ʼE Koutou Fai Koa Hakotou Ako Takitokotahi?

KO HE kaugana ʼa te ʼAtua ʼe fakamalotoloto, ʼe fiafia anai ʼi hana fakaʼaogaʼi ʼo hona temi loaloaga ki te ako takitokotahi ʼo te Tohi-Tapu. (Pesalemo 1:1, 2) Kae, ʼi tanatou logoʼi ʼaē ʼe lahi te ʼu meʼa ʼe fakamaʼua kiai tonatou temi pea mo tonatou mālohi, ʼe mata faigataʼa ki te tokolahi te fakaʼaogaʼi ʼo te temi pea mo te mālohi ʼaē ʼe nātou loto kiai moʼo fai ʼo hanatou ako takitokotahi.

Kae, ke feala hatatou liliu ko ni ʼu kaugana mālohi ʼa te ʼAtua, ʼe tonu ke tou fakafoʼou ʼi te ʼaho fuli pe tatatou fiafia pea mo totatou mālohi ʼaki he ʼu manatu foʼou peʼe loloto, ʼo ʼuhiga mo te moʼoni ʼe haʼu mai te Folafola ʼa te ʼAtua. Ko te ʼu moʼoni faka Tohi-Tapu ʼaē neʼe nātou uga koutou ki muʼa atu ʼe mole kei feiā tanatou uga ʼo koutou ʼi te temi nei. Koia, ʼe lelei, pea mo maʼuhiga ʼaupito, ke tou faiga fakamalotoloto ke tou maʼu he fakasiosio loloto pea mo foʼou ʼo ʼuhiga mo te moʼoni, ke feala ai hatatou nonofo mālohi ʼi te faʼahi fakalaumālie.

Neʼe lava feafeaʼi ki te hahaʼi tui ʼo te ʼu temi ʼāfea, ʼo hanatou nonofo mālohi ʼi te faʼahi fakalaumālie ʼaki tanatou ako takitokotahi ia te Folafola ʼa te ʼAtua? E feafeaʼi te haga ʼa ʼihi kaugana ʼa Sehova ʼo totatou temi ʼo hikihiki te fiafia pea mo te fua manuʼia ʼo tanatou ako? Neʼe feafeaʼi te tapuakina ʼo tanatou ʼu faiga?

Neʼe Nātou Fakafoʼou Tonatou Mālohi ʼAki Te Ako Takitokotahi

Neʼe ʼāsili age te mālohi ʼo te Hau ʼo Suta ko Sosiasi, ʼi te tauʼi ʼaē ʼo te tauhi tamapua, ʼi te ʼosi lau age ʼaē ki ai ‘te tohi ʼo te ʼu lao ʼa Sehova ʼaē neʼe tohi e Moisese.’ ʼE mahino papau ia neʼe mole ko he meʼa foʼou kia ia te koga tohi ʼaia ʼo te Folafola ʼa te ʼAtua; kae ko tana fagono ʼaē ki te logo ʼe haʼu totonu mai te tohi olisinale, ʼaē neʼe ina uga ia ia ʼi tana tau ʼaē ʼo ʼuhiga mo te tauhi maʼa.—2 Fakamatala 34:14-19.

Neʼe ʼiloʼi e te polofeta ko Taniela ‘te ʼu taʼu ʼaē neʼe tonu ai ke fakahoko te ʼu fakaʼauha ʼo Selusalemi pea ʼe mahino papau ia neʼe mole ina ʼiloʼi ʼaki pe te tohi ʼo Selemia, kae neʼe ina toe ʼiloʼi foki ʼaki “te ʼu tohi.” ʼE mahino ia neʼe kau kiai te tohi ʼo Levitike (26:34, 35), te tohi ʼa Isaia (44:26-28), te tohi ʼa Osea (14:4-7), pea mo te tohi ʼa Amosi (9:13-15). Ko te meʼa ʼaē neʼe ina fakamoʼoni kiai ʼi tana ako fakatepitepi te ʼu tohi ʼo te Folafola ʼa te ʼAtua, neʼe ina taki te tagata aga lotu ʼaia ke fakaōviōvi ki te ʼAtua ʼaki he ʼu faikole ʼe loloto. Ki muli age ko tana kole maʼuhiga ʼaia neʼe tali ʼaki te fakahā age ki ai te ʼu meʼa fakaloto mālohi ʼo ʼuhiga mo Selusalemi pea mo tana hahaʼi.—Taniela, kapite 9.

Ko Sosiasi, ʼaē neʼe ina fai “te meʼa ʼaē neʼe matatonu kia mata ʼa Sehova,” pea mo Taniela, ʼaē neʼe “leleiʼia” e te ʼAtua, neʼe mole nā kehekehe mo tatou ʼi te temi ʼaenī. (2 Hau 22:2; Taniela 9:23) Ko tanā ʼu faiga takitokotahi, ʼaē neʼe nā fakaʼaogaʼi moʼo akoʼi ʼo te ʼu tohi ʼo te Tohi-Tapu ʼaē neʼe kua maʼu ʼi te temi ʼaia, neʼe ʼāsili ʼaki ai tanā mālohi ʼi te faʼahi fakalaumālie pea neʼe tokoni kia nāua ke nā taupau maʼu he ʼu felogoi mālohi mo te ʼAtua. Ko te meʼa ʼaia ʼe toe feala pe hona faka ʼuhiga ki te tahi age ʼu kaugana ʼa Sehova ʼo te temi ʼaē, ohage la ko Sefeteo mo te tagata fai pesalemo ʼo te ʼapi ʼo Asafe, peʼe ko Nehemia, pea mo Etieni. Ko nātou fuli ʼaia neʼe nātou fakahā ʼaki ni ʼu fakamoʼoni tanatou ako fakalelei takitokotahi te koga ʼo te Tohi-Tapu ʼaē neʼe kua maʼu ʼi tonatou temi.—Kau Fakamāu 11:14-27; Pesalemo 79, 80; Nehemia 1:8-10; 8:9-12; 13:29-31; Gāue 6:15-7:53.

Tou Tuku Te Minisitelio Ke Ina Uga Tatou

Tokolahi ʼi te ʼu kaugana ʼa Sehova ʼo totatou temi ʼaē neʼe nātou tauhi ki ai lolotoga he temi loaloaga, ʼe nātou tahi nofo mo tana polokalama ki te ako takitokotahi ʼo te Tohi-Tapu. Ki te manatu ʼa te ʼu kaugana ʼaia ʼe maʼuhiga ʼaupito te faʼahi ʼaia ki te nofo fakaonoono pea mo te fakahoko katoa ʼo tanatou ʼu maʼua faka Kilisitiano. Kae ʼi te faʼahi ʼaia, ʼe ʼui e te tokolahi ia nātou ʼaia ʼe mole ko he meʼa faigafua tuʼumaʼu te vahevahe fakalelei ʼo tonatou temi ʼo tatau aipe mo tonatou mālohi ki te ako pea mo te tahi ʼu meʼa ʼaē ʼe mole ʼaoga ke meʼa noaʼi.

Koia, mai tona ʼaluʼaga ʼaē ko te faka mafola ʼo te Puleʼaga ki te malamanei katoa kua fakaʼau ki tona fakaʼosi, ko te nofo fakaonoono ʼi te faʼahi fakalaumālie ʼaki he ako fakatepitepi, ʼe maʼuhiga ʼaupito moʼo foaki te ʼu meʼa ʼaē ʼe ʼaoga ʼi te minisitelio faka Kilisitiano. Ko nātou ʼaē ʼe nātou maʼu he ʼatamai ʼe foʼou pea mo loloto ʼo ʼuhiga mo te Folafola ʼa te ʼAtua ʼe feala hanatou tauʼi te faigataʼaʼia ʼaē ko te fakatupu ʼo he fia logo ia nātou ʼaē ʼe pakupaku ʼi te faʼahi fakalaumālie. ʼE moʼoni te faʼahi ʼaia, ʼo tatau aipe peʼe hinoʼi he tahi ki he fenua ʼe ikaʼia ʼi te faʼahi fakalaumālie ʼo toe feiā pea mo ia ʼaē ʼe haga fai ʼi he ʼu telituale kua lahi tona gāueʼi kae ʼe mālohi ʼi ai te lotonoa.

Ke Koutou Kai Tuʼumaʼu Ki Te Folafola ʼa Te ʼAtua

Ko te ʼu meʼa ʼaē ʼe fai e ʼihi, ʼe feala ke tokoni atu kia koutou peʼe lava feafeaʼi anai hakotou fakaʼāsili age te fiafia ʼi takotou ako māhani peʼe feafeaʼi anai he fakaʼaogaʼi ʼo te temi ʼo te ako ke fua manuʼia kia koutou mo tokotou famili? Ko te lau tuʼumaʼu ʼo te Tohi-Tapu ʼe kau ki te ʼu meʼa ʼaē ʼe mole fia tōtō ai anai te kaugana ʼa te ʼAtua. Ko te tokolahi neʼe nātou fakatuʼutuʼu ʼo ʼuhiga mo tanatou lau tuʼumaʼu ia te Tohi-Tapu ke nātou lau he ʼu kapite e tolu peʼe fā ʼi te vāhaʼa fuli. ʼE koutou fia lau koa te Tohi-Tapu katoa ʼi he taʼu e tahi? Pea koia ʼe koutou fiafia anai ʼi te hikihiki age ʼo te temi ʼaē ʼe koutou lau ai te tohi ʼaia, ʼe feala hakotou fai he vaeluaʼi hola ʼi te ʼaho fuli.

Neʼe kua fakalaka koa ʼi te tuʼa tahi takotou lau te Tohi-Tapu katoa? He koʼe ʼe mole koutou fai he fakatuʼutuʼu foʼou ke koutou toe lau ʼi hakotou tahi age fai? Moʼo fetogi, ko te fafine kua ʼohoana neʼe ina lau te ʼu tohi ʼo te Tohi-Tapu ʼo mulimuli ki te fakahoahoa ʼaē neʼe tohi ʼaki. Neʼe lahi te ʼu faʼahi neʼe ina fakamaʼumaʼu, ʼi te fakaʼaluʼalu ʼo te ʼu hisitolia ʼaia, mai tona ʼaluʼaga ʼaē, ki muʼa atu neʼe mole ina fakatokagaʼi te ʼu faʼahi ʼaia ʼe mulimuli ki te ʼu meʼa lalahi ʼaē neʼe hoko ʼi te hoholo mai ʼo te temi. Lolotoga te ʼu taʼu e nima ʼaenī kua hili, ko te tahi fafine kua ʼohoana neʼe ina lau tuʼa nima te Tohi-Tapu katoa, pea ʼi te temi fuli pe neʼe ina fai ʼaki he fakatuʼutuʼu kehekehe. ʼI tana ʼuluaki lau, neʼe ina lau hoholo mai te tohi ʼo te Senesi ki te tohi ʼo te Fakahā. ʼI te lua, neʼe ina tohi fakanounou te ʼu manatu tāfito ʼo te ʼu kapite fuli ki te laini e tahi peʼe lua ʼo te kiʼi kaupepa. ʼI te tolu taʼu, neʼe ina fakaʼaogaʼi te Tohi-Tapu ʼaē ʼe lalahi age tana ʼu mataʼi tohi, pea ʼi tana ʼuluaki lau neʼe ina fakasiosio te ʼu vaega ʼaē hinoʼi ʼi te kolona ʼaē ʼe tuʼu ʼi te lotomalie ʼo te pasina pea ʼosi ʼaia pea ʼi tana tahi age lau ʼo te Tohi-Tapu pe ʼaia neʼe ina fakatokagaʼi lelei te ʼu meʼa ʼaē ʼe tuʼu ʼi lalo ʼo te pasina pea mo te ʼu meʼa ʼaē ʼe fakamatala ʼi te ʼu nota fakaʼosi ʼo te Tohi-Tapu. ʼI te tuʼa nima neʼe ina fakaʼaogaʼi te ʼu mape ʼo te Tohi-Tapu moʼo hikihiki tana mahino ʼaē ki te faʼahi ʼaē ʼo te seokalafia. Neʼe ina ʼui fēnei: “Kia ʼau ko te lau ʼo te Tohi-Tapu neʼe liliu ia ko meʼa fakatupu fiafia ohage ko he meʼa kai.”

Ki te manatu ʼa te kau ako mālohi ʼo te Tohi-Tapu, ʼe ko he meʼa lelei hanatou fakaʼaogaʼi he Tohi-Tapu ke ʼāteaina pe ki tanatou ako takitokotahi, ke feala ai hanatou tohi fakanounou ia tafa ʼo te ʼu pasina te ʼu manatu ʼaē ʼe maʼuhiga, mo te ʼu lea fakatātā ʼaē ʼe loloto tanatou ʼu manatu, peʼe ko te ʼu pasina ʼo te tahi ʼu tohi ʼe feala ke nātou fakaʼaogaʼi ki muli age. Ki te pionie katoa, ʼe ko he meʼa fakatupu fiafia kia ia ʼi te fakaʼosi ʼo te māhina hana tohi ʼi tana kaupepa ako te ʼu puani foʼou ʼaē neʼe ina akoʼi ʼi te lolotoga ʼo te māhina. ʼE ina ʼui fēnei, “ko taku fakasiosio ʼaē ki toku ʼu hola maʼuhiga ʼaia, ʼe tokoni mai kia ʼau ke feala haku fakahoko he tahi fakatuʼutuʼu ʼi te māhina ʼaē ʼe ʼamanaki hoko mai.”

Ko Ni ʼu Manatu Fakapotopoto

Ko takotou polokalama, ʼe hage koa kia koutou ʼe fonu pe ia ʼi te ʼu meʼa ʼaē ʼe ʼaoga ki te maʼuli fakasino ʼo te ʼaho fuli pe, pea ʼe koutou fakafuafua koa ʼe ʼaoga anai kia koutou he ʼu tokoni ʼo ʼuhiga mo te fakaʼaogaʼi lelei ʼo tokotou temi? Koia, koutou feʼāveʼaki mo koutou te meʼa ʼaē neʼe koutou fakatuʼutuʼu ke koutou lau, pea mo koutou fakaʼaogaʼi tokotou ʼu temi mālōlō. ʼI fale peʼe ʼi te koga meʼa ʼaē ʼe koutou ako māhani ai, kapau ʼe feala, koutou fakatokatoka takotou ʼu tohi pea mo te ʼu meʼa gāue ʼaē ʼe koutou fakaʼaogaʼi ki takotou ako ke faigafua hakotou maʼu. Koutou teuteuʼi te faʼahi ʼaē ʼe koutou ako ai ke matalelei, kae ke ʼaua leva naʼa liliu ko hakotou kiʼi koga fale moe. ʼE ʼi ai koa hakotou akonaki neʼe hinoʼi atu? Koutou kamata lau mokā maʼu hokotou temi faigamālie, pea ke koutou tuku ke haʼu tokotahi te ʼu manatu kia koutou ʼi te temi ʼaē ʼe koutou mālōlō ai peʼe ʼi te temi ʼaē ʼe koutou lolotoga fai ai he tahi age ʼu meʼa.

Ko ʼihi ʼe feala ke nātou tokoni atu ki te fakaʼaogaʼi fakalelei ʼo te temi ke fua manuʼia kia koutou fuli. Ohage la, ʼe feala ki he tahi ke ina lau fakalelei pea lau leʼolahi atu te ʼu alatike, kae koutou lolotoga fai te ʼu gāue māhani ʼo te loto fale peʼe koutou lolotoga teuteuʼi he tī ki te tagata peʼe ko te fafine agalelei ʼaē lautohi maʼa koutou. He koʼe ʼe mole felogoi fuli te loto fale ki he temi ʼe mole tonu anai ke toe logoaʼa he tahi ʼuhi ko te ako takitokotahi? “Koteā koa ʼaē neʼe koutou lau fakamuli?” ʼI ʼihi temi ʼe feala ke koutou fakaʼaogaʼi te ʼu meʼa ʼaē neʼe ako e tokotou ʼu kaumeʼa ʼaki hakotou lagaʼi he fai palalau.

ʼE koutou fia fakahū koa he ʼu manatu foʼou ki takotou polokalama ako? ʼE feala ke koutou fakatuʼutuʼu te temi ʼaē ʼe ka koutou fakaʼaogaʼi ki te ako, ke hage pe ko te temi ʼaē ʼe fakaʼaogaʼi e te tokolahi moʼo fagonogono ʼo te Tohi-Tapu ki niʼihi. Ko te pionie katoa ʼe fiafia ʼi tana sio ʼaē ʼe fakaōvi ke katoa tana fakatuʼutuʼu ʼo ʼuhiga pea mo te ʼu hola ʼe tonu ke ina fakaʼaogaʼi, ʼi te māhina fuli pe ki tana ako takitokotahi. Ko ʼihi ʼe nātou faka tuʼakoi tanatou temi sio televisio, pea ʼaki te faʼahiga fai ʼaia ʼe nātou taupau lelei tonatou temi ako. Ko ʼihi ʼe nātou fili he manatu tāfito ke nātou akoʼi, ʼo hoholo aipe tanatou akoʼi te manatu ʼaia lolotoga he temi, ohage la ko te ʼu fua ʼo te laumālie, te kupu tāfito ʼa te Tohi-Tapu, peʼe ko te faiva ʼaē ʼi te fai akonaki. Ko ʼihi ʼe nātou leleiʼia te tohi ʼo he ʼu lisi ʼo te ʼu meʼa ʼaē neʼe hoholo mai ʼi te temi, ohage la ko he ʼu lisi ʼe talanoa ki te ʼu hau ʼo Iselaele pea mo te ʼu polofetaa ʼo te temi ʼaia peʼe ko te tohi ʼo te ʼu Gāue ʼa te kau ʼapositolo pea mo te ʼu tohi ʼaē ʼa Paulo.

Kau tūpulaga, ʼe koutou loto koa ki he tui ʼe mālohi age? He koʼe koa ʼe mole koutou fili he tohi ke koutou akoʼi lolotoga tokotou ʼu temi mālōlō? Ko te finemui kua papitema ʼe ako ʼi te ʼu faleako lalahi neʼe ina fili te tohi ʼaē neʼe tā e te Sosiete Watch Tower ʼaē ko te L’humanité à la recherche de Dieu. Neʼe ina tohi fakanounou ʼi te kaupepa te ʼu meʼa fuli ʼaē neʼe ina akoʼi ʼi te ʼu kapite ʼo te tohi ʼaia. Neʼe ko he meʼa faigataʼa ia pea neʼe loaloaga age te temi ʼaē neʼe ina fakaʼaogaʼi ki te faʼahi ʼaia ʼi te temi ʼaē neʼe ina fakatuʼutuʼu kiai. Kae, ʼi tana ʼosi lau te tohi katoa, neʼe ʼofolele ʼosi ʼi te moʼoni ʼo te logo ʼaē ʼe haʼu mai te Tohi-Tapu.

Ke Lahi Takotou Fia Ako

E lahi te ʼu kaugana agatonu ʼa Sehova ʼo totatou temi ʼe nātou “faʼa gāue ʼi te ʼAliki.” (1 Kolonito 15:58) Tatau aipe ʼaki he polokalama foʼou pea mo he ʼu faiga fakamalotoloto, ko te ʼu meʼa ʼaē ʼe koutou fai māhani ʼi te vāhaʼa fuli ʼe mole lahi anai tanatou fetogi. Kae, ko takotou faiga mālohi ʼaē ke ʼāsili age takotou mahino ki te moʼoni pea mo lesili age takotou nofo fakaonoono ʼo mulimuli ki te lolotoga hoko ʼo te finegalo ʼo te ʼAtua, ʼe tokoni atu anai ke koutou hikihiki te ʼaluʼaga ʼo takotou ʼu ako māhani.

ʼE ko he meʼa fakaloto mālohi te fagono ki te ʼu tapuakina ʼaē neʼe maʼu e nātou ʼaē neʼe nātou hikihiki tanatou ʼu ako māhani. Ko te Kilisitiano ʼi tana sio ʼaē neʼe mole kei tatau tana faiga ʼaē ke loloto tana mahino ki te moʼoni, neʼe ina fai tana fakatuʼutuʼu ke lahi age ai tana fakaʼaogaʼi tona ʼu temi faigamālie ki te ako takitokotahi. ʼO ina ʼui fēnei: “Neʼe ʼau maʼu ai he fiafia neʼe mole heʼeki ʼau ʼiloʼi ʼi muʼa atu. ʼE kua feala ke ʼau talanoa ki niʼihi ʼo ʼuhiga mo taku tui, ʼaki he loto falala katoa ki te tupuʼaga fakaʼatua ʼo te Tohi-Tapu, pea mo he loto fiafia moʼoni. ʼE ʼau logoʼi ʼe ʼau mākona pea mo mālohi ʼi te faʼahi fakalaumālie, pea ʼe ʼau loto fiafia ʼi te ʼaho fuli pe.”

Ko te taupau feʼaluʼaki ʼo te kau Fakamoʼoni ʼa Sehova, e lahi te ʼu kokelekasio ʼe ina ʼaʼahi, neʼe ina fakamatala fēnei te tahi ʼu fua lelei: “Ko nātou ʼaē ʼe nātou fakatepitepi ʼi te ako takitokotahi, ʼi te agamāhani ʼe nātou malimali pea mo fiafia ʼi tanatou ʼu fai palalau. ʼE lelei age tanatou felogoi pea mo te tahi ʼu hahaʼi, pea ʼe mole hoʼi lotovaivai pe ʼi te ʼu muhumuhu ʼa niʼihi. ʼI te gāue faka minisitelio, ʼe nātou foaki pea mo tokagaʼi te ʼu meʼa ʼaē ʼe ʼaoga ki te hahaʼi ʼe felāveʼi mo nātou.”

ʼE ina tuku mai te tahi puani ʼe ʼaoga ke taupau maʼu e niʼihi ʼi tanatou sivisivi ʼaē tanatou ʼu ako takitokotahi. “ ʼI te ʼu fono mokā fai he ʼu fai palalau ʼe fakatafito ki te Tohi-Tapu, ko te tokolahi ʼe nātou lau tanatou ʼu manatu ʼaē neʼe tohi ki te moʼi pepa. ʼE lahi age anai tona ʼaoga ʼaē kia nātou mo kapau ʼe nātou fakakaukauʼi te pikipikiga ʼo te kupu tāfito ʼaia pea mo te meʼa ʼaē neʼe nātou ako ʼi te temi ʼaē peʼe koteā tona pikipikiga pea mo tonatou maʼuli totonu.” ʼI takotou manatu ʼe feala koa ke koutou hikihiki te faʼahi ʼaia?

Ko te polofeta ko Taniela, hili kiai taʼu e 90 tupu, neʼe mole ina ʼui ia neʼe kua feʼauga tana mahino ʼaē ki te ʼu ala ʼa Sehova. ʼI tona ʼu taʼu fakaʼosi, neʼe ina fehuʼi age ʼo ʼuhiga mo te meʼa neʼe mole mahino lelei kiai: “Ê toku ʼAliki, ʼe ko ʼāfea anai koa te temi fakaʼosi ʼo te ʼu meʼa ʼaia?” (Taniela 12:8) ʼE mahino papau ia ko te holi tuʼumaʼu ʼaia ke ʼāsili age tana mahino ki te ʼu moʼoni ʼa te ʼAtua, neʼe ko te kalavi ʼaia ʼo tana agatonu fakaofoofo lolotoga tona maʼuli ʼaē neʼe lahi ai te ʼu meʼa ʼaē neʼe hoko ki ai.—Taniela 7:8, 16, 19, 20.

ʼE tonu ki te kaugana takitokotahi ʼa Sehova ke mālohi ʼi tona ʼuhiga Fakamoʼoni. Ke koutou lotomālohi tuʼumaʼu pe ki te ako ke feala ai hakotou nofo mālohi ʼi te faʼahi fakalaumālie. Koutou faigaʼi ke koutou hilifaki he ʼu puani foʼou, e tahi peʼe lua ki takotou polokalama ako takitokotahi ʼaē neʼe fakatuʼutuʼu ʼi he vāhaʼa, peʼe ʼi he māhina, peʼe ʼi te taʼu fuli pe. Koutou sisio peʼe feafeaʼi anai te tapuakiʼi e te ʼAtua he kiʼi faiga pe ʼe koutou fai anai. ʼIo, ke koutou fiafia ʼi takotou ako takitokotahi te Tohi-Tapu pea mo te ʼu fua ʼaē ka ina foaki atu anai.—Pesalemo 107:43.

[Nota ʼi te lalo pasina]