Ko Te Maʼuli ʼo Te Kau Faka Mafola ʼo Te Puleʼaga
Fakaʼapaʼapa Ki Te Taputapu ʼo Te Maʼuli
ʼE FAKAHĀ e te Tohi-Tapu ko te toto ʼe maʼuhiga ki te ʼu mata ʼo te ʼAtua pea ʼe ina fakatūʼa mo kapau ʼe mole fakaʼaogaʼi fakalelei (Levitike 17:14; Gāue 15:19, 20, 28, 29). ʼUhi ko te ʼu fakatotonu ʼaia ʼa te Tohi-Tapu, ko te kau Fakamoʼoni ʼa Sehova ʼe mole nātou tali te ʼu foʼi huki toto.
Moʼo tokoni ki te ʼu tōketā pea mo nātou ʼaē ʼe gāue ʼi te lopitali ke nātou mahino ki te manatu faka lotu ʼa te kau Fakamoʼoni ʼa Sehova ʼo ʼuhiga mo te faʼahi ʼaia pea ke nātou tali ʼo fakaʼaogaʼi ʼihi age ʼu faitoʼo, neʼe fakatuʼu e te Sosiete Watch Tower te Komite felogoi tahi mo te Lopitali ʼi te ʼu fenua kehekehe. Ko nātou ʼaē ʼe kau ʼi te ʼu komite ʼaia ʼe nātou felogoi mo te ʼu hahaʼi ʼaē ʼo te ʼu lopitali. Mole heʼeki faʼa fualoa kiai, ko te ʼu kolo e 12 ʼi Polonia, neʼe fai ai te ʼu fono e 200 tupu, neʼe kau ai te ʼu tōketā e 500 tupu, tāfito la te ʼu pule ʼo te ʼu lopitali lalahi peʼe ko te ʼu lopitali pe. Ko te meʼa neʼe hoko lolotoga ʼo te taʼi ʼaʼahi feiā:
“Ko te fono ʼi te kilinike ʼe tafa ai te ʼu mafu ʼi Zabrze neʼe maui lelei. Talu mai te taʼu 1986 ko te kūtuga ʼo te kilinike ʼaia ʼe nātou tafa ʼotatou ʼu tēhina kae ʼe mole nātou fakaʼaogaʼi te toto. ʼO aʼu mai ki te temi nei ko te ʼu tafa e 40 kua fai. Kua tali e te kilinike te kau mahaki mai te potu ʼo Polonia tatau aipe mai te ʼu fenua ʼi tuʼa atu ʼo Polonia. Hili minuta e 50 ki te felogoi ʼaia, ko te pule ʼe hoa ki te pule lahi ʼo te lopitali, neʼe ina fakahū te hahaʼi ʼo te komite felogoi tahi mo te lopitali ki te kau mahaki pea mo ʼui maʼana fēnei: ‘Ko te ʼu hahaʼi ʼaenī ko te kau Fakamoʼoni ʼa Sehova. ʼE nātou kaugā gāue mo tamatou kilinike, pea mo tokoni kia mātou. ʼO mole gata ʼaki pe ʼonatou ʼu kaugā fagona ʼi te tui kae ko te ʼu mahaki foki ʼaē ʼe nātou toe maʼu te tokoni mai ia nātou ʼaia. ʼAki te kau Fakamoʼoni ʼa Sehova, ʼe mātou ʼiloʼi papau ko te tafa ʼaē ʼo ʼuhiga mo te ʼu mafu ʼe feala ke fai ʼo mole fakaʼaogaʼi te toto.
“ ‘Ohage la, neʼe mātou tafa te fafine ʼaenī [ʼo ina hinoʼi te fafine ʼi tana kau mahaki] neʼe mole mātou fakaʼaogaʼi te toto, pea ʼi te mōnite ʼe mavae leva ia ʼi te lopitali. ʼE ʼau fakahā pe ʼi te temi nei ʼe mole kei lahi tamatou fakaʼaogaʼi te toto ohage ko te temi muʼa, koteʼuhi ʼe fakatupu tuʼutāmaki. ʼE pipiki ia ki te HIV, mo te hépatite, pea ʼe loaloaga tona lelei.
“ ‘ ʼE ʼau katolika, kae ʼi tomatou loto fale ʼe mātou tali pe te ʼu manatu ʼa ʼihi. ʼI te tahi ʼaho neʼe ʼau ʼeva ai mo taku fānau ʼi te Malaʼe ʼo Slaski. ʼI muʼa atu, ko te malaʼe ʼaia neʼe mole gaohi fakalelei, kae neʼe mātou fakatokagaʼi kua fetogi ʼo teitei pe ke mole mātou toe ʼiloʼi. Neʼe fehuʼi age ki te tagata gāue he koʼe kua fetogi. Neʼe ina tali ko te fakatokatoka ʼo te malaʼe neʼe mole kei hona puleʼaki, kae neʼe lue e te kau Fakamoʼoni ʼa Sehova, pea ko nātou ʼaia ʼaē neʼe nātou toe fakafoʼou.
“ ‘Pea ko nātou ʼaia ko ni ʼu hahaʼi ʼe feala pe kia tatou fuli ʼaenī ke tou mahino kiai. ʼI taku manatu ko te lopitali ʼaenī ʼe tonu ke ina maʼu he fakasiosio tonu ʼo ʼuhiga mo te ʼu manatu ʼa ʼihi.’ Pea ina hinoʼi te Fakamoʼoni ʼe teuteuʼi ke tafa, ʼo ʼui maʼana: ‘Ko te fafine ʼaenī ko te Fakamoʼoni ʼa Sehova, pea ʼe tafa anai ia ʼe mole fakaʼaogaʼi te toto.’ ”
Ko te kau Fakamoʼoni ʼa Sehova ʼe mole nātou akonaki fakakinau ki niʼihi, ʼe nātou mulimuli ki te faʼifaʼitaki ʼa te kau ʼapositolo pea ʼe nātou “fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata”. (Gāue 5:29.) ʼO kau ai te fakaʼapaʼapa ki te toto. ʼE nātou leleiʼia mo kapau ʼe fakaʼapaʼapa niʼihi ki tanatou ʼu tui faka lotu ʼo ʼuhiga mo te faʼahi ʼaia.