Ko Sehova—Te Faʼifaʼitaki Lahi ʼo Te Agalelei
“Koutou vikiʼi ia Sehova ʼo te ʼatu kautau, heʼe ko Sehova ʼe agalelei!”—Selemia 33:11.
1. He koʼe ʼe tou fia vikiʼi te agalelei ʼa te ʼAtua?
KO SEHOVA ʼATUA ʼe agalelei ʼi hona ʼaluʼaga haohaoa. Neʼe ʼui fēnei e te polofeta ko Sakalia: “ ʼE lahi ʼaupito tana agalelei!” (Sakalia 9:17) Koia ʼe hā te agalelei ʼa te ʼAtua ʼi te ʼu meʼa fuli ʼaē neʼe ina teuteuʼi ʼi te kele ke tou fiafia ai. (Senesi 1:31) ʼE mole feala anai ke tou mahino katoa ki te ʼu lao kehekehe fuli ʼaē neʼe fakatuʼu e te ʼAtua, ʼi te temi ʼaē neʼe ina fakatupu ai te ʼatulaulau. (Tagata Tānaki 3:11; 8:17) Kae ko te ʼu kiʼi meʼa veliveli pe ʼaē kua tou mahino kiai, ʼe ina uga tatou ke tou vikiʼi te agalelei ʼa te ʼAtua.
2. Koteā te faka ʼuhiga ʼo te agalelei?
2 Koteā te agalelei? ʼE ko te kalitate maʼuhiga ʼo te aga ʼaē ʼe tonu ke fai. Kae ʼe mole faka ʼuhiga pe ki takita tekeʼi te ʼu meʼa ʼaē ʼe kovi. Ko te agalelei, ʼaē ʼe kau ki te ʼu fua ʼo te laumālie, ʼe ko he kalitate ʼe hā mokā tou fai he aga ʼe lelei pea mo ʼaoga. (Kalate 5:22, 23) ʼE tou fakahā te agalelei mokā tou fai he ʼu meʼa ʼe lelei pea mo ʼaoga ki te hahaʼi. ʼI te tuʼu ʼo te faʼahiga meʼa ʼaenī, ko te meʼa ʼaē ʼe lelei ki ʼihi ʼe lagi kovi ia ki ʼihi. Kae kapau ʼe tou fia maʼu te tokalelei pea mo te fiafia, pea ʼe tonu ke ʼi ai he lekula e tahi ʼo ʼuhiga mo te agalelei. Ko ai ʼaē ʼe tonu ke ina fakatuʼu te lekula ʼaia?
3. Koteā ʼaē ʼe fakahā ia Senesi 2:16, 17 ʼo ʼuhiga mo te lekula ʼo te agalelei?
3 ʼE fakatuʼu e te ʼAtua te lekula ʼo ʼuhiga mo te agalelei. ʼI te kamataʼaga ʼo te hisitolia ʼo te tagata, neʼe ko Sehova ʼaē neʼe ina fakatotonu ki te ʼuluaki tagata: “Ko te ʼu fuʼu ʼakau fuli ʼo te ʼōloto ʼe feala anai hau kai ki ai ʼo aʼu ki tau mākona. Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke ke kai kiai, heʼe ko te ʼaho pe ʼaē ka ke kai anai kiai, ʼe ke mate moʼoni anai.” (Senesi 2:16, 17) Ei, ʼe tonu ke fakalogo te hahaʼi ki tonatou Tupuʼaga moʼo ʼiloʼi te meʼa ʼaē ʼe lelei pea mo te meʼa ʼaē ʼe kovi.
ʼE Mole Tāu Mo Tatou Tana Agalelei
4. Koteā ʼaē neʼe fai e te ʼAtua maʼa te malamanei ʼi te agahala ʼa Atama?
4 ʼI te temi ʼaē neʼe agahala ai ia Atama pea mo ina fakafisi ke fakatuʼu e te ʼAtua te ʼu lekula ʼo ʼuhiga mo te agalelei, neʼe feala ai ke mole kei ʼi ai he ʼamanaki ʼa te malamanei ki he fiafia heʼegata ʼi he maʼuli haohaoa. (Senesi 3:1-6) Kae ʼi muʼa ʼo te tutupu ʼa te hōloga ʼo Atama ʼo nātou maʼu te agahala pea mo te mate, neʼe fakakikite e te ʼAtua ʼe tupu anai he Hāko haohaoa. ʼI tana palalau totonu ki te “gata afea,” ia Satana te Tevolo, neʼe tala fēnei e Sehova: “ ʼE ʼau tuku anai he fehiʼa ia koe mo te fafine, ʼi tou hāko pea mo tona hāko. Pea ʼe ina fakavolu anai koe ʼi tou ʼulu pea ʼe ke fakavolu anai ia ia ʼi tona muliʼi vaʼe.” (Apokalipesi 12:9; Senesi 3:15) Neʼe ko te fakatuʼutuʼu ʼa Sehova ke hāofaki te malamanei agahala. Neʼe fakahā e Sehova tana agalelei ʼaē neʼe mole tāu mo tatou, ʼo ina fai te fakatuʼutuʼu moʼo hāofaki nātou ʼaē ka tui anai ki te sakilifisio faitotogi ʼo tona ʼAlo ʼofaina.—Mateo 20:28; Loma 5:8, 12.
5. Logola ʼe holi totatou loto ki te meʼa ʼaē ʼe kovi, kae he koʼe ʼe feala pe ke tou fakahā he faʼahiga agalelei?
5 ʼE moʼoni, ʼuhi ko te agahala ʼa Atama, ʼe holi totatou loto ki te meʼa ʼaē ʼe kovi. (Senesi 8:21) Kae meʼa lelei, heʼe tokoni mai Sehova kia tatou ke tou maʼu he faʼahiga aga ʼe lelei. Ka tou haga maʼuliʼi te ʼu meʼa ʼaē neʼe tou ako ʼi tana Tohi-Tapu, pea ʼe tou liliu ai ʼo ‘popoto ki te hāofaki’ pea mo ‘tou katoa moʼo fai te ʼu gāue lelei fuape,’ kae ʼe toe feala ai foki ke tou fai te meʼa ʼaē ʼe lelei kia mata ʼo te ʼAtua. (2 Timoteo 3:14-17) Kae ke fua lelei kia tatou te ako ʼo te Tohi-Tapu pea mo te fakahā ʼo te agalelei, ʼe tonu ke tou maʼu te manatu ʼa te tagata fai pesalemo ʼaē neʼe hiva fēnei: “ ʼE ke agalelei [Sehova] pea ʼe ke fai te meʼa ʼaē ʼe lelei. Akoʼi mai kia te ʼau tau ʼu lekula.”—Pesalemo 119:68.
ʼE Vikiʼi Te Agalelei ʼa Sehova
6. ʼI te ʼosi ʼave e te Hau ko Tavite te aleka ʼo te fuakava ki Selusalemi, koteā te ʼu palalau neʼe hivaʼi e te kau Levite?
6 Neʼe fakamoʼoni e Tavite, te Hau ʼo Iselaele ʼāfea ki te agalelei ʼa te ʼAtua pea neʼe ina kumi Tana takitaki. Neʼe ʼui fēnei e Tavite: “ ʼE agalelei pea mo agatonu ia Sehova. Ko te tupuʼaga la ʼaia ʼo tana akoʼi te kau agahala ʼi te ala.” (Pesalemo 25:8) ʼI te ako fakaʼatua ʼaē neʼe foaki ki te kau Iselaele, neʼe kau kiai te ʼu lao maʼuhiga e hogofulu—Te ʼu Folafola e Hogofulu—neʼe tohi ki te ʼu foʼi maka e lua pea mo taupau ʼi te puha taputapu neʼe higoa ko te aleka ʼo te fuakava. ʼI te ʼosi ʼave e Tavite te Aleka ki Selusalemi, te kolo lahi ʼo Iselaele, neʼe hiva e te kau Levite te hiva ʼaenī: “Koutou vikiʼi Sehova, heʼe agalelei, heʼe ko tana agaʼofa ʼe mole ʼiloʼi hona gataʼaga.” (1 Fakamatala 16:34, 37-41) Neʼe lagi fiafia ʼaupito te hahaʼi ʼi tanatou logo ki te hivaʼi ʼo te ʼu palalau ʼaia e te kau Levite!
7. Koteā ʼaē neʼe hoko ʼi te temi ʼaē neʼe tuku ai te Aleka ki te Potu Taputapu ʼAupito pea ʼi te ʼosi faikole ʼa Salomone?
7 Neʼe toe fai te ʼu palalau fakavikiviki ʼaia ʼi te ʼaho ʼaē neʼe fakatapu ai te fale lotu ʼo Sehova, ʼaē neʼe laga e Salomone te foha ʼo Tavite. ʼI te ʼosi fakatuʼu ʼo te aleka ʼo te fuakava ʼi te Potu Taputapu ʼAupito ʼo te fale lotu foʼou ʼaia, neʼe vikiʼi e te kau Levite ia Sehova “heʼe agalelei, heʼe ko tana agaʼofa ʼe mole ʼiloʼi hona gataʼaga.” ʼI te lakaga ʼaia, neʼe hoko ai te milakulo he neʼe ʼi ai te ʼao ʼi te fale lotu neʼe ina fakatātā te ʼafio faka kolōlia ʼa Sehova. (2 Fakamatala 5:13, 14) ʼI te ʼosi faikole ʼa Salomone, “ko te afi neʼe to mai te lagi pea ina tutu te holokoseta pea mo te ʼu sakilifisio.” ʼI tanatou sio ki te meʼa ʼaia, “ko te ʼu foha fuli ʼo Iselaele . . . neʼe nātou tulolo atu aipe, ʼo tuku tonatou fofoga ki te kele, ki te lauʼi simā pea mo nātou tuʼutuli pea mo fakamālo kia Sehova, ‘heʼe agalelei, heʼe ko tona agaʼofa ʼe mole ʼiloʼi hona gataʼaga.’ ” (2 Fakamatala 7:1-3) Hili ʼaho e 14 ʼaē neʼe nātou fakafiafia ai, neʼe toe liliu te kau Iselaele ki tonatou ʼu loto fale, neʼe “nātou fiafia pea mo logo lelei ʼi tonatou loto ʼuhi ko te agalelei ʼa Sehova kia Tavite mo Salomone pea mo Iselaele tana hahaʼi.”—2 Fakamatala 7:10.
8, 9. (a) Logola te vikiʼi e te kau Iselaele ia Sehova ʼuhi ko tana agalelei, koteā te meʼa ʼaē neʼe nātou fai ki muli age? (b) ʼAki ia Selemia, koteā ʼaē neʼe fakakikite ʼo ʼuhiga mo Selusalemi, pea neʼe hoko feafeaʼi te lea faka polofeta ʼaia?
8 Kae neʼe mole haga mulimuli te kau Iselaele ki tanatou ʼu hiva fakavikiviki ʼaē ki te ʼAtua. ʼAki te temi, ko te hahaʼi ʼo Suta neʼe nātou ‘vikiʼi ia Sehova ʼaki pe tonatou ʼu laugutu.’ (Isaia 29:13) Neʼe mole nātou mulimuli ki te ʼu lekula ʼa te ʼAtua ʼo ʼuhiga mo te agalelei, kae neʼe nātou kamata fai te meʼa ʼaē ʼe kovi. Koteā te ʼu meʼa kovi ʼaē neʼe nātou fai? Neʼe nātou tauhi tamapua, mo fai te ʼu felāveʼi fakasino heʼeʼaoga, mo gaohi koviʼi te masiva, pea mo te tahi ʼu agahala mamafa! Koia, ʼi te taʼu 607 ʼi muʼa ʼo totatou temi, neʼe fakaʼauha ai Selusalemi pea neʼe ʼave popūla te hahaʼi ʼo Suta ki Papiloni.
9 Neʼe fakatonutonuʼi ai e te ʼAtua tana hahaʼi. Kae ʼaki te polofeta ko Selemia, neʼe ina fakakikite ʼe toe logoʼi anai ʼi Selusalemi te leʼo ʼo te hahaʼi ʼe nātou ʼui fēnei: “Koutou vikiʼi ia Sehova ʼo te ʼatu kautau, heʼe ko Sehova ʼe agalelei; heʼe ko tana agaʼofa ʼe mole ʼiloʼi hona gataʼaga.” (Selemia 33:10, 11) Pea neʼe hoko moʼoni te faʼahi ʼaia. Hili taʼu e 70 ʼaē neʼe līʼakina ai te fenua, ko te toe ʼo te kau Iselaele neʼe nātou liliu ki Selusalemi ʼi te taʼu 537 ʼi muʼa ʼo totatou temi. (Selemia 25:11; Taniela 9:1, 2) Neʼe nātou toe laga te ʼaletale ʼi te potu ʼaē neʼe tuʼu ai te fale lotu ʼi te Moʼuga ʼo Molia, pea mo nātou momoli ai te ʼu sakilifisio. Neʼe laga te ʼu tafitoʼaga ʼo te fale lotu ʼi te lua taʼu ʼo tanatou liliu mai. Neʼe ko he temi fakafiafia ʼaupito! Neʼe ʼui fēnei e Esitalasi: “ ʼI te temi ʼaē neʼe fakatuʼu ai e te kau gāue te ʼu tafitoʼaga ʼo te fale lotu ʼo Sehova, ko te kau pelepitelo ʼaki tonatou ʼu teu faka pelepitelo, ʼaki tanatou ʼu meʼa pupuhi, pea mo te kau Levite te ʼu foha ʼo Asafe, ʼaki te ʼu nafa, neʼe nātou tutuʼu ake moʼo vikivikiʼi ia Sehova ohage ko tona fakatotonu e Tavite te hau ʼo Iselaele. Pea neʼe nātou tali ʼaki he ʼu fakavikiviki pea mo he ʼu fakafetaʼi kia Sehova, ‘heʼe agalelei, heʼe ko tana agaʼofa ki Iselaele ʼe mole ʼiloʼi hona gataʼaga.’ ”—Esitalasi 3:1-11.
10. Koteā te ʼu palalau maʼuhiga ʼe kamata pea mo fakaʼosi ʼaki te Pesalemo 118?
10 ʼE lahi te ʼu pesalemo ʼe hā tuʼa lahi ai te ʼu palalau fakavikiviki feiā ʼo ʼuhiga mo te agalelei ʼa Sehova. Ohage la ko te Pesalemo 118 ʼaē neʼe hiva e te kau Iselaele moʼo fakaʼosi te Pāsikate. ʼE kamata pea mo fakaʼosi te pesalemo ʼaia ʼaki te ʼu palalau ʼaenī: “Koutou fakafetaʼi kia Sehova, heʼe agalelei; heʼe ko tana agaʼofa ʼe mole ʼiloʼi hona gataʼaga.” (Pesalemo 118:1, 29) Neʼe lagi ko te ʼu fakavikiviki fakaʼosi ʼaia ʼaē neʼe hivaʼi e Sesu Kilisito mo tana kau ʼapositolo agatonu, ʼi te po ʼi muʼa ʼo tana mate ʼi te taʼu 33 ʼo totatou temi.—Mateo 26:30.
“Fakalelei, Kae Fakahā Mai Tou Kolōlia”
11, 12. ʼI te temi ʼaē neʼe sio ai ia Moisese ki te kolōlia ʼo te ʼAtua, koteā te ʼu palalau ʼaē neʼe logo kiai?
11 Neʼe hā te pikipikiga ʼo te agalelei ʼa Sehova pea mo tana agaʼofa ʼi te ʼu sēkulō ʼi muʼa atu ʼo te temi ʼo Esitalasi. Mole fualoa, ʼi te hili ʼo te temi ʼaē neʼe atolasio ai te kau Iselaele ki te pipi aulo ʼi te toafa pea mo te fakaʼauha ʼo te kau agakovi, neʼe kole fēnei e Moisese kia Sehova: “Fakalelei, ka ke fakahā mai tou kolōlia.” Neʼe ʼiloʼi e Sehova ʼe mate anai ia Moisese mokā ʼe sio ki Tona fofoga, koia neʼe ina ʼui fēnei ai: “ ʼE ʼau tuku anai ke fakalaka ʼi ʼou muʼa te ʼu meʼa fuli ʼaʼaku ʼe lelei.”—Ekesote 33:13-20.
12 Ko te agalelei ʼa Sehova neʼe fakalaka ia muʼa ʼo Moisese ʼi te uhu ake ʼi te Moʼuga ʼo Sinai. ʼI te temi ʼaia, neʼe sio ai ia Moisese ki te kolōlia ʼo te ʼAtua pea mo ina logo ki tana ʼu palalau ʼaenī: “Sehova, Sehova, ʼAtua manavaʼofa pea mo lotoʼofa, tuai ʼi te ʼita pea mo mohu ʼi te agaʼofa pea mo te moʼoni, ʼe ina taupau tana agaʼofa ki te ʼu lauʼi afe hahaʼi, ʼe ina fakamolemole te hala pea mo te talagataʼa pea mo te agahala, kae ʼe mole ina fakahāo anai mai te tūʼa, ʼo ina fakahoko te tūʼa ʼo te hala ʼo te ʼu mātuʼa ki te ʼu foha, mo te ʼu mokopuna, ki te tolu taʼiake pea ki te fā taʼiake.” (Ekesote 34:6, 7) ʼE fakahā lelei e te ʼu palalau ʼaia ko te agalelei ʼa Sehova ʼe pipiki ki tana agaʼofa pea mo te tahi ʼu kalitate ʼo tona ʼulugaaga. Kapau ʼe tou vakaʼi te ʼu kalitate ʼaia pea ʼe tokoni mai anai kia tatou ke tou agalelei ki te hahaʼi. Tou vakaʼi muʼa te kalitate ʼaē ʼe hā tuʼa lua ʼi te ʼu palalau fakatalakitupua ʼaia ʼo te agalelei ʼa te ʼAtua.
Ko He “ ʼAtua . . . [ʼe] Mohu ʼi Te Agaʼofa”
13. ʼI te tala ʼo te agalelei ʼa te ʼAtua, koteā te kalitate ʼaē ʼe hā tuʼa lua, pea he koʼe ʼe tau te kalitate ʼaia mo Sehova?
13 Ko “Sehova [ʼe ko he] ʼAtua . . . [ʼe] mohu ʼi te agaʼofa . . . , [mo] ina taupau tana agaʼofa ki te ʼu lauʼi afe hahaʼi.” Ko te kupu faka Hepeleo ʼaē neʼe fakaliliu ʼaki te kupu “agaʼofa” ʼe toe faka ʼuhiga ki te kupu “ ʼofa agatonu.” ʼE gata pe ki te kalitate ʼaia ʼe hā tuʼa lua ʼi te ʼu palalau ʼa te ʼAtua kia Moisese. ʼE tau te faʼahi ʼaia mo Sehova heʼe ko tona kalitate maʼuhiga ʼe ko te ʼofa. (1 Soane 4:8) ʼE faka maʼuhigaʼi te kalitate ʼaia ʼi te ʼu palalau fakavikiviki kia Sehova ʼaenī kua tou ʼiloʼi “heʼe agalelei, heʼe ko tana agaʼofa ʼe mole ʼiloʼi hona gataʼaga.”
14. Ko ai tāfito ʼaē ʼe fakahā ki ai e te ʼAtua tana agalelei pea mo tana agaʼofa?
14 ʼE hā te agalelei ʼa Sehova heʼe “mohu ʼi te agaʼofa.” ʼE hā tāfito te faʼahi ʼaia ʼi tana tokaga ʼofa ʼaē ki tana ʼu kaugana agatonu ʼaē kua foaki tonatou maʼuli kia te ia. (1 Petelo 5:6, 7) ʼE ina ‘taupau tana agaʼofa’ kia nātou ʼaē ʼe ʼoʼofa pea mo tauhi kia te ia, pea ʼe lava fakamoʼoni kiai te kau Fakamoʼoni ʼa Sehova. (Ekesote 20:6) Neʼe mole kei maʼu e te puleʼaga ʼo Iselaele te agaʼofa ʼo Sehova, peʼe ko tana ʼofa agatonu, he neʼe nātou līaki tona ʼAlo. Kae ko te agalelei pea mo te ʼofa agatonu ʼa te ʼAtua ki te kau Kilisitiano agatonu ʼi te ʼu fenua fuli ʼe heʼegata anai.—Soane 3:36.
Ko Sehova—ʼE Manavaʼofa Pea Mo Lotoʼofa
15. (a) Koteā te ʼu ʼuluaki palalau ʼaē neʼe logo kiai ia Moisese ʼi te Moʼuga ʼo Sinai? (b) Koteā te faka ʼuhiga ʼo te manavaʼofa?
15 Ko te ʼu palalau ʼaē neʼe logo kiai ia Moisese ʼi te Moʼuga ʼo Sinai, neʼe kamata fēnei: “Sehova, Sehova, ʼAtua manavaʼofa pea mo lotoʼofa.” Ko te kupu faka Hepeleo ʼaē neʼe fakaliliu ʼaki te kupu “manavaʼofa,” ʼe feala ke faka ʼuhiga ki “te ʼu gākau” pea ʼe ʼi ai tona pikipikiga mo te kupu “falega fānau.” Koia ko te manavaʼofa ʼe faka ʼuhiga ki te ʼu meʼa loloto ʼi te loto ʼa he tahi. Kae ko te manavaʼofa ʼe mole gata pe ki he fakaʼofaʼofa ki te hahaʼi. ʼE tonu ke ina uga tatou ke tou fai he meʼa moʼo fakafimālie te mamahi ʼo te hahaʼi. Ohage la, ko te kau tagata ʼāfea ʼofa ʼe nātou sio ʼe ʼaoga ke nātou manavaʼofa ki te ʼu tēhina, ‘ ʼo fakahā te manavaʼofa ʼaki te fiafia’ mo kapau ʼe tau mo feʼauga te faʼahi ʼaia.—Loma 12:8; Sakopo 2:13; Suta 22, 23.
16. He koʼe ʼe feala ke tou ʼui ko Sehova ʼe lotoʼofa?
16 ʼE toe hā te agalelei ʼa te ʼAtua ʼi tana lotoʼofa. Ko he tahi ʼe lotoʼofa ʼe ina “tokagaʼi tāfito te loto ʼo te hahaʼi” pea mo ‘agalelei tāfito kia nātou ʼaē ʼe mole faʼa maʼuhiga.’ Ko Sehova ʼe ko te faʼifaʼitaki lelei ʼo te lotoʼofa ʼi tana ʼu felogoi mo tana ʼu kaugana agatonu. Ohage la neʼe lotoʼofa te ʼAtua ʼi tana fakaʼaogaʼi he ʼu ʼaselo moʼo fakaloto mālohiʼi ia te polofeta ko Taniela ʼaē neʼe kua matuʼa, pea mo tala ki te taʼahine taupoʼou ko Malia te pilivilesio ʼaē ke ina fānauʼi ia Sesu. (Taniela 10:19; Luka 1:26-38) ʼI totatou ʼuhiga hahaʼi ʼa Sehova, ʼe tou fakafetaʼi ki tona lotoʼofa, ʼo ina fakaʼaogaʼi te ʼu pasina ʼo te Tohi-Tapu moʼo pāuiʼi ʼo tatou. ʼE tou fakavikiviki kia te ia ʼi tana fakahā tana agalelei pea mo tou faiga ke tou lotoʼofa ki te hahaʼi. Ka fakatonutonuʼi he tēhina “ ʼaki te agavaivai,” e nātou ʼaē ʼe nātou maʼu te ʼu fealagia fakalaumālie ki te faʼahi ʼaia, pea ʼe nātou faiga ke nātou agamālū, mo lotoʼofa.—Kalate 6:1.
Ko He ʼAtua ʼe Tuai ʼi Te ʼIta
17. He koʼe ʼe tou fakafetaʼi ki te “tuai [ʼa Sehova] ʼi te ʼita”?
17 Ko he “ ʼAtua . . . [ʼe] tuai ʼi te ʼita.” ʼE hā lelei ʼi te ʼu palalau ʼaia te tahi agaaga ʼo te agalelei ʼa te ʼAtua. ʼE faʼa kātakiʼi e Sehova tatatou ʼu hala pea mo ina tuku mai he temi ke tou tauʼi totatou ʼu vaivaiʼaga pea mo tou tuputupu ʼi te faʼahi fakalaumālie. (Hepeleo 5:12–6:3; Sakopo 5:14, 15) ʼE toe fua lelei te faʼa kātaki ʼa te ʼAtua ki te hahaʼi ʼaē ʼe mole heʼeki nātou tauhi kia te ia. ʼE kei maʼu honatou temi ke nātou tali te logo ʼo te Puleʼaga pea mo fakahemala. (Loma 2:4) Kae logola te faʼa kātaki ʼa Sehova, kae ʼi ʼihi temi ko tana agalelei ʼe ina uga ia ia ke ina fakahā tona ʼita, ohage ko tana fai ki te kau Iselaele ʼaē neʼe nātou tauhi ki te pipi aulo ʼi te Moʼuga ʼo Sinai. Kua vave hā te ʼita ʼo te ʼAtua ʼi hona ʼaluʼaga lahi age, mokā ina fakagata anai te tuʼu agakovi ʼa Satana.—Esekiele 38:19, 21-23.
18. ʼO ʼuhiga mo te moʼoni, koteā te kehekehe ʼa Sehova pea mo te ʼu pule ʼo te malamanei?
18 Ko “Sehova [ʼe ko he] ʼAtua . . . [ʼe] mohu ʼi te . . . moʼoni.” ʼE kehe ʼaupito ia Sehova mo te ʼu pule ʼo te malamanei, ʼaē ʼe nātou fakapapauʼi mai he ʼu meʼa lahi kae mole nātou fakahoko! Kae ko te hahaʼi ʼaē ʼe tauhi kia Sehova ʼe feala ke nātou falala ki te ʼu meʼa fuli ʼaē ʼe tuʼu ʼi te Folafola ʼa te ʼAtua. Mai tona ʼaluʼaga ʼaē ko te ʼAtua ʼe mohu ʼi te moʼoni, koia ʼe feala ke tou falala ʼi te temi fuli pe ki tana ʼu fakapapau. ʼUhi heʼe agalelei, ʼe tali tuʼumaʼu e tatatou Tāmai ʼaē ʼi selo ki tatatou kole ia te moʼoni fakalaumālie, ʼo ina foaki lahi mai.—Pesalemo 43:3; 65:2.
19. Koteā te toe agalelei lahi ʼaē neʼe fakahā e Sehova ki te kau agahala ʼaē ʼe fakahemala?
19 Ko “Sehova [ʼe ko he] ʼAtua . . . ʼe ina fakamolemole te hala pea mo te talagataʼa pea mo te agahala.” ʼUhi heʼe agalelei, ʼe fakamolemole ia Sehova ki te kau agahala ʼaē ʼe fakahemala. ʼE mahino ia, ʼe tou fakafetaʼi lahi ki tatatou Tāmai ʼofa ʼaē ʼi selo, ʼi tana fakatuʼutuʼu te sakilifisio ʼa Sesu ke feala hana fakamolemole mai kia tatou. (1 Soane 2:1, 2) Koia ʼe tou fiafia ai, he ko nātou fuli ʼaē ʼe tui ki te totogi ʼe feala ke nātou vāhaʼa lelei ai mo Sehova, ʼaki te ʼamanaki ʼaē ke nātou maʼuʼuli ʼo heʼegata ʼi tona mālama foʼou ʼaē ʼe ina fakapapauʼi mai. ʼE ko he ʼu tupuʼaga maʼuhiga ʼaia ke tou fakavikiviki kia Sehova ʼi tana fakahā tana agalelei ki te malamanei!—2 Petelo 3:13.
20. Koteā te fakamoʼoni ʼe hā mai ai ko te ʼAtua ʼe mole ina tali te aga ʼaē ʼe kovi?
20 “ ʼE mole . . . fakahāo anai [e Sehova] mai te tūʼa.” ʼE ko he tahi tupuʼaga ʼaia ke tou fakavikiviki kia Sehova ʼo ʼuhiga mo tana agalelei. Koteā tona tupuʼaga? Koteʼuhi ko te faʼahi maʼuhiga ʼo tana agalelei ʼe ko tana mole tali te aga ʼaē ʼe kovi. Tahi ʼaē meʼa, “ ʼi te fakahā ʼo te ʼAliki ko Sesu, mai te lagi, mo tana kau ʼaselo mālohi,” ʼe fakahoko anai te lagavaka “kia nātou ʼaē ʼe mole nātou ʼiloʼi te ʼAtua, pea mo nātou ʼaē ʼe mole fakalogo ki te logo lelei.” (2 Tesalonika 1:6-9, MN ) Ko te kau atolasio ʼa Sehova ʼaē ka hāo anai, ʼe nātou fiafia anai ʼi tonatou maʼuli, pea ʼe mole toe fakahalaʼi anai nātou e te hahaʼi ʼe mole tauhi ki te ʼAtua, ʼaē ʼe nātou “fehia ki te lelei.”—2 Timoteo 3:1-3.
Tou Faʼifaʼitakiʼi Te Agalelei ʼa Sehova
21. He koʼe ʼe tonu ke tou agalelei?
21 ʼE mahino ia ʼe lahi te ʼu tupuʼaga ke tou vikiʼi pea mo fakafetaʼi kia Sehova ki tana agalelei. ʼUhi ʼaē ko tatou ko tana ʼu kaugana, ʼe mole tonu koa la ke tou faiga mālohi ke tou fakahā te kalitate ʼaia? Ei, heʼe fakaloto mālohi fēnei e te ʼapositolo ko Paulo te kau Kilisitiano: “Koutou liliu ko te faifaitaki o te Atua, ke tuha mo he u fanau ofaina.” (Efeso 5:1) Ko tatatou Tāmai ʼaē ʼi selo ʼe agalelei tuʼumaʼu, pea ʼe tonu mo tatou ke tou fai feiā.
22. Koteā ʼaē ka tou vakaʼi anai ʼi te alatike ka hoa mai?
22 Kapau neʼe tou foaki totatou maʼuli kia Sehova ʼaki totatou loto katoa, pea ʼe mahino papau ia ʼe tou fia faʼifaʼitakiʼi tana agalelei. ʼUhi ʼaē heʼe tou kau ʼi te hōloga ʼo Atama, ʼe mole faigafua te fai ʼo te meʼa ʼaē ʼe lelei. Kae ʼi te alatike ʼaē ka hoa mai, ʼe tou vakaʼi anai pe koʼe ʼe feala ke tou agalelei. ʼE tou toe vakaʼi anai te ʼu ʼaluʼaga kehekehe ʼe feala pea ʼe tonu ai ke tou faʼifaʼitakiʼi ia Sehova—te faʼifaʼitaki lahi ʼo te agalelei.
Koteā Takotou Tali?
• Koteā te agalelei?
• Ko te ʼu palalau fea ʼi te Tohi-Tapu ʼe fakahā lelei ai te agalelei ʼa te ʼAtua?
• Ko te ʼu kalitate fea ʼaē ʼe hā ai te agalelei ʼa Sehova?
• He koʼe ʼe tonu ke tou faʼifaʼitakiʼi te agalelei ʼa Sehova?
[Paki ʼo te pasina 12]
Neʼe fakatonutonuʼi e Sehova tana hahaʼi ʼi te temi ʼāfea he neʼe mole kei nātou mulimuli ki tanatou ʼu fakavikiviki
[Paki ʼo te pasina 12]
Ko te toe ʼo te kau Iselaele agatonu neʼe toe liliu ki Selusalemi
[Paki ʼo te pasina 13]
Neʼe logo ia Moisese ki te ʼu palalau fakatalakitupua ʼo te agalelei ʼa te ʼAtua
[Paki ʼo te pasina 15]
ʼE hā te agalelei ʼa Sehova ʼi tana fakaʼaogaʼi te ʼu pasina ʼo te Tohi-Tapu moʼo pāuiʼi ʼo tatou