Tou Faifaitaki Te Kātaki Fualoa ʼa Sehova Mo Sesu

“Koutou tui ko te kataki fualoa o totatou Aliki ko tokotou fakamauli.”—2 PET. 3:15.

KOTEĀ TAKOTOU TALI?

ʼE fakahā feafeaʼi e Sehova tana kātaki fualoa?

He koʼē neʼe tonu ke kātaki fualoa ia Sesu?

Koteā ʼaē ʼe feala ke tou fai moʼo faifaitakiʼi te kātaki fualoa ʼa te ʼAtua?

1. Koteā te fehuʼi ʼaē ʼe fai e ʼihi kua fualoa tanatou tauhi agatonu kiā Sehova?

KO HE tuagaʼane kua fualoa tana tauhi agatonu kiā Sehova pea mo kātakiʼi te ʼu ʼaluʼaga faigataʼa, neʼe ina fehuʼi fēnei: “ ʼE au sio anai koa ki te fakaʼosi ʼi muʼa ʼo taku mate?” Ko ʼihi ʼaē kua fualoa tanatou tauhi kiā Sehova neʼe natou toe fai ia te fehuʼi ʼaia. ʼE tou fakaʼamu ke hoko mai lā te ʼaho ʼaē kā fakafoʼou anai e te ʼAtua ia meʼa fuli, pea mo pulihi te ʼu faigataʼaʼia ʼaē ʼe tou tau mo ia iā ʼaho nei. (Apk. 21:5) Logolā ʼe lahi te ʼu tupuʼaga ke tou tui ai kua ovi mai te fakaʼosi ʼo te tuʼu ʼa Satana, kae ʼe feala ke faigataʼa hatatou fakatalitali ki te ʼaho ʼaia ʼaki he loto faʼa kātaki.

2. Koteā te ʼu fehuʼi ʼaē kā tou tali anai kiai ʼo ʼuhiga mo te kātaki fualoa?

² ʼE fakahā ʼi te Tohi-Tapu ʼe tonu ke tou kātaki fualoa. Ohagē ko te ʼu kaugana ʼa te ʼAtua ʼo te temi muʼa, ʼe tou maʼu anai te ʼu meʼa ʼaē neʼe fakapapau e te ʼAtua, mo kapau ʼe mālohi tatatou tui pea mo tou fakatalitali ʼaki he loto faʼa kātaki ki te temi ʼaē kā hoko anai te ʼu fakapapau ʼaia. (Lau ia Hepeleo 6:11, 12.) Ko Sehova ʼe kātaki fualoa. Neʼe kua feala pē hana pulihi te agakovi, kae ʼe fakatalitali ia ki te temi ʼaē ʼe lelei moʼo fai te faʼahi ʼaia. (Loma 9:20-24) He koʼē ʼe faʼa kātaki fualoa fēia? ʼE faifaitakiʼi feafeaʼi e Sesu te kātaki fualoa ʼo tana Tamai, pea mo ina tuku mai ai he faifaitaki? He koʼē ʼe lelei kiā tātou ke tou ako ke tou fakatalitali ʼaki he loto faʼa kātaki ohagē ko Sehova? Ko te tali ki te ʼu fehuʼi ʼaia ʼe tokoni mai anai ke tou kātaki fualoa pea mo mālohi ai tatatou tui, tatau aipē peʼe hagē kiā tātou ko Sehova ʼe fakatuatuai fau.

HE KO’Ē ʼE KĀTAKI FUALOA IA SEHOVA?

3, 4. (1) He koʼē ʼe kātaki fualoa ia Sehova? (2) ʼI te talagataʼa ʼo Atama mo Eva, koteā ʼaē neʼe fai e Sehova?

³ ʼE mole he tahi ʼe lahi age tana pule ʼi te ʼatulaulau iā Sehova, pea ʼe mole ʼaoga hana fakatalitali moʼo fakagata te ʼu faigataʼaʼia fuli. Kae ʼe ʼi ai te tupuʼaga lelei ʼo te kātaki fualoa ʼa Sehova. ʼI te agatuʼu ʼaē neʼe hoko ʼi Eteni, neʼe lagaʼi ai te ʼu fehuʼi maʼuhiga neʼe ʼaoga kiai he ʼu tali ke fua lelei ai kiā nātou fuli ʼi selō pea mo te kele. Neʼe ʼiloʼi e Sehova ʼe ʼaoga anai he temi loaloaga moʼo tali fakalelei ki te ʼu fehuʼi ʼaia, ko te tupuʼaga lā ʼaia ʼo tana kātaki fualoa. ʼI tana ʼiloʼi lelei te ʼu aga mo te ʼu manatu ʼo nātou fuli ʼaē ʼi selō pea mo te kele, ʼe mahino ia ʼe ina lolotoga fai te meʼa ʼaē ʼe lelei maʼa tātou.—Hep. 4:13.

⁴ Neʼe loto e Sehova ke fakafonu te kele e te hākoga ʼo Atama mo Eva. ʼI te temi ʼaē neʼe kākāʼi ai e Satana ia Eva, pea mo talagataʼa ai ia Atama, neʼe mole tuʼania te ʼAtua. Neʼe mole ina hoko fai pē he tonu peʼe ina liʼaki te tagata. Kae neʼe ina foimo fai he fakatuʼutuʼu moʼo fakahoko te meʼa ʼaē neʼe loto kiai maʼa te hahaʼi pea mo te kele. (Esa. 55:11) Neʼe fakahā e Sehova ia he toe loto lolomi pea mo kātaki fualoa, ʼo feala ai ke ina fakahoko tana fakatuʼutuʼu pea mo fakamoʼoni ai ʼe ko tana pule ʼaē ʼe lelei tokotahi ki te hahaʼi fuli. Neʼe kua fakatalitali pē lā talu mai taʼu e lauʼi afe moʼo fakahoko lelei ʼihi koga ʼo tana fakatuʼutuʼu ʼaia.

5. He koʼē ʼe lelei ke tou fakatalitali kiā Sehova?

⁵ Ko te tahi tupuʼaga ʼo te fakatalitali ʼa Sehova ʼaki he kātaki fualoa, heʼe ina loto ke lahi age te hahaʼi ʼaē kā natou maʼu te maʼuli heʼegata. ʼI te temi nei, ʼe ina lolotoga fai te ʼu meʼa ʼaē ʼe ʼaoga moʼo haofaki “he hahai kaugamalie osi,” peʼe ko te toe hahaʼi tokolahi. (Apk. 7:9, 14; 14:6) ʼAki tatatou fai fakamafola, ʼe fakaafe e Sehova te hahaʼi ke natou ako pe koteā tona Puleʼaga pea mo ʼana lēkula faitotonu. Ko te logo ʼo te Puleʼaga ʼe ko he “logo lelei” ki te hahaʼi. ʼI tona fakahagatonu, ʼe ko te logo pē ʼaia ʼaē ʼe lelei tokotahi! (Mat. 24:14) Ko nātou fuli ʼaē ʼe fakaafe e Sehova, ʼe natou liliu ʼo kau ki te kautahi fakamālamanei ʼaē ʼe maʼu ai he ʼu kaumeʼa moʼoni ʼe ʼoʼofa ki te faitotonu. (Soa. 6:44-47) ʼE fai e totatou ʼAtua ʼofa ia meʼa fuli ʼaia moʼo tokoni ki te hahaʼi ke natou maʼu tona ʼofa. ʼE ina toe filifili he ʼu hahaʼi ke natou kau ki tona Puleʼaga ʼaē ʼi selō. ʼI tanatou ʼolo ki selō, ʼe natou tokoni anai ki te hahaʼi fakalogo ʼi te kele ke natou liliu ʼo haohaoa pea mo maʼuli ʼo heʼegata. Koia, ʼi te fakatalitali ʼaia ʼa Sehova ʼaki he kātaki fualoa, ʼe gāue pē ia moʼo fakahoko ʼana fakapapau. Pea ʼe ina fai te ʼu gāue fuli ʼaia ke tou fiafia ai.

6. (1) Neʼe fakahā feafeaʼi e Sehova tana kātaki fualoa ʼi te temi ʼo Noe? (2) ʼE fakahā feafeaʼi e Sehova tana kātaki fualoa ʼi totatou temi?

⁶ ʼE kātaki fualoa ia Sehova logo aipē ʼe fai e ʼihi he ʼu aga fakalialia ʼe pātapāta ai kiā te ia. Ohagē lā, kotou fakakaukauʼi te meʼa ʼaē neʼe ina fakatotonu ke ina fai ʼo ʼuhiga mo te agakovi ʼaē neʼe hoko ʼi muʼa ʼo te Tulivio. Ko Sehova neʼe “mamahi osi tona loto” he neʼe fakafonu e te hahaʼi ia te kele ʼaki te ʼu aga heʼeʼaoga pea mo te agamālohi, pea neʼe holi pē nātou ki te ʼu meʼa ʼaē ʼe kovi. (Sen. 6:2-8) ʼE mahino ia, neʼe mole ina tuku ia ke hoholo atu te agakovi. Koia neʼe ina fakatotonu ai ke ina fakatō he Tulivio moʼo fakaʼauha te hahaʼi talagataʼa. ʼI te fakatalitali ʼaia ʼa Sehova, neʼe ina fai te ʼu meʼa ʼaē ʼe ʼaoga moʼo haofaki ia Noe pea mo tona fāmili. (1 Pet. 3:20) ʼI tona temi totonu, neʼe fakahā e Sehova kiā Noe ʼe ina fakatō anai he Tulivio pea neʼe ina fakatotonu ai kiā ia ke ina faʼu he ʼaleka. (Sen. 6:14-22) Pea neʼe loto e Sehova ke tala e Noe ki te hahaʼi te fakaʼauha ʼaē kā vave hoko. ʼE ʼui ʼi te Tohi-Tapu ko Noe neʼe ko “te tagata faiakonaki aena o te faitotonu.” (2 Pet. 2:5) Neʼe ʼui e Sesu ko totatou temi ʼe hagē pē ko te temi ʼo Noe. Kua fakakatofa e Sehova te temi ʼaē kā ina fakaʼauha anai te tuʼu agakovi ʼaenī, kae ʼe mole he tahi ʼe ina ʼiloʼi “te aho pea mo te hola” ʼaē kā hoko ai anai. (Mat. 24:36) Iā ʼaho nei, neʼe tuku mai e Sehova te gāue ʼaē ke tou fakatokaga ki te hahaʼi pea mo fakahā peʼe feafeaʼi hanatou hao.

7. ʼE fakatuatuai fau koa ia Sehova moʼo fakahoko ʼana fakapapau? Kotou fakamahino.

⁷ ʼE mahino ia ko te kātaki fualoa ʼa Sehova ʼe mole fakaʼuhiga ia ʼe fakatalitali pē ke fakalaka te temi. Pea ʼe mole tonu ʼi he temi ke tou manatu ʼe mole tokaga ia kiā tātou! Kae ʼe faigafua hatatou maʼu te manatu ʼaia mokā kua fakahaʼuhaʼu te mātutuʼa peʼe mokā tou maʼuli mamahi ʼi te tuʼu agakovi ʼaenī. ʼE lagi feala ke tou lotovaivai ai peʼe tou manatu ʼe fakatuatuai fau te ʼAtua moʼo fakahoko ʼana fakapapau. (Hep. 10:36) ʼAua naʼa galo kiā tātou ʼe ʼi ai te ʼu tupuʼaga lelei ke kātaki fualoa ai Sehova pea ʼe ina fakaʼaogaʼi te temi ʼaia ke fua lelei ki ʼana kaugana agatonu. (2 Pet. 2:3; 3:9) Tou vakaʼi ʼi te temi nei pe neʼe faifaitakiʼi feafeaʼi e Sesu te kātaki fualoa ʼo tana Tamai.

HE KO’Ē KO SESU ʼE KO HE FAIFAITAKI LELEI ʼO TE KĀTAKI FUALOA?

8. Ko te ʼu ʼaluʼaga fea ʼaē neʼe fakahā ai e Sesu te kātaki fualoa?

⁸ ʼE fai pē e Sesu te finegalo ʼo te ʼAtua pea ʼe ina fai te faʼahi ʼaia ʼaki he loto fiafia talu mai ni taʼu e lauʼi afe. ʼI te temi ʼaē neʼe agatuʼu ai Satana, neʼe fakatuʼutuʼu e Sehova ʼe hifo anai tona ʼAlo ki te kele ke liliu ko te Mēsia. Kotou fakakaukauʼi age muʼa te kātaki fualoa ʼa Sesu ʼi tana fakatalitali lolotoga taʼu e lauʼi afe ke hoko te ʼaho ʼaia. (Lau ia Kalate 4:4.) Lolotoga te ʼu taʼu ʼaia, neʼe mole fakaʼaoʼaoganoa ia. Kae neʼe maʼumaʼua ʼaupitō ʼi te gāue ʼaē neʼe foaki age e tana Tamai kiā te ia. Pea ʼi tana hifo mai ki te kele, neʼe mahino kiā te ia ʼe matehi anai ia ia e Satana, ohagē pē ko tona fakakikite. (Sen. 3:15; Mat. 16:21) Neʼe ina ʼūtakiʼi ʼona mamahi ʼo kaku ki tona mate he neʼe ina ʼiloʼi neʼe ko te finegalo ʼaia ʼo te ʼAtua. Neʼe mole manatu Sesu kiā ia totonu. Kae neʼe agavaivai ia pea neʼe lotolelei ke mamahi, logolā neʼe ko te ʼAlo ʼo te ʼAtua. Neʼe tuku e Sesu he faifaitaki lelei ʼo ʼuhiga mo te nofo agatonu ki te ʼAtua, pea ʼe tonu ke tou mulimuli ki tana faifaitaki.—Hep. 5:8, 9.

9, 10. (1) Koteā ʼaē ʼe fai e Sesu ʼi tana fakatalitali ʼaē ke fakaʼauha e te ʼAtua te tuʼu agakovi ʼa Satana? (2) ʼE tou lava faifaitakiʼi feafeaʼi te aga ʼa Sesu?

⁹ ʼI tona ʼosi fakatuʼuake, neʼe tuku age kiā Sesu te pule fuli ʼi te lagi mo te kele. (Mat. 28:18) ʼE ina fakaʼaogaʼi tuʼumaʼu pē te pule ʼaia moʼo fakahoko te fakatuʼutuʼu ʼa Sehova, pea ʼe gāue tuʼumaʼu pē ʼo mulimuli ki te temi ʼaē kua fakakatofa kiai e Sehova. Koia neʼe fakatalitali ʼaki he kātaki fualoa ʼi te toʼomataʼu ʼo te ʼAtua ʼo kaku ki te taʼu 1914. ʼI te taʼu ʼaia neʼe foaki e te ʼAtua kiā Sesu te pule ki ʼona fili. (Pes. 110:1, 2; Hep. 10:12, 13) Kua ovi mai pē te temi ʼaē kā ina fakaʼauha ai te tuʼu ʼa Satana. ʼI tana fakatalitali ki te temi ʼaia, ʼe tokoni Sesu ʼaki he kātaki fualoa ki te hahaʼi ke natou maʼu te ʼofa ʼo te ʼAtua pea mo ina taki nātou ki te ʼu “vai mauli.”—Apk. 7:17.

¹⁰ ʼE kotou mahino koa pe feafeaʼi hakotou faifaitakiʼi te aga ʼa Sesu? Neʼe mālama kiā te ia kua fakakatofa e Sehova he temi moʼo fakaʼauha ai te tuʼu ʼa Satana. ʼE mahino ia neʼe fakaʼamu lahi Sesu ke ina fakahoko lā te ʼu gāue ʼaē neʼe fakatuʼutuʼu kiai e tana Tamai. Kae neʼe lotolelei pē ke fakatalitali ki te temi ʼaē kua fakakatofa kiai e te ʼAtua. ʼI tatatou fakatalitali ki te fakaʼauha ʼo te tuʼu agakovi ʼa Satana, ʼe tonu ke tou kātaki fualoa. ʼE ʼaoga ke tou fakatalitali ki te temi ʼaē kā fakaʼauha ai e te ʼAtua te tuʼu ʼa Satana pea ke ʼaua naʼa tou fiu ʼi te fakatalitali mokā tou lotovaivai. Koteā ʼaē ʼe feala ke tou fai ke tou kātaki fualoa?

ʼE TOU LAVA FAIFAITAKIʼI FEAFEAʼI IA TE KĀTAKI FUALOA ʼO TE ʼATUA?

11. (1) Koteā te pikipikiga ʼo te kātaki fualoa pea mo te tui? (2) Koteā te tupuʼaga lelei ʼaē ʼe tou maʼu ke mālohi ai tatatou tui?

¹¹ ʼI muʼa ʼo te haʼu ʼa Sesu ki te kele, ko te kau polofetā pea mo te tahi atu ʼu kaugana agatonu neʼe natou fakahā, ʼaki tanatou faifaitaki, ʼe feala pē ki te hahaʼi heʼe haohaoa hanatou faʼa kātaki. Neʼe natou kātaki fualoa he neʼe natou maʼu te tui. (Lau ia Sakopo 5:10, 11.) Kapau neʼe mole natou tui ki te ʼu meʼa ʼaē neʼe fakapapau age e Sehova, pea neʼe mole feala ia hanatou fakatalitali ʼaki he kātaki fualoa ke hoko ʼana fakapapau. Kae neʼe natou kātakiʼi tuʼumaʼu pē he ʼu ʼaluʼaga faigataʼa ʼaupitō mo fakamataku, he neʼe natou tui ʼe fakahoko anai e te ʼAtua ʼana fakapapau. (Hep. 11:13, 35-40) ʼE fakahā ʼi te Tohi-Tapu ʼe ʼi ai te tahi age tupuʼaga ʼe tou maʼu iā ʼaho nei ke tou tui mālohi ai. Ko te kua liliu ʼa Sesu ko “Ia ʼaē ʼe ina fakakātoa tatatou tui.” (Hep. 12:2, MN) Neʼe ina fakahoko te ʼatu lea fakapolofetā pea mo tokoni mai ke tou mahino lelei age ki te ʼu fakatuʼutuʼu ʼa te ʼAtua.

12. Koteā ʼaē ʼe feala ke tou fai ke mālohi age tatatou tui?

¹² Koteā ʼaē ʼe feala ke tou fai ke mālohi age tatatou tui, pea ke feala ai hatatou kātaki fualoa? ʼE maʼuhiga ke tou mulimuli ki te ʼu fakatotonu ʼa te ʼAtua. Ohagē lā, kotou fakakaukauʼi pe koʼē ʼe tonu ke kotou fakamuʼamuʼa ia te Puleʼaga ʼi tokotou maʼuli. ʼE feala koa ke lahi age ʼakotou faiga moʼo mulimuli ki te fakatotonu ʼaē ʼe tuʼu iā Mateo 6:33? ʼE lagi feala ke kotou hikihiki age tokotou temi fai fakamafola peʼe fai he ʼu fetogi moʼo fakafaigafua tokotou maʼuli. Neʼe tapuakina e Sehova te ʼu faiga ʼaē neʼe kotou fai ʼo kaku ki te temi nei moʼo mulimuli ki ʼana fakatotonu. Neʼe lagi kua ina foaki atu he ako Tohi-Tapu foʼou pe neʼe tokoni atu ke kotou maʼu “te tokalelei o te Atua, ae e fakalaka age i te u atamai fuli.” (Lau ia Filipe 4:7.) Kā kotou fakakaukauʼi ia te ʼu tapuakina ʼaia neʼe kotou maʼu, pea ʼe kotou mahino anai ʼe lelei ke kotou kātaki fualoa.—Pes. 34:9.

13. Koteā te fakatā ʼe feala ke tou fakaʼaogaʼi moʼo fakahā te pikipikiga ʼo te kātaki fualoa pea mo te tui?

¹³ ʼE feala ʼaki te fakatā ʼaenī ke tou mahino ki te pikipikiga ʼo te kātaki fualoa pea mo te tui. Ko he tagata gāue kele ʼe ina tō, mo huo pea mo utu. ʼI te temi fuli pē ʼaē ʼe lahi ai tana utu te ʼufi, ʼe toe lahi age tana falala mokā ina toe tō te ʼu pulapula. ʼE lagi toe lahi age te ʼu gāueʼaga ʼaē kā ina tō ai tana pulapula. ʼE ina tō te pulapula kae ʼe ina ʼiloʼi ʼe tonu pē anai ke fakatalitali ʼaki he kātaki fualoa ki te temi utu ʼo te ʼufi. Kae ʼe falala ia ʼe ina utu pē anai. ʼO toe fēia, kā tou ʼiloʼi te ʼu fakatotonu ʼa te ʼAtua, mo mulimuli kiai, pea mo tou sio ki ʼona fua, pea ʼe toe tuputupu ai tatatou falala pea mo tatatou tui kiā Sehova. ʼE faigafua age leva hatatou kātaki fualoa pea mo fakatalitali ki te ʼu tapuakina ʼaē ʼe tou ʼiloʼi kā hoko mai anai.—Lau ia Sakopo 5:7, 8.

14, 15. ʼE tonu ke feafeaʼi tatatou manatu ʼo ʼuhiga mo te ʼu mamahi ʼi te mālamanei?

¹⁴ Ko te tahi meʼa ʼe feala ke tou fai ke lahi age tatatou kātaki fualoa, ʼe ko te faiga ʼaē ke tou manatu ohagē ko Sehova ʼo ʼuhiga mo te mālamanei pea mo ʼotatou ʼaluʼaga. Ohagē lā, kotou fakakaukauʼi pe koteā ʼaē ʼe logoʼi e Sehova ʼo ʼuhiga mo te ʼu mamahi ʼi te mālamanei. Talu mai fualoa, ʼe sio Sehova ki te maʼuli mamahi ʼa te hahaʼi, pea ʼe lotomamahi ai. Logolā tana lotomamahi ʼaia kae neʼe ina fai pē he meʼa ʼe lelei, ʼaki tana fekauʼi mai tona ʼAlo ke ina “maumaui te u gaue a te tiapolo” pea mo pulihi te ʼu mamahi fuli ʼaē neʼe fakatupu e Satana ʼi te mālamanei. (1 Soa. 3:8) Kua vave hoko mai pē te haga ʼaē ʼa te ʼAtua ʼo fakagata ʼo talu ai ia te ʼu mamahi fuli pē. Koia ʼe mole vaivai anai tatatou tui ʼuhi ko tatatou sio ki te ʼu mamahi ʼi te mālamanei. ʼE mole tou fiu anai ʼi te fakatalitali ki te temi ʼaē kā fakaʼauha ai e Sehova te tuʼu ʼa Satana. Tou tui ki te ʼu fakapapau ʼa te ʼAtua. Kua fakakatofa e Sehova te temi ʼaē kā ina pulihi ai te agakovi, pea ʼe ina fakahoko anai ʼi tona temi totonu.—Esa. 46:13; Nau. 1:9.

¹⁵ ʼI te ʼu ʼaho fakamuli mo faigataʼa ʼaenī, ʼe lagi tonu ke tou kātakiʼi he ʼu ʼaluʼaga faigataʼa ʼe ʼahiʼahiʼi ai tatatou tui. ʼE lagi ko tātou peʼe ko nātou ʼaē ʼe tou ʼoʼofa ai ʼaē ʼe mamahi ʼuhi ko te agamālohi peʼe ko te tahi age ʼu tupuʼaga. ʼE mole tonu ke tou ʼiʼita ʼo tou fia fakatonutonuʼi te ʼu ʼaluʼaga ʼaia, kae ʼe ʼaoga ke tou falala kātoa kiā Sehova. ʼE tou agahala, koia ʼe mole faigafua hatatou fai te faʼahi ʼaia. Kae tou manatuʼi te meʼa ʼaē neʼe fai e Sesu, ohagē ko tona ʼui iā Mateo 26:39.—Lau.

16. ʼI tatatou fakatalitali ki te hoko mai ʼo te fakaʼosi, koteā ʼaē ʼe mole tonu ke tou fai?

¹⁶ Ko he tahi ʼe mole kei faʼa tui kua ovi mai te fakaʼosi, ʼe feala ke ina maʼu he manatu ʼe mole lelei. ʼE lagi manatu anai ʼe tonu ke ina fai e ia totonu he ʼu fakatuʼutuʼu, naʼa mole hoko te ʼu fakapapau ʼa Sehova. ʼE lagi manatu fēnei: “ ʼE au nofo muʼa ʼo fakatalitali ke au sio peʼe fakahoko moʼoni e Sehova ʼana fakapapau.” Ko ia ʼaē ʼe manatu fēia ʼe faigataʼa anai kiā ia hana kātaki fualoa. ʼE lagi liliu anai ʼo fia maʼu tuʼulaga ʼi te mālamanei, peʼe falala ki te paʼaga pea ʼe mole kei ina fakamuʼamuʼa te Puleʼaga ʼo te ʼAtua. Peʼe lagi fia hoko atu tana ako ʼi te ʼu faleako lalahi ke feala hana maʼu he maʼuli fīmālie ʼi te temi nei. Kae ʼe ko te fakaʼiloga ʼaia ʼo tana mole kei tui. Tou manatuʼi, neʼe ʼui e Paulo ke tou faifaitakiʼi nātou ʼaē “nee tui mo kataki fualoa,” pea neʼe natou maʼu ai te ʼu tapuakina ʼaē neʼe fakapapau e Sehova. (Hep. 6:12) Kua fakatotonu e Sehova ke ina fakaʼauha te mālama agakovi ʼaenī, pea ʼe mole tauhala anai ia. (Hap. 2:3) ʼO fakatalitali ki te temi ʼaia, ʼe mole tonu ke tou fakaʼaoʼaoganoa ʼi te tauhi ʼaē kiā Sehova. Kae ʼe tonu ke tou manatuʼi ʼe tou māʼuʼuli ʼi te ʼu ʼaho fakamuli, pea ʼe tonu ke lahi age tatatou gāue ʼi te fai fakamafola. ʼE feala ke tou maʼu ʼi te temi nei he toe fiafia lahi ʼi tatatou fai te gāue ʼaia.—Luka 21:36.

KOTEĀ TE ʼU TAPUAKINA ʼE TOU MAʼU MOKĀ TOU KĀTAKI FUALOA?

17, 18. (1) Koteā te faigamālie ʼe tou maʼu ʼi tatatou fakatalitali ʼaki he kātaki fualoa? (2) Kapau ʼe tou kātaki fualoa, koteā te ʼu tapuakina ʼaē kā tou maʼu anai?

¹⁷ Tatau aipē peʼe mole heʼeki faʼa fualoa peʼe kua lauʼi taʼu tatatou tauhi kiā Sehova, kae ʼe tou fia tauhi kiā te ia ʼo talu ai. Kapau ʼe tou kātaki fualoa, pea ʼe feala anai hatatou kātaki ʼo kaku ki te fakaʼosi ʼo te tuʼu ʼaenī, tatau aipē te temi ʼaē ʼe kei toe ke tou fakatalitali ai. ʼE foaki mai e Sehova ʼi te temi nei te faigamālie ʼaē ke tou fakahā ʼe tou falala kātoa ki ʼana fakatotonu, pea ʼe tou nonofo agatonu anai kiā te ia māʼia mokā tou tau mo he ʼu mamahi. (1 Pet. 4:13, 14) ʼE toe akoako tātou e te ʼAtua ke feala hatatou faʼa kātaki ʼo kaku ki te fakaʼosi pea ke haofaki ai tātou.—1 Pet. 5:10.

¹⁸ Kua maʼu e Sesu te pule ʼi te lagi mo te kele, pea ʼe feala pē ke ina puipui koutou mo kapau ʼe kotou nonofo agatonu. (Soa. 10:28, 29) ʼE mole ʼaoga ke tou mātataku ʼo ʼuhiga mo te kā haʼu peʼe ki te mate. Ko nātou ʼaē ʼe faʼa kātaki ʼo kaku ki te fakaʼosi, ʼe haofaki anai nātou. Koia, tou tōkakaga ke mole fetogi e te mālama ʼatatou manatu, ʼo mole kei tou falala ai kiā Sehova. Kae ʼi te temi ʼaenī ʼaē ʼe fakahā ai e Sehova tana kātaki fualoa, ʼe tonu ke tou faiga ke mālohi age tatatou tui pea mo fakaʼaogaʼi fakapotopoto totatou temi.—Mat. 24:13; lau ia 2 Petelo 3:17, 18.

[Paki ʼo te pāsina 21]

Kapau ʼe kotou kātaki fualoa, pea ʼe feala anai hakotou fakamuʼamuʼa te Puleʼaga ʼo te ʼAtua pea mo kotou maʼu he ʼu tapuakina!