ʼE Feala Koa Hakotou Maʼuliʼi Te Faʼa Kātaki?

NEʼE ʼui e Sehova kia Apalamo: “Mavae ʼi tou fenua . . . ki te fenua ʼaē ʼau fakahā atu anai; pea ʼe ʼau fakaliliu anai ia koe ko he puleʼaga lahi pea ʼe ʼau tapuakina anai koe, pea ʼe ʼau hikihiki anai tou huafa.” (Senesi 12:1, 2) ʼI te temi ʼaia neʼe taʼu 75 ia Apalamo. Neʼe fakalogo Apalamo pea ʼaki he aga fakapotopoto neʼe ina maʼuliʼi te faʼa kātaki ʼo kaku ki tana mate, ʼo falala kia Sehova.

Hili ʼaia, neʼe fai e te ʼAtua te fakapapau ʼaenī ki te tagata faʼa kātaki ʼaē ko Apalahamo (Apalamo): “ ʼE mahino ia ʼi te tapuakina ʼe ʼau tapuakina anai koe, pea ʼi te fakahahaʼi ʼe ʼau fakahahaʼi anai koe.” Neʼe toe hoko atu e te ʼapositolo ko Paulo ʼo fēnei: “Pea koia ʼi te hili ʼaē ʼo te fakahā e Apalahamo te faʼa kātaki, neʼe ina maʼu te fakapapau.”—Hepeleo 6:13-15.

Koteā te faʼa kātaki? Ko te ʼu tikisionalio ʼe nātou faka ʼuhiga ki te fealagia ʼaē ke “ ʼaua naʼa kita hoha ki he meʼa” peʼe ko te fakahā ʼaē ʼo te “lotoʼutaki mokā hoko te manukinuki peʼe ko te mamahi.” Koia ko takotou faʼa kātaki ʼe ʼahiʼahiʼi mokā ʼe koutou fakatalitali ki he tahi peʼe ko he meʼa, mokā ʼe manukinukiʼi koutou peʼe faigataʼaʼia takotou fakakaukau. ʼI te ʼu ʼaluʼaga ʼaia, ko te tagata ʼaē ʼe faʼa kātaki ʼe mole nofo hoha ia; kae ko ia ʼaē mole faʼa kātaki ʼe fakalāluvale pea mo ʼita.

Ko Te Mālama Heʼe Faʼa Kātaki ʼo Totatou Temi

Tāfito ʼi te ʼu kolo lalahi, ʼe mole ko te faʼa kātaki ʼaē ʼe mālohi ʼi ai kae ko te fakavilivili. Ki te toko miliona hahaʼi ʼaē ʼe maʼuʼuli ʼi te ʼu kolo ʼaē hahaʼi ʼaupito, ko te ʼaho ʼe kamata mokā tagi te ʼuasi. ʼE ko te kamataʼaga ʼaia ʼo te fakavilivili—moʼo aʼu ki he koga meʼa, moʼo felāveʼi mo he tahi, moʼo fakaʼosi ʼo he meʼa. ʼE fakapuna’maʼuli koa te hoha feiā pea mo te mole faʼa kātaki ʼa te hahaʼi?

ʼE koutou ʼita koa mokā hala atu niʼihi kia koutou? “ ʼE mole ʼau leleiʼia mokā tauhala mai he tahi,” ko te ʼui ʼaia ʼa Albert. ʼE manatu tahi anai te tokolahi ʼo ʼuhiga mo te faʼahi ʼaenī, ʼe ko he meʼa fakakinakina foki te atali ʼo he tahi ʼe tauhala mai, tāfito la mo kapau neʼe kua talagaʼi he hola ke felāveʼi ai. ʼO ʼuhiga mo te Duc de Newcastle, ko te tagata fai politike ʼo te 18 sēkulō, neʼe ʼui fēnei: ‘ ʼI te pogipogi uhu ʼe pulinoa tona vaeluaʼi hola, pea ʼi te lolotoga ʼo te ʼaho ʼe tauhala tuʼumaʼu pe.’ Ka na pau la neʼe tonu ke koutou fakalogo ki he tahi feiā ʼi te ʼaho fuli pe, ʼe koutou taupau anai koa takotou faʼa kātaki?

ʼI takotou ʼuli motokā, ʼe koutou ʼita vave koa, ʼi takotou pipiko ʼaē ʼi te talitali, peʼe gaholo fau koa takotou taki motokā ʼi ʼihi temi? ʼI te ʼu ʼaluʼaga ʼaia, ko te mole faʼa kātaki ʼe vave pe tana taki ki te ʼu tuʼutāmaki fakamataku. Lolotoga te taʼu 1989, ʼi te fenua ʼaē neʼe fakahigoaʼi ʼi te temi ʼaē ko Siamani ʼo te Potu Hihifo, ko te ʼu fakaʼī e 400 000 tupu ʼaē neʼe hoko ʼi te ʼu ala lalahi ʼo fakatupu ʼaki ai te ʼu lāvevea pea mo te kau mate. ʼI te ʼu fakaʼī ʼaia, ko te fakaʼī e 1 ʼi te ʼu fakaʼī e 3 neʼe hoko ʼuhi ko te vave fau peʼe ko te ōvi fau ʼo te ʼuli motokā ʼa he tahi ki te motokā ʼaē neʼe ʼalu ʼi ʼona muʼa. Koia ʼi hona faʼahiga ʼaluʼaga, ko te mole faʼa kātaki neʼe ko te tupuʼaga ʼaia ʼo te lāvevea pea mo te mamate ʼa te toko 137 000 hahaʼi. ʼI meʼa fakaʼofaʼofa foki te fua ʼo te mole faʼa kātaki!

“Ki taku manatu ʼe faigataʼa te taupau ʼo te faʼa kātaki mokā tuʼusi e he tahi te palalau ʼi te temi fuli pe,” ko te ʼui ʼaia ʼa Ann, “peʼe mokā lahi fau te fia hā ʼa he tahi.” Kia Karl-Hermann ko tana faʼa kātaki ʼe ʼahiʼahiʼi e “te kau tūpulaga ʼaē mole fakaʼapaʼapa ki te hahaʼi matutuʼa.”

Ko te ʼu ʼaluʼaga ʼaia pea mo niʼihi age ʼaluʼaga ʼe feala ke nātou pulihi ia koutou te faʼa kātaki. Koia, ʼe lava feafeaʼi hakotou gāueʼi ke ʼāsili age takotou faʼa kātaki?

Ko Sehova ʼe Feala Ke Ina Fakamālohiʼi Takotou Faʼa Kātaki

Ki te tokolahi ko te faka ʼuhiga ʼo te faʼa kātaki ko te lotolotolua peʼe ko he vaivaiʼaga. Kae, kia Sehova, ʼe ko he fakaʼiloga ia ʼo te mālohi. Ko ia totonu “ ʼe faʼa kātaki . . . koteʼuhi ʼe mole loto ia ke fakaʼauha he tahi kae ke tou fakahemala fuli.” (2 Petelo 3:9) Koia la ʼaē, moʼo fakamālohiʼi takotou faʼa kātaki, koutou tapiki maʼu kia Sehova pea mo koutou falala ki ai ʼaki tokotou loto katoa. Ko te fakamālohiʼi ʼo tokotou vāhaʼa pea mo te ʼAtua ʼe ko te puani ʼaē ʼe maʼuhiga age ki te fakatuputupu ʼo te faʼa kātaki.

Tahi ʼaē meʼa, ʼe maʼuhiga ʼaupito ke koutou ʼiloʼi te ʼu fakatuʼutuʼu ʼa Sehova ʼo ʼuhiga mo te kele pea mo te tagata. Ko Apalahamo “neʼe talitali ia ki te kolo ʼaē ʼe ʼi ai tona ʼu fakatafito moʼoni, te kolo ʼaē ko tona tufuga pea mo tona tupuʼaga ko te ʼAtua.” (Hepeleo 11:10) ʼO toe feiā aipe, ʼe ʼaoga anai te taupau ʼo he fakasiosio tonu ʼo ʼuhiga mo te ʼu fakapapau fakaʼatua pea mo te fiafia ʼi te falala ʼaē kia Sehova. ʼE koutou ʼiloʼi ai anai ko te faʼa kātaki, ʼe mole ko he fakaʼiloga ia ʼo te lotolotolua, ʼe ina lolotoga faka fealagia nei ki te hahaʼi ke nātou maʼu te tauhi moʼoni. Koia la ʼaē, “koutou faka ʼuhiga te kātaki ʼo totatou ʼAliki ko he fakamaʼuli ʼo tatou.”—2 Petelo 3:15.

Kae, e feafeaʼi la mo kapau ʼe ʼahiʼahiʼi ʼaupito takotou faʼa kātaki e tokotou ʼu ʼaluʼaga takitokotahi ʼo teitei pe ke mole ma kātakiʼi? Ko nātou koa ʼaē ʼe mole tui ki te ʼAtua, ʼe nātou fakakinakinaʼi koa koutou? Neʼe kua koutou mahahaki koa lolotoga ni ʼu temi neʼe hage atu kia koutou ʼe mole kei ʼi ai hona gataʼaga? ʼI te faʼahi ʼaia, koutou fakamaʼumaʼu ʼi tokotou loto te meʼa ʼaē neʼe tohi e te tisipulo ko Sake. ʼI te hili ʼo tana talanoa ki te faʼifaʼitaki ʼaē neʼe tuku mai e te kau polofeta ʼo ʼuhiga mo te maʼuliʼi ʼo te faʼa kātaki, neʼe ina fakahā te kalavi ʼo te loto lolomi mokā hoko he fihifihia mālohi. Neʼe ʼui e Sake: “ ʼE ʼi ai koa he tahi ia koutou ʼe lolotoga tau mo te mamahi? Ke faikole ia.”—Sake 5:10, 13.

Koutou faikole fakamalotoloto ki te ʼAtua ke ina fakamālohiʼi takotou faʼa kātaki pea mo tokoni atu ke koutou faʼa kātaki mokā hoko he ʼahiʼahi. Koutou haga tuʼumaʼu kia Sehova, pea ʼe tokoni atu anai ke koutou ʼiloʼi te ʼu ʼaluʼaga peʼe ko te ʼu agamāhani ʼa ʼihi ʼaē ko he ʼahiʼahi ki tokotou loto lolomi. Ko te faikole mokā ʼahiʼahiʼi koutou ʼe feala ke tokoni ki takotou faʼa kātaki.

Ko He Fakasiosio Fakahagatonu ʼo Kita Pea Mo Nātou ʼAē

Moʼo taupau he fakakaukau ʼe maui mālie, ʼe tonu anai ke koutou sioʼi te hahaʼi ohage pe ko takotou sioʼi ʼo koutou. ʼE fealagia te faʼahi ʼaia ʼaki he ako faka Tohi-Tapu, koteʼuhi ʼe ina fakahā ko te tagata ʼe agahala pea koia ʼe ʼi ai tona ʼu vaivaiʼaga. Tahi ʼaē meʼa, ko he mālama ʼo ʼuhiga mo te Tohi-Tapu ʼe tokoni atu anai ke koutou tuputupu ʼi te ʼofa. Ko te kalitate ʼaia ʼe ʼaoga ʼaupito ki te fakahā ʼo te faʼa kātaki kia nātou ʼaē.—Soane 13:34, 35; Loma 5:12; Filipe 1:9.

Ko te ʼofa mo te loto faʼa kātaki ʼo fakamolemole, ʼe feala ke nā fakamalū tokotou loto mokā ʼe koutou ʼiʼita. Kapau ʼe ʼi ai he tahi ko tana aga māhani ko te fakakinakinaʼi ʼo koutou, ko te ʼofa ʼe ina fakamanatuʼi atu anai ʼe ko tana ʼu aga ʼaē mole koutou leleiʼi, kae mole ko ia totonu. Koutou fakakaukauʼi age muʼa peʼe tuʼa fia takotou ʼahiʼahiʼi te faʼa kātaki ʼa te ʼAtua pea mo takotou fakatupu ʼita kia nātou ʼaē.

Ko he fakasiosio lelei ʼo koutou totonu ʼe toe tokoni anai kia koutou ke koutou atalitali ʼaki he loto faʼa kātaki. Ohage la, neʼe koutou loto koa ki ni ʼu pilivilesio ʼi te selevisi ʼaē kia Sehova, kae neʼe mole foaki atu? ʼE koutou logoʼi koa ʼe mole kei feala hakotou faʼa kātaki? Kapau koia ʼaia, koutou manatuʼi, ʼi hona ʼaluʼaga lahi, ko te mole faʼa kātaki ʼe fakatafito ia ki te fialahi. Neʼe ʼui maʼa Salomone “ ʼE lelei age ia ia ʼaē ʼe faʼa kātaki ia ia ʼaē ʼe fia māʼoluga.” (Tagata Tānaki 7:8) ʼE mahino ia, ko te fialahi ʼe ko he fakafeagai lahi ia ki te fakatuputupu ʼo te faʼa kātaki. ʼE mole moʼoni koa la te ʼui ʼaē ʼe faigafua age ki te kau agavaivai hanatou faʼa kātaki? Koia, koutou maʼuliʼi te agavaivai, pea ʼe koutou tali lelei anai te atalitali ʼaki he fakakaukau ʼe tokalelei.—Tāʼaga Lea 15:33.

E Lahi Te ʼu Tapuakina ʼi Te Faʼa Kātaki

Ko Apalahamo neʼe ʼiloa ʼi te temi ʼaē, ʼuhi ko tana tui. (Loma 4:11) Kae, neʼe hoholo tana tui he neʼe faʼa kātaki. ʼI tana falala ʼaē kia Sehova neʼe koteā tona fakapale?

Neʼe tuputupu aipe te falala ʼa Apalahamo kia Sehova. Koia, ko te huafa ʼo Apalahamo neʼe hikihiki pea ko tona hōloga neʼe liliu ko he puleʼaga mālohi. Ko te hahaʼi fuli ʼo te kele ʼe feala ke tapuakina nātou ʼuhi pe ko tana hāko. Ko Apalahamo neʼe ko he ʼave folafola ʼa te ʼAtua pea neʼe ko he fakafofoga ia ʼo te Tupuʼaga. Neʼe ʼi ai koa la he tahi fakapale ʼe lahi age moʼo tapuakina te tui pea mo te faʼa kātaki ʼa Apalahamo?

“Ko Sehova ʼe ʼofa mamahi ʼaupito” ki te kau Kilisitiano ʼaē ʼe nātou ʼutaki ʼaki he loto faʼa kātaki te ʼu ʼahiʼahi. (Sake 5:10, 11) Ko te hahaʼi ʼaia ʼe nātou taupau maʼu he leʼo ʼo loto ʼe maʼa ʼi tanatou fai te finegalo ʼo te ʼAtua. Koia, ʼo ʼuhiga mo koutou, kapau ʼe koutou falala kia Sehova pea mo ʼutaki ʼaki he loto faʼa kātaki te ʼu ʼahiʼahi, ʼe leleiʼia anai e Sehova mo ina tapuakina anai takotou fakamolemole gafua.

ʼE ʼaoga te faʼa kātaki ki te hahaʼi ʼa Sehova ʼi te ʼu faʼahi fuli ʼo te maʼuli. Ko te ʼu kaugana e lua ʼa Sehova, ko Christian pea mo Agnès, neʼe nā ʼiloʼi te faʼahi ʼaia ʼi te temi ʼaē neʼe nā fakatuʼutuʼu ai ke nā fakatahi. Neʼe nā holomuli te ʼaho ʼo tanā fakatahi, ko he fakaʼapaʼapa ki te ʼu mātuʼa ʼa Christian, he neʼe nā fia ʼiloʼi lelei muʼa ia Agnès. Neʼe koteā te fua ʼo te aga ʼaia?

Neʼe tali maʼa Christian: “Ki muli age, neʼe ma mahino ai leva he koʼe neʼe maʼuhiga ʼaupito ki taku ʼu mātuʼa ke ma faʼa kātaki. Ko tamā faʼa kātaki ʼo atalitali neʼe mole ina maumauʼi taku felogoi mo toku ʼohoana. Kae neʼe ko te ʼuluaki fakatafito ʼaia ʼo tamā felogoi lelei mo taku ʼu mātuʼa.” ʼIo, e lahi te ʼu tapuakina e kita maʼu ʼi te maʼuliʼi ʼo te faʼa kātaki.

Ko te faʼa kātaki ʼe toe lagolago foki ki te tokalelei. Ko takotou famili pea mo tokotou ʼu kaumeʼa ʼe nātou fiafia anai ʼi takotou mole fakatupu he kē ʼi tanatou ʼu kiʼi hala fuli pe. Ko takotou faʼa kātaki pea mo takotou lotomahino mokā hala atu niʼihi, e nā tokoni atu anai ke ʼaua naʼa hoko he ʼu meʼa ʼe mole mo tāu. Ko te tāʼaga lea faka Siaina ʼe ina ʼui fēnei: “Ko te faʼa kātaki ʼi te temi ʼo te ʼita ʼe ina fakahāo anai koutou ke ʼaua naʼa koutou nofo hoha ia ʼaho e teau.”

Ko te faʼa kātaki ʼe ina hikihiki ia koutou, ʼe tokoni kia koutou ke koutou taupau lelei te tahi age ʼu kalitate ʼo koutou. ʼE ina fakatologa anai takotou tui, tokotou tokalelei, pea mo tokotou ʼofa ke tuʼu mālohi. Ko te faʼa kātaki ʼe tokoni atu anai ke koutou fiafia ʼi takotou maʼuliʼi te finegaloʼofa, te agalelei, pea mo te agamālū. Ko te maʼuliʼi ʼo te faʼa kātaki ʼe ina fakatupu anai te mālohi ʼaē ʼe ʼaoga moʼo fakahoko te manavaʼofa pea mo te lotoʼutaki.

Koia, ke koutou fakatalitali ʼaki he loto faʼa kātaki ki te fakahoko ʼo te ʼu fakapapau ʼa Sehova, pea ʼe mahino papau ia ʼe koutou maʼu anai he ka haʼu ʼe fakaofoofo. Ohage ko Apalahamo, ʼofa pe “ke koutou maʼu te ʼu fakapapau ʼaki te tui pea mo te faʼa kātaki.”—Hepeleo 6:12.

[Paki ʼo te pasina 23]

Ko he vāhaʼa lelei pea mo te ʼAtua ʼe tokoni atu anai ke koutou maʼuliʼi te faʼa kātaki, ohage ko Apalahamo