ʼE ʼi Ai Koa He Puipui Moʼoni?

KO TE tagata faitohi ko Ralph Waldo Emerson neʼe ina ʼui fēnei: “Tokosiʼi te ʼu tagata ʼe nātou fakamoʼoni ki te lasio (...). Ko te ʼu tagata ʼaē ʼe mālolohi ʼi te aga ke fai pea mo ʼaē ʼo te ʼatamai ʼe nātou fakamoʼoni ki te tupuʼaga pea mo te ikuʼaga.” Ei, ko he tahi ʼe tui ki te mālohi ʼo te ʼu kiʼi kahoa fakamanamana pea mo te ʼu meʼa taupau faka lasio, ʼe ina tuku tona maʼuli ke takitaki e te ʼu mālohi fakapulipuli. ʼE ina fakafisi ki te meʼa ʼaē ʼe lākatonu pea mo tonu, pea ʼe mulimuli ia ki te ʼu mataku fakatemonio ʼaē ʼe mole honatou ʼuhiga.

Kae, ko te Tohi-Tapu ʼe feala ke ina faka ʼāteaina he tahi mai te ʼu taʼi tuʼania ʼaia. ʼE ina fakahā ko te ʼu kiʼi kahoa pea mo te ʼu meʼa taupau ʼe ko he ʼu meʼa gaʼegaʼe, ʼe mole honatou mālohi. E feafeaʼi tona fakahā e te Tohi-Tapu ʼo te faʼahi ʼaia? ʼE ʼui e te tohi The New Encyclopædia Britannica, “ko te ʼu kiʼi kahoa ʼe ʼui ʼe maʼu tonatou mālohi mai tanatou felogoi [ʼi te lotolotoga ʼo ʼihi meʼa] mo te ʼu mālohi fakalaumālie”. Ko te ʼu mālohi ʼaia e lagi ʼe feala pe ‘ko te ʼu laumālie ʼo te kau mate’ peʼe ‘ko te mālohi ʼo te lasio’. Kae ʼe fakahā fakalelei e te Tohi-Tapu ko te kau mate “mole kei nātou ʼiloʼi he meʼa e tahi”. (Tagata Tānaki 9:5.) Koia, ʼe mole he ʼu laumālie ʼo te kau mate ʼe feala ke nātou tokoni peʼe ke nātou fakatupu lavea ki he tahi ʼe maʼuli; pea ʼe mole toe ʼi ai he faʼahiga mālohi fakapulipuli ohage ko te lasio ʼe feala ke gāue maʼa koutou.

ʼI te ʼu temi ʼo te kau pateliaka, neʼe tauteaʼi e te ʼAtua ia nātou ʼaē neʼe nātou mavae mai ia ia, ia nātou ʼaē neʼe nātou galoʼi tona moʼuga tapu, “ia nātou ʼaē ʼe nātou fakatuʼu te laupapa ki te ʼatua ʼo te Faigamālie pea mo nātou ʼaē ʼe nātou fakafonu ʼo aʼu ki te gutuʼi ipu te vino ʼe fefioʼaki maʼa te ʼatua ʼo te Mataʼi Tohi”. ʼO mole ʼui ke maʼu te puipui, ko te hahaʼi lagolago ʼaia ʼo te faigamālie neʼe tuku nātou ki te fakaʼauha. “ ʼE ʼau finegaloʼi anai koutou ki te heletā”, neʼe ko te ʼui ʼaia ʼa Sehova ʼAtua. — Isaia 65:11, 12.

ʼI te fakaʼaogaʼi ʼo te ʼu meʼa fakatemonio, lagi ko te Papiloni ʼāfea neʼe tui ki he puipui ʼo te ʼu mālohi faka misitelio. Kae ko Papiloni neʼe tau pe mo te ʼu mamahi. “Haga nofo ʼi tau ʼu faitutuku pea mo tau ʼu toe gāue fakatemonio”, ko te fakalaga ʼaia neʼe fai age e te polofeta ko Isaia kia nātou. “Lagi ʼe feala ke ke maʼu he tokoni mai ia nātou ʼaia (...). Kailoa ia! logope la takotou tuʼuga meʼa ʼe mole ʼi ai hokotou mālohi.” (Isaia 47:12, 13, The New English Bible). ʼI te ʼalu ʼo te temi ko te puleʼaga neʼe puli katoa ʼosi. Ko te tui ki te ʼu meʼa fakalilolilo fakatemonio neʼe fakamoʼoni ʼe noa. ʼO toe feiā aipe, ʼe mole he kiʼi kahoa mana, he meʼa taupau ʼo kita, ʼe feala ke ina fai he meʼa moʼo tokoni peʼe moʼo puipui koutou.

Ko te faʼahiga tauhi tamapua

Kae, ko ʼihi ʼe feala ke nātou faka ʼuhiga ʼe mole nātou tuʼutāmaki ia ʼi tanatou toʼo ʼaē ʼo te cristal, he vaeʼi lapino, peʼe ko he metai faka lotu. ʼE ko he ʼu kiʼi meʼa koa ʼaia ʼe mole faʼa fakatupu tuʼutāmaki? Kailoa ia, ko te tali ʼaia ʼa te Tohi-Tapu. ʼE ina ʼui ko te mālohi ʼaē ʼo te ʼu meʼa fakalilolilo fakatemonio ʼe ko he meʼa noa ia kae ʼe fakatupu tuʼutāmaki.

Ko te fakaʼaoga ʼo te ʼu kiʼi kahoa ʼe ko he faʼahiga tauhi tamapua — ʼe tautea fakahagatonu e te Folafola ʼa te ʼAtua (Ekesote 20:4, 5). ʼE moʼoni, ʼe lagi feala ke mole ʼiloʼi e he tahi ʼe ina lolotoga atolasioʼi he kiʼi kahoa peʼe ko he kiʼi meʼa. Kae ʼe mole ko he fakaʼapaʼapa koa pea mo atolasio ki he ʼu mālohi fakamanamana fakatemonio fakapulipuli mo kapau pe ʼe maʼu e he tahi hana meʼa taupau fakatemonio? Pea ʼe mole ko te moʼoni koa la ʼaē ko he tokaga faka atolasio (ohage la ko he fekita) neʼe ina tau tuku kia nātou ko he ʼu taupau? Kae ko te Tohi-Tapu, ia 1 Soane 5:21, ʼe tokoni ki te kau kilisitiano, ʼo fēnei: “Koutou fakamamaʼo mai te ʼu tamapua.” ʼE mole fakapipiki anai ki te faʼahi ʼaia he ʼu meʼa ʼe ʼui ko he ʼu meʼa taupau peʼe ko he ʼu kiʼi kahoa?

Ko te hele ʼo te meʼa fakatemonio

ʼI te fakaʼaoga ʼaē ʼo te ʼu kiʼi kahoa, tokolahi foki neʼe tō ki te hele ʼaē ʼo te meʼa fakatemonio. ʼE moʼoni, ko ʼihi ʼe feala ke nātou toʼo he cristal peʼe ko he vai fakamanamana ʼo nātou mulimuli pe ki te agaʼi fenua kae ʼe mole falala nātou kiai. Kae ohage pe ko te feʼauʼaki mo he paomutu ʼe feala ke maʼu ai te mahaki ʼaē ko te SITA, ko te fakatahi ʼaē mo te meʼa fakatemonio ʼe toe feala pe ke maʼu ai he ʼu ikuʼaga kovi. Neʼe ko he tupuʼaga lelei ʼaē neʼe tapuʼi ai e te ʼAtua te kau Iselaelite mai te ʼu gaohi meʼa mana, mo te ʼu fai fakakikite, pea mo he fakakikite ʼaki te lau ʼo te ʼu nima. ʼE valoki e te Tohi-Tapu, ʼo fēnei: “Ko ʼaē ʼe na fai te ʼu meʼa ʼaia ʼe ko he meʼa fehiʼaʼinaʼi ia e Sehova.” — Teutalonome 18:10-14.

Koteā te tupuʼaga ʼo te tapu mamafa ʼaia? Koteʼuhi ko te ʼu mālohi fakapulipuli fakatemonio ʼi te ʼu taʼi aga ʼaia, ʼe mole ko te ʼu laumālie ʼo te kau mate peʼe ko he mālohi ʼo te lasio kae ko Satana te Tevolo pea mo tana kau temonioa. Pea ko te fakaʼaogaʼi ʼo te ʼu kiʼi kahoa ʼe pipiki tāfito ki te tauhi ʼo te kau temonio. ʼE ʼui e te Vine’s Expository Dictionary of Old and New Testament Words: “ ʼI te ʼu meʼa fakatemonio, ko te fakaʼaogaʼi ʼo te toloke, peʼe vaivai peʼe mālohi, ʼi te agamāhani neʼe hilifaki kiai te ʼu palalau fakamanamana pea mo te ʼu pāui ki te ʼu mālohi fakatemonio fakapulipuli, ʼaki te tufa ʼo te ʼu faʼahiga meʼa taupau feiā aipe mo te ʼu kiʼi kahoa.”

Ko he tahi ʼe nofo mo hona kiʼi kahoa fakamanamana, ʼe mahino ia ʼe pipiki ki te ʼu meʼa fakatemonio. ʼE feala ke nofo ʼi te taki ʼa te mālohi fakamataku pea mo te pule ʼo te “ ʼatua ʼo te ʼu faʼahiga meʼa ʼo te tuʼu ʼaenī” — ko Satana te Tevolo (2 Kolonito 4:4). Ko te tupuʼaga tāfito ʼaia ʼo te fakatotonu mai e te Tohi-Tapu ke tou tekeʼi te ʼu faʼahiga meʼa fakatemonio kehekehe. — Kalate 5:19-21.

Maumauʼi te ʼu seini ʼo te mataku noa

Pea tahi ʼaē ʼe fakatokagaʼi e te tohi The World Book Encyclopedia: “ ʼE mahalo ia ko te ʼu mataku noa ʼe pipiki fualoa anai ia ki te maʼuli ʼo te hahaʼi ʼaē ʼe femanavaheʼaki pea mo nātou maʼu te ʼu lotolotolua ʼo ʼuhiga mo te temi ka haʼu.” Kae ko te kau Fakamoʼoni ʼa Sehova neʼe nātou tokoni ki te tokolahi ke nātou ʼāteaina mai te ʼu mataku noa faka tuʼutāmaki ʼaia. Ko te fafine ʼi te potu Toga ʼo Afelika ʼe ina manatuʼi, ʼo fēnei: “Neʼe ʼau mataku ki te kau laumālie kovi, pea ko toku ʼapi neʼe fonu ai te muti moʼo taupau ʼau mai ia nātou.” Ko te kau Fakamoʼoni ʼa Sehova neʼe nātou tokoni kia ia ke mahino ki te ʼu tuʼutāmaki ʼo te pipiki ʼaē ki te ʼu meʼa fakatemonio fakapulipuli. Koteā tana tali? “Neʼe ʼau kamata līaki te ʼu meʼa fuli ʼaē neʼe nofo mo ʼau ʼaē neʼe pipiki mo te ʼu meʼa fakatemonio”, ko tana ʼui ʼaia. “Ko toku maʼuli neʼe siasiaʼa mai ai. Neʼe ʼau voto toku maʼuli ʼo kaugana kia Sehova pea neʼe ʼau papitema.” ʼI te temi nei kua ʼāteaina ia mai te mataku noa pea mo te meʼa fakatemonio.

Toe fakatokagaʼi age, ko te tagata fai fakalauʼakau Niselia ʼaē neʼe ina fakapipiki te ʼu meʼa fakatemonio pea mo tana ʼu faiva faifaitoʼo. Tuʼumaʼu pe ʼaki te ʼu fakamataku pea mo te ʼu faitutuku ʼe ina kapu anai te kau Fakamoʼoni ʼa Sehova mai tona ʼapi mokā ʼe nātou pāui anai. ʼI te tahi ʼaho neʼe ina gaohi te vai fakamanamana, neʼe ina fai te ʼu palalau fakamanamana ki te vai ʼaia, pea neʼe ina pīʼi ʼaki te ʼu mata ʼo te tagata Fakamoʼoni! “Ia ʼaho e fitu ʼe ke mate anai!” ko tana kalaga ʼaia. ʼAho e fitu ki muli age, neʼe liliu ki ai te tagata Fakamoʼoni, ʼo tupu ai leva te haʼu ki tuʼa ʼo te tagata fai fakalauʼakau, heʼe ʼi tana manatu neʼe sio ki te laumālie! Ko tana meʼa fakamanamana neʼe noa ia, neʼe ina tali ai leva tana ako faka tohi-tapu ʼo liliu mo ia ko te Fakamoʼoni.

Mo koutou pe la ʼe feala ke koutou ʼāteaina mai te ʼu seini ʼo te manavahe pea mo te mataku noa. ʼE mahino pe, ko te meʼa ʼaia ʼe feala ke mole faigafua. Lagi neʼe koutou tutupu ʼi he agaʼi fenua ko te fakaʼaogaʼi ʼo te ʼu kiʼi kahoa pea mo te ʼu meʼa taupau ko he agamāhani ia. Ko te kau kilisitiano ʼo te Efesi ʼāfea neʼe nātou tau mo te taʼi fihifihia ʼaia. Neʼe nātou maʼuʼuli ʼi te agaʼi fenua neʼe puleʼi mālohi e te ʼu meʼa fakatemonio. Koteā te meʼa neʼe nātou fai ʼi tanatou mahino ʼaē ki te moʼoni ʼo te Folafola ʼa te ʼAtua? ʼE ʼui e te Tohi-Tapu, ʼo fēnei: “Tokolahi ia nātou ʼaē neʼe nātou fai te ʼu meʼa fakatemonio, neʼe nātou tānaki tanatou ʼu tohi pea nātou tutu ia muʼa ʼo te hahaʼi fuli. Ko te lau ʼo tona totogi neʼe maʼu ko piesi siliva e nimagofulu afe.” — Gāue 19:19.

Ke maʼu te puipui ʼa te ʼAtua

Kapau ʼe koutou vevete ia koutou te ʼu meʼa fuli ʼo te ʼu meʼa fakatemonio, ʼe koutou hāla anai koa mo he puipui? Kailoa ia, “ko te ʼAtua ko he tauʼaga maʼa tatou pea mo he mālohi, ko he tokoni ʼe faigafua tona maʼu ʼi te ʼu temi mamahi”. (Pesalemo 46:1.) ʼE ʼiloga tāfito anai te puipui ʼa te ʼAtua mokā ʼe ina fakaʼauha te ʼu faʼahiga meʼa ʼo te tuʼu agakovi ʼaenī. “ ʼE ʼiloʼi e Sehova peʼe feafeaʼi te hāofaki ʼo te ʼu tagata aga faka lotu mai he ʼaʼahi, kae ʼe ina tuku te kau heʼe faitotonu ki te ʼaho ʼo te fakamāu ke toʼo ai nātou.” — 2 Petelo 2:9; vakaʼi ia Pesalemo 37:40.

Kae ʼi te temi nei, ‘ko te ʼu temi pea mo te ʼu meʼa fakafokifā ʼe hoko ia kia tatou fuli’. (Tagata Tānaki 9:11.) ʼE mole fakapapau e te ʼAtua ko tana ʼu kaugana ʼe nātou maʼu anai he maʼuli “fīmālie” peʼe ʼe ina taupau anai nātou mai te ʼu tuʼutāmaki fuli ʼe felāveʼi mo nātou takitokotahi. Kae, ʼe ina fai te fakapapau ʼaē ʼe ina puipui totatou ʼaluʼaga fakalaumālie pea mo totatou vāhaʼa mo ia (Pesalemo 91:1-9). ʼO feafeaʼi? ʼE ina foaki kia tatou te ʼu lao pea mo te ʼu pelesepeto ʼe feala ke fua lelei kia tatou pea mo puipui tatou mai te pule fakahehema ʼa Satana (Isaia 48:17). ʼI tatatou maʼu te mālama ʼo te ʼu ala ʼa Sehova, ‘ko te fealagia ʼo te fakakaukau ʼe ina leʼoleʼo anai koe, ko te fakasiosio lelei ʼe ina taupau anai koe’ — ohage la, mai te ʼu gāue ʼe mole hona fua peʼe faka tuʼutāmaki. — Tāʼaga Lea 2:11.

Ko te tahi faʼahiga puipui ʼo tatou e te ʼAtua ko tana tuku mai “te mālohi ʼaē ʼe laka age ʼi te mālohi māhani” ʼi te ʼu temi ʼaʼahi (2 Kolonito 4:7). Pea kapau ʼe ʼai he ʼu ʼaluʼaga ʼe faka mafasia ki he kilisitiano, ʼe ina foaki “te tokalelei ʼa te ʼAtua, ʼaē ʼe māʼoluga age ʼi te ʼu manatu fuli”, moʼo taupau te loto pea mo te ʼu fealagia fakakaukau (Filipe 4:7). Ei, ko te kilisitiano ʼe nofo teuteu moʼo “tāʼofi fakamālohi ki te ʼu puleʼaki ʼa te Tevolo”. — Efesi 6:11-13.

E feafeaʼi koa hakotou maʼu te tai puipui ʼaia? ʼUluaki ʼaki te ʼatamai mālama kia Sehova pea mo tona ʼAlo, ko Sesu Kilisito (Soane 17:3). Ko te kau Fakamoʼoni ʼa Sehova ʼe feala ke nātou tokoni ʼaupito kia koutou ʼi te ʼu faʼahi ʼaia. ʼI takotou fakatuputupu te vāhaʼa lelei mo Sehova, ʼe koutou kamata maʼu anai tana puipui agalelei. ʼE ʼui e te ʼAtua ia Pesalemo 91:14: “Koteʼuhi neʼe ina tuku kia te ʼau tona ʼofa, ʼe ʼau foaki age anai kia ia ke hāo. ʼE ʼau puipui anai ia, koteʼuhi neʼe ina ʼiloʼi toku huafa.”

ʼIo, kapau ʼe koutou agatonu kia te ia, ʼe mahino ia ʼe tapuakiʼi anai koutou e te ʼAtua ʼaki te maʼuli heʼegata ʼi te mālama foʼou ka haʼu. ʼE fai e Sehova te fakapapau ʼo ʼuhiga mo nātou ʼaē ʼe maʼuʼuli ʼi te temi ʼaia: “ ʼE mole ʼi ai anai he tahi ʼe ina fakamanavaheʼi ia nātou, he ko te gutu ʼaē ʼo Sehova ʼo te kautau ʼaē neʼe lea ki ai.” (Mikea 4:4). Ko te mahaki pea mo te mate ʼe mole toe ʼi ai anai (Fakahā 21:4). ʼI te temi pe la ʼaenī, ʼe feala ke koutou fakafiafia ʼi he faʼahi tokalelei — kapau ʼe koutou fakatuputupu he vāhaʼa lelei mo Sehova. Ohage ko te tagata fai pesalemo, ʼe feala anai ke koutou ʼui fēnei: “Ko toku hāoʼaga ʼe haʼu mai ia Sehova, ko te Tupuʼaga ʼo te lagi pea mo te kele.” — Pesalemo 121:2.

[Nota ʼi te lalo pasina]

[Paki ʼo te pasina 6]

Ko te kau kilisitiano ʼo Efesi neʼe nātou vevete ia nātou te meʼa fuli ʼe pipiki ki te meʼa mana ʼe fakaū.

[Paki ʼo te pasina 7]

ʼI te Puleʼaga ʼo te ʼAtua, ko te manavahe ʼe mole toe ʼi ai anai.