Manuʼia ʼi Te Kele Haohaoa Ka Haʼu!
ʼE FEALA ke tou fakafiafia ʼaē ko Sehova, ko te ʼAtua fakatokatoka pea mo maʼa, ka ina fakahoko anai tana fakatuʼutuʼu tāfito ʼaē ko te fakaliliu ʼo te kele katoa ko he palatiso (Isaia 11:6-9)! ʼE fēnei tana fakapapau: “Ko te folafola ʼaē ʼe ʼalu atu ʼi toku gutu. ʼE mole feala ke toe liliu mai kia te ʼau ka neʼe mole ʼi ai hona fua, kae, ʼe ina fakahoko anai te meʼa neʼe ʼau leleiʼia.” Ko te ʼu talanoa ʼaenī ʼe mole ʼalu noa, “ ʼe mole feala ʼaupito ai ki te ʼAtua ke loi”. — Isaia 55:11; Hepeleo 6:18.
ʼAki te ʼofa ʼo Sehova, ʼe ina fakahoko anai tona finegalo ia muʼa ʼo he maumauʼi katoa e te tagata te kele tāfito la te tuʼutāmaki ʼo he pulihi talu ʼosi ʼo te kele ʼaē ʼe mole lava anai hona tāʼofi! — Fakahā 11:18.
ʼE matehi anai e Sehova ia nātou ʼe mole fia fakahemala, mo te kau hahaʼi fakahehema pea mo nātou ʼe talagataʼa faʼitaliha ki tana ʼu fakatuʼutuʼu ʼaē ki te fakatokatoka pea mo te fakamaʼa. ʼE mole faka fealagia anai ki he tahi ke ina maumauʼi te Palatiso ka toe fakatuʼu. — Tāʼaga Lea 2:20-22.
Lolotoga ʼo te ʼafio ʼo te Puleʼaga ʼo te ʼAtua, ʼaki te taki ʼa Sesu Kilisito, ʼe akoʼi anai e te tagata peʼe feafeaʼi te molehi ʼo te ʼu toega ʼaē ʼe fakatupu tefu ki te kele. Pea tahi ʼaē meʼa — ʼe mole ko te temi nei — ʼaē ka haga anai te ʼu kaugana fuli ʼa te ʼAtua ʼo fai te ʼu fakatuʼutuʼu takitokotahi pea mo faka kaugā moʼo lagolago anai ki he fakamaʼa katoa ʼe mole heʼeki fai ʼe he tahi. — Vakaʼi ia Esekiele 39:8-16.
Ko nātou ʼaē ka maʼuʼuli ʼi te fakaʼosi ʼo te ʼu faʼahiga meʼa ʼo te tuʼu ʼaenī, ʼe nātou lagolago fakalelei pea mo fakafiafia anai te polokalama fakamaʼa ʼaia ohage pe ko tanatou kau ʼaē ki te gāue fakamaʼa fakalaumālie ʼaē ʼi te temi nei. — Pesalemo 110:3.
ʼE hoko moʼoni te fakamaʼa ʼo te kele, ʼaē ko te toe fakamaʼa lahi ʼaia ʼo te ʼu temi fuli ʼe fakahoko e te Puleʼaga ʼo te ʼAtua. Ko meʼa fuli ʼe pipiki ki te fakahehema ʼe pulihi anai ia. Ko te ʼu faʼahiga paki ʼi te ʼu kaupā ʼe mole toe maʼu anai ʼi te ʼu potu fuli ʼo te kele. ʼO toe feiā aipe mo te ʼu hina neʼe foafoaʼi, mo te ʼu tini, mo te ʼu kato palasitike, te ʼu puluʼi kamu pea mo te ʼu pepa kofukofu ʼo te ʼu meʼa mālie, mo te ʼu sulunale, pea mo te ʼu nusipepa ʼaē ʼe leta haʼele ʼi te ʼu mata tai peʼe ʼi ʼu koga meʼa faka palatiso.
Manuʼia ʼi te kele haohaoa ka haʼu!
[Paki ʼo te pasina 7]
ʼE koutou kau anai koa ʼi te toe fakamaʼa ka hoko?