“Koutou Kumi Ia Sehova, Koutou Fuli, Te Kau Agavaivai”

“KOUTOU kumi ia Sehova, koutou fuli, te kau agavaivai ʼo te kele, ʼaē neʼe koutou fakahoko Tana tonu fakamāu. Koutou kumi te faitotonu, koutou kumi te agavaivai. Lagi ʼe fufū anai koutou ʼi te ʼaho ʼo te hāūhāū ʼo Sehova.” — Sofonia 2:3.

Neʼe fai e te polofeta ko Sofonia te ʼu palalau ʼaia ki te “kau agavaivai ʼo te kele”, pea ʼe maʼuhiga kia nātou ke nātou “kumi te agavaivai” ke feala ai honatou hāofaki ʼi “te ʼaho ʼo te hāūhāū ʼo Sehova”. ʼE hā mai ai ko te agavaivai ʼe ʼaoga ki te hāofaki. Kae koteā tona tupuʼaga?

He koʼe ʼe ʼaoga ke kumi te agavaivai?

Ko te agavaivai ʼe ko te kalitate ʼaia ʼo te agamālū, ʼo ʼāteaina mai te fiatuʼu peʼe ko te vaʼiga. Ko te faʼahi ʼaia ʼe pipiki tahi ki ʼihi ʼu vilitute, ohage la ko te fia mālalo pea mo te agamālū. ʼO ʼuhiga mo te faʼahi ʼaia, ko te hahaʼi agavaivai ʼe faigafua tonatou akoʼi pea ʼe nātou lotolelei ʼo nātou tali te ako ʼaē ʼe haʼu mai te ʼAtua, tatau aipe peʼe hage ʼe mata faigataʼa ʼi te temi pe ʼaia. — Pesalemo 25:9; Hepeleo 12:4-11.

Ko te agavaivai ʼe feala ke ina fakahoko he faʼahiga meʼa ki te hahaʼi ʼaē neʼe ako peʼe neʼe maʼuhiga ʼi tonatou maʼuli. Kae, ko nātou ʼaē neʼe ako ʼi te ʼu faleako lalahi peʼe nātou maʼuhiga ʼi te malamanei ʼe ʼui maʼa nātou kua nātou faiva ʼi te fai ʼo he tonu ʼo ʼuhiga mo te ʼu meʼa fuli, tatau aipe mo te potu ʼaē ʼo te lotu. Ko te meʼa ʼaenī ʼe feala ai tanatou mole faka fealagia ki he tahi ke akoʼi age he meʼa kia nātou peʼe ko te tali ʼo te tokoni pea mo fai ʼo he ʼu fetogi ʼaoga ʼi tonatou maʼuli. Ko ʼihi hahaʼi ʼe maʼu koloā ʼe feala ke nātou manatu hāla ʼe nātou maʼu te fīmālie ʼi tanatou ʼu koloā. Pea, ʼi tanatou manatu ʼe mole ʼaoga kia nātou te ʼu meʼa fakalaumālie ʼi te Folafola ʼa te ʼAtua, te Tohi-Tapu. — Mateo 4:4; 5:3; 1 Timoteo 6:17.

Koutou fakatokagaʼi te kau sekelipa, te kau Faliseo, pea mo te ʼu takitaki lotu ʼi te temi ʼo Sesu. ʼI he temi neʼe fekauʼi ai te ʼu ofisie ke nātou ʼolo ʼo puke ia Sesu neʼe nātou liliu ʼātea mai, neʼe ʼui maʼa te kau Faliseo: “ ʼE kua toe kau koa ia mo koutou ʼi te fakahēʼi? ʼE ʼi ai koa la he tahi ia ʼi te kau tagata pule peʼe ko te kau Faliseo ʼe tui kia te ia? Kae ko te hahaʼi ʼaenā ʼe mole nātou ʼiloʼi te Lao, ko te kau malaʼia.” (Soane 7:45-49). Ko tona faka ʼuhiga, kia nātou ʼe gata pe ki te hahaʼi ʼaē ʼe mole mahino ki he meʼa pea neʼe mole ako ʼe faigafua tanatou tui kia Sesu.

Māʼiape la te faʼahi ʼaia, ko ʼihi ʼu Faliseo neʼe nātou tali te moʼoni, pea neʼe nātou kau foki mo Sesu pea mo te kau kilisitiano. Ia nātou ʼaia neʼe kau ai ia Nikotemo pea mo Kamaliele (Soane 7:50-52; Gāue 5:34-40). ʼI te hili ʼo te mate ʼo Sesu, “ko he tokolahi ʼi te ʼu pelepitelo neʼe nātou liliu ʼo mulimuli ki te tui”. (Gāue 6:7.) Kae ko te faʼifaʼitaki ʼaē ʼe lelei ʼaupito neʼe ko te ʼapositolo ko Paulo. Neʼe akoʼi ia e Kamaliele pea neʼe liliu ia ko he tahi neʼe lahi tona faiva pea neʼe fakaʼapaʼapa ki ai te kau Sutea. Kae, ʼaki te agavaivai neʼe ina tali te pāui ʼa Kilisito Sesu pea neʼe liliu ia ko tana tisipulo faiva. — Gāue 22:3; 26:4, 5; Kalate 1:14-24; 1 Timoteo 1:12-16.

Ko te ʼu meʼa ʼaia ʼe hā mai ai māʼiape la he manatu ʼa he tahi ʼi te temi kua hili peʼe ko te temi ʼaenī ʼo ʼuhiga mo te logo ʼo te Tohi-Tapu, ko te ʼu palalau ʼa Sofonia ʼe kei ʼaoga ia. Kapau ʼe loto he tahi ke leleiʼia ia e te ʼAtua pea mo taki e tana Folafola, ʼe ʼaoga kia ia te agavaivai.

Ko nātou ʼaē ʼe nātou “kumi te agavaivai” ia ʼaho nei

ʼE lauʼi miliona te hahaʼi ʼe ʼōmai mai te malamanei ʼe nātou tali te logo lelei ʼo te Puleʼaga. Ko te kau Fakamoʼoni ʼa Sehova ʼe nātou taki te ʼu ako faka tohi-tapu e fā miliona tupu ʼi te vāhaʼa ʼi te ʼu ʼapi ʼo te ʼu hahaʼi ʼaia. ʼE nātou ʼōmai mai te ʼu potu fuli pea mo te ʼu ʼaluʼaga faka ekonomike pea mo faka sosiale kehekehe. Kae, ko te meʼa e tahi ʼe nātou maʼu fuli ʼe ia nātou te agavaivai ʼo nātou tali te logo ʼa te Tohi-Tapu ʼaē neʼe fakahā age e he tahi ʼi tonatou ʼapi peʼe ʼi he tahi faʼahi. Tokolahi ia nātou ʼe tuputupu lelei koteʼuhi ʼe nātou lotolelei ʼo nātou faiga mālohi ke nātou tauʼi te ʼu faigataʼaʼia ʼi tonatou maʼuli. ʼIo, ʼe nātou kau ki “te ʼu hahaʼi agavaivai ʼi te kele” ia ʼaho nei.

Tou toʼo te faʼifaʼitaki ʼo Malia ʼi Mekesike. Neʼe ina ako te ʼu lao ʼi te univelesitē pea neʼe maʼuli fīmālie ʼi te faʼahi fakakoloa koteʼuhi neʼe ina maʼu tona tofiʼa. ʼAki te faʼahi ʼaia, neʼe ina maʼu te ʼu manatu faʼifaʼitaliha ʼo tupu ai leva tana fetogi, ohage ia, ko he tahi ʼe “logo gataʼa, mālohi, fiatuʼu, pea mole tui”. “ ʼI taku manatu ʼe feala te fakatokatoka ʼo te ʼu meʼa fuli ʼaki te paʼaga pea ko te ʼAtua ʼe mole maʼuhiga ia. ʼIo, neʼe hage kia ʼau ʼe mole maʼuli te ʼAtua”, ko te ʼui ʼaia ʼa Malia. “Kia te ʼau ko te lotu ʼe ko he meʼa faka galivale pea ʼe ko he maʼua faka sosiale”, ko tana toe ʼui ʼaia.

Ki muli age, neʼe fakatokagaʼi e Malia te fetogi ʼo tona kiʼi tokolua mataʼi tama ʼi tana liliu ʼaē ko te Fakamoʼoni ʼa Sehova. Neʼe fakamahino e Malia “neʼe ko he tama aga ʼitaʼia, pea ʼi te temi nei kua liliu ia ko he tama fīmālie pea mo faitotonu”. “Neʼe tala age e tona kāiga ko ia ko te kaugā faka mafola pea ʼe ina lau te Tohi-Tapu, pea ko te tupuʼaga la ʼaia ʼo tana mole kei ʼinu kava pea mole kei muli fafine. Koia neʼe ʼau loto leva ke haʼu ia ia pea ke ina lau mai te Tohi-Tapu koteʼuhi ʼi taku manatu ʼe ko te ala ʼaia ke ʼau toʼo ke ʼau maʼu ai te tokalelei pea mo te fīmālie ʼaē neʼe lahi taku loto ki ai.” Ko te meʼa neʼe hoko neʼe tali e Malia te ako faka tohi-tapu mo te taumatuʼa ʼi te kau Fakamoʼoni.

Neʼe lahi te ʼu meʼa ke ina tauʼi, pea neʼe faigataʼa foki tana tali te ʼu fakatuʼutuʼu ʼo ʼuhiga mo te pule famili ʼi te Tohi-Tapu ohage ko te fakalogo ki tona ʼohoana. Kae neʼe ina fai te ʼu fetogi maʼuhiga ʼi tona maʼuli pea mo tana aga. Neʼe ʼui maʼana: “ ʼE ʼau manatu talu te ʼōmai ʼa te ʼu tuagaʼane ki toku ʼapi ʼo nātou ʼaumai te tokoni ʼa Sehova, ʼe ʼi ai te fīmālie, te tokalelei, pea ko te tapuakina ʼa te ʼAtua ʼe ʼi toku ʼapi.” Ia ʼaho nei, kua foaki e Malia tona maʼuli, ʼo papitema ko te Fakamoʼoni ʼa Sehova.

ʼI te hoko atu ʼo te kumi ʼo te tauhi moʼoni, ʼe ʼi ai te tahi faʼahi ʼe maʼuhiga ke ʼi ai te agavaivai. Ko te meʼa ʼe tautau hoko, ko te fafine ʼaē ʼi te famili ʼe ina tali te moʼoni pea mo fia kaugana ki te ʼAtua, kae ʼe lotolotolua tona ʼohoana. E lagi ʼe faigataʼa ki te ʼu tagata ke nātou tali te manatu ʼaē ʼe ʼi ai te tahi — ko Sehova ʼAtua — ʼaē ʼe tonu ke fakalogo ki ai tonatou ʼohoana ʼi te temi ʼaenī (1 Kolonito 11:3). Ko he fafine ʼi Chihuahua, ʼi Mekesike, neʼe ina kole hana ako faka tohi-tapu, pea neʼe ina tali ai te moʼoni pea mo tana ʼu tamaliki e fitu. Ko te ʼuluaki meʼa neʼe hoko neʼe fakafeagai tona ʼohoana. Koteā tona tupuʼaga? Koteʼuhi neʼe mole ina tali ke ʼolo tona famili ʼo fai faka mafola ʼi te ʼu ʼapi, ʼo tufa te ʼu tohi faka tohi-tapu. ʼE hage ʼi tana manatu ko te meʼa ʼaia ʼe fakamālaloʼi ai ia. Kae, ko tona famili, neʼe nātou taupau maʼu tanatou tonu ʼo nātou kaugana ki te ʼAtua. Pea neʼe sio ai tona ʼohoana ki te maʼuhiga ʼo te fakatuʼutuʼu ʼa te ʼAtua pea ina tali. Kae ʼi te hili ʼo taʼu e 15 pea ina foaki tona maʼuli kia Sehova.

ʼI te fenua katoa ʼo Mekesike, ʼe kei lahi ai te ʼu faʼahi ʼe mamaʼo ʼe nofoʼi e te kau Initia pea fai mo ʼanatou agaʼi fenua. Ko te logo ʼo te Tohi-Tapu ʼe aʼu ki te ʼu hahaʼi ʼaia pea ʼe tokoni kia nātou ke nātou hikihiki ki muʼa, ohage ko ʼihi ʼe nātou ako lautohi pea mo faitohi ʼi tanatou ako te moʼoni. Kae, ʼuhi ko te mole lahi ʼo te ako ʼa te hahaʼi peʼe ko tanatou ʼu paʼaga ʼe mole faka ʼuhiga leva ʼe lahi tanatou fia fakalogo. Ko te fiatuʼu ʼo te lanu pea mo te mālohi ʼo te taupau ʼo te ʼu talatisio mai te ʼu matuʼa ʼi ʼihi temi ʼe faigataʼa ki niʼihi ke nātou tali te moʼoni. Ko te meʼa ʼaenī ʼe toe fakamahino mai ai pe koʼe ʼi ʼihi kolo Initia, ko nātou ʼaē ʼe nātou tali te moʼoni ʼe tautau gaohi koviʼi nātou e ʼihi ʼo te kolo. Koia ko te agavaivai ʼe lahi tona ʼu agaaga.

Tali ʼaki te agavaivai

Kaeā koa ia koutou takitokotahi? Kua koutou tali koa te moʼoni ʼi te Folafola ʼa te ʼAtua? Peʼe faigataʼa koa takotou tali te ʼu moʼoni ʼo te Tohi-Tapu? E lagi ʼe koutou fia tokagaʼi anai ia koutou totonu ke koutou vakaʼi ai pe koteā te meʼa ʼaē ʼe faigataʼa kia koutou. ʼE koutou lotolotolua koa ʼuhi ko te tokolahi ʼi te hahaʼi ʼaē ʼe fia fai ki te moʼoni ʼe ko te ʼu hahaʼi agavaivai? ʼE koutou manatu pe koa kia koutou? ʼE lelei te fakakaukauʼi ʼo te ʼu palalau ʼa te ʼapositolo ko Paulo: “Ko te ʼAtua neʼe ina filifili te ʼu meʼa ʼaē ʼe vale ʼo te malamanei moʼo fakaufiufi ki te ʼu tagata popoto; pea ko te ʼAtua neʼe ina filifili te ʼu meʼa ʼaē ʼe vaivai ʼo te malamanei moʼo fakaufiufi ki te ʼu meʼa mālohi; pea ko te ʼAtua neʼe ina filifili te ʼu meʼa manuki ʼo te malamanei pea mo te ʼu meʼa ʼaē ʼe vaʼiganoaʼi, te ʼu meʼa ʼaē ʼe mole vaʼiganoaʼi, moʼo faka pulinoaʼi ʼo te ʼu meʼa ʼaē ʼi ai, ke ʼaua naʼa faka kolōliaʼi e he tahi ia ia, ia muʼa ʼo te ʼAtua.” — 1 Kolonito 1:27-29.

ʼE koutou fia līaki koa te koloā ʼaia koteʼuhi pe ʼe koutou maʼu ʼi he kiʼi ipu kele? Kailoa! Koia, ko te faʼahi ʼaia ʼe ko te ala ʼe fili e te ʼAtua moʼo fakahā mai kia tatou te Folafola ʼo te moʼoni ʼaē ʼe ina hāofaki ai tatou, ohage ko te fakamatala e te ʼapositolo ko Paulo: “Ko te koloā ʼaia, ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani ʼe ko te mālohi ia ʼo te ʼAtua kae mole ko te mālohi ʼaē ʼe haʼu mai ia tatou.” (2 Kolonito 4:7). Ko te agavaivai pea mo te loto fia mālalo ʼe ʼaoga kia tatou ke tou sio ki te maʼuhiga moʼoni ʼo te koloā pea ke ʼaua naʼa tou sisio pe ki te ʼu “ipu kele”, peʼe ko te ʼu fakafofoga fakatagata, ʼaē neʼe tuku mai kia tatou. ʼAki tatatou fai te faʼahi ʼaia, ʼe tou fakatuputupu anai te fealagia ʼaē ʼo hatatou “fufū ʼi te ʼaho ʼo te hāūhāū ʼo Sehova” pea mo tou kau ʼi te kau agavaivai ʼaē ʼe nātou “maʼu anai te kele”. — Sofonia 2:3; Mateo 5:5.