Tonatou Maʼuli

Neʼe ʼAu Kivi, Pea Kua Ava ʼOku Mata!

NEʼE FAKAMATALA E EGON HAUSER

Hili te ʼu māhina e lua ʼo taku kivi, pea neʼe ava ʼoku mata ki te ʼu moʼoni faka Tohi-Tapu ʼaē neʼe mole ʼau ʼiloʼi ʼi toku maʼuli.

KA ʼAU toe manatu ki te ʼu taʼu e fitugofulu tupu kua hili, neʼe lahi te ʼu meʼa fakafiafia neʼe hoko ʼi toku maʼuli. Kae kanapaula neʼe ʼau lava fetogi he meʼa, ʼe ʼau faigaʼi anai ke ʼau ʼiloʼi tautonu age ia Sehova ʼAtua.

Neʼe ʼau tupu ʼi te taʼu 1927 ʼi Uruguay, ko he fenua ʼe tuʼu ʼi te vaha ʼo Alasatine pea mo Pelesile, pea neʼe ʼi ai tona potu fenua neʼe haga lelei ki te matatai ʼo Atlantique. Ko te hahaʼi tāfito ʼo te fenua ʼe ko te ʼu hōloga ʼo te kau Italia pea mo te kau Sepania. Kae ko taku ʼu mātuʼa neʼe ʼōmai mai Hukalia, pea ʼi te temi ʼaē neʼe kei ʼau veliveli ai, neʼe lelei ʼaupito tamatou ʼu felogoi mo tomatou ʼu vāhaʼa fale. Neʼe tuku ava pe te ʼu matapā ʼo te ʼu ʼapi pea neʼe mole ʼi ai he ʼu ʼā ukamea ʼi te ʼu matapā fakamālama. Neʼe mole he fakapalatahi ʼi te hahaʼi ʼo te ʼu lanu kehekehe. Neʼe mātou kaumeʼa fuli, te kau matāpule pea mo te hahaʼi ʼo te fenua, ʼo feiā mo te kau ʼuli pea mo te kau papālagi.

Neʼe tauhi lotu lelei taku ʼu mātuʼa ʼi te Lotu Katolika, pea neʼe ʼau tauhi misa ʼi toku taʼu hogofulu. ʼI taku lahi ake, neʼe ʼau gāue mo te patele ʼo te palokia pea neʼe ʼau kau ki te kūtuga ʼe fai tokoni ki te ʼēpikopō ʼo te palokia. ʼI taku ʼosi filifili ke ʼau gāue faka tōketā, neʼe fakaafe ʼau ke ʼau kau ki te fono ʼi Venesuela neʼe teuteuʼi e te Lotu Katolika. ʼI te kau tōketā ohage ko ʼau ʼaē ʼe tokakaga tāfito ki te ʼu mahaki faka fafine, neʼe tuku mai ke mātou sivi te foʼi ʼakau folo—ke ʼaua naʼa faitama te hahaʼi fafine—ʼaē neʼe kamata fakatau ʼi te temi ʼaia.

Te ʼu Meʼa ʼUluaki Neʼe ʼAu Logoʼi ʼi Taku Ako Faka Tōketā

ʼI te temi ʼaē neʼe kei ʼau akoako ai te gāue faka tōketā pea neʼe ʼau ako ʼo ʼuhiga mo te faʼufaʼu ʼo te sino, neʼe fakaofoofo ʼaupito kia ʼau te ʼu faʼahiga faʼufaʼu ʼaia ʼo totatou sino. Ohage la, neʼe ʼau punamaʼuli ʼi te fealagia ʼo te sino ke ina faitoʼo ia ia totonu pea mo tana toe lava maʼu pe ia te maʼuli mālōlō, ohage la mo kapau neʼe kua toʼo fakakoga ia he ʼate peʼe ko ʼihi huiʼi vakavaka pea ʼe feala pe hanatou toe liliu ʼo katoa ohage ia neʼe mole toʼo hona koga.

ʼI te temi ʼaia, neʼe ʼau sio ki te hahaʼi tokolahi neʼe fakaʼī, pea neʼe mamahi toku loto ʼi taku ʼiloʼi ʼaē neʼe nātou mamate koteʼuhi neʼe ʼai kia nātou te ʼu foʼi huki toto. ʼE ʼau manatuʼi te ʼaho ʼaia, neʼe faigataʼa ʼaupito te fakahā ki te famili ʼo ia ʼaē neʼe mahaki, neʼe mate ʼuhi ko te ʼu faigataʼaʼia tupu ko te toto. Teitei pe ʼi te agamāhani, ʼe mole fakahā ki te famili neʼe hoko te mate ki tonatou kāiga ʼuhi ko te foʼi huki toto. Kae ʼe tau fakahā age kia nātou te tahi ʼu tupuʼaga ʼo te mate. Logola kua fakalaka ni taʼu, kae ʼe kei ʼau manatuʼi pe taku mole leleiʼia ia te ʼu foʼi huki toto, pea mo taku mole leleiʼia ia te fakaʼaogaʼi ʼo te ʼu foʼi huki toto. Neʼe lagi feala pe ke mole hoko he ʼu meʼa feiā mo kanapaula neʼe ʼau ʼiloʼi vave ia te lao ʼa Sehova ki te ʼuhiga taputapu ʼo te toto! Kanaʼauala neʼe lagi feala pe ke ʼau mahino ki te tupuʼaga ʼo taku mole leleiʼia ia te fakaʼaogaʼi ʼo te ʼu foʼi huki toto.—Gaue 15:19, 20.

Ko Te Logo Fīmālie ʼi Te Tokoni Ki Te Hahaʼi

ʼAki te temi, neʼe ʼau liliu ʼo tōketā pea neʼe ʼau pule ʼi te fale mahaki ʼi Santa Lucía. Neʼe ʼau toe pule pe foki ʼi te Institut national de biologie. Neʼe ʼau leleiʼia ʼaupito ia te gāue ʼaia. Neʼe ʼau tokoni ki te hahaʼi ʼi tonatou ʼu mahaki, mo fakafimālieʼi ʼonatou mamahi, pea ʼe lahi te ʼu ʼaluʼaga neʼe ʼau hāofaki ai te ʼu maʼuli, pea mo ʼau tokoni ki te ʼu faifānau ʼa te hahaʼi fafine. ʼUhi ko te ʼu meʼa ʼaē neʼe hoko kia ʼau ʼi te kamataʼaga ʼo te gāue faka tōketā ʼaki te ʼu foʼi huki toto, neʼe mole ʼau fakaʼaogaʼi te toto pea neʼe lahi te ʼu tafa neʼe mole ʼau fakaʼaogaʼi ai te toto. Neʼe ʼau fakakaukau pe, mokā ʼalu te toto ʼe hage pe ko he foʼi poe ʼe mama. Ko te fai puleʼaki pe e tahi, ko te pulusi ʼo te mama ʼaia, kae ʼaua te hoko atu ʼo te ʼuʼutu ʼo te foʼi poe.

Taku Faitoʼo Te Kau Mahaki Fakamoʼoni

Neʼe ʼau kamata feʼiloʼiʼaki mo te kau Fakamoʼoni ʼa Sehova ʼi te ʼu taʼu 1960, ʼi tanatou kamata ʼōmai ki tomatou lopitali ki te ʼu fai tafa ʼaē ʼe mole fakaʼaogaʼi ai te toto. ʼE mole galo anai ia ʼau ia te pionie neʼe mahaki ʼi te tahi temi, neʼe higoa ko Mercedes Gonzalez. Neʼe kua gaʼegaʼe ʼosi pea neʼe mole fia tafa e te ʼu tōketā ʼo te tahi lopitali, ʼi tanatou tuʼania ʼaē naʼa mate. Logope neʼe lahi te maligi ʼo tona toto, kae neʼe mātou tafa ia ia ʼi tomatou lopitali. Neʼe maui mālie te tafa, pea neʼe hoko atu tana pionie lolotoga te ʼu taʼu e 30 tupu ʼo aʼu ki tona mate mole heʼeki faʼa fualoa ʼi tona taʼu 86.

Neʼe malave tuʼumaʼu kia ʼau ia te ʼofa pea mo te tokakaga ʼa te kau Fakamoʼoni ki ʼonatou tēhina Kilisitiano ʼaē neʼe takokoto ʼi te lopitali. ʼI taku ʼu vākai mahaki, neʼe ʼau leleiʼia te fakalogo kia nātou mokā nātou palalau ki te ʼu meʼa ʼaē ʼe nātou tui kiai, pea neʼe ʼau tali te ʼu tohi ʼaē neʼe nātou fakatoʼo mai kia ʼau. Neʼe mole hake ʼi taku fakakaukau ʼe ʼau liliu anai ko tonatou tōketā pea mo tonatou tēhina fakalaumālie.

Neʼe ʼau lēsili fakatahi mo te kau Fakamoʼoni ʼi taku ʼohoanaʼi ia Beatriz, neʼe ko te ʼofafine ʼo te tagata neʼe mahaki. Teitei pe ko tona famili fuli neʼe kua nātou fakatahi mo te kau Fakamoʼoni, pea hili tomā ʼohoana, neʼe liliu mo ia ko te Fakamoʼoni. Kae kia ʼau, neʼe lahi ʼaupito taku maʼumaʼua ʼi taku gāue pea neʼe kua ʼau hiki tuʼulaga. Neʼe hage neʼe lelei ʼaupito ia te maʼuli. Kae ko te meʼa ʼaē neʼe mole ʼau ʼiloʼi, ko te ʼamanaki hoko mai kia ʼau te fetogi lahi ʼi toku maʼuli.

Te Hoko Mai ʼo Te Mamahi

Ko te meʼa kovi ʼaupito ʼe feala ke hoko ki he tōketā, ko tana liliu ʼo kivi. Pea neʼe hoko te meʼa ʼaia kia ʼau. Fokifā pe ʼi te tahi ʼaho, kua ʼau liliu ʼo kivi pea neʼe mole ʼau ʼiloʼi peʼe feala haku toe sio. ʼI toku ʼosi tafa, neʼe ʼau takoto ʼi te palepale kae haʼi ʼoku mata, pea neʼe ʼau lotovaivai ai. Neʼe hage maʼaku ʼe mole kei ʼi ai hoku ʼaoga pea mole kei ʼi ai hoku falalaʼaga, pea neʼe ʼau fia fakamate. Neʼe ʼau takoto ʼi te kogafale ʼi te laufata fā, pea neʼe ʼau tuʼu ʼo haʼele pikipiki ki te kaupā, ke ʼau kaku ki te matapā fakamālama. Neʼe ko taku faiga ʼaia ke ʼau fakatō ʼo fakamate. Kae ʼi taku haʼele ʼaia neʼe ʼau kaku ai ki te potu ʼaē ʼe feʼoloʼaki ai te hahaʼi ʼi te lopitali, pea neʼe toe ʼave ʼau e te afilimie ki toku palepale.

Neʼe mole ʼau toe faigaʼi ke ʼau fakamate. Kae ʼi taku kua kivi, neʼe hoko atu pe taku lotovaivai pea mo ʼau hoko ʼita. Lolotoga te temi ʼaia ʼo taku kivi, neʼe ʼau fai taku fakapapau ki te ʼAtua, kapau leva ʼe ʼau toe sio, pea ʼe ʼau lau katoa anai ia te Tohi-Tapu. Ki muli age, neʼe fakahaʼuhaʼu māmālie taku sio, ʼo feala ai taku lautohi. Kae neʼe mole kei feala haku hoko atu taku gāue tōketā. Kae ʼi Uruguay ʼe ʼi ai te tākuga lea ʼe ina ʼui fēnei: “No hay mal que por bien no venga,” ko tona fakaliliu “ ʼE feala pe hakita maʼu tuʼumaʼu he meʼa ʼe lelei mai he meʼa ʼe kovi.” Neʼe ʼamanaki hoko moʼoni te palalau ʼaia kia ʼau.

Ko He Kamataʼaga Kovi Mo Te Kau Fakamoʼoni

Neʼe ʼau fia totogi he foʼi Tohi-Tapu lahi ʼo te Bible de Jérusalem, kae neʼe ʼau ʼiloʼi ʼi te kiʼi Fakamoʼoni tūpulaga neʼe haʼu kiō ʼoku, ʼe totogi lelei te Tohi-Tapu ʼa te kau Fakamoʼoni ʼa Sehova. ʼI te uhu ake neʼe tuʼu te tūpulaga ʼaia mo te Tohi-Tapu ʼi te muʼa matapā ʼo toku ʼapi. Neʼe avahi te matapā e toku ʼohoana pea neʼe palalau mo ia. Neʼe ʼau kalaga mai te loto fale kapau ʼe totogi e toku ʼohoana ia te Tohi-Tapu pea ke ʼaua naʼa toe haʼu ki toku ʼapi kae ʼe lelei age pe hana mavae, pea neʼe ʼalu ai. Neʼe mole ʼau ʼiloʼi ko te tūpulaga ʼaia ʼe tokoni lahi anai kia ʼau.

ʼI te tahi ʼaho, neʼe ʼau fai te fakapapau ki toku ʼohoana neʼe mole lava fakahoko. Koia moʼo fakafiafiaʼi tona loto neʼe ʼau ʼui age ʼe ʼau ʼalu anai mo ia ki te ʼAho Fakamanatu ʼo te mate ʼo Kilisito. ʼI te hoko mai ʼo te ʼaho ʼaia, neʼe ʼau manatuʼi taku fakapapau pea neʼe ʼau ʼalu mo ia. Neʼe malave ʼaupito kia ʼau tanatou agalelei pea mo toku tali fakaleleiʼi. ʼI te kamata ʼo te akonaki neʼe ʼau punamaʼuli ʼi taku sio ʼaē neʼe ko te tūpulaga ʼaē neʼe ʼau kapu ʼi toku ʼapi. Neʼe malave ʼaupito kia ʼau tana faiakonaki, pea neʼe ʼau lotomamahi ʼi taku tali koviʼi ia ia. Koteā ʼapē he meʼa ke ʼau fai moʼo fakatokatoka te meʼa ʼaē neʼe ʼau fai?

Neʼe ʼau kole age ki toku ʼohoana ke ina fakaafe ia ia ke mātou kakai fakatahi mo ia ʼi te afiafi ʼaia, kae neʼe tali mai e toku ʼohoana: “ ʼE mole lelei age koa la mo kapau ko koe ʼaē ʼe ina fakaafe ia ia? Tā tutuʼu maʼu ʼi henī, heʼe haʼu anai kia tāua.” Neʼe manatu tonu toku ʼohoana. Neʼe haʼu te tūpulaga ʼo fakamālo mai kia māua pea neʼe ina tali fakafiafia tamā fakaafe.

Ko tamatou fai palalau ʼi te po ʼaia neʼe ko te kamataʼaga ʼo te ʼu fetogi lahi kia ʼau. Neʼe ina fakahā mai te tohi La vérité qui conduit à la vie éternelle,a pea neʼe ʼau fakahā age te ʼu tohi e ono feiā neʼe ʼau nofo mo ia. Ko te kau mahaki Fakamoʼoni kehekehe neʼe nātou foaki mai ʼi te lopitali, kae neʼe mole heʼeki ʼau lau. Lolotoga tamatou kakai pea ʼi te hili ʼo tamatou kakai, neʼe lahi te ʼu fehuʼi neʼe ʼau fai age ki ai—pea neʼe ina tali fuli kiai ʼaki te Tohi-Tapu. Neʼe aʼu te fai palalau ki te hola fā māfoatā. ʼI muʼa ʼo tana ʼalu, neʼe fakaʼui mai e te tūpulaga ke ina ako te Tohi-Tapu mo ʼau, ʼaki te tohi Vérité. Neʼe ma ako te tohi ʼaia ia māhina e tolu pea neʼe ma hoko atu te ako ʼaki te tohi “ Babylone la Grande est tombée ! ” Le Royaume de Dieu a commencé son règne !* ʼI taku ʼosi ako ia te tohi ʼaia, neʼe ʼau foaki leva toku maʼuli kia Sehova ʼAtua, ʼo ʼau papitema.

Kua ʼAu Toe Logoʼi Toku ʼAoga

ʼAki taku kivi, neʼe avahi ‘te ʼu mata ʼo toku loto’ e te ʼu moʼoni ʼo te Tohi-Tapu ʼaē neʼe heʼeki ʼau mahino kiai! (Efeso 1:18) Neʼe fetogi toku maʼuli katoa ʼi taku ʼiloʼi ia Sehova pea mo tana fakatuʼutuʼu ʼofa. Kua ʼau toe logoʼi toku ʼaoga pea mo toku fiafia. ʼE ʼau tokoni ki te hahaʼi ʼi te faʼahi fakasino pea mo te faʼahi fakalaumālie pea ʼe ʼau toe fakahā age kia nātou te faʼahiga fakaloaloaga ʼo tonatou maʼuli ʼi he ʼu kiʼi taʼu ʼi te tuʼu ʼaenī pea mo ke nātou maʼu te maʼuli heʼegata ʼi te tuʼu foʼou.

ʼE ʼau faiga tuʼumaʼu pe ke ʼau ʼiloʼi te ʼu meʼa foʼou ʼi te faʼahi faka tōketā, pea ʼe ʼau fai te ʼu fekumi ʼo ʼuhiga mo te tuʼutāmaki ʼaē ʼe hoko ʼaki te fakaʼaogaʼi ʼo te toto, mo te ʼu faitoʼo moʼo fetogi ʼaki te fakaʼaogaʼi ʼo te toto, mo te ʼu fealagia ʼe maʼu e te hahaʼi mahahaki, pea mo te ʼu lekula faka tokētā. ʼI toku fakaafe ke ʼau palalau ki te ʼu meʼa ʼaia ʼi te ʼu fono faka tōketā, neʼe ʼau maʼu ai te ʼu faigamālie ke ʼau vaevae te ʼu fekumi ʼaia mo te kau tōketā. ʼI te 1994, neʼe ʼau kau ʼi Rio de Janeiro, ʼi Pelesile, ki te ʼuluaki fono ʼaē neʼe talanoa ai ki te ʼu faitoʼo ʼaē ʼe mole fakaʼaogaʼi ai te toto, pea neʼe ʼau fai te akonaki ʼo ʼuhiga mo te ʼu faitoʼo moʼo fakagata te hali ʼo te toto. ʼI te nusipepa faka tōketā ʼaē ko te Hemoterapia, neʼe tohi ai te vaega ʼo taku akonaki ʼi te alatike neʼe ʼau tohi, “Una propuesta: Estrategias para el Tratamiento de las Hemorragias” (Ko He Tokoni ʼo ʼUhiga Mo He Faitoʼo Moʼo Tāʼofi Te Hali ʼo Te Toto).

ʼE ʼAu Nofo Agatonu Logola Te ʼu Fakaneke ʼa Te Kau Tōketā

ʼI taku kamata gāue faka tōketā, ko taku ʼu lotolotolua ʼo ʼuhiga mo te ʼu huki neʼe fakatafito ʼaupito ki te ʼu poto fakatagata. Kae ʼi te temi ʼaē neʼe ʼau mahaki ai, neʼe ʼau sio ai leva ki te faigataʼa ʼaē ʼo te fakafisi ki te ʼu foʼi huki toto pea mo ʼau nofo agatonu logola te ʼu fakaneke ʼa te kau tōketā. ʼI taku ʼosi mahaki mafu, neʼe ʼau fakamahino taku mole tali te toto ki te tōketā fai tafa lolotoga te ʼu hola e lua. Neʼe ko te foha ʼo toku ʼu kaumeʼa lelei, pea neʼe ina ʼui mai ʼe mole ina tuku anai ke ʼau mate logola tana tui papau ʼaē ʼe lava hāofaki toku maʼuli e he foʼi huki toto. Neʼe ʼau faikole fakalogologo kia Sehova, ʼo ʼau kole age kia Ia ke tokoni ifo ki te tōketā ke mahino pea mo fakaʼapaʼapa ki te meʼa ʼaē ʼe ʼau loto kiai, tatau aipe peʼe mole ina tali taku manatu. ʼOsi ʼaia, pea neʼe fakapapau mai e te tōketā ʼe fakaʼapaʼapa anai ki toku loto.

ʼI te tahi ʼaluʼaga, neʼe tonu ke toʼo te kovi mai toku prostate. Neʼe hali lahi toku toto. Neʼe ʼau toe fakamahino te ʼu tupuʼaga ʼo taku fakafisi ki te ʼu huki toto, pea logola te kua maligi lahi ʼo toku toto, kae neʼe fakaʼapaʼapa te kau tōketā ki taku tonu.

Te Fetogi

ʼI taku kau ki te Kautahi Faka Malamanei ʼo Uhiga Mo Te ʼu Lekula Faka Tokētā, neʼe ʼau sio ai ki te ʼu fetogi ʼo te kau tōketā pea mo te ʼu puleʼaga ʼo ʼuhiga mo te ʼu fealagia ʼaē ʼe maʼu e ia ʼaē ʼe mahaki. ʼE mole kei fakakinauʼi e te kau tōketā te ʼu foʼi huki toto, kae kua nātou fakaʼapaʼapa heʼe kua nātou mahino. Kua nātou faka fealagia ki te kau mahaki ke nātou filifili te faitoʼo ʼaē ʼe nātou loto kiai. ʼE mole kei ʼui ko te kau Fakamoʼoni ʼa Sehova ʼe ko ni hahaʼi ʼe tauhi fakavale pea mo ʼui ʼe mole ʼaoga kia nātou he faitoʼo. Kae ʼe ʼiloa ia nātou ohage ko he kau mahaki ʼe nātou mahino lelei ki tonatou mahaki pea ʼe tonu ke fakaʼapaʼapa ki tonatou loto. ʼI te ʼu fono ʼa te kau tōketā pea mo te ʼu tala logo ʼi te televisio, neʼe ʼui e te kau polofesea ʼiloa: “ ʼAki te ʼu faiga ʼa te kau Fakamoʼoni ʼa Sehova, kua mātou mahino . . . ” “Neʼe ʼi ai te ʼu meʼa neʼe akoʼi mai e te kau Fakamoʼoni . . .” pea, “Neʼe nātou tokoni mai ke hikihiki te ʼu faitoʼo.”

ʼE ʼui ko te maʼuli ʼe maʼuhiga age ia meʼa fuli, koteʼuhi kapau ʼe mole kita maʼuli, pea ʼe mole ʼi ai anai he ʼuhiga ʼo te ʼāteaina, mo te loto faʼifaʼitaliha, pea mo te ʼuhiga ʼo kita. Tokolahi ʼi te temi nei ʼe nātou tali te faʼahi maʼuhiga ʼaia ʼaē kua fakagafua e te lao, kua mahino kia nātou ʼe fakalogo ki te hahaʼi takitokotahi te ʼu meʼa ʼaē ʼe nātou loloto kiai ʼi he ʼu ʼaluʼaga makehe. Koia, ʼi te ʼu ʼaluʼaga ʼaia ʼe fakamuʼamuʼa aipe ia te ʼuhiga ʼo kita, mo te ʼāteaina, pea mo takita lotu. Ko ia ʼaē ʼe mahaki ʼe ina filifili te faitoʼo ʼaē ʼe loto kiai. Ko te fakatuʼutuʼu ʼa te kau Fakamoʼoni ʼa Sehova, ʼaē ko te Komite Faka Felogoi Mo Te Lopitali, neʼe tokoni ki te kau tōketā tokolahi ke nātou mahino lelei age ki te ʼu faʼahi ʼaia.

Ko te tokoni tuʼumaʼu mai ʼo toku famili neʼe ina faka fealagia mai ke ʼau tauhi kia Sehova pea ke ʼau tagata ʼāfea ʼi te kokelekasio. Ohage pe ko te meʼa ʼaē neʼe kua ʼau talanoa kiai, ʼe ʼau fakahemala ʼaupito ʼi taku mole ʼiloʼi tautonu ia Sehova ʼi toku maʼuli. Kae ʼe ʼau fakafetaʼi ʼaupito ʼi tana avahi toku ʼu mata ki te ʼamanaki taulekaleka ke ʼau maʼuli ʼi te takitaki ʼo te Puleʼaga ʼo te ʼAtua ʼaē “ ʼe mole he tahi ʼe ina ʼui anai: ‘ ʼE ʼau mahaki.’ ”—Isaia 33:24.b

[Kiʼi nota]

[Paki ʼo te pasina 24]

ʼI toku taʼu 30, neʼe ʼau gāue ʼi te lopitali ʼi Santa Lucía

[Paki ʼo te pasina 26]

Ko ʼau mo toku ʼohoana, ia Beatriz, ʼi te 1995