Tou Haga Fakahā Te Agalelei
“Ko te fua ʼo te mālama ʼe ko te agalelei fuape pea mo te faitotonu pea mo te moʼoni.”—Efeso 5:9, MN.
1. ʼE fakahā feafeaʼi e te ʼu lauʼi miliona hahaʼi tanatou loto tahi mo te Pesalemo 31:19?
KO TE meʼa lelei ʼaupito ʼaē ʼe feala ke fai e te hahaʼi ʼe ko te faka kolōliaʼi ʼo Sehova. Ia ʼaho nei, ko te ʼu lauʼi miliona hahaʼi ʼe nātou fai te faʼahi ʼaia, ʼo nātou vikiʼi te ʼAtua ʼuhi ko tana agalelei. ʼI totatou ʼuhiga kau Fakamoʼoni ʼa Sehova agatonu, ʼe tou loto tahi katoa mo te tagata fai pesalemo ʼaē neʼe hiva fēnei: “ ʼE lahi ʼaupito tau agalelei, ʼaē neʼe ke fakakoloa ʼaki ia nātou ʼaē ʼe nātou manavasiʼi kia te koe.”—Pesalemo 31:19.
2, 3. Koteā ʼaē ʼe feala ke hoko mo kapau ʼe mole tou fai he aga ʼe lelei ʼi tatatou gāue ʼaē ko te fai ʼo he ʼu tisipulo?
2 Ko te manavasiʼi ʼaē kia Sehova ʼe ina uga tatou ke tou fakavikiviki kia te ia ʼuhi ko tana agalelei. ʼE ina toe uga tatou ke tou ‘vikiʼi ia Sehova, mo fakafetaʼi kia te ia, pea mo tou palalau ʼo ʼuhiga mo te kolōlia ʼo tona ʼafioʼaga.’ (Pesalemo 145:10-13) Ko te tupuʼaga la ʼaia ʼo tatatou kau ʼaki he loto fakamalotoloto ki te gāue ʼaē ko te faka mafola ʼo te Puleʼaga pea mo te fai ʼo he ʼu tisipulo. (Mateo 24:14, 28: 19, 20) ʼE mahino ia, ʼe tonu ke tou fai tatatou gāue fai faka mafola ʼaki he aga ʼe lelei, naʼa tupu ai he laukoviʼi ʼo te huafa ʼo Sehova.
3 ʼE lau e te hahaʼi tokolahi ʼe nātou tauhi ki te ʼAtua, kae ʼe mole ʼalutahi tanatou aga mo te ʼu lekula ʼaē ʼe tuʼu ʼi tana Folafola. ʼO ʼuhiga mo nātou ʼaē ʼe mole nātou mulimuli ki tanatou ʼui ʼaē ʼe nātou fai te meʼa ʼaē ʼe lelei, neʼe tohi fēnei e te ʼapositolo ko Paulo: “E ke fakaʼako te tahi kaiga, kae e mole ke akoʼi ia koe totonu! Ko koe ae e ke ako ke aua te kaihaa, kae e ke kaihaa! E ke lau ke aua te tono, kae e ke tono? . . . O hage ko tona tohi: ‘Uhi ko koe e [“laukoviʼi,” MN ] te huafa o te Atua i te hahai pagani.’ ”—Loma 2:21, 22, 24.
4. Koteā ʼaē ʼe hoko mo kapau ʼe lelei tatatou aga?
4 ʼAua naʼa tou fai he meʼa ke laukoviʼi ai te huafa ʼo Sehova, kae tou faiga ʼaki te lelei ʼo tatatou aga, ke tupu ai hona faka kolōliaʼi. ʼE malave lelei te faʼahi ʼaia kia nātou ʼaē ʼe mole kau ki te kokelekasio. ʼUluaki, ʼe tokoni mai ke mole valokiʼi tatou e te kau fakafeagai. (1 Petelo 2:15) Ko te meʼa ʼaē ʼe maʼuhiga tāfito, ka lelei tatatou aga pea ʼe ina taki mai te ʼu hahaʼi ki te kautahi ʼa Sehova, ʼo feala ai ke nātou faka kolōlia kia Sehova pea mo nātou maʼu te maʼuli heʼegata.—Gaue 13:48.
5. Koteā te ʼu fehuʼi ʼaē ʼe tonu ke tou vakaʼi?
5 Mai tona ʼaluʼaga ʼaē ʼe tou heʼe haohaoa, ʼe tou lava tekeʼi feafeaʼi te aga ʼaē ʼe ina fakalainoaʼi ia Sehova pea mo tūkia ai te hahaʼi ʼaē ʼe nātou kumi te moʼoni? Pea koteā ʼaē ʼe tou lava fai ke feala hatatou fakahā te agalelei?
Ko Te Fua ʼo Te Mālama
6. Koteā “te u gaue paʼa a te fakapouli,” kae koteā te fua ʼe tonu ke fakahā e te kau Kilisitiano?
6 ʼUhi ko tatou ko he kau Kilisitiano kua tou foaki totatou maʼuli, ʼe tou maʼu te meʼa ʼaē ʼe tokoni mai ke mole tou fai “te u gaue paʼa a te fakapouli.” ʼE kau ki te ʼu gāue ʼaia te ʼu aga ʼaē ʼe nātou fakalainoaʼi te ʼAtua, ohage ko te loi, te kaihaʼa, te fatufatu, he ʼu palalau heʼeʼaoga, te aga fakaufiufi, te ʼu fakahuahua heʼeʼaoga, pea mo te konahia. (Efeso 4:25, 28, 31; 5: 3, 4, 11, 12, 18) ʼE mole tou fai anai te ʼu gāue ʼaia, kae tou “mauli o hage ko te u fanau o te malama.” ʼE ʼui e te ʼapositolo ko Paulo: “Ko te fua ʼo te mālama ʼe ko te agalelei fuape pea mo te faitotonu pea mo te moʼoni.” (Efeso 5:8, 9, MN ) Koia kapau ʼe tou haʼele ʼi te mālama, pea ʼe feala ai ke tou haga fakahā te agalelei. Kae ko te faʼahiga mālama feafeaʼi koa ʼaia?
7. Koteā ʼaē ʼe tonu ke tou fai ke tou haga fakahā te agalelei?
7 Logola totatou ʼuhiga heʼe haohaoa, kae ʼe feala ke tou fakahā te agalelei mo kapau ʼe tou haʼele ʼi te mālama fakalaumālie. Neʼe hiva fēnei te tagata fai pesalemo: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.” (Pesalemo 119:105) Kapau ʼe tou haga fakahā “te fua ʼo te mālama” ʼaki “te agalelei fuape,” pea ʼe tonu ke tou fakaʼaogaʼi lelei tuʼumaʼu te mālama fakalaumālie ʼaē ʼe tou maʼu ʼi te Folafola ʼa te ʼAtua, ʼaē ʼe fakamahino lelei ʼi te ʼu tohi, pea mo tau talanoa kiai ʼi tatatou ʼu fono. (Luka 12:42; Loma 15:4; Hepeleo 10:24, 25) ʼE toe ʼaoga foki ke tou tokagaʼi tāfito te faʼifaʼitaki pea mo te ʼu akonaki ʼa Sesu Kilisito, “te malama o te malama-nei” pea mo “te huhulu o [te] kololia [ʼo Sehova].”—Soane 8:12; Hepeleo 1:1-3.
Ko Te Fua ʼo Te Laumālie
8. He koʼe ʼe tou lava fakahā te agalelei?
8 ʼE mahino papau ia ko te mālama fakalaumālie ʼe tokoni mai kia tatou ke tou fakahā te agalelei. Pea ʼe tou toe lava fakahā te kalitate ʼaia heʼe taki tatou e te laumālie ʼo te ʼAtua, peʼe ko tona mālohi gāue. ʼE kau te agalelei ki “te fua o te Laumalie.” (Kalate 5:22, 23) Kapau ʼe tou fakalogo ki te takitaki ʼa te laumālie maʼoniʼoni ʼo Sehova, pea ʼe tou fakahā anai tona fua matalelei ʼaē ko te agalelei.
9. ʼE tou lava mulimuli feafeaʼi ki te ʼu palalau ʼa Sesu ʼaē ʼe tuʼu ia Luka 11:9-13?
9 Ko tatatou loto ʼaē ke tou fakafiafia ia Sehova ʼo tou fakahā te fua ʼo te laumālie ʼaē ko te agalelei, ʼe ina uga tatou ke tou mulimuli ki te ʼu palalau ʼaenī ʼa Sesu: “Koutou kole pea e foaki atu anai kia koutou, koutou kumi pea e koutou mau anai, koutou tukituki pea e avahi atu anai kia koutou. Koteuhi ko he tahipe e ina kole, e avage, mo kumi e ina mau, pea kia ia ae e tukituki e avahiʼage anai. Pe ko te tamai fea ia koutou, e koleʼage e tona foha kia te ia he ika, e mole ina fakatooʼage anai he ika kia te ia kae ko he gata? Pe e ina koleʼage he foimoa, pea e ina fakatooʼage anai he sekolopio? Pea kapau leva, ko koutou [ʼaē ʼe koutou agahala pea mo] agakovi, e koutou popoto i te fai meaofa lelei ki autou fanau, pea e lahi feafeai anai te foaki e te Tamai i Selo ia te Laumalie-Maonioni kia ia e ina kole kia te ia.” (Luka 11:9-13) Tou mulimuli ki te tokoni ʼa Sesu ʼo tou kole te laumālie ʼo Sehova, ke feala hatatou fakahā tona fua ʼaē ko te agalelei.
“Fai Te Mea e Lelei”
10. Koteā te ʼu agaaga ʼo te agalelei ʼa te ʼAtua ʼe fakahā ia Ekesote 34:6, 7?
10 ʼAki te mālama fakalaumālie mai te Folafola ʼa te ʼAtua pea mo te tokoni ʼa te laumālie maʼoniʼoni ʼo te ʼAtua, ʼe feala ke tou “fai te mea e lelei.” (Loma 13:3) ʼAki tatatou ako tuʼumaʼu te Tohi-Tapu, ʼe lahi ai te ʼu meʼa ʼe tou ako ke tou lava faʼifaʼitakiʼi te agalelei ʼa Sehova. Neʼe tou vakaʼi ʼi te ʼuluaki alatike te ʼu agaaga kehekehe ʼo te agalelei ʼa te ʼAtua, ʼaē ʼe tou maʼu ʼi te ʼu palalau ʼaē neʼe fai e Moisese ia Ekesote 34:6, 7: “Sehova, Sehova, ʼAtua manavaʼofa pea mo lotoʼofa, tuai ʼi te ʼita pea mo mohu ʼi te agaʼofa pea mo te moʼoni, ʼe ina taupau tana agaʼofa ki te ʼu lauʼi afe hahaʼi, ʼe ina fakamolemole te hala pea mo te talagataʼa pea mo te agahala, kae ʼe mole ina fakahāo anai mai te tūʼa.” Kapau ʼe tou vakavakaʼi fakalelei te ʼu faʼahi ʼaia ʼo te agalelei ʼa Sehova, pea ʼe tokoni mai anai ke tou “fai te mea e lelei.”
11. ʼE tonu ke malave feafeaʼi kia tatou tatatou ʼiloʼi ʼaē ko Sehova ʼe manavaʼofa pea mo lotoʼofa?
11 Ko te ʼu palalau ʼaia mai te ʼAtua ʼe ina fakatokagaʼi mai kia tatou te maʼua ʼaē ke tou faʼifaʼitaki ia Sehova, ʼo tou manavaʼofa pea mo lotoʼofa. Neʼe ʼui fēnei e Sesu: “Manuia natou e manavaofa, e natou mau anai te manavaofa.” (Mateo 5:7; Luka 6:36) ʼI tatatou ʼiloʼi ʼaē ko Sehova ʼe lotoʼofa, ʼe uga ai tatou ke tou lotoʼofa pea mo agalelei ʼi tatatou ʼu felogoi mo te hahaʼi, ohage ko nātou ʼaē ʼe tou fai faka mafola ki ai. ʼE ʼalutahi te faʼahi ʼaia mo te tokoni fēnei ʼa Paulo: “Ke lelei tuumau tautou lea, i tona fakakonakona aki te masima, ke koutou iloi te tali e tonu ke koutou fai kia natou takitahi.”—Kolose 4:6.
12. (a) ʼUhi ʼaē ko te ʼAtua ʼe tuai ʼi te ʼita, ʼe tonu ke feafeaʼi tatatou aga ki ʼihi? (b) Kapau ʼe tou maʼu te agaʼofa ʼa Sehova, pea ʼe ina uga tatou ke tou fai tea?
12 ʼUhi ʼaē ko te ʼAtua ʼe tuai ʼi te ʼita, ko tatatou fia “fai te mea e lelei” ʼe ina uga tatou ke tou kātakiʼi te ʼu kiʼi hala ʼo totatou ʼu tēhina pea mo tou tokagaʼi tāfito tonatou ʼu kalitate. (Mateo 7:5; Sakopo 1:19) Ko te agaʼofa ʼa Sehova ʼe ina uga tatou ke tou fakahā te ʼofa agatonu, māʼia ʼi te ʼu ʼaluʼaga faigataʼa ʼaupito. ʼE mahino papau ia ʼe ko he meʼa lelei ʼaupito.—Tāʼaga Lea 19:22.
13. Koteā ʼaē ʼe feala ke tou fai moʼo fakahā ko Sehova ʼe ‘mohu ʼi te moʼoni’?
13 ʼUhi ko tatatou Tāmai ʼi selo ʼe ‘mohu ʼi te moʼoni,’ ʼe tou faiga ke tou ‘fakahā ko tatou ko tana ʼu minisi ʼaki he ʼu palalau moʼoni.’ (2 Kolonito 6:3-7) ʼI te ʼu meʼa e fitu ʼaē ʼe fehiʼa kiai Sehova, ʼe kau ai “te ʼalelo ʼe loi” pea mo “he fakamoʼoni loi ʼe ina tala he ʼu loi.” (Tāʼaga Lea 6:16-19) Koia ko tatatou loto ʼaē ke leleiʼia tatou e te ʼAtua ʼe ina uga tatou ke tou ‘līaki te loi pea mo palalau ʼaki te moʼoni.’ (Efeso 4:25) ʼOfa pe ke tou fakahā tuʼumaʼu te agalelei ʼo fai te faʼahi maʼuhiga ʼaia.
14. He koʼe ʼe tonu ke tou loto fakamolemole?
14 Ko te folafola ʼa te ʼAtua kia Moisese ʼe tonu ke ina uga tatou ke tou loto fakamolemole, heʼe ko Sehova ʼe loto fakamolemole. (Mateo 6:14, 15) ʼE moʼoni, ʼe tonu ke fakatūʼa e Sehova te kau agahala ʼaē ʼe mole fakahemala. Koia ʼe tonu ke tou lagolago ki tana ʼu lekula ʼo ʼuhiga mo te agalelei, moʼo taupau te kokelekasio ke maʼa ʼi te faʼahi fakalaumālie.—Levitike 5:1; 1 Kolonito 5:11, 12; 1 Timoteo 5:22.
“Koutou Tokaga Lelei Ki Tokotou Faʼahiga Maʼuli”
15, 16. ʼE ʼaoga feafeaʼi kia tatou te tokoni ʼa Paulo ia Efeso 5:15-19 ke tou haga fakahā te agalelei?
15 Ke feala hatatou agalelei logola te agakovi ʼa te hahaʼi, ʼe ʼaoga ke tou fonu ʼi te laumālie ʼo te ʼAtua pea mo tou tokaga ki totatou faʼahiga maʼuli. Koia neʼe fakaloto mālohiʼi fēnei e Paulo te kau Kilisitiano ʼo Efeso: “Koutou tokaga lelei ki tokotou faʼahiga maʼuli: ke ʼaua naʼa hage ko he kau vavale, kae ke hage ko ni kau popoto, ʼo koutou totogi maʼa koutou te temi faigamālie, koteʼuhi ko te ʼu ʼaho kua agakovi. Koia, ke tuku takotou liliu ʼaē ʼo vavale, kae ke koutou haga mahino pe koteā te finegalo ʼo Sehova. Pea ʼaua naʼa koutou konahihia ʼi te vino, ʼaē ʼe maʼu ai te agavale, kae ke koutou fonu ʼi te laumālie, ʼaki hakotou fefaipalalauʼaki ʼaki he ʼu pesalemo, he ʼu fakavikiviki ki te ʼAtua pea mo he ʼu hiva fakalaumālie, ʼo koutou hiva pea mo fai musika ʼi ʼokotou ʼu loto, kia Sehova.” (Efeso 5:15-19, MN ) ʼE mahino ia ʼe lelei te tokoni ʼaia kia tatou ʼi te ʼu ʼaho fakamuli pea mo faigataʼa ʼaenī.—2 Timoteo 3:1.
16 Kapau ʼe tou haga fakahā te agalelei, pea ʼe tonu ke tou vakaʼi fakalelei ke tou maʼuʼuli ohage ko nātou ʼaē ʼe nātou maʼu te poto fakaʼatua. (Sakopo 3:17) ʼE tonu ke tou tekeʼi te ʼu agahala mamafa pea ʼe tonu ke tou fonu ʼi te laumālie maʼoniʼoni, ʼo tou tuku ke ina takitaki tatou. (Kalate 5:19-25) Ka tou maʼuliʼi te ako fakalaumālie ʼaē ʼe tou maʼu ʼi te ʼu fono pea mo te ʼu fakatahi, pea ʼe feala ai ke tou haga fai te meʼa ʼaē ʼe lelei. Ko te ʼu palalau ʼa Paulo ki te kau Efeso ʼe lagi ina toe fakamanatuʼi mai kia tatou, ʼi tatatou ʼu fakatahi ki te tauhi, ʼe tou hiva ʼaki totatou loto katoa te ʼu “hiva fakalaumalie”—pea ʼe lahi te ʼu katiko ʼe nātou talanoa tāfito ki te ʼu kalitate fakalaumālie, ohage ko te agalelei.
17. Kapau ʼe mole feala ki te kau Kilisitiano ʼaē ʼe tau mo he mahaki kovi ke nātou kau tuʼumaʼu ki te ʼu fono, koteā ʼaē ʼe feala ke nātou tui papau kiai?
17 E feafeaʼi ki totatou ʼu tēhina mo tuagaʼane ʼaē ʼe mole feala ke nātou kau tuʼumaʼu ki te ʼu fono heʼe nātou tau mo he mahaki kovi? ʼE lagi nātou lotomamahi heʼe mole kei nātou lava fakatahi tuʼumaʼu mo tonatou ʼu tēhina mo tuagaʼane fakalaumālie moʼo tauhi kia Sehova. Kae ʼe feala ke nātou tui papau ko Sehova ʼe mahino ki tonatou ʼaluʼaga, ʼe ina taupau anai nātou ʼi tana mālama, ʼe ina foaki anai kia nātou tona laumālie maʼoniʼoni, pea ʼe tokoni anai kia nātou ke nātou haga fai te meʼa ʼaē ʼe lelei.—Isaia 57:15.
18. Koteā ʼaē ka tokoni anai kia tatou ke tou haga fakahā te agalelei?
18 Ke feala hatatou taupau te agalelei, ʼe tonu ke tou tokakaga ki tatatou ʼu fakakaugā pea mo tou fakamamaʼo mai ia nātou ʼaē ʼe nātou “fehia ki te lelei.” (2 Timoteo 3:2-5; 1 Kolonito 15:33) Kapau ʼe tou maʼuliʼi te tokoni ʼaia pea ʼe mole tou “fakalotomamahi te Laumalie-Maonioni,” ʼo tou fai he ʼu meʼa ʼe fakafeagai ki tana takitaki. (Efeso 4:30) Tahi ʼaē meʼa, ʼe feala anai ke tou fai te meʼa ʼaē ʼe lelei mo kapau ʼe tou fakatahi lelei mo nātou ʼaē ʼe nātou fakahā ʼi tonatou maʼuli ʼe nātou ʼoʼofa ki te agalelei, pea mo taki nātou e te laumālie maʼoniʼoni ʼo Sehova.—Amosi 5:15; Loma 8:14; Kalate 5:18.
Te ʼu Fua Lelei ʼo Te Agalelei
19-21. Koutou fakamatala he ʼu meʼa neʼe hoko ʼe fakahā ai te ʼu fua ʼo te fakahā ʼo te agalelei.
19 Ko tatatou haʼele ʼi te mālama fakalaumālie, mo tatatou fakalogo ki te takitaki ʼo te laumālie ʼo te ʼAtua, pea mo tatatou tokaga ki totatou faʼahiga maʼuli, ʼe tokoni mai anai ke ʼaua naʼa tou fai te meʼa ʼaē ʼe kovi kae ke tou “fai te mea e lelei.” Pea ʼe tou maʼu anai he ʼu fua lelei. Koutou tokagaʼi te meʼa ʼaē neʼe hoko kia Zongezile, te Fakamoʼoni ʼa Sehova ʼi Afelika Saute. ʼI te tahi ʼaho, ʼi tana ʼalu ki te faleako, neʼe ʼalu ʼo vakaʼi peʼe ko tana fia ʼaē neʼe tuku ʼi te fale paʼaga. Ko te masini neʼe faihala ʼi tana tohi te moʼi pepa, he neʼe ina hilifaki te ʼu tola Amelika e 6 000. Ko te tagata leʼo ʼo te fale paʼaga pea mo te tahi ʼu hahaʼi, neʼe nātou uga ia ia ke ina toʼo te falā ʼaia pea ke ina toe ʼai ki he tahi fale paʼaga. Kae ko te taumatuʼa ʼaē neʼe nofo ai ia Zongezile neʼe nā tokoni kia ia ke mole ina toʼo te falā ʼaia.
20 ʼI te ʼaho ake, ʼi tana ʼalu ʼo gāue, neʼe fakahā e Zongezile te faihala ʼa te fale paʼaga. Neʼe maʼu ai neʼe tatau tona numelo ʼi te fale paʼaga pea mo te numelo ʼo te tagata maʼu koloā, neʼe faihala ʼi tana fakahū tana falā ki te fale paʼaga. ʼI tana punamaʼuli ki te mole fakaʼaogaʼi e Zongezile te paʼaga ʼaia, neʼe fehuʼi fēnei age e te tagata kia ia: “Koteā tau lotu?” Neʼe fakamahino e Zongezile ko ia ko te Fakamoʼoni ʼa Sehova. Neʼe fakamālo lahi age kia ia te kau pule ʼo te fale paʼaga, ʼo nātou ʼui fēnei: “ ʼE mātou loto ke liliu te hahaʼi fuli ʼo agatonu ohage ko te kau Fakamoʼoni ʼa Sehova.” ʼE moʼoni, kapau ʼe tou agatonu pea mo agalelei, pea ʼe feala ai ki te hahaʼi ke nātou faka kolōlia kia Sehova.—Hepeleo 13:18.
21 ʼE mole ʼaoga ke lahi ʼaupito takita agalelei ke maʼu ai he ʼu fua lelei. Ohage la, ko te tēhina tūpulaga, ʼe pionie katoa ʼi te motu ʼi Haʼamoa, neʼe ʼalu ki te fale tōketā. Neʼe atalitali te hahaʼi ki te vakaʼi tōketā pea neʼe fakatokagaʼi e te tēhina ko te finematuʼa ʼaē neʼe ʼi ʼona tafa neʼe logo kovi ʼaupito. Neʼe ina ʼui age ki te fafine ke ina toʼo tona lapalasi ke foimo ʼavage hona ʼu faitoʼo. ʼI te tahi ʼaho, neʼe felāveʼi te Fakamoʼoni mo te finematuʼa ʼaia ʼi te fale koloā. Neʼe manatuʼi e te fafine ia ia pea mo tana agalelei ʼi te fale tōketā. Neʼe ina ʼui fēnei: “Kua ʼau ʼiloʼi ʼi te temi nei, ʼe ʼofa moʼoni te kau Fakamoʼoni ʼa Sehova ki tonatou kāiga.” Neʼe mole ina tali ʼi muʼa atu te logo ʼo te Puleʼaga, kae ko te agalelei ʼa te Fakamoʼoni kia ia neʼe ʼi ai tona fua lelei. Neʼe ina tali ke fai hana ako Tohi-Tapu pea neʼe ina kamata maʼu ai te ʼatamai mālama ʼo te Folafola ʼa te ʼAtua.
22. Koteā te faʼahi maʼuhiga ʼe feala ai ke tou “fai te mea e lelei”?
22 ʼE mahino papau ia ʼe feala ke koutou fakamatala mo he ʼu meʼa neʼe hoko ʼe fakahā ai te maʼuhiga ʼo te fakahā ʼo te agalelei. Ko te faʼahi tāfito moʼo “fai te mea e lelei” ʼe ko te kau tuʼumaʼu ki te tala ʼo te logo lelei ʼo te Puleʼaga ʼa te ʼAtua. (Mateo 24:14) ʼOfa pe ke tou haga kau lahi ki te gāue maʼuhiga ʼaia, heʼe tou ʼiloʼi ʼe tou fai te meʼa ʼaē ʼe lelei, tāfito kia nātou ʼaē ʼe nātou tali lelei. Ko te meʼa ʼaē ʼe maʼuhiga tāfito, heʼe ko totatou minisitelio pea mo te lelei ʼo tatatou aga ʼe ina faka kolōliaʼi ai ia Sehova, te matapuna ʼo te agalelei.—Mateo 19:16, 17.
Tou Haga “Fai Ia Te Lelei”
23. He koʼe ko te minisitelio faka Kilisitiano ʼe ko he gāue lelei?
23 ʼE mahino ia ko totatou minisitelio ʼe ko he gāue ʼe lelei. ʼE feala ke hāofaki ai tatou pea mo nātou ʼaē ka fakalogo ki te logo ʼo te Tohi-Tapu ʼo haʼele ʼi te ala ʼaē ʼe ina taki ki te maʼuli heʼegata. (Mateo 7:13, 14; 1 Timoteo 4:16) Ka tonu ke tou fai he ʼu tonu, ʼuhi ko tatatou loto ʼaē ke tou fai te meʼa ʼaē ʼe lelei, ʼe tou fai anai te ʼu fehuʼi ʼaenī: ‘ ʼE malave feafeaʼi anai te tonu ʼaia ki taku gāue fai faka mafola? Ko te meʼa ʼaē ʼe ʼau fakatuʼutuʼu ke ʼau fai ʼe fua lelei moʼoni anai? ʼE tokoni mai anai koa ke ʼau lagolago ki te hahaʼi ke nātou tali te “logo lelei . . . heʼegata,” pea ke nātou felogoi lelei ai mo Sehova ʼAtua?’ (Apokalipesi 14:6, MN ) ʼE tou maʼu anai he fiafia lahi mo kapau ʼe tou fai he tonu ʼe lagolago lahi ki te Puleʼaga.—Mateo 6:33; Gaue 20:35.
24, 25. Koteā ʼihi meʼa lelei ʼe feala ke tou fai ʼi te kokelekasio, pea koteā ʼaē ʼe tou lava falala kiai mo kapau ʼe tou haga fakahā te agalelei?
24 ʼAua naʼa tou meʼa noaʼi te ʼu fua lelei ʼo te agalelei. ʼE feala ke tou haga fakahā te kalitate ʼaia ʼo tou lagolago ki te kokelekasio pea mo tou fai te ʼu meʼa ʼaē ʼe tou lavaʼi moʼo tokoni ki tona haʼele lelei. ʼE mahino ia ʼe tou fai te meʼa ʼaē ʼe lelei mokā tou kau tuʼumaʼu ki te ʼu fono pea mo tou fai ai he ʼu tali. Ko tatatou kau kiai ʼe ina fakaloto mālohiʼi totatou ʼu tēhina, pea ko tatatou ʼu tali ʼaē neʼe tou teuteuʼi lelei ʼe ina fakaloto mālohi nātou ʼi te faʼahi fakalaumālie. ʼE tou toe fai te meʼa ʼaē ʼe lelei mokā tou fakaʼaogaʼi totatou ʼu koloā moʼo taupau lelei totatou Fale ʼo te Puleʼaga pea mokā tou tokoni ki tona fakamaʼa. (2 Hau 22:3-7; 2 Kolonito 9:6, 7) Koia, “i tatatou kei mau te temi, tou fai ia te lelei ki te tagata fuape, kae tafito ia te lelei o te kaiga o te tui.”—Kalate 6:10.
25 ʼE mole feala ke tou ʼiloʼi fakatomuʼa te ʼu ʼaluʼaga fuli ʼaē ʼe tonu anai ke tou fakahā ai te agalelei. Kae kapau ʼe tou tauʼi he ʼu faigataʼaʼia, pea tou vakaʼi te ʼu tokoni ʼa te Tohi-Tapu, tou kole te laumālie maʼoniʼoni ʼo Sehova, pea mo tou faiga ke tou fakahoko tona finegalo ʼaē ʼe lelei pea mo haohaoa. (Loma 2:9, 10; 12:2) Tou falala ko Sehova ʼe ina tapuakina lahi anai tatou mo kapau ʼe tou haga fakahā te agalelei.
Koteā Takotou Tali?
• ʼE lava feafeaʼi hatatou fai te meʼa ʼaē ʼe lelei ʼaupito?
• He koʼe ʼe ʼui ko te agalelei ʼe ko he ‘fua ʼo te mālama’?
• He koʼe ʼe ʼui ko te agalelei ʼe ko he ‘fua ʼo te laumālie’?
• Koteā te ʼu fua ʼaē ʼe tou maʼu mo kapau ʼe lelei tatatou aga?
[Paki ʼo te pasina 17]
Ko te Folafola ʼa te ʼAtua mo tona laumālie maʼoniʼoni ʼe tokoni mai ke tou fakahā te agalelei
[Paki ʼo te pasina 18]
Kapau ʼe tou fakahā te agalelei pea ʼe fua lelei anai