Molehi ʼo Te Fakahehema—ʼAē ʼi Te Loto Pea Mo Te ʼAtamai

NEʼE mole tuku e Sehova ki te tagata te manatu mālohi ʼaē ke ina fai te meʼa fakaʼuli pea mo fakamaveuveu. Ko te kele neʼe fakatuʼutuʼu ke liliu ko he palatiso maʼa, tokalelei pea mo matalelei. Neʼe mole fakatuʼutuʼu e te ʼAtua ke liliu te kele ko he huaʼaga ʼotaʼota. — Senesi 2:8, 9.

Koia, ʼi te lituʼa ʼa te tagata ki te takitaki ʼa te ʼAtua, neʼe ina laga ai leva tana faʼahiga mālama. ʼI te mole maʼu ʼo te poto fakaʼatua feiā aipe mo te mole ʼiloʼi ʼo te fakaʼaluʼalu ʼo te maʼuli, neʼe mahino te tagata ki te meʼa ʼaia ʼaki tana felāveʼi mo te ʼu faigataʼaʼia pea mo te ʼu fakatuʼutuʼu hāla ʼaē neʼe ina fai. ʼE lagolago te hisitolia ki te moʼoni ʼaē ʼo te Tohi-Tapu ʼo ʼuhiga ʼaē ko te tagata ʼe mole feala ke ina taki tona ala fakalelei; ia taʼu ʼe lauʼi afe “ko te tagata ʼe ina puleʼi pe te tagata ki tona tuʼutāmaki”. (Tagata Tānaki 8:9; Selemia 10:23.) Ko te tuʼutāmaki ʼo te fakahehema ʼo te temi nei, ʼi tona ʼu ʼaluʼaga fuli, ʼe ko he ikuʼaga ʼaia ʼo te takitaki vale ʼa te tagata.

Fakaʼaogaʼi te manatu ʼa te ʼAtua

Ko te hahaʼi ʼaē ʼe nātou fia lelei ki te ʼAtua, ʼe nātou faiga mālohi ke nātou mulimuli ki te ʼu lekula fakamaʼa ʼo te Tupuʼaga. Koia ʼaē, ko te kau Fakamoʼoni ʼa Sehova neʼe nātou felāveʼi mo te fihifihia ʼi tanatou fakatahi faka malamanei ʼaē neʼe fai ʼi Prague ʼi Sekosolovakia, ʼi te vaelua ʼo te taʼu 1991a. ʼE lagi ko te toko 75 000 hahaʼi ʼe kau ai anai, ko te toe hahaʼi ʼaia neʼe feala ke fakatahi fakafiafia ʼi te malaʼe ʼo Strahov. Kae ko te malaʼe neʼe mole kei fakaʼaogaʼi ia taʼu e nima. Neʼe kua matakovi ʼosi ia, ʼe ʼiloga la ʼi te ʼu meʼa ʼaē neʼe kua maumau ʼi ai. Ko te kiʼi toko 1 500 kau Fakamoʼoni ʼa Sehova neʼe nātou fakafoʼou pea mo pena te malaʼe ʼaia ia hola e 65 000 tupu. ʼI te temi ʼo te fakatahi, ko te gāue fakamaʼa ʼaia neʼe fai neʼe ina fakaliliu te malaʼe ʼaia ko he koga meʼa matamatalelei ki te tauhi ʼo te ʼAtua moʼoni, ko Sehova.

Koteā koa te meʼa ʼaē ʼe ina uga te kau Fakamoʼoni ʼa Sehova ke nātou kehekehe mo te hahaʼi ʼo te malamanei logope la ko te malamanei ʼe ina fakahā hana faʼahiga leleiʼia te fakamaʼa pea mo te tokalelei? Ko te maʼuhiga ʼo te tokoni ʼo te Tohi-Tapu ʼaē ʼe tonu ai ke toʼo e te kau kilisitiano te ʼu agaaga ʼe mole lelei, ohage la ko te manatu pe ʼaē kia tatou totonu, ko te mole tokagaʼi ʼo ʼihi, ko te mānumānu, pea mo te mole maʼu ʼo te ʼofa. ʼE ʼui e te Tohi-Tapu, “koutou toʼo kehe ia koutou takotou ʼu aga ʼāfea mo tona ʼuhigaʼi tagata”. Pea ke koutou fetogi te aga ʼaia “ ʼaki te natula foʼou, ʼaē ʼaki te mālama totonu, ʼe fakafoʼou ia ki te paki ʼo Ia ʼaē neʼe ina fakatupu”. Ko te natula ʼaē ʼe ina maʼu te ʼofa ki te fakamaʼa, ki te tokalelei, pea mo te matalelei, ʼe mole ina maʼu ia te ʼu manatu ʼaē ki he fakahehema. — Kolose 3:9, 10; 2 Kolonito 7:1; Filipe 4:8; Tito 2:14.

ʼE fakamaʼua e te ʼuhigaʼi tagata foʼou ki te kau kilisitiano ke nātou tokagaʼi te fakahehema, ke ʼaua naʼa nātou fakahehema peʼe mo talagataʼa ʼi hanatou mole tokagaʼi te ʼu lao fakamaʼa ʼaē mai te ʼu puleʼaga. ʼE tokoniʼi e te natula foʼou te kau kilisitiano ke ʼaua naʼa nātou laku haʼele he ʼu meʼa, pea ke ʼaua naʼa nātou maʼu te manatu pe kia nātou totonu, pea mo te aga fakapepeʼe ʼaē ʼe ina taki ki te fakaʼuli. ʼAki te fakaʼapaʼapa ki te ʼu meʼa ʼa ʼihi, ʼe tekeʼi e te natula foʼou te faʼahiga fakaʼaogaʼi ʼaē ʼo te ʼu paki ʼi te ʼu kaupā ohage ko he faʼahiga fakahā ʼaia ʼo te manatu, peʼe ko he gaoʼi ʼe mole faʼa kovi, peʼe ko he faʼahiga faiva. ʼE ina fakamaʼua ʼo ʼuhiga mo te ʼu loto fale, mo te ʼu motakā, pea mo te ʼu mutuʼi meʼa, pea mo te ʼu sino ke taupau ke maʼa. — Vakaʼi ia Sake 1:21.

ʼO ʼuhiga mo nātou ʼaē ʼe mole nātou fia kofuʼi te natula foʼou, ʼe tukuga koviʼi koa ia te ʼAtua ʼi tana tapuʼi kia nātou ʼaia te maʼuli ʼi te Palatiso ka haʼu? Kailoa. Ko he tahi pe ʼe kei na maʼu ʼi tona loto pea mo tona ʼatamai te ʼu manatu fakahehema ʼe ko he tuʼutāmaki anai ki te kele faka palatiso ʼaē ka toe fakatuʼu, ʼo toe fakatupu mamahi aipe kia nātou ʼaē ʼe nātou fia taupau ke maʼa te kele. Ko te fakatuʼutuʼu ʼa te ʼAtua ʼaē “ke ina faka ʼauha ia nātou ʼaē ʼe nātou faka ʼauha te kele” ʼe tonu pea mo ʼofa. — Fakahā 11:18; 21:8.

ʼE tou kau mālohi koa ki ai?

Kae, ʼe fakamaʼua koa ia ki te kau kilisitiano ke nātou lagolago fakamālohi te ʼu fakatuʼutuʼu ki te fakamaʼa?

ʼE mahino ko te fakahehema ʼe fakatupu kovi ki te fīmālie ʼo te maʼuli pea mo te malamanei. Neʼe tokagaʼi e Sehova te ʼu faʼahi ʼaia, ʼaē ʼe tou maʼu ʼi te ʼu lao ʼaē neʼe ina foaki ki te kau Iselaele (Ekesote 21:28-34; Teutalonome 22:8; 23:12-14). Kae neʼe mole ʼi ai pe la he temi neʼe ina fakatotonuʼi nātou ke nātou fakalotoʼi ʼihi hahaʼi ʼo ʼuhiga mo te ʼu meʼa fakafimālie ʼo te malamanei; pea mo te kau kilisitiano ʼo te ʼuluaki sēkulō neʼe mole he temi neʼe nātou fai te taʼi aga ʼaia.

Ia ʼaho nei, ko te ʼu meʼa ʼo ʼuhiga mo te malamanei ʼe feala pe ke liliu ko he ʼu talanoa faka politike. Ko ʼihi faʼahi faka politike neʼe fakatuʼutuʼu tāfito moʼo fakatokatoka te ʼu fihifihia ʼo te malamanei. Ko te kilisitiano ʼaē ʼe ina faka fealagia hana kau ki he ʼu fakatuʼutuʼu faka politike ʼe faka ʼuhiga leva ia ia ʼaia ʼe kau ki te politike. Neʼe tuku e Sesu te fakatuʼutuʼu ʼaenī ki tana kau tisipulo, ʼo fēnei: “ ʼE mole nātou kau ʼi te malamanei, ohage ko ʼau ʼe mole ʼau kau ʼi te malamanei.” Ko te kilisitiano ʼaē ʼe mole ina tokagaʼi te fakatuʼutuʼu ʼaia ʼe tuʼutāmaki anai ʼi hana kau mo te “kau pule ʼo te ʼu faʼahiga meʼa ʼo te tuʼu ʼaenī, ʼaē ʼe tonu ke faka ʼauha ʼo talu ʼosi”. — Soane 17:16; 1 Kolonito 2:6.

Neʼe mole fia fakatokatokaʼi e Sesu te ʼu fihifihia fuli ʼo tona temi; ʼo toe feiā aipe ki tana kau tisipulo, neʼe mole ina fakahā age kia nātou ke nātou fai te faʼahi ʼaia. Ko te fakatotonu ʼaē neʼe ina fai kia nātou, koʼeni: “Koutou ʼolo pea mo koutou fai he kau tisipulo ʼi te hahaʼi ʼo te fenua fuli pe, ʼo koutou papitemaʼi ia nātou (...), ʼo koutou akonakiʼi ia nātou ke nātou taupau te ʼu meʼa fuli pe neʼe ʼau fakatotonu atu.” Neʼe mole talanoa ia ʼo ʼuhiga mo te ʼu meʼa faka politike ʼo te malamanei. — Mateo 28:19, 20.

ʼI tana fakamahinohino ʼo ʼuhiga mo te meʼa ʼe tonu ke fakamuʼamuʼa ʼi te maʼuli ʼo te kilisitiano, neʼe ʼui fēnei e Sesu: “Ke koutou haga kumi muʼa te puleʼaga pea mo Tona faitotonu.” (Mateo 6:33). ʼI te temi leva ʼaē ka haga ai Sehova ʼaki te Puleʼaga faka mesia ʼo fakatuʼu te ʼu fakatuʼutuʼu faitotonu ʼi te kele katoa, ko te ʼu fihifihia faka politike ʼe fakatokatoka anai ʼo talu ʼosi ai pea ʼe ko he meʼa ʼe lelei anai ki te hahaʼi fuli.

Koia ʼaē, ʼe maʼu e te kau Fakamoʼoni ʼa Sehova te aga fakapotopoto ʼi te malamanei. ʼO mulimuli ki te manatu ia Loma 13:1-7, ʼe ko he maʼua hanatou fakalogo fakalelei ki te ʼu lao ʼo te puleʼaga ʼo ʼuhiga mo te fakaʼaluʼalu ʼo te ʼu meʼa ʼo te malamanei. Pea tahi ʼaē, ko te ʼofa faka lotu ʼaē ʼe nātou maʼu ki ʼonatou tatau, ʼe ina uga ia nātou ke nātou fakaʼapaʼapa ki te ʼu meʼa ʼa ʼihi — ko te kaugamalie peʼe ko te hahaʼi takitokatahi — ʼi hanatou mole fai he meʼa ke kovi feiā aipe mo te hoko liaki ʼo he ʼu ʼotaʼota. Kae neʼe mole fakatotonuʼi nātou moʼo fai he ʼu puleʼaki ʼo ʼuhiga mo te ʼu fakatuʼutuʼu fakamaʼa ʼo te malamanei. Koia ʼaē ʼe nātou tuku aipe ki muʼa te faka mafola ʼo te logo ʼo te Puleʼaga ʼo te ʼAtua, ʼo fakahā ʼaki ko te puleʼaga pe ʼaia ka ina fai he ʼu lelei heʼegata.

Ko te fakamaʼa fakalaumālie

Neʼe tuʼa lahi te ʼu fakatokaga neʼe fai ki te kau Iselaele ʼo te temi muʼa mokā nātou fakahehema te kele ʼaki te toto ʼaē ʼe nātou liligi, feiā aipe mo te faʼahiga maʼuli heʼeʼaoga ʼe nātou fai, peʼe ko tanatou mole fakaʼapaʼapa ki te ʼu meʼa taputapu (Faka au 35:33; Selemia 3:1, 2; Malakia 1:7, 8). Neʼe tauteaʼi nātou ʼi te fakahehema fakalaumālie ʼaia, kae mole ko te fakahehema fakasino ʼaē neʼe feala ke nātou toe fakalakahalaʼi aib.

Koia, ʼe ko te fakahehema fakalaumālie peʼe ko te fakaʼuli ʼaē ʼe tonu muʼa ke faigaʼi e te kilisitiano ʼo tekeʼi. ʼE ina fai te faʼahi ʼaia ʼi hana kofuʼi “te natula foʼou”, ʼaē ʼe ina molehi te ʼu manatu fakahehema ʼaē ʼi te loto pea mo te ʼatamai. Ko te toko fā miliona tupu kau Fakamoʼoni ʼa Sehova ʼe nātou fua manuʼia ʼaki te fakamaʼa fakalaumālie ʼaia, ʼi tanatou ʼu aga faka lotu pea mo maʼa ʼi te aga ʼaē ke fai, feiā aipe mo te fakamaʼa fakasino. — Efesi 4:22-24.

Ko te temi ʼaenī ʼo te gāue fakamaʼa fakalaumālie. Ko te gāue fakamaʼa fakasino ʼi te kele katoa ʼe hoko anai ʼi tona temi katofa pea ʼe tou taupau anai totatou nofoʼaga mai te huaʼaga ʼotaʼota ʼi he gaohi ʼo te ʼulihi ʼaenī ʼe hoko ko he koga meʼa ʼe tau mo tona ʼaluʼaga. — Tagata Tānaki 3:1.

[Nota ʼi te lalo pasina]