ʼE Koutou Fakamolemole Koa?

NEʼE hoholo aipe te faigataʼaʼia ʼo Bill pea mo tona ʼofafine e taʼu 16 ʼaē ko Lisa. Ko te ʼu kiʼi tokakovi ʼaē neʼe tau hoko kia nāua neʼe iku tuʼumaʼu pe ki te ʼu kē leʼolahi. ʼI tona fakaʼosi leva, neʼe lēsili age pe te kovi ʼo kaku ki te kapu ʼaē ʼo Lisa ʼi tona ʼapi.a

Hili te temi kiai, neʼe mahino leva kia Lisa, ko ia ʼaē neʼe lākahala pea neʼe faiga leva ke ina maʼu te fakamolemole ʼa tana tāmai. Kae, ʼo mole ʼui ke ina tuku feiā te ʼu hala ʼo te temi ʼaē ʼa Lisa, neʼe fakafisi tana tāmai ʼaē neʼe kei lotokovi pe, ki tana ʼu faiga ʼaē ki te tokalelei. Koutou fakakaukauʼi age muʼa! Neʼe mole lotolelei pe la te tāmai ke ina fakahā tana manavaʼofa ki tona ʼofafine totonu!

Kua hili kiai te ʼu sēkulō, neʼe fakatūʼa ki te mate te tagata, neʼe mole ʼi ai hana hala, ki he fakapō neʼe mole ina fai. Neʼe fai te ʼu fakamatala loi e te kau fakamoʼoni, pea neʼe lituʼa te kau takitaki politike, ʼo nātou fakafisi ʼi tonatou loto faʼitaliha ki te fakahoko ʼo te faitotonu. Ko te tagata ʼaia ʼaē neʼe mole ʼi ai hana hala, ko Sesu Kilisito. Ko te temi siʼisiʼipe ʼi muʼa ʼo tana mate, neʼe ina kole ki te ʼAtua ʼaki he faikole fakamalotoloto ʼaupito: “Tāmai, fakamolemole age kia nātou, koteʼuhi ʼe mole nātou ʼiloʼi te meʼa ʼaē ʼe nātou fai.”—Luka 23:34.

Neʼe fakamolemole gafua ia Sesu, ʼaki tona loto, pea neʼe ina uga tana kau tisipulo ke nātou faʼifaʼitakiʼi ia ia, ʼi te faʼahi ʼaia. (Efesi 4:32) Kae, ohage pe ko Bill, ko te tokolahi ʼe nātou aga fakapō ʼo mole nātou lotolelei ki te fakamolemole. E feafeaʼi ia koutou ʼo ʼuhiga mo te fakahoko ʼo te faʼahi ʼaia? ʼE koutou lotolelei koa ke koutou fakamolemole kia nātou ʼaē mokā agahala atu kia koutou? Pea e feafeaʼi ʼo ʼuhiga mo te ʼu agahala mamafa? ʼE tonu anai koa ke toe fakamolemole mo te ʼu agahala ʼaia?

Ko Te Fakamolemole ʼe Ko He Meʼa Faigataʼa

ʼE mole ko he meʼa ʼe faigafua tuʼumaʼu te tali lelei ʼaē ke kita fakamolemole. Pea ʼi te ʼu temi maʼuhiga ʼaenī, ko te ʼu felogoi ʼa te hahaʼi kua liliu ia ʼo faigataʼa ʼaupito ʼo mole ʼi ai hona fakatatau. Tāfito la, ʼi te maʼuli faka famili, ʼaē ʼe tau hoko ai te tuʼania pea mo te ʼu ʼaluʼaga fakatupu lotomamahi. Neʼe fakahā e te ʼapositolo Kilisitiano ʼaē ko Paulo, ʼe mahu anai te ʼu ʼaluʼaga ʼaia ʼi te ʼu “ ʼaho fakamuli.” Neʼe ina ʼui fēnei: “Ko te hahaʼi ʼe kaumeʼa pe anai mo nātou totonu, kaumeʼa mo te paʼaga, fiatuʼu, fialahi, . . . mole manako ki te meʼa ʼaē ʼe lelei, kākā, fiatuʼu, fonu ʼi te fialahi.”—2 Timoteo 3:1-4.

Koia, ʼe mahino papau ia, ko tatou fuli ʼe tou felāveʼi mo te ʼu fihifihia mai tuʼa, ʼo nātou ʼahiʼahiʼi te fealagia ʼaē ʼa tatou ki te fakamolemole ki niʼihi age. ʼO toe hilifaki kiai, ʼe tou toe tauʼi foki mo te ʼu mālohi ʼaē ʼe maʼu ʼi totatou ʼu loto. Neʼe ʼui e Paulo ʼaki he lotomamahi: “Ko te meʼa ʼaē ʼe lelei ʼaē ʼe ʼau fakaʼamu kiai ʼe mole ʼau fai ʼau, kae ko te meʼa ʼaē ʼe kovi ʼaē ʼe mole ʼau fakaʼamu kiai, koʼena te meʼa ia ʼaē ʼe ʼau fai. Koia kapau ko te meʼa ia ʼaē ʼe mole ʼau fakaʼamu kiai ʼaē ʼe ʼau fai, pea ʼe mole ko ʼau ia ʼaē ʼe ʼau fai, kae ko te agahala ia ʼaē ʼe nofo ia ʼau.” (Loma 7:19, 20) Ko tona ikuʼaga, ko te tokolahi ia tatou ʼe mole tou fakamolemole ohage ko te fakamolemole ʼaē neʼe tou ʼamanaki ke tou fai. Koia, ko te heʼe haohaoa ʼaē neʼe tou maʼu mai ʼatatou ʼu mātuʼa pea mo te agahala ʼe mālohi tana fakahehemaʼi ʼo tatou fuli, ʼi ʼihi temi ʼe nātou toʼo ia tatou te manavaʼofa ʼaē ki te hahaʼi.

ʼI tona fakaloto mālohiʼi ʼaē ke fakamolemole ki te tahi neʼe hala age kia ia, neʼe tali fēnei e te fafine: “ ʼE mole ʼi ai he tahi ʼe tāu mo ia, te faiga ʼaē ʼe fakamaʼuaʼi e te fakamolemole.” ʼE hā ʼaki mai ai, ko te taʼi talanoa ʼaia ʼe feala pe ke hage mai ʼe fefeka, ʼe mamafa, peʼe fakafeagai ʼosi pe ki te aga ʼaē ʼe tonu ke fai. Kae ʼaki hatatou vakavakaʼi ke loloto age, ʼe tou mahino ai leva ki te lotokovi ʼaē ʼe logoʼi e te hahaʼi ʼi tanatou tauʼi he mālama, ki tanatou manatu, ʼe manatu pe kia ia, ʼe mole loto tokaga ia, ʼe agakovi. Neʼe ʼui e te tagata: “Ko te hahaʼi ʼe nātou mālo ia koutou ʼi te temi ʼaē ʼe koutou fakamolemole ai kia nātou. ʼE hage ko he tahi ʼe ina tali lelei pe tona gaohi koviʼi kae mole meo ia.”

Koia la ʼaē, ʼe mole fakapuna’maʼuli te faigataʼa ʼo te maʼuliʼi ʼo te loto fakamolemole ʼi te ʼu ʼaho fakamuli ʼaenī. Kae ko te Tohi-Tapu ʼe ina uga tatou ke tou fakamolemole ʼaki he loto katoa. (Fakatatau pea mo 2 Kolonito 2:7.) He koʼe koa ʼe tonu ke tou loto fakamolemole?

[Nota ʼi te lalo pasina]