ʼE ʼIloga ʼi Tatatou Minisitelio Ia Te Faʼa Kātaki
1. ʼE feafeaʼi koa te fakahā te faʼa kātaki ʼa Sehova ki te tagata?
1 Neʼe faʼa kātaki ʼaupitō te ʼAtua ʼi tana ʼu felōgoi mo te tagata.(Eke. 34:6; Pes. 106:41-45; 2 Pet. 3:9) Ko te faʼifaʼitaki tāfito ʼo tana faʼa kātaki ʼe hā lelei ʼi te mālamanei kātoa ʼi te gāue fai fakamafola. Ko te gāue ʼa Sehova ki te mālamanei kua teitei taʼu e 2 000, pea kei hoko atu pe nei tana taki mai te hahaʼi ʼaē ʼe fakamālotoloto ki te ia. (Soa. 6:44) ʼE feafeaʼi koa ʼi tatatou minisitelio hatatou faʼifaʼitakiʼi te faʼa kātaki ʼa Sehova?
2. ʼE feafeaʼi koa haku fakahā taku faʼa kātaki ʼi taku gāueʼi taku telituale?
2 ʼI Te Fai Fakamafola ʼi Te ʼu ʼApi: ʼE tou faʼifaʼitakiʼi te faʼa kātaki ʼa Sehova ʼi totatou haga fai fakamafola ʼi te ʼu koga meʼa ʼaē ʼe mole fakahā mai e te hahaʼi hanatou fia logo. (Gāue 5:42) ʼE tou faʼa kātakiʼi ʼi te mole fia logo ʼa te hahaʼi, te meʼa noaʼi pea mo te fakafeagai ki tatatou gāue fakaminisitelio. (Mko. 13:12, 13) ʼE tou toe fia fakahā te faʼa kātaki ʼi totatou faiga tuʼumaʼu ke tō te pulapula ʼo te moʼoni, mokā hoko mai he faigataʼa ʼi te mole maʼu atu nātou ki tonatou ʼu ʼapi.
3. He koʼē koa ʼe ʼaoga te faʼa kātaki ʼi tatatou toe liliu ʼo ʼaʼahi te hahaʼi pea mo tatatou fai te ʼu ako Tohi-Tapu?
3 ʼI Te ʼu Ako Tohi-Tapu: ʼI te homo māmālie ake ʼo he fuʼu ʼakau, ʼe ʼaoga kiā tātou ia te faʼa kātaki. ʼE feala ke tou tokaga kiai kae ʼe mole feala hatatou fakahomo vave tana tupu. (Sake 5:7) ʼO toe fēia aipē mo te tuputupu fakalaumālie, ʼe faifai māmālie pē, ʼo mulimuli ki tana tupu. (Mko. 4:28) ʼE feala ke faigataʼa kiā nātou ʼaē ʼe natou lolotoga ako te Tohi-Tapu ia te liʼaki ʼo tanatou tauhi hala peʼe mo tonatou ʼu agaʼi fenua. ʼE mole tou fakaviliviliʼi anai ia nātou ʼaē ʼe ako ke natou fai ni ʼu fetogi. ʼE ʼaoga te faʼa kātaki moʼo tuku he temi feʼauga ke feala ki te laumālie ʼo te ʼAtua tana gāueʼi te loto ʼo ia ʼaē ʼe ako.—1 Ko. 3:6, 7.
4. ʼE tokoni feafeaʼi mai te faʼa kātaki ke tou fagonogono lelei ki totatou ʼu kāiga ʼaē ʼe mole tauhi tahi mo tātou?
4 ʼI Tatatou ʼu Felōgoi Mo Totatou ʼu Kāiga ʼAē ʼe Mole Tauhi Tahi Mo Tātou: Logolā pe lā ʼe tou loto mālohi ke akoʼi te moʼoni ki totatou ʼu kāiga, kae ʼe tonu ke tou faʼa kātaki ʼo tou fakatalitali ki tona temi totonu ke tou palalau ki tatatou tui kiā nātou. Tou tōkakaga naʼa lahi faʼu te ʼu fakamatala ʼaē ʼe tou fai age. (Tnk. 3:1, 7) Lolotoga te temi ʼaia, ʼe tou tuku anai he faʼifaʼitaki lelei, mo nofo teuteu ke tou palalau ʼo ʼuhiga mo tatatou tui ʼaki he agamalū pea mo he fakaʼapaʼapa lahi. (1 Pet. 3:1, 15) ʼI tona fakahagatonu, ko te minisitelio ʼaē ʼe ʼiloga ai te faʼa kātaki ʼe fua lelei anai pea mo leleiʼia ai anai e tatatou Tamai ʼaē ʼe ʼi selō.