Tou Faʼifaʼitakiʼi Te Aga Neʼe Tonu Ke Fai e He Hau

“ ʼE tonu anai ke ina hiki maʼana ki he tohi te lao ʼaia. . . . Pea ʼe tonu anai ke nofo mo ia, pea ʼe tonu anai ke ina lau ʼi te ʼaho fuli pe ʼo tona maʼuli.”—Teutalonome 17:18, 19.

1. Ko ai ʼaē ʼe fia hoko ki ai he Kilisitiano?

ʼE MOLE lagi koutou fakatatau anai ia koutou ki he hau peʼe ko he fineʼaliki. ʼE ʼi ai koa he Kilisitiano agatonu ʼe ina ako te Tohi-Tapu, ʼe fia hage ko he hau, ohage ko te ʼu Hau agatonu ko Tavite, Sosiasi, Esekiasi, peʼe ko Sosafate? Kae ʼe ʼi ai te faʼahi ʼe feala pea ʼe tonu ke koutou faʼifaʼitakiʼi ai ia nātou. Koteā te faʼahi ʼaia? Pea he koʼe ʼe tonu ke koutou faʼifaʼitakiʼi te faʼahi ʼaia?

2, 3. Koteā ʼaē neʼe kua ʼiloʼi fakatomuʼa e Sehova ʼo ʼuhiga mo he hau, pea koteā ʼaē neʼe tonu ke fai e te hau ʼaia?

² ʼI te temi ʼo Moisese, ʼi muʼa ʼo te tali e te ʼAtua ke hau he tagata ki te kau Iselaele, neʼe kua Ina ʼiloʼi fakatomuʼa ʼe loto anai e Tana hahaʼi ke ʼi ai honatou hau. Koia neʼe ina fakahā ai kia Moisese ke hilifaki ki te Lao ʼo te fuakava te ʼu fakatotonu ki te faʼahi ʼaia. Neʼe ko he ʼu fakatotonu neʼe fai maʼa te hau.

³ Neʼe ʼui fēnei e te ʼAtua: “Ka ke hū anai ki te fenua ʼaē ʼe foaki atu e Sehova tou ʼAtua, . . . pea mo ke ʼui anai: ‘Ke ʼau fakanofo hoku hau, ohage ko te ʼu puleʼaga fuli ʼi ʼoku tafaʼaki’, ʼe tonu anai ke ke fakanofo ke hau kia te koe ia ia ʼaē ka fili anai e Sehova tou ʼAtua. . . . Pea ka heka anai ki te hekaʼaga faka hau ʼo tona puleʼaga, ʼe tonu anai ke ina hiki maʼana ki he tohi te lao ʼaia . . . Pea ʼe tonu anai ke nofo mo ia, pea ʼe tonu anai ke ina lau ʼi te ʼaho fuli pe ʼo tona maʼuli, ke ina ako te manavasiʼi ʼaē kia Sehova, tona ʼAtua, ke ina taupau te ʼu folafola fuli ʼo te lao ʼaia, pea mo te ʼu fakatotonu ʼaia, ʼo ina maʼuliʼi.”—Teutalonome 17:14-19.

4. ʼI te ʼu fakatotonu ʼa te ʼAtua, koteā ʼaē neʼe tonu ke fai e te ʼu hau?

⁴ Koia ko te hau ʼaē ka fili e Sehova maʼa tana hahaʼi tauhi, neʼe tonu ke ina hiki maʼa ia te ʼu tohi ʼaē ʼe feala ke koutou maʼu ʼi takotou Tohi-Tapu. Pea neʼe tonu ke lau liuliuga e te hau te tohi ʼaia ʼi te ʼaho fuli. Neʼe mole ina fai te faʼahi ʼaia ke ina maʼu fakaʼatamai te ʼu tohi ʼaia. Neʼe ko he ako, pea neʼe tonu ke fua lelei kia ia. Ko te hau ʼaē neʼe ina fia maʼu te tapuakina ʼa Sehova, neʼe tonu ke ina haga fai te ako ʼaia moʼo fakatuputupu pea mo taupau tuʼumaʼu he loto e totonu. Neʼe tonu foki ke ina ako te ʼu tohi fakaʼatua ʼaia ke fua manuʼia tana pule pea ke liliu ko he hau ʼe fakasiosio tonu.—2 Hau 22:8-13; Tāʼaga Lea 1:1-4.

Koutou Ako Ohage Ko Te Hau

5. Koteā te ʼu tohi ʼo te Tohi-Tapu ʼaē neʼe tonu ke hiki e te Hau ko Tavite pea mo ina lau, pea neʼe koteā tana manatu kiai?

⁵ ʼI takotou manatu, koteā ʼaē neʼe fakatotonu kia Tavite ke ina fai ʼi tana liliu ʼo hau ki Iselaele? Neʼe tonu ke ina hiki te ʼu tohi ʼo te Pentateuque (te tohi ʼo Senesi, mo Ekesote, mo Levitike, mo Faka au, mo Teutalonome). Koutou fakakaukauʼi age muʼa pe neʼe feafeaʼi te manatu pea mo te loto ʼo Tavite, ʼi tana fakaʼaogaʼi tona ʼu mata pea mo tona ʼu nima moʼo hiki te Lao. ʼE ʼasi mai, neʼe toe tohi e Moisese te tohi ʼo Sopo pea mo te ʼu Pesalemo 90 pea mo te 91. Neʼe toe hiki koa e Tavite te ʼu tohi ʼaia? ʼE mahalo pe. Pea neʼe lagi ina lau mo te ʼu tohi ʼo Sosue, mo te Kau Fakamāu, pea mo Lute. ʼE koutou tokagaʼi ai neʼe lahi te ʼu tohi ʼo te Tohi-Tapu ʼaē neʼe tonu ke lau pea mo ako e te Hau ko Tavite. Pea ʼe koutou lava tui neʼe ina fai te faʼahi ʼaia, heʼe tou maʼu tana ʼu manatu ʼo ʼuhiga mo te Lao ʼa te ʼAtua, ʼi te Pesalemo 19:7-11.

6. ʼE tou ʼiloʼi feafeaʼi neʼe leleiʼia e Sesu te Tohi-Tapu, ohage ko tana kui ko Tavite?

⁶ Neʼe toe fai feiā e te Tavite Lahi, ia Sesu te ʼAlo ʼo Tavite. Neʼe ko te agamāhani ʼa Sesu hana ʼalu ki te sinakoka ʼi te vāhaʼa fuli. Neʼe fakalogo ai ki te lau pea mo te fakamahino ʼo te Tohi-Tapu. Tahi ʼaē meʼa, ʼi te tahi lakaga, neʼe lau leʼolahi e Sesu totonu ia muʼa ʼo te hahaʼi te Folafola ʼa te ʼAtua pea mo ina fakamahino. (Luka 4:16-21) ʼE faigafua hakotou tokagaʼi neʼe ina ʼiloʼi lelei te Tohi-Tapu. Kapau ʼe koutou lau te ʼu Evaselio, pea ʼe koutou tokagaʼi anai neʼe ʼui tuʼumaʼu e Sesu “kua tohi” peʼe talanoa ki he ʼu vaega Tohi-Tapu. Ohage la ʼi tana Akonaki ʼi te Moʼuga ʼaē ʼe fakamatala e Mateo, neʼe tuʼa 21 te fakaʼaogaʼi e Sesu te ʼu Tohi Faka Hepeleo.—Mateo 4:4-10; 7:29; 11:10; 21:13; 26:24, 31; Soane 6:31, 45; 8:17.

7. He koʼe neʼe mole tatau ia Sesu mo te kau takitaki lotu?

⁷ Neʼe mulimuli ia Sesu ki te tokoni ʼa Pesalemo 1:1-3: “Manuʼia te tagata ʼaē neʼe mole haʼele ʼi te tokoni ʼa te kau agakovi, . . . kae ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po. . . . Ko meʼa fuli ʼaē ʼe ina fai ʼe iku lelei anai.” Neʼe mole feiā te aga ʼa te kau takitaki lotu ʼi te temi ʼo Sesu, he neʼe nātou “heheka i te hekaʼaga o Moisese” kae neʼe nātou meʼa noaʼi “te lao ʼa Sehova.”—Mateo 23:2-4.

8. He koʼe neʼe mole fua lelei ki te kau takitaki lotu Sutea tanatou lau pea mo ako te Tohi-Tapu?

⁸ Kae ʼe lagi loto mahalohalo ʼihi ki te ʼu palalau ʼaē neʼe fai e Sesu, heʼe hage neʼe mole ina fakaloto mālohiʼi ke ako te Tohi-Tapu. Ia Soane 5:39, 40 ʼe tou lau ai te ʼu palalau neʼe fai e Sesu ki ʼihi hahaʼi ʼo tona temi: “E koutou huke te Tohi-tapu koteuhi e koutou manatu e koutou mau te mauli heegata, ko te Tohi-tapu ae e fakamooni mai kia te au. Pea e mole koutou fia omai kia te au ke koutou maù te mauli.” Neʼe mole fai e Sesu te ʼu palalau ʼaia ke mole ako e te kau Sutea ia te Tohi-Tapu. Kae neʼe ina fakahā tanatou mole loto fakamalotoloto peʼe ko tanatou mole agatonu. Neʼe mahino kia nātou neʼe feala ke taki nātou e te Tohi-Tapu ki te maʼuli heʼegata, kae ko te Tohi-Tapu ʼaē neʼe nātou kumi neʼe ina toe taki foki nātou ki te Mesia, ia Sesu. Kae neʼe nātou fakafisi kia te ia. Koia neʼe mole he fua lelei kia nātou te ako, he neʼe mole nātou loto fakamalotoloto pea neʼe mole nātou fia ako.—Teutalonome 18:15; Luka 11:52; Soane 7:47, 48.

9. Koteā te faʼifaʼitaki lelei neʼe tuku e te kau ʼapositolo pea mo te kau polofeta?

⁹ Neʼe kehekehe te ʼaluʼaga ʼa te kau tisipulo ʼa Sesu pea mo te kau ʼapositolo. Neʼe nātou ako “te ʼu tohi taputapu, ʼaē ʼe feala ke nātou fakaliliu [he tahi] ke poto ki te fakamaʼuli.” (2 Timoteo 3:15, MN ) Neʼe nātou hage ko te kau polofeta ʼaē neʼe nātou “ako fakamalotoloto pea mo kumi fakalelei.” Ko te kau polofeta ʼaia neʼe mole nātou ako fakamalotoloto ʼi he ʼu kiʼi māhina peʼe ko he taʼu. ʼE ʼui e te ʼapositolo ko Paulo “neʼe nātou faiga ke nātou ʼiloʼi,” tāfito ʼo ʼuhiga mo Kilisito pea mo te ʼu tapuakina neʼe pipiki ki tana hāofaki te malamanei. ʼI tana ʼuluaki tohi, neʼe fakaʼaogaʼi tuʼa 34 e Petelo te ʼu tohi e hogofulu ʼo te Tohi-Tapu.—1 Petelo 1:10, 11, MN.

10. He koʼe ʼe tonu ke tou ako takitokotahi te Tohi-Tapu?

¹⁰ Koia ʼe hā lelei mai ko te ako fakalelei ʼo te Folafola ʼa te ʼAtua neʼe ko he fakatotonu ʼaia ki te ʼu hau ʼo Iselaele. Neʼe mulimuli ia Sesu ki te fakatuʼutuʼu ʼaia. Pea ko te ako ʼo te Folafola ʼa te ʼAtua neʼe ko he maʼua ʼo nātou ʼaē ka kaugā hau anai mo Kilisito ʼi selo. (Luka 22:28-30; Loma 8:17; 2 Timoteo 2:12; Apokalipesi 5:10; 20:6) Ko te faʼahi ʼaia ʼaē neʼe tonu ke fai e he hau, ia ʼaho nei ʼe ko he maʼua ʼe tonu ke fai e te hahaʼi fuli ʼaē ʼe nātou fia maʼu te ʼu tapuakina ʼi te kele, ʼi te pule ʼo te Puleʼaga.—Mateo 25:34, 46.

Ko He Maʼua Ki Te ʼu Hau Pea Mo Koutou

11. (a) Koteā ʼaē ʼe feala ke hoko ki he Kilisitiano ʼo ʼuhiga mo te ako? (b) Koteā te ʼu fehuʼi ʼe tonu ke tou fai?

¹¹ ʼE feala ke tou ʼui fakahagatonu ko te kau Kilisitiano moʼoni takitokotahi ʼe tonu ke nātou vakaʼi te Tohi-Tapu. ʼE mole tonu pe ke koutou fai te faʼahi ʼaia ʼi takotou kamata ako te Tohi-Tapu mo te kau Fakamoʼoni ʼa Sehova. ʼE tonu ke tou tahi fakatotonu ke mole tou hage ko ʼihi ʼi te temi ʼo te ʼapositolo ko Paulo, ʼaē hili he kiʼi temi neʼe mole kei nātou fai hanatou ako takitokotahi. Neʼe nātou ako “te u uluaki pelesepeto o te u folafola a te Atua,” ohage ko “te akonaki o te kamataʼaga o uhiga mo Kilisito.” Kae neʼe mole hoko atu tanatou ako pea neʼe mole nātou “hiki atu ki te katoa o te tagata kua lahi.” (Hepeleo 5:12–6:3) Koia ʼe feala ke tou fai kia tatou te ʼu fehuʼi ʼaenī: ‘Koteā taku manatu ʼo ʼuhiga mo te ako takitokotahi ʼo te Folafola ʼa te ʼAtua, tatau aipe peʼe mole heʼeki faʼa fualoa peʼe kua fualoa taku kau ki te kokelekasio? Neʼe faikole ia Paulo ʼo ʼuhiga mo te kau Kilisitiano ʼo tona temi ke nātou haga “lakalaka ki mua i te iloi o te Atua.” ʼE ʼau holi moʼoni koa ki te faʼahi ʼaia?’—Kolose 1:9, 10.

12. He koʼe ʼe maʼuhiga ke kita leleiʼia te Folafola ʼa te ʼAtua?

¹² Kapau ʼe koutou fia fakamāhani ʼo ako te Tohi-Tapu, pea ʼe maʼuhiga ke koutou manako ʼaupito ki te Folafola ʼa te ʼAtua. Ia Pesalemo 119:14-16, ʼe fakahā lelei ai ke koutou fiafia ʼi te ako, ʼe tonu ke koutou ʼiloʼi peʼe koteā ʼaē ʼe koutou fia ako ʼi te Folafola ʼa te ʼAtua pea mo koutou metitasio tuʼumaʼu kiai. Pea ʼe toe moʼoni te faʼahi ʼaia tatau aipe peʼe kua taʼu fia takotou ʼi te moʼoni. Moʼo fakahā lelei te faʼahi ʼaia, koutou manatuʼi te faʼifaʼitaki ʼa Timoteo. Logola neʼe ko te tagata ʼāfea neʼe tauhi ohage ko “he tagata tau lelei ʼa Kilisito Sesu,” kae neʼe fakaloto mālohiʼi ia ia e Paulo ke faiga mālohi ke “ina fakaʼaoga lelei te folafola ʼo te moʼoni.” (2 Timoteo 2:3, 15, MN; 1 Timoteo 4:15) Koia ʼe tonu ke koutou “faiga” ke liliu te ako ko he meʼa ʼe koutou fai māhani.

13. (a) ʼE lava maʼu feafeaʼi he temi ʼe lahi age ki te ako ʼo te Tohi-Tapu? (b) Koteā te ʼu fetogi ʼe koutou sio ʼe feala ke koutou fai ke lahi age tokotou temi ako?

¹³ Ke feala hakotou māhani ʼi te ako, ʼe tonu ke koutou tuku kehe tuʼumaʼu he temi ki te ako ʼo te Tohi-Tapu. Koteā ʼaē kua koutou fai ʼo ʼuhiga mo te faʼahi ʼaia? Tatau aipe peʼe koteā takotou tali kiai, kae ʼe koutou manatu koa ʼe fua lelei lahi anai kia koutou, mo kapau ʼe koutou fakaʼaogaʼi lahi tokotou temi ki te ako takitokotahi? ʼE feala ke koutou feʼekeʼaki: ‘ ʼE ʼau fakatuʼutuʼu feafeaʼi anai koa toku temi ki te faʼahi ʼaia?’ Ko ʼihi neʼe nātou hikihiki tonatou temi ako ʼo te Tohi-Tapu, ʼo nātou ʼaʼala ake ʼi te kei māfoatā. ʼE feala ke nātou lau te Tohi-Tapu ia minuta e 15 peʼe nātou fai ai tanatou ako takitokotahi. Peʼe feala koa ke koutou fai he kiʼi fetogi ʼi takotou polokalama ʼi te vāhaʼa? Ohage la, kapau ko takotou agamāhani te lau ʼo te sulunale ʼi te ʼaho fuli, peʼe ko te vakaʼi ʼo te ʼu tala logo ʼi te afiafi, pea ʼe feala koa ke koutou fetogi te faʼahi ʼaia ʼi he ʼaho pe e tahi ʼi te vāhaʼa? ʼE feala ke koutou fakaʼaogaʼi te temi ʼaia moʼo hikihiki takotou ako te Tohi-Tapu. Kapau ʼe koutou fakaʼaogaʼi te ʼu minuta ʼaia e 30 ʼo te ʼu tala logo ki takotou ako takitokotahi, pea ʼe koutou maʼu anai te ʼu hola ako e 25 ʼi te taʼu. Koutou fakakaukauʼi age te ʼu lelei ʼaē ka koutou maʼu ʼi te ʼu hola ʼaia e 25 moʼo lau peʼe ako te Tohi-Tapu! Koʼeni te tahi tokoni: ʼI te vāhaʼa ʼaenī ka haʼu, koutou vakavakaʼi takotou ʼu gāue ʼi te fakaʼosi ʼo te ʼaho fuli. Koutou vakaʼi peʼe ʼi ai he meʼa ʼe feala ke fetogi peʼe fakanounou tona fai, ke maʼu hokotou temi feʼauga moʼo lau pea mo ako te Tohi-Tapu.—Efeso 5:15, 16.

14, 15. (a) He koʼe ʼe maʼuhiga ke fai he ʼu fakatuʼutuʼu ʼo ʼuhiga mo te ako takitokotahi? (b) Koteā te ʼu fakatuʼutuʼu ʼe feala ke fai ʼo ʼuhiga mo te lau ʼo te Tohi-Tapu?

¹⁴ Koteā ʼaē ʼe tonu ke koutou fai, ke faigafua age kia koutou te ako, pea mo koutou leleiʼia? ʼE tonu ke koutou fai he ʼu fakatuʼutuʼu. Koteā te ʼu fakatuʼutuʼu lelei ʼaē ʼe feala ke koutou fai? Ki te tokolahi, ko te ʼuluaki fakatuʼutuʼu ʼaē ʼe maʼuhiga, ko tanatou lau te Tohi-Tapu katoa. Lagi ʼo aʼu mai ki te temi nei, neʼe koutou lau ʼihi koga ʼo te Tohi-Tapu pea neʼe lelei ʼaupito kia koutou. ʼI te temi nei, ʼe feala koa hakotou fakatotonu ke koutou lau te Tohi-Tapu katoa? Ke feala hakotou fai te faʼahi ʼaia, ʼe feala ʼuluaki ke koutou lau te ʼu Evaselio e fā, pea koutou fai he tahi fakatuʼutuʼu ohage la ko te lau ʼo te toe ʼo te Koga Tohi-Tapu Faka Keleka. ʼI takotou sio ki tona ʼu fua lelei kia koutou, ʼe feala ke koutou fakatuʼutuʼu ke koutou lau te ʼu tohi ʼa Moisese pea mo te ʼu tohi faka hisitolia ʼo aʼu ki te tohi ʼa Esitele. ʼOsi ʼaia, pea ʼe koutou sio anai ʼe feala ke koutou fakaʼosi te lau ʼo te ʼu tohi ʼaē kei toe ʼo te Tohi-Tapu. Ko te fafine, neʼe taʼu 65 ʼi te temi neʼe liliu ai ko he Kilisitiano, neʼe ina tohi ʼi te loto takafi ʼo tana Tohi-Tapu te ʼaho ʼaē neʼe ina kamata lau ai te Tohi-Tapu pea mo te ʼaho ʼaē neʼe ina fakaʼosi ai. ʼI te temi nei, kua ina lau tuʼa nima te Tohi-Tapu! (Teutalonome 32:45-47) Pea neʼe mole ina lau ʼi he olotinatea peʼe ʼi he moʼi pepa, kae neʼe ina lau ʼi tana Tohi-Tapu.

¹⁵ Ko ʼihi ʼaē kua nātou ʼosi lau katoa te Tohi-Tapu, ʼe nātou fai te tahi ʼu fakatuʼutuʼu moʼo hikihiki tanatou ako te Tohi-Tapu pea mo fua lelei kia nātou. Ko te meʼa ʼe nātou fai ʼe nātou filifili he tohi ako ʼi muʼa ʼo tanatou lau te Tohi-Tapu. ʼI te tohi “ Toute Écriture est inspirée de Dieu et utile ” pea mo te tohi Étude perspicace des Écritures, ʼe lava maʼu e he tahi he ʼu manatu lelei ʼo ʼuhiga mo te hisitolia, mo te faʼahiga faitohi, pea mo te ʼu puani ʼaoga ʼo te ʼu tohi fuli ʼo te Tohi-Tapu.a

16. Ka tou ako te Tohi-Tapu, ko ai koa ʼaē ʼe mole tonu ke tou faʼifaʼitakiʼi?

¹⁶ Ka koutou ako, ʼaua naʼa koutou fai ohage ko te ʼu hahaʼi sivi Tohi-Tapu. ʼE nātou tokakaga fau ʼo vakaʼi te ʼu vaega, ʼo nātou faka ʼuhiga te Tohi-Tapu ohage ko he tohi neʼe fai e te tagata. Tokolahi ia nātou ʼe nātou ʼui ko te ʼu tohi ʼo te Tohi-Tapu neʼe fai maʼa he ʼu hahaʼi makehe, peʼe nātou fakakaukauʼi te fakatuʼutuʼu pea mo te manatu ʼaē neʼe maʼu e te tagata faitohi ʼo te Tohi-Tapu. Ko te taʼi faʼahiga manatu faka tagata ʼaia, ʼe feala ke ina faka ʼuhiga te Tohi-Tapu ʼe ko he tohi faka hisitolia pe ia, peʼe ohage ko he tohi ʼe talanoa ki te lotu. Ko ʼihi hahaʼi sivi Tohi-Tapu ʼe nātou vakaʼi tāfito te ʼu kupu, ohage ko te ako ʼo te lea ʼo te Tohi-Tapu. ʼE nātou tokakaga tāfito ʼo ako te haʼuʼaga ʼo te ʼu kupu pea mo te faka ʼuhiga ʼo te ʼu palalau faka Hepeleo pea mo faka Keleka, kae mole nātou tokagaʼi te faka ʼuhiga ʼo te logo ʼaē ʼe haʼu mai te ʼAtua. Kia koutou, ko te faʼahiga ako ʼaia ʼe fakahā ai koa he tui ʼe loloto?—1 Tesalonika 2:13.

17. He koʼe ʼe tonu ke tou manatu ʼe maʼu ʼi te Tohi-Tapu he logo ki te hahaʼi fuli pe?

¹⁷ ʼE moʼoni koa te ʼu manatu ʼa te hahaʼi sivi Tohi-Tapu? ʼE moʼoni koa ko te ʼu tohi takitahi ʼo te Tohi-Tapu ʼe faka ʼuhiga ki he puani pe e tahi, pe neʼe fai ki he faʼahiga hahaʼi tāfito pe e tahi? (1 Kolonito 1:19-21) ʼI tona ʼuhiga moʼoni, ʼe maʼuhiga te ʼu tohi ʼo te Tohi-Tapu ki te ʼu hahaʼi ʼe taʼu kehekehe pea mai te ʼu faʼahiga maʼuli kehekehe. Tatau aipe peʼe ʼi te kamata, neʼe fai te tohi ki he tahi pe, ohage ko Timoteo peʼe ko Tito, peʼe ki he kūtuga, ohage ko te kau Kalate peʼe ko te kau Filipe, kae ko tatou fuli ʼe feala pea ʼe tonu ke tou ako te ʼu tohi ʼaia. ʼE maʼuhiga te ʼu tohi ʼaia kia tatou takitokotahi, pea ʼe feala ke talanoa he tohi ki he ʼu manatu kehekehe pea ke fua lelei ki te hahaʼi tokolahi. ʼE moʼoni, ko te logo ʼa te Tohi-Tapu neʼe fai ki te hahaʼi fuli pe, ʼo tou mahino ai pe koʼe neʼe fakaliliu ki te ʼu lea ʼo te malamanei katoa.—Loma 15:4.

Ke ʼAoga Kia Koutou Pea Mo ʼIhi Atu

18. ʼI takotou lau te Folafola ʼa te ʼAtua, koteā ʼaē ʼe tonu ke koutou fakakaukauʼi?

¹⁸ Ka koutou ako, ʼe koutou tokagaʼi anai ʼe fua lelei hakotou kumi ke koutou mahino ki te Tohi-Tapu, pea mo takotou faiga ke koutou maʼu te ʼu pikipikiga ʼo te ʼu manatu. (Tāʼaga Lea 2:3-5; 4:7) Ko te meʼa ʼaē neʼe fakahā e Sehova ʼi tana Folafola ʼe pipiki lelei ki tana fakatuʼutuʼu. Koia ka koutou lau te Tohi-Tapu, pea koutou vakaʼi te pikipikiga ʼo te ʼu fakamatala pea mo te ʼu tokoni ki tona fakatuʼutuʼu. ʼE feala ke koutou feʼekeʼaki peʼe koteā te pikipikiga ʼo te meʼa neʼe hoko, ʼo he manatu peʼe ko he lea faka polofeta mo te fakatuʼutuʼu ʼa Sehova. Koutou fai kia koutou te ʼu fehuʼi ʼaenī: ‘Koteā ʼaē ʼe ʼau ako ai ʼo ʼuhiga mo Sehova? Koteā tona pikipikiga mo te fakatuʼutuʼu ʼa te ʼAtua ʼaē ka ina fakahoko ʼaki tona Puleʼaga?’ ʼE feala ke koutou toe fakakaukauʼi fēnei: ‘ ʼE ʼau lava fakaʼaogaʼi feafeaʼi te manatu ʼaenī? ʼE feala koa ke ʼau fakaʼaogaʼi ʼi taku faiako peʼe mokā ʼau fakatokaga te hahaʼi ʼaki te Tohi-Tapu?’—Sosue 1:8.

19. ʼE fua lelei kia ai takotou fakamatala ki ʼihi te ʼu meʼa ʼaē neʼe koutou ako? Koutou fakamahino.

¹⁹ ʼE toe fua lelei mo kapau ʼe koutou manatu ki te hahaʼi. ʼI takotou lau pea mo ako te Tohi-Tapu, ʼe koutou ako anai he ʼu meʼa foʼou pea mo tuputupu ai mo takotou fakasiosio tonu. Koutou faiga ke koutou palalau ki te ʼu meʼa ʼaia mo tokotou famili peʼe ko ʼihi atu. Kapau ʼe koutou fai feiā ʼi te ʼu temi lelei pea ʼaki he agavaivai, pea ʼe mahino ia ʼe fua lelei anai te ʼu fai palalau ʼaia. Ko takotou fakamatala ʼaki he loto fiafia te ʼu meʼa ʼaē neʼe koutou ako peʼe ko te ʼu meʼa ʼaē neʼe koutou leleiʼia, ʼe malave anai ki te hahaʼi. Pea ʼe toe ʼaoga lahi anai kia koutou. ʼO feafeaʼi? Neʼe fakatokagaʼi e te hahaʼi popoto, ʼe manatuʼi fualoa anai e he tahi te ʼu meʼa neʼe ina ako peʼe ina lau, mo kapau ʼi te temi ʼaē kei ina manatuʼi lelei ai, ʼe ina fakaʼaogaʼi peʼe palalau liuliuga kiai, ʼo ina fakamatala ki ʼihi.b

20. He koʼe ʼe ʼaoga ke lau tuʼumaʼu te Tohi-Tapu?

²⁰ ʼI te temi fuli pe ʼaē ʼe koutou lau katoa ai he tohi ʼo te Tohi-Tapu, ʼe mahino ia ʼe koutou ako anai he manatu foʼou. ʼE koutou punamaʼuli anai ʼi ʼihi ʼu vaega, ʼaē ki muʼa atu neʼe mole honatou ʼuhiga kia koutou. ʼE koutou mahino lahi anai ki te ʼu vaega ʼaia. ʼE fakahā e te faʼahi ʼaia ko te ʼu tohi ʼo te Tohi-Tapu ʼe mole ko he ʼu tohi faka tagata, kae ko te ʼu koloā neʼe tohi maʼa koutou, ke koutou ako tuʼumaʼu pea ke fua lelei kia koutou. Koutou manatuʼi, ko te hau, ohage la ko Tavite, neʼe tonu ke ina “lau ʼi te ʼaho fuli pe ʼo tona maʼuli.”

21. Koteā te ʼu fua lelei ʼe feala ke koutou maʼu mo kapau ʼe lahi age takotou ako te Folafola ʼa te ʼAtua?

²¹ Ei, ko nātou ʼaē ʼe nātou fakaʼaogaʼi he temi lahi moʼo ako loloto te Tohi-Tapu, ʼe fua lelei lahi kia nātou. ʼE nātou maʼu he ʼu koloā fakalaumālie pea mo he fakasiosio poto. Ko tanatou felogoi mo te ʼAtua ʼe mālohi pea mo lelei age. ʼE nātou tokoni ʼaupito ki tonatou famili, ki te ʼu tēhina mo tuagaʼane ʼo te kokelekasio, pea mo nātou ʼaē kei tonu ke liliu ko he kau atolasio ʼa Sehova.—Loma 10:9-14; 1 Timoteo 4:16.

[Kiʼi nota]

ʼE Kei Koutou Manatuʼi Koa?

• Koteā ʼaē neʼe tonu ke fai e te ʼu hau ʼo Iselaele?

• Koteā te faʼifaʼitaki neʼe tuku e Sesu pea mo te kau ʼapositolo ʼo ʼuhiga mo te ako ʼo te Tohi-Tapu?

• Koteā te ʼu fetogi ʼe feala ke koutou fai ke lahi age tokotou temi ki takotou ako takitokotahi?

• ʼE tonu ke feafeaʼi takotou manatu mokā koutou ako te Folafola ʼa te ʼAtua?

[Talanoa ʼo te pasina 15]

“Ke ʼi Ai Hakotou Tohi-Tapu”

“Kapau ʼe koutou fia . . . vakaʼi he tahi ʼu Tohi-Tapu, ko te meʼa gāue lelei ʼe ko te Internet. Kae kapau ʼe koutou fia lau te Tohi-Tapu, mo ako, mo fakakaukauʼi, mo metitasioʼi, ʼe tonu ke ʼi ai hakotou Tohi-Tapu, heʼe feala ai ke koutou tuku kiai takotou fakakaukau pea mo tokotou loto.”—Gertrude Himmelfarb, ko te polofesea ʼiloa kua letelete ʼo te Univelesitē ʼo New York.