Koutou Haga Kātaki ʼi Te Selevisi Pionie
KO TE toko 4 500 000 kau Fakamoʼoni ʼa Sehova ʼe nātou kalagaʼi te logo lelei ʼi te malamanei. Ia nātou ʼaia ʼe kau ai te toko 600 000 kau pionie, peʼe ko te kau fai faka mafola ʼi te temi katoa. Ko nātou ʼaia ʼo te foʼi kautau ʼaia ʼe fakaʼalu mai te ʼu taʼu ʼi muʼa ʼo te temi tūpulaga ʼo aʼu ki te temi letelete ʼi tonatou taʼu 90. ʼE nātou ʼomai mai te ʼu agaʼi fenua pea mo te ʼu faʼahiga maʼuli kehekehe.
ʼE mahino, ko te kau fai faka mafola ʼi te temi katoa ʼaia ʼe nātou loloto ke maui mālie tanatou minisitelio faka pionie. ʼE fakaʼamu te tokolahi ke nātou gāue pionie katoa ʼi te temi fuli pe ʼo tonatou maʼuli. ʼE mole fealagia ki ʼihi ʼuhi ko te ʼu tupuʼaga kehekehe. Kae, ko ʼihi neʼe fealagia pe te hoko atu ʼo tanatou pionie logo aipe la te ʼu faigataʼaʼia ʼi te faʼahi faka paʼaga, te mahamahaki, te lotovaivai, pea mo ʼihi faigataʼaʼia. Koia, e feafeaʼi he fealagia ki te kau fai faka mafola ʼi te temi katoa hanatou tauʼi te ʼu faigataʼaʼia ʼaia pea mo nātou haga kātaki aipe ʼi te selevisi pionie?
Ko te felāveʼi mo te ʼu faigataʼaʼia ʼi te faʼahi faka paʼaga
ʼI te agamāhani, ko te kau pionie ʼe nātou gāue moʼo totogi te ʼu meʼa ʼa nātou ʼāteaina, ohage ko tana fai e te ʼapositolo ko Paulo (1 Tesalonika 2:9). E lahi ʼi te ʼu koga meʼa ʼi te malamanei, ʼe felāveʼi te kau pionie mo te ʼu totogi fakamataku ʼo te kai, ʼo te meʼa vala, ʼo te koga fale, pea mo te meʼa feʼaluʼaki. ʼE tau faigataʼa te maʼu ʼo te gāue vaeluaʼi temi ʼaē ʼe ʼaoga kia nātou. Pea ka maʼu, ʼe tau maʼu ʼi te ʼu taʼi gāue ʼe siʼisiʼi tona totogi pea ʼe mole he ʼu lelei ki te hāofaki ʼo te maʼuli haohaoa.
Kapau ʼe tou ‘haga kumi muʼa te Puleʼaga ʼo te ʼAtua pea mo tona faitotonu’, ʼe feala ke tou falala ko Sehova ʼe ina foaki mai anai te ʼu meʼa ʼaē ʼe ʼaoga kia tatou ʼi te faʼahi fakakoloa. Koia, ka tau te kau pionie mo he ʼu faigataʼaʼia ʼi te faʼahi faka paʼaga, ʼe mole ‘ ʼaoga ke nātou hoha ʼo ʼuhiga mo te ʼapogipogi’. (Mateo 6:25-34.) Ka ʼe nātou faiga fakamalotoloto ke nātou maʼu he puleʼaki ki te ʼu taʼi faigataʼaʼia ʼaia, ko he tui mālohi kia Sehova ʼe ina tāʼofi anai nātou mai he tuʼania fakavale.
Ka tau he tahi mo he ʼu faigataʼaʼia faka paʼaga, ʼe feala pe he fakasiʼisiʼi ʼo te toʼo meʼa. ʼAki ʼihi fetogi faka paʼaga, ʼe feala anai te punupunu te ʼu meʼa ʼaē ʼe ʼaoga, ʼe mole ko he ʼu koloā ʼāteaina pe. Moʼo fakasiʼisiʼi te ʼu meʼa ʼaē ʼe toʼo, ko ʼihi pionie ʼe nātou koga fale tahi mo ʼihi kilisitiano. Moʼo tokoni ki ʼanatou fānau ke nātou pionie, ʼi ʼihi lakaga ko te ʼu mātuʼa ʼe nātou foaki noa te nofoʼaga peʼe nātou foaki ʼaki hona kiʼi totogi ʼe veliveli. Ko ʼihi ʼe nātou tokoni ki te kau pionie ki te totogi ʼo te kai pea mo te meʼa feʼaluʼaki. Kae ko te kau pionie ʼe mole nātou loloto anai ke nātou liliu ko he ʼu kavega ki niʼihi, koteʼuhi ʼe ʼi ai tonatou maʼua faka Tohi-Tapu ʼaē ko te taupau ʼonatou totonu. — 2 Tesalonika 3:10-12.
Ko te ʼu totogi ʼo te meʼa feʼaluʼaki ʼe feala pe ke siʼisiʼi ʼaki he vaevae mo ʼihi pionie. Kapau ko he ʼu pionie e lua ʼe nā maʼu motokā, ʼe feala hanā gāue tahi ʼi te koga meʼa e tahi, ʼo nā fakaʼaogaʼi he motokā e tahi ʼo puli ai te totogi ʼe fai ki te ʼu motokā e lua. Ko te kau pionie ʼaē ʼe mole ʼi ai hanatou motokā ʼe feala pe hanatou kau fakatahi mo nātou ʼaē ʼe maʼu motokā pea mo nātou kau ki te totogi ʼo te feʼaluʼaki. Ko te ʼu totogi ʼo te meʼa fagona ʼe feala pe ke fakasiʼisiʼi ʼaki he fai lalo ʼo te ʼu telituale ʼaē ʼe ōvi mai. E lahi te ʼu fenua, ʼe fakaʼaogaʼi e te kau pionie te meʼa feʼaluʼaki ʼo te hahaʼi fuli ʼaē ʼe totogi siasiaʼa.
Ia nātou ʼaē neʼe mālo ʼi tanatou ʼu faigataʼaʼia faka paʼaga pea mo nātou kātaki aipe ʼi tanatou selevisi ʼi te temi katoa neʼe kau ai ia Newton Cantwell pea mo tona ʼohoana. Neʼe nā fakatau tanā fale gāue kele pea neʼe nā kamata gāue pionie mo te toko ono ʼo tanā fānau ʼaē e toko fitu ʼi te taʼu 1932, lolotoga te Lakilisi Lahi. Neʼe tohi fēnei e te tēhina ko Cantwell: “Mole faʼa fualoa kiai, pea ʼosi fakaʼaogaʼi fuli te falā ʼaē neʼe mātou maʼu mai te fakatau ʼaia — tāfito ki te ʼu vakaʼi mahaki. ʼE mātou manatuʼi ʼi te temi ʼaē neʼe mātou hiki ki te lua koga meʼa ʼaē neʼe hinoʼi mātou kiai, neʼe feʼauga te falā moʼo lue lolotoga vāhaʼa e lua, pea toe mai leva te dollars e nima. Kae neʼe mātou ʼiloʼi ko Sehova ʼe ina lagolago anai mātou ʼi te temi fuli pe ʼaē ʼe mātou fakahoko fakalelei aipe tamatou selevisi. (...) Neʼe mātou ako te fakasiʼisiʼi ʼi te ʼu faʼahi kehekehe. Ohage la, ka mātou hiki ki he telituale foʼou, ʼe ʼau fai palalau mo ʼihi tagata ʼo te ʼu fale ʼutuʼaga lolo pea ʼe ʼau fakamahino age ʼe mātou taki motokā e tolu ʼi te ʼaho fuli ki te ʼaluʼaga ʼo tamatou gāue faka kilisitiano. ʼE tau iku ai ki te siʼisiʼi ʼo te totogi ʼo te lolo. Ko tamā ʼu toe tagata neʼe nātou ako te tokakaga ki te gaohi ʼo tamatou motokā, ʼo hāofaki ai mātou mai te ʼu totogi ʼo te gaohi motokā ʼi he fale.” Ko te famili Cantwell neʼe ina tauʼi tona ʼu faigataʼaʼia ʼi te faʼahi faka paʼaga ʼo maui mālie pea, neʼe nātou haga kātaki aipe ʼi tanatou selevisi ʼi te temi katoa. ʼI te hoko tona mate ʼi tona taʼu 103, ko te tēhina ko Cantwell neʼe kei kau ʼi te lisi ʼo te kau pionie.
Ko te maʼu ʼo he gāue kogaʼi ʼaho
Tokolahi te kau pionie ʼe nātou taupau ia nātou totonu ʼi te faʼahi faka paʼaga ʼaki te ʼu gāue kogaʼi ʼaho. Moʼo taupau ʼo ia totonu ʼi te minisitelio ʼi Kolonito, ko Paulo neʼe gāue ʼi tona ʼuhiga tagata fai fale lā mo tana ʼu kaugā fagona tui ko Aquila pea mo Priscille (Gāue 18:1-11). ʼI te temi nei, ko te ʼu tēhina fakalaumālie ʼe nātou tau fiafia te foaki ki te kau pionie he gāue kogaʼi ʼaho. Ko ʼihi pionie ʼe nātou maʼu te ʼu taʼi gāue ʼaia mai ʼi te ʼu sosiete kumi gāue ʼaē ʼe nātou foaki te ʼu gāue faka temi. Ko te tui ki te ʼAtua ʼe maʼuhiga, pea ʼe toe maʼuhiga foki te faikole fakamalotoloto ki tana takitaki ki te fai ʼo he tonu ʼo ʼuhiga mo te gāue. — Tāʼaga Lea 15:29.
Neʼe ʼui fēnei e te pionie: “Hili pe ʼaē taku maʼu te mālohi feʼauga ʼi te faikole, neʼe ʼau fakaʼilo ki toku pule ko taku gāue faka minisitelio ʼe ko he maʼua maʼuhiga ʼa kita ʼāteaina pea ʼe mole feala anai ke ʼau tali te gāue ʼaho katoa. ʼI te feliafā ʼaē hoa mai kiai, neʼe fakaʼui mai ke ʼau toe fakakaukau ki te gāue kae ʼe fai kogaʼi ʼaho. Neʼe ʼau tali fakafiafia.” ʼAua naʼa koutou meʼa noaʼi te mālohi ʼo te faikole, pea mo koutou fakahoko takotou ʼu faikole ʼaki he ʼu gāue.
E lagi ko he aga fakapotopoto ki te kau pionie hanatou fakahā kia nātou ko tonatou patolo, ko te tupuʼaga ʼo tanatou kumi ʼo he gāue kogaʼi ʼaho ko te taupau ʼo nātou totonu ʼi te minisitelio. ʼE feala pe ke nātou fakahā peʼe ko te ʼu ʼaho fea ʼaē ʼe nātou ava ai pea mo te ʼu hola ʼe fia ʼe feala ke nātou fai ki he gāue ʼi te vāhaʼa. Ko te ʼu tuagaʼane e lua, ko te tau tēhina totonu, neʼe feala tanā vaevae te gāue ʼaho katoa ʼi te sosiete, tufaki tokoni ʼo ʼuhiga mo te lao, ʼo fealagia ai kia nāua ke nā gāue he ʼu vaeluaʼi ʼaho ʼi te vāhaʼa. Ko te meʼa ʼaia neʼe lagolago kia nāua ʼi tonā ʼuhiga pionie ʼo aʼu ki tanā kau ʼaē ki te Fale ako faka tohi-tapu ʼo Kalaate ʼo te Watchtower pea mo hinoʼi ki tanā telituale faka misionea.
Ko te ʼu faʼahiga gāue kehekehe ʼe ʼalutahi mo te ʼu fakatuʼutuʼu ʼa te Tohi-Tapu ʼe feala ke maʼu ʼi he fai palalau mo te ʼu kaugā fagona tui pea mo ʼihi hahaʼi peʼe ko te vakaʼi ʼo te nusipepa. Ko te agavaivai ʼe ʼaoga, koteʼuhi ʼe ina tāʼofi te kau pionie mai te filifili ʼo te faʼahiga gāue ke nātou fai (Vakaʼi ia Sake 4:10). Ke hoko atu tanatou gāue pionie, e lagi ʼaoga ke nātou fai he gāue ʼe meʼa noaʼi e te hahaʼi ko he gāue fakatō ki laloʼi. Kapau ko te taʼi gāue ʼaia ʼe tali kae fakaʼui he meʼa kehe, e lagi feala pe ke fetogi te gāue.
Ko te mahamahaki pea mo te lotovaivai
Ki ʼihi, neʼe tonu ke tuku tanatou selevisi pionie ʼuhi ko te mahamahaki kovi. Kae, kapau ko he ʼu pionie ʼe mole nātou tokakaga fakavilivili ki te faʼahi ʼaia, ʼe feala pe ke nātou fakatokagaʼi ko he mahaki ʼe feala ke faitoʼo peʼe ko he maʼuli haohaoa ʼe feala ke hikihiki tona lelei kia nātou ke hoko tanatou gāue pionie. Tokolahi ʼe feala pe ke nātou pionie logope te mahamahaki koteʼuhi ʼe ʼi ai tonatou ʼu faitoʼo, ʼe fakamaʼua he faʼahiga kai kia nātou, pea ʼe ʼaoga he mālōlō pea mo he faigaoʼi. Neʼe fakatokagaʼi e te taupau feʼaluʼaki te tuagaʼane pionie, ʼi tana mahaki kovi ʼi te arthrite, neʼe ʼaoga ke tokoni age ki ai ʼi te haʼele ʼi te ʼu ʼapi lolotoga te minisitelio (Gāue 20:20). Kae, ko te tuagaʼane pea mo tona ʼohoana neʼe nā taki te ʼu ako tohi-tapu e 33 pea mo nā tokoni ki te toko 83 hahaʼi ke nātou tali te moʼoni ʼo te ʼAtua. Ko tona maʼuli haohaoa neʼe fakaʼau ʼo lelei ʼaki te temi, pea neʼe kau ia ʼi te Fale ako ʼo te kau Pionie hili kiai te taʼu e 11.
Ko te lotovaivai ʼe feala pe ke ina ʼaumai ʼihi ke nātou fakagata te gāue pionie (Tāʼaga Lea 24:10). Neʼe ʼui fēnei e te pionie ki te taupau feʼaluʼaki: “ ʼE ʼau tuku anai taku gāue pionie. (...) ʼE ʼi ai toku ʼu maʼua ʼe tonu ke ʼau huʼi.” Neʼe ʼaoga ki ai he ʼu mata sioʼata e 20 dollars tona totogi. Neʼe fehuʼi age e te taupau feʼaluʼaki: “ ʼE ke tuku anai koa tau gāue pionie ʼuhi pe heʼe ʼaoga kia koe he dollars e 20?” Neʼe ʼui age ki te pionie ke ʼalu ʼo gāue ʼaho e tahi ʼi te toʼaga kafe ʼo te fenua, ke ina maʼu te dollars e 20, ke ina totogi te ʼu mataʼi sioʼata, pea ke hoko tana gāue pionie. Ki muli age ʼo te fai palalau neʼe hā te fihifihia tāfito neʼe ko te lotovaivai ki te ʼu totogi mamafa ʼo te gaohi ʼo te motokā. Neʼe fakatotonu ki te pionie ke ina fakasiʼisiʼi te ʼu meʼa ʼaē ʼe ina totogi ʼo fakasiʼisiʼi te ʼu kilometa ʼaē ʼe ina fai ʼaki te motokā ʼi te ʼaho fuli. Neʼe toe tokoniʼi foki ke ina taupau tona maʼuli fakalaumālie. Neʼe fakaʼaogaʼi e te pionie te tokoni, pea hili kiai te māhina e ono neʼe ina maʼu te pāui ke kau ʼi te Fale ako ʼo Kalaate. Hili te maʼu ʼo tona pepa, neʼe hinoʼi ki te tahi fenua pea neʼe gāue agatonu ʼi ai lolotoga te ʼu taʼu e fualoa ʼo aʼu ki tona mate. ʼIo, ko te ʼu tapuakina ʼe tau hoko mo kapau ʼe mole tou tō ki te lotovaivai kae ke tou taupau ʼi totatou ʼatamai ko Sehova ʼe nofo mo tatou.
Koutou manako ki takotou pilivilesio gāue
Logope te ʼu ʼahiʼahi, ohage ko te ʼu lakaga neʼe ʼi ai te ʼu meʼa neʼe ʼaoga kia ia pea mo te ʼu lakaga neʼe hāla mo kai, neʼe faka ʼuhiga aipe e Paulo tana minisitelio ohage ko he koloā (2 Kolonito 4:7; 6:3-6). ʼI tanatou tau mo te faigataʼaʼia pea mo te fakataga ʼi te temi nei, tokolahi te kau kaugana ʼa Sehova ʼi Afelika, ʼi Asia, ʼi te Eulopa ʼo te potu Hahake, pea mo ʼihi koga meʼa neʼe nātou haga taupau aipe tanatou pilivilesio ʼaē ko te gāue pionie. Koia, ka koutou felāveʼi mo he ʼu ʼahiʼahi, koutou faiga fakamalotoloto ke koutou haga kātaki ʼi te selevisi pilivilesioʼia ʼaia, ki te fakavikiviki ʼa Sehova.
Tokolahi te kau pionie neʼe feala tanatou kau ki te gāue faka mafola ʼi te temi katoa ʼuhi pe ko tanatou fakamaʼamaʼa tanatou faʼahiga maʼuli. Ohage ko Paulo, neʼe nātou tekeʼi te ʼu meʼa ʼe fakalalata ʼi te ʼu koloā pea mo nātou maʼuliʼi te fakafeauga ʼi te “meʼa kai pea mo te mutuʼi meʼa”. Moʼo haga faʼa kātaki ʼi te selevisi pionie, ʼe ʼaoga kia nātou ke nātou fakafeauga ki te ʼu meʼa ʼaē ʼe maʼuhiga (1 Timoteo 6:8). Ko te fiafia ʼe tupu mai te manako ʼi totatou ʼu pilivilesio ʼaē ʼe foaki mai e te ʼAtua, ʼo tou tuku te ʼu meʼa ʼaia ʼi ʼoluga age ʼi te ʼu koloā.
Moʼo fakatā te faʼahi ʼaia: ko Anton Koerber neʼe pilivilesioʼia ʼi tana fakafofoga te ʼu meʼa ʼo te Puleʼaga ki te ʼu hahaʼi maʼu tuʼulaga ʼi te puleʼaga ʼi Washington. Neʼe pionie lolotoga te temi pea neʼe taupau fakakolo ʼi te ʼu taʼu 1950. Ko ʼihi ʼi tana ʼu kaugā gāue ʼāfea neʼe nātou fakaōvi age kia te ia ʼaki te gāue neʼe feala ke ina maʼu he toe manuʼia ko te tahi miliona dollars maʼa ia totonu. Kae, moʼo fakahoko te faʼahi ʼaia, neʼe tonu ke ina tuku fuli tona temi ki te gāue ʼaia teitei pe ke maʼu he taʼu kiai. ʼI tana ʼosi faikole ki he fakaʼaluʼalu pea mo te fakakaukau lelei, neʼe ina ʼui fēnei: “ ʼE mole pe feala ia kia ʼau ke ʼau lituʼa ki taku ʼu pilivilesio fakatalakitupua ʼaē ko te gāue maʼa Sehova ʼi henī tatau aipe peʼe ko he taʼu pe e tahi, peʼe ko te falā fuli ʼo te malamanei. Ko te tauhi ki ʼoku ʼu tēhina ʼi henī ʼi Washington ʼe maʼuhiga age ia kia ʼau, pea ʼi henī ʼe mahino kia ʼau, ʼe ʼau maʼu te tapuakina ʼa Sehova. ʼE mahino papau ia ʼe ʼau fia fai anai ki te tahi miliona dollars, kae hili te taʼu ʼo te taʼi maʼuli ʼaia, ʼe ʼau feafeaʼi anai ʼi te faʼahi fakalaumālie, peʼe ko te faʼahi fakasino?” Koia neʼe fakafisi ia ki te gāue. Ko te manako ki tanatou ʼu pilivilesio ʼi he faʼahiga ʼaluʼaga feiā ʼe ina tokoni te tokolahi ke nātou haga kātaki ʼi te selevisi pionie.
ʼE ko he ʼu tapuakina lahi ia ʼaē ʼe fakafiafia kiai te kau pionie! ʼE ko he tapuakina ia te fakaʼaogaʼi he ʼu tuʼuga hola moʼo palalau ki te ʼuhiga hau faka kolōlia ʼo Sehova (Pesalemo 145:11-13). Koteʼuhi ko te foaki he toe temi ki te minisitelio, ʼe maʼu e te kau pionie te tapuakina ʼaē ko te ʼave he fakafimālie fakalaumālie ki te masiva pea mo ia ʼaē ʼe maʼuli popūla, ki te mahaki peʼe ko ia ʼaē ʼe ʼauhē, pea mo ʼihi ʼe nātou maʼuli mamahi pea ʼe ʼaoga kia nātou he ʼamanaki moʼoni. Koia, kapau ʼe ʼi ai he ʼu mafuliʼaga ʼe nātou faka fealagia ai kia tatou ke tou kau ki te gāue faka mafola ʼi te temi katoa, ʼio ʼe tou fakafiafia anai ki te ʼu pilivilesio lahi. Ko ‘te tapuakina ʼa Sehova ʼe ina fakakoloaʼia’. (Tāʼaga Lea 10:22.) Pea ʼaki tana tokoni pea mo tana tapuakina, tokolahi te kau faka mafola ʼo te Puleʼaga ʼe nātou haga kātaki fakafiafia ʼi te selevisi pionie.