kau ki te mālama agakovi ʼaenī (Soane 15:17-21). ʼAua leva naʼa ʼui ko te ʼu tisipulo ʼa Sesu neʼe nātou maʼuʼuli ohage ko he kau mōnike. Neʼe ʼui e Sesu ʼi tana faikole ki tana Tāmai: “ ʼE ʼau kole atu, ʼaua naʼa ke toʼo kehe nātou ʼi te mālama, kae ke ke tokaga kia nātou ʼuhi ko te agakovi. ʼE mole nātou kau ʼi te malamanei, ohage ko ʼau ʼe mole ʼau kau ʼi te malamanei. Fakamaʼa ia nātou ʼaki te moʼoni; ko tau folafola ʼe moʼoni. Ohage ko tau fekauʼi mai ʼau ki te malamanei, mo ʼau foki, ʼe ʼau fekauʼi nātou ki te malamanei.” (Soane 17:15-18). Ohage ko Sesu, ʼe fekauʼi mo tatou ke tou tala te moʼoni ʼo te Puleʼaga. Neʼe faigafua te fakaōvi kia Sesu. Neʼe fīmālie te hahaʼi ʼi tana faʼahiga fai ako (Vakaʼi ia Mateo 7:28, 29; 11:28, 29; Soane 7:46). ʼE tonu pe foki ke toe feiā aipe mo tatou.

⁹ ʼE tonu anai ko ʼatatou ʼu gāue ʼofa, pea mo te ʼaluʼaga ʼo tatatou faiteuteu, feiā aipe mo he felogoi lelei pea mo he agalelei ke tali ia tatou feiā mo tatatou logo e te hahaʼi ʼaē ʼe loto totonu. ʼE tonu ke tou tekeʼi te loto noa, te ʼu kofu heʼe fakaʼapaʼapa, te ʼu fakatahi ʼaē ʼe feala ke nātou taki tatou ki te ʼu meʼa ʼo te malamanei, pea mo taʼomia ʼi he faʼahiga maʼuli faʼifaʼitaliha ʼe tou sio kiai ʼi te malamanei. ʼI tatatou kua “liliu ko te meʼa ʼe sioʼi ʼi te malamanei, feiā aipe mo te kau ʼaselo, pea mo te tagata”, ʼe ia tatou te maʼua ʼaē ke tou gāue ʼi te temi fuli pe ki te tauhi pea mo maʼuli ohage ko he kau kilisitiano faʼifaʼitaki (1 Kolonito 4:9; Efesi 5:1-4; Filipe 4:8, 9; Kolose 4:5, 6). ʼE tonu ke tahi totatou loto ʼo aʼu ki te fakaʼosi.

10. ʼE feafeaʼi te manatuʼi e Sehova ia nātou ʼaē ʼe nātou lototahi tonatou loto ʼi te gāue taputapu?

¹⁰ Ko tatou ʼaē neʼe faka lototahi totatou loto ki te manavasiʼi ʼo te huafa ʼo Sehova, tou metitasio ki tana ʼu fakatuʼutuʼu lahi pea mo tou maʼuli ʼaki te gāue taputapu, ʼaē ʼe manatuʼi anai e Sehova. “ ʼO ʼuhiga mo Sehova, ko tona ʼu mata ʼe taka ʼi te kele katoa, ke ina fakahā tona mālohi maʼa nātou ʼaē ʼe katoa tonatou loto kia te ia.” (2 Fakamatala 16:9). Ko te lea faka polofeta ʼo ʼuhiga mo totatou temi, ʼe tohi fēnei ia Malakia 3:16: “ ʼI te temi ʼaia, ko nātou ʼaē ʼe manavasiʼi kia Sehova neʼe nātou fai palalau ia nātou, takitokotahi pe mo tona kaumeʼa, pea neʼe tokaga ia Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kia Sehova pea mo nātou ʼaē ʼe fakaanau ki tona huafa.” ʼE feala ke faka lototahi totatou loto ki te manavasiʼi katoa ʼa Sehova!

Te loto ofa ʼa Sehova

11. ʼE feafeaʼi anai te fakahā ʼo te loto ʼofa ʼo Sehova ʼo ʼuhiga mo te ʼu hahaʼi agatonu?

¹¹ ʼE ko he faikole ʼa Tavite fakamalotoloto! ʼE ina toe ʼui fēnei: “ ʼE ʼau viki anai koe, ê Sehova, toku ʼAtua, ʼi toku loto katoa, pea ʼe ʼau faka kolōlia anai tou huafa ki he ʼu temi ʼe mole ʼiloʼi honatou gataʼaga, koteʼuhi ko tou finegaloʼofa kia te ʼau ʼe lahi, pea neʼe ke hāofaki toku nefesi ʼi te Seole, ʼi tona koga meʼa mālalo ʼosi.” (Pesalemo 86:12, 13). Kua tuʼa lua ʼi te pesalemo ʼaenī, ʼe fakavikiviki e Tavite te finegaloʼofa ʼo Sehova — tona ʼofa agatonu. ʼAki te lahi ʼo te ʼofa ʼaia, ʼe feala ke ina taupau he ʼu ʼaluʼaga ʼe hage ʼe mata faigataʼa. ʼI te kapu haʼele e Saulo ia Tavite ʼi te toafa, ʼe mahalo pe neʼe hage kia Tavite ka mate ia. Neʼe hage pe kua ina felāveʼi mo te Seole — te loloto ʼo te faitoka. Kae neʼe fakahāo ia ia e Sehova! ʼO toe feiā aipe, ko Sehova neʼe ina haga ʼo fakafimālie tana kau kaugana ʼi te temi nei ʼi te ʼu faʼahiga meʼa fakaofoofo, pea mo ina lagolago ia nātou ʼaē neʼe nātou taupau tanatou agatonu ʼo aʼu ki te mate. Ko nātou fuli neʼe agatonu ʼe nātou maʼu anai tonatou fakapale, lagi ʼe ko he toe fakatuʼuake mai te mate. — Vakaʼi ia Sopo 1:6-12; 2:1-6, 9, 10; 27:5; 42:10; Tāʼaga Lea 27:11; Mateo 24:9, 13; Fakahā 2:10b.

12. Neʼe feafeaʼi te fia hā pea mo te agamālohi ʼa te kau takitaki lotu, pea koteā anai tonatou fakapale?

¹² ʼO ʼuhiga mo nātou ʼaē neʼe nātou fakataga ia Tavite, ʼe fēnei te pāuʼi ʼa Tavite: “E ʼAtua, ko te kau fia hā neʼe nātou fakafeagai kia te ʼau; pea ko te kautahi ʼa te kau fakahau neʼe ina kumi toku nefesi, pea neʼe mole nātou tuku koe ki ʼonatou muʼa.” (Pesalemo 86:14). Ia ʼaho nei, ko te kau fakataga ko te kau takitaki ʼo te keletiate. ʼE nātou ʼui ʼe nātou tauhi ki te ʼAtua kae ʼe nātou fetogi tona huafa maʼoniʼoni ʼaki te kupu ʼaē ko te “ ʼAliki” pea mo nātou fakahā ia ia ohage ko he tahi tolu faka misitelio ʼaē ʼe mole tuʼu ʼi he potu ʼo te Tohi-Tapu. ʼE ko he fia hā ia! Fakatahiʼi atu ki te meʼa ʼaia, neʼe nātou fakalotoʼi te kau pule faka politike ke tapuʼi pea mo pilisoniʼi te kau Fakamoʼoni ʼa Sehova, pea ʼe lahi te ʼu fenua ʼi te kele ʼe nātou lolotoga fai te meʼa ʼaia. Ko te kau takitaki lotu ʼaē ʼe nātou laukovi te huafa ʼo te ʼAtua, ʼe nātou utu anai tonatou fakapale, ʼo kau ai mo te ʼu koga faka paomutu ʼo te Papiloni Lahi. — Fakahā 17:1, 2, 15-18; 19:1-3.

13. Koteā te ʼu kalitate ʼe fakahā e Sehova ʼi tana fakamahino ʼo tona loto ʼofa?

¹³ Meʼa lelei foki ko te faikole ʼa Tavite ʼe toe ʼui fēnei: “Kae ko koe, ē Sehova, ko koe ko te ʼAtua loto ʼutaki pea mo manavaʼofa, tuai ʼi te ʼita pea mo mahu ʼi te loto ʼofa pea mo te moʼoni.” (Pesalemo 86:15). ʼIo, ko te ʼu kalitate ʼo totatou ʼAtua ʼe māʼoluga. ʼAki te ʼu palalau ʼaia ʼe tou manatuʼi te kole ʼaē ʼa Moisese ʼi te Moʼuga ʼo Sinai ke sio ki te kolōlia ʼa Sehova. Neʼe fēnei te tali ʼa Sehova: “Ko ʼau, ʼe au fai anai ʼi ʼou muʼa te ʼu meʼa lelei fuli ʼe ʼau maʼu pea ʼe ʼau kalagaʼi anai te huafa ʼo Sehova ʼi ʼou muʼa.” Kae neʼe fēnei tana fakatokaga kia Moisese: “ ʼE mole feala ke ke sio ki toku fofoga, koteʼuhi ʼe mole he tagata ʼe feala ke sio kia te ʼau pea maʼuli.” Pea tahi ʼaē, ko Sehova neʼe hifo mai te ʼao, ʼo kalaga fēnei: “Sehova, Sehova, ʼAtua agaʼofa pea mo fakamolemole gafua, tuai ʼi te ʼita pea mohu ʼi te loto ʼofa pea mo te moʼoni.” (Ekesote 33:18-20; 34:5, 6). Neʼe fai e Tavite te ʼu palalau feiā ʼi tana faikole. Ko te ʼu taʼi kalitate ʼaia ʼa Sehova ʼe maʼuhiga ʼaupito age ia ʼi he faʼahiga meʼa fakasino ʼe hā! ʼI te ʼu meʼa kua hoko kia tatou, ʼe mole tou leleiʼia koa te loto ʼofa ʼa Sehova ʼaē ʼe ʼiloga ʼi te ʼu kalitate fakaofoofo ʼaia?

“He fakaʼiloga ʼe hā ʼaki ai te loto ʼofa”

14, 15. ʼE feafeaʼi te foaki e Sehova ki tana kau kaugana “he fakaʼiloga ʼe hā ʼaki ai te loto ʼofa”?

¹⁴ ʼE toe kolekole e Tavite te tapuakina ʼa Sehova, ʼo ina ʼui fēnei: “Mafuli mai kia te ʼau pea mo fakahā mai tou ʼofa. Ke ke foaki he mālohi ki tau kaugana, pea mo hāofaki te tama ʼo tau kaugana fafine. Ke ke fai ʼo ʼuhiga mo ʼau he fakaʼiloga ʼe hā ʼaki ai te loto ʼofa, ke sio kiai ia nātou ʼaē ʼe nātou fehiʼa kia te ʼau pea ke nātou ufiufi. Koteʼuhi ko koe, ê Sehova, neʼe ke hāofaki ʼau pea neʼe ke fakafimālie ʼau.” (Pesalemo 86:16, 17). ʼE fakamoʼoni ia Tavite ko te ‘tama ʼo te kaugana fafine ʼa Sehova’, ʼe tonu ke pipiki anai mo ia kia Sehova. ʼO toe feiā aipe kia tatou fuli kua foaki totatou maʼuli kia Sehova pea mo kaugana ki tana gāue ʼi te temi nei. ʼE ʼaoga kia tatou te mālohi ʼo Sehova ʼaē ʼe ina hāofaki ʼaki tona laumālie maʼoniʼoni. Koia, ʼe tou kole ai ki totatou ʼAtua ke ina fai ʼo ʼuhiga mo tatou “he fakaʼiloga ʼe hā ʼaki ai te loto ʼofa”. Ko te loto ʼofa ʼo Sehova ʼe pipiki ki te ʼu kalitate matalelei neʼe kua tou felogoi kiai. ʼAki te meʼa ʼaia, koteā te fakaʼiloga ʼe feala ke tou falala ʼe foaki mai e Sehova kia tatou?

¹⁵ Ko Sehova ko te Tufa lahi ʼo te “meʼa ʼofa matalelei fuli pea mo te mōlaga haohaoa fuli” pea ʼe manavaʼofa, ohage ko tona fakapapau mai ʼaē e Sesu, ʼi tana foaki “te laumālie maʼoniʼoni kia nātou ʼaē ʼe kole age kia te ia”! (Sake 1:17; Luka 11:13.) Ko te laumālie maʼoniʼoni ʼe ko he meʼa ʼofa fakaofoofo ia mai ia Sehova! ʼAki te laumālie maʼoniʼoni, ʼe foaki e Sehova te loto fiafia, māʼia pe la ʼi te temi fakataga. ʼIo, ko te kau ʼapositolo ʼa Sesu, ʼi tonatou temi fakataga neʼe feala pe ke nātou tala fakafiafia ko te ʼAtua neʼe ina foaki te laumālie maʼoniʼoni kia nātou ʼaē ʼe nātou fakalogo kia te ia ohage ko honatou pule (Gāue 5:27-32). Tuʼumaʼu pe ko te fiafia ʼo te laumālie maʼoniʼoni ʼe ina fai kia nātou “he fakaʼiloga ʼe hā ʼaki ai te loto ʼofa”. — Loma 14:17, 18.

16, 17. a) Koteā te fakaʼiloga ʼo tona loto ʼofa neʼe foaki e Sehova kia Paulo pea mo Palanapasi? b) Koteā te fakaʼiloga neʼe foaki kia nātou ʼaē neʼe fakatagaʼi ʼi Tesalonika?

¹⁶ ʼI te lolotoga ʼo tanatou folau faka misionea ʼi te Asia Hihifo, neʼe felāveʼi ia Paulo pea mo Palanapasi mo te ʼu faigataʼaʼia, mo te ʼu fakataga mālohi. ʼI tana fagonogono ʼi Atiokia ʼo Pisitia, ko te kau Sutea neʼe nātou fakafisi ki tanā logo. Koia, neʼe nā mafuli ai leva ki te hahaʼi ʼo te ʼu puleʼaga. Koteā tona fua? “ ʼI tanatou logo ki te meʼa ʼaia, ko te hahaʼi ʼo te ʼu puleʼaga neʼe nātou fakafiafia aipe pea mo faka kolōlia te folafola ʼa Sehova, pea ko nātou fuli ʼaē neʼe tau lelei mo te maʼuli heʼegata neʼe nātou liliu ʼo tui.” Kae neʼe lagaʼi e te kau Sutea te maveuveu, koteʼuhi ke kapu ʼi te kolo te ʼu misionea ʼaia. Ko nāua ʼaia pea mo te kau tui foʼou neʼe nātou lotovaivai koa ʼo ʼuhiga mo te meʼa ʼaia? Kailoa ia. Neʼe nātou “fonu aipe ʼi te fiafia mo te laumālie maʼoniʼoni ia te kau tisipulo”. (Gāue 13:48, 52.) Neʼe foaki e Sehova kia nātou te fakaʼiloga ʼe hā ʼaki ai te loto ʼofa.

¹⁷ Ki muli age, ko te kokelekasio foʼou ʼi Tesalonika neʼe felāveʼi mo te fakataga. Koia ʼaē neʼe fai ai e Paulo te tohi moʼo fakafimālie ʼo nātou, ʼo ina uga ke nātou loto faʼa kātaki ʼi te fakataga. Neʼe nātou “tali te folafola ʼi te lotolotoiga ʼo te ʼu fakataga ʼe mālohi ʼaupito, ʼaki te fiafia ʼo te laumālie maʼoniʼoni”. (1 Tesalonika 1:6.) Ko “te fiafia ʼo te laumālie maʼoniʼoni” neʼe ina fakaloto mālohiʼi aipe ia nātou ohage ko he fakaʼiloga mai te ʼAtua ʼaē ʼe manavaʼofa pea mo agalelei, tuai ʼi te ʼita, pea mo mahu ʼi te loto ʼofa pea mo te moʼoni.

18. Neʼe fakahā feafeaʼi e ʼotatou ʼu tēhina ʼo te potu Hahake ʼo te Eulopa tanatou leleiʼia te loto ʼofa ʼa Sehova?

¹⁸ ʼI te ʼu taʼu ʼaenī kua hili atu, neʼe fakahā e Sehova tona loto ʼofa ki ʼotatou ʼu tēhina ʼi te potu Hahake ʼo te Eulopa, ʼo ina fakalainoaʼi ia nātou ʼaē neʼe fehiʼa kia nātou — te hahaʼi ʼaē neʼe nātou fakatagaʼi nātou. Neʼe mole heʼeki faʼa fualoa te faka ʼāteaina nātou mai te popūla ʼe lauʼi hogofulu taʼu, neʼe loto faʼa kātaki aipe te ʼu tēhina ʼaia, ko te tokolahi neʼe nātou tau mo te ʼu faigataʼaʼia faka ekonomike ʼaupito. Kae, ko te “fiafia ʼo te laumālie maʼoniʼoni” neʼe ina fakafimālie aipe ia nātou. Koteā te fiafia lahi neʼe feala ke nātou maʼu ʼi tanatou fakaʼaoga ʼo tonatou ʼāteaina ʼo ʼuhiga mo te faka mafola ʼo te gāue? Tokolahi te hahaʼi neʼe fagono ki tanatou gāue, ohage ko tona fakamatala ʼi te ʼu fakatahi pea mo tona fakaʼiloga ʼaē ʼi te ʼu papitema. — Vakaʼi ia Gāue 9:31.

19. ʼE feafeaʼi koa hatatou fakaʼaoga maʼa tatou te ʼu palalau ʼaē ia Pesalemo 86:11?

¹⁹ Ko meʼa fuli neʼe tou talanoa kiai ʼi te alatike ʼaenī pea mo ʼaē kua hili atu ʼe nātou talanoa ki te faikole ʼa Tavite kia Sehova: “Akoʼi ʼau (...) ê Sehova! (...) Gaohi ke tahi toku loto ke ʼau manavasiʼi ki tou huafa.” (Pesalemo 86:11). Tou taupau maʼu te ʼu palalau ʼaia ʼo te kogaʼi tohi ʼo te taʼu 1993 mokā ʼe tou gāue ʼaki totatou loto katoa moʼo lagolago te ʼu meʼa ʼo te Puleʼaga pea mo fakafetaʼi ki te manavaʼofa ʼo totatou ʼAtua, te Tuʼi ʼAliki ko Sehova.

[Nota ʼi te lalo pasina]

ʼE feafeaʼi anai takotou tali?

◻ Koteā te meʼa ʼe tou fakahā mokā ʼe tou faikole fēnei, “Akoʼi ʼau (...) ê Sehova!”?

◻ Koteā te faka ʼuhiga ʼaē ke faka lototahi totatou ʼu loto moʼo manavasiʼi ki te huafa ʼo Sehova?

◻ ʼE fakahā feafeaʼi anai e Sehova tona loto ʼofa ki te hahaʼi agatonu?

◻ ʼE foaki feafeaʼi e Sehova kia tatou “he fakaʼiloga ʼe hā ʼaki ai te loto ʼofa?”

[Talanoa ʼo te pasina 16]

Ko te kogaʼi tohi ʼo te taʼu 1993: “Akoʼi ʼau (...) ê Sehova! (...) Gaohi ke tahi toku loto ke ʼau manavasiʼi ki tou huafa.” — Pesalemo 86:11.

[Paki ʼo te pasina 15]

Ko Sehova ko te maka pea mo te kolo tau kia nātou ʼaē ʼe nātou haʼele fakahagatonu ʼi te moʼoni.

[Paki ʼo te pasina 18]

Ko te fakatahi faka malamanei ʼa te kau Fakamoʼoni ʼa Sehova ko te “Kau toʼo ʼo te mālama” ʼi St. Petersburg, Lusia, ʼi sūnio, neʼe ko tona hahaʼi ko te toko 46 214 pea ko te toko 3 256 neʼe papitema. ʼE ko he meʼa fakaofoofo kia nātou ʼaia neʼe nātou tau mo te loto ʼofa ʼa Sehova, ʼaki te “fiafia ʼo te laumālie maʼoniʼoni”!