Te ʼu Fehuʼi ʼa Te Kau Lautohi

Ko te ʼu kupu “ ʼe mahalo pe” ʼaē ʼe tuʼu iā Sofonia 2:​3, ʼe faka ʼuhiga koa ʼe mole feala ke ʼiloʼi papau e te ʼu kaugana ʼa te ʼAtua peʼe nātou maʼu anai te maʼuli heʼegata?

ʼE tou lau fēnei ʼi te vaega ʼaia: “Koutou kumi ia Sehova, ia koutou fuli, kau agavaivai ʼo te kele, ʼaē neʼe koutou fai Tana tonu fakamāu. Koutou kumi te faitotonu, koutou kumi te agavaivai. Pea ʼe mahalo pe ʼe fufū anai koutou ʼi te ʼaho ʼo te hāūhāū ʼo Sehova.” He koʼe ʼe ʼui ʼi te vaega ʼaia “ ʼe mahalo pe”?

Ke tou mahino peʼe koteā anai ka fai e Sehova ki tana ʼu kaugana agatonu ʼi Halamaketone, ʼe ʼaoga ke tou toe fakamanatu te ʼu meʼa ʼaē ʼe akoʼi mai ʼi te Tohi-Tapu ʼo ʼuhiga mo te meʼa ʼaē ka fai e te ʼAtua maʼa nātou ʼaia ʼe mamate ʼi muʼa ʼo te temi fakamāu ʼaia. Ko ʼihi ʼe fakatuʼuake anai ke nātou liliu ko he ʼu laumālie ʼe māʼuʼuli tuputupua ʼi te lagi, kae ko ʼihi ʼe fakatuʼuake anai ʼi te kele ʼaki te ʼamanaki ʼaē ke nātou māʼuʼuli ʼo heʼegata ʼi te Palatiso. (Soane 5:​28, 29; 1 Kolonito 15:​53, 54) Kapau ʼe manatuʼi e Sehova pea mo fakapale tana ʼu kaugana agatonu ʼaē neʼe mamate ʼi muʼa ʼo Halamaketone, pea ʼe ina fakahoko feiā pe anai ʼo ʼuhiga mo tana ʼu kaugana ʼaē ʼe ka māʼuʼuli anai ʼi te ʼaho ʼo tona hāūhāū.

ʼE toe fakaloto mālohi mo te ʼu folafola fakaʼatua ʼaē neʼe fai e te ʼapositolo ko Petelo. Neʼe ina tohi fēnei: “[Ko te ʼAtua] nee ina haofaki pe i te temi nee ina fakahifo ai te tulivio o fakamou te malama o te hahai pagani, ia Noe nee tokovalu aki ia natou nee mauli, iaʼia ae nee ina kalagai te susitisia; pea nee ina tautea te u kolo o Sotoma mo Komola o fakaliliu o lefulefu, . . . pea nee ina haofaki Lote te agatonu . . . E iloi e . . . [“Sehova,” MN ] te haofaki o te hahai agatonu mai te ahiahi, kae e ina taupau te hahai agahala ke tautea natou i te aho o te Fakamau.” (2 Petelo 2:​5-9) Logope neʼe fakaʼauha e Sehova te kau agakovi ʼi te temi muʼa, kae neʼe ina hāofaki ia Noe mo Lote, ʼaē neʼe nā tauhi agatonu kiā te ia. ʼE ina toe hāofaki anai mo te hahaʼi ʼaē ʼe pipiki kiā te ia mokā ina fakaʼauha anai te kau agakovi ʼi Halamaketone. Ko “te toe hahaʼi tokolahi” ʼo te kau agatonu ʼe nātou hāo anai.​—Apokalipesi 7:​9, 14, MN.

Koia, ʼe ʼiloga mai ko te palalau “ ʼe mahalo pe” ʼaē ʼe tuʼu iā Sofonia 2:​3, ʼe mole ko he ʼiloʼi papau peʼe feala ki te ʼAtua ke ina hāofaki ia nātou ʼaē ʼe ina leleiʼia. Kae ʼe fakamahalo pe te fufū ʼo he tahi ʼi te ʼaho ʼo te hāūhāū ʼo Sehova, mo kapau neʼe hoki kamata age pe tana kumi ia te faitotonu pea mo te agavaivai. ʼE fakalogo anai te hāofaki ʼo he tahi, ki tana haga kumi ia te agavaivai pea mo te faitotonu.​—Sofonia 2:⁠3.

[Paki ʼo te pasina 31]

‘ ʼE ʼiloʼi e Sehova peʼe feafeaʼi hana hāofaki ia te hahaʼi agatonu mai te ʼahiʼahi’