Koutou Faʼifaʼitakiʼi Te Agalelei ʼa Sehova
1 Ka tou sisio ki te matalelei ʼo te tō ʼo te laʼā peʼe tou leleiʼia he meʼa kai ʼe kano lelei, ʼe mahino ia ʼe tou fia fakamālo kia Sehova, ia te Matapuna ʼo te agalelei fuli pe. ʼE uga tatou e tana agalelei ke tou fia faʼifaʼitakiʼi ia ia. (Pes. 119:66, 68; Ef. 5:1) ʼE tou lava fakahā feafeaʼi te agalelei?
2 Tou Agalelei Kia Nātou ʼAē ʼe Mole Tui: ʼE feala ke tou faʼifaʼitakiʼi te agalelei ʼa Sehova ʼaki hatatou tokakaga fakamalotoloto kia nātou ʼaē ʼe mole ko hotatou ʼu kāiga ʼi te tui. (Kal. 6:10) Kapau ʼe tou agalelei kia nātou ʼi te ʼu meʼa ʼaē ʼe tou fai, pea ʼe feala ai ke fetogi tanatou manatu ʼo ʼuhiga mo te kau Fakamoʼoni ʼa Sehova pea mo te logo ʼaē ʼe tou faka mafola.
3 Ohage foki la, ko te tēhina pionie tūpulaga neʼe fakatalitali ki te vakai mahaki ʼi te lopitali, pea neʼe ina tokagaʼi te finematuʼa neʼe heka ʼi tona ʼu tafa pea neʼe hage neʼe mahaki kovi age ia nātou fuli ʼaē neʼe fakatalitali. ʼI te hoko mai ko ia ʼaē neʼe tonu ke ʼalu ki te tōketā, neʼe ina tuku te finematuʼa ke ʼalu kae fakatalitali ia. Ki muli age neʼe toe felāveʼi te pionie mo te finematuʼa ʼaia, ʼi te fakatauʼaga meʼa kai, pea neʼe fiafia ʼaupito te fafine ʼi tana sio ki ai. Logope neʼe mole ina tali lelei te logo lelei ʼi muʼa atu, kae neʼe ina ʼui age kua ina ʼiloʼi leva ko te kau Fakamoʼoni ʼa Sehova ʼe nātou ʼoʼofa moʼoni ki tonatou ʼu kāiga. Neʼe kamata fai tana ako Tohi-Tapu pea neʼe fai tuʼumaʼu.
4 Tou Agalelei Ki ʼOtatou Tēhina: ʼE tou toe faʼifaʼitakiʼi foki te agalelei ʼo Sehova mokā tou fakahoko tatatou tokoni ki totatou ʼu tēhina ʼi te tui. ʼI te ʼu temi ʼaē ʼe hoko ai te ʼu tuʼutāmaki, ko tatou ʼaē ʼe ʼuluaki tokoni ki ʼotatou tēhina. ʼE tou toe fakahā foki tatatou agalelei mokā tou tokoni ki te feʼāveʼaki ki te ʼu fono ia nātou ʼaē ʼe ʼaoga kiai, mo tou ʼaʼahi te kau mahaki, pea mo tou fakalahi atu totatou ʼofa kia nātou ʼaē ʼe mole tou feʼiloʼiʼaki lelei ʼi te kokelekasio.—2 Ko. 6:11-13; Hep. 13:16.
5 ʼE toe fakahā e Sehova tana agalelei ʼaki tana “fakamolemole gafua.” (Pes. 86:5) ʼI tatatou faʼifaʼitakiʼi ia ia, ʼe tou lava fakahā tatatou leleiʼia te agalelei ʼo tou fakamolemole ki niʼihi. (Ef. 4:32) ʼE tokoni mai te faʼahi ʼaia ke tou fakaliliu tatatou fakatahi mo totatou ʼu tēhina ‘ko he meʼa lelei pea mo fakafiafia.’—Pes. 133:1-3.
6 ʼOfa pe ke fakatupu ia tatou ia te agalelei lahi ʼo Sehova ke tou fiafia ʼi te fakavikiviki ia ia pea mo tou liliu ai ʼo fiafia. Pea ʼofa pe ke uga tatou ke tou faʼifaʼitakiʼi tana agalelei ʼi te ʼu meʼa fuli ʼaē ʼe tou fai.—Pes. 145:7; Sel. 31:12.