‘Koutou Fai Hokotou ʼu Kaumeʼa ʼAki Te ʼu Koloā Heʼe Faitotonu’

“Koutou fai hokotou ʼu kaumeʼa ʼaki te ʼu koloā heʼe faitotonu . . . Ko ʼaē ʼe agatonu ʼi te ʼu meʼa liliki ʼe toe agatonu pe foki ʼi te ʼu meʼa lalahi.”—Luka 16:9, 10.

1. Neʼe feafeaʼi te fakavikiviki ʼa Moisese pea mo te ʼu foha ʼo Iselaele kia Sehova ʼi tanatou hāo ʼaē mai Esipito?

NEʼE hāofaki ʼaki te milakulo—ʼe ko te meʼa ʼaia neʼe fakaloto mālohiʼi aipe foki te tui! Ko te mavae ʼa Iselaele mai Esipito neʼe feala pe ke ʼui neʼe hoko ʼuhi ko Sehova, te Māfimāfi. ʼE mole mata fakapuna’maʼuli te hiva ʼaenī ʼa Moisese pea mo te kau Iselaelite, ʼo fēnei: “Ko toku mālohi, ko Sah, heʼe gāue ia ki toku hāofaki. Ko ia toku ʼAtua pea ʼe ʼau vikiviki anai.”—Ekesote 15:1, 2; Teutalonome 29:2.

2. Koteā te meʼa neʼe toʼo e te hahaʼi ʼa Sehova ʼi tanatou mavae mai Esipito?

² ʼE ko te ʼāteaina ʼaia ʼaē neʼe hoki toe maʼu age pe e Iselaele, neʼe kehekehe ʼosi ia mo tonatou ʼaluʼaga ʼaē ʼi Esipito! ʼI te temi leva ʼaē kua feala ke nātou atolasio kia Sehova ʼo mole kei ʼi ai he meʼa ke fakafihi kia nātou. Pea neʼe mole nātou mavae ʼātea mai Esipito. ʼE ʼui fēnei e Moisese: “Ko te ʼu foha ʼo Iselaele . . . neʼe nātou kole ki te kau Esipito te ʼu meʼa siliva, pea mo te ʼu meʼa aulo, pea mo te ʼu kofu pulupulu. Pea neʼe fai e Sehova ke tali te kole ʼa te hahaʼi e te kau Esipito ke nātou foaki age te ʼu meʼa ʼaē neʼe nātou kole age; pea neʼe nātou fakatelefuaʼi te kau Esipito.” (Ekesote 12:35, 36) Kae neʼe feafeaʼi tanatou fakaʼaogaʼi te ʼu koloā ʼaia ʼo Esipito? Neʼe iku koa ki he ‘hikihiki ʼo Sehova’? Koteā te ako ʼe tou maʼu mai te faʼifaʼitaki ʼe nātou tuku mai?—Vakaʼi ia 1 Kolonito 10:11.

“Ko Te Meʼa ʼOfa ʼa Sehova”

3. Koteā ʼaē neʼe fai e Sehova ʼi te fakaʼaogaʼi e Iselaele te aulo ki te tauhi hala?

³ ʼI te lolotoga nofo ʼa Moisese ʼi te Moʼuga ʼo Sinaï ia ʼaho e 40 ke foaki age e te ʼAtua kia te ia te ʼu fakatotonu ʼo ʼuhiga mo Iselaele, ko te fakatalitali ʼa te hahaʼi neʼe kamata hoha. ʼI tanatou toʼo tonatou ʼu hau aulo, neʼe nātou fakatotonu kia Alone ke fai he fakatātā ke nātou atolasio kiai. Neʼe toe faʼu pe foki e Alone maʼa nātou te ʼaletale, pea ʼi te kei hegihegi ʼo te ʼaho ake, neʼe nātou mōlagaʼi ai te ʼu sakilifisio. ʼI tanatou fai ʼo te aga ʼaia ʼaki tanatou aulo neʼe leleiʼia koa ia nātou e tonatou Fakamaʼuli? Kailoa ia! Neʼe ʼui fēnei e Sehova kia Moisese: “Koia ʼi te temi nei, tuku muʼa ke ʼau fai, ke vela toku hāūhāū kia nātou pea ke ʼau fakaʼauha ia nātou.” ʼUhi ko te tagi ʼa Moisese, neʼe mole fakaʼauha e Sehova te hahaʼi fuli, logope la neʼe matehi te kau takitaki talagataʼa ʼaki te tautea mai te ʼAtua.—Ekesote 32:1-6, 10-14, 30-35.

4. Neʼe koteā te “meʼa ʼofa ʼa Sehova,” pea ko ai ʼaē neʼe ina foaki age?

⁴ Ki muli age, neʼe maʼu e Iselaele te fealagia ke nātou fakaʼaogaʼi tonatou ʼu koloā ʼo mulimuli ki he meʼa neʼe lelei kia mata ʼo Sehova. Neʼe nātou tatānaki “te meʼa ʼofa maʼa Sehova.”a ʼI te ʼu meʼa ʼofa ʼaē ki te laga pea mo te teuteuʼi ʼo te tapenakulo neʼe ʼi ai te aulo, te siliva, te kapa, te filo ʼuʼui, te ʼu faʼahiga meʼa pena, te ʼu tala ʼo te matuʼaʼi akeno, te ʼu kili ʼo te manu ʼaē ko te phoque, pea mo te ʼakau ko te akasia. Ko te puani tāfito ʼo te fakamatala, ʼe ko te fakahā mai ʼo te aga ʼa nātou ʼaē ʼe nātou foaki te ʼu meʼa ʼofa. “Ki te tagata fuli pe ʼe lotolelei ke ina ʼaumai ohage ko te meʼa ʼofa ʼa Sehova.” (Ekesote 35:5-9) Neʼe tali fakalelei ia Iselaele ki te faʼahi ʼaia. Pea, ko te tapenakulo neʼe ko he mātaga “matalelei pea mo taulekaleka ʼaupito,” ko te ʼui ʼaia ʼa te tagata ʼe ina sivi te Tohi-Tapu.

Ko Te ʼu Meʼa ʼOfa Ki Te Fale Lotu

5, 6. ʼO ʼuhiga mo te fale lotu, neʼe feafeaʼi te fakaʼaogaʼi e Tavite tona ʼu koloā, pea neʼe koteā te tali ʼa ʼihi kiai?

⁵ Logope la ko te Hau ʼo Iselaele ko Salomone ʼaē neʼe ina lagiaki ke laga he fale ke tologa ki te tauhi kia Sehova, ko Tavite tana tāmai neʼe kua ina fai te ʼu teuteu lahi kiai. Neʼe tānaki e Tavite te toe aulo lahi, te siliva, te kapa, te ukamea, te ʼakau, pea mo te ʼu maka matalelei. Neʼe ʼui e Tavite ki tana hahaʼi, ʼo fēnei: “Ohage ko toku fiafia ʼi te fale ʼo toku ʼAtua, ʼe kei ʼi aipe taku meʼa ʼa ʼaku: te aulo pea mo te siliva; ʼe ʼau foaki ki te fale ʼo toku ʼAtua ʼo hilifaki ki te ʼu meʼa fuli neʼe ʼau teuteuʼi ʼo ʼuhiga mo te fale taputapu; ko taleta aulo e tolu afe . . . pea mo taleta siliva māninifi e fitu afe moʼo kofuʼi te ʼu kaupā ʼo te ʼu fale.” Neʼe fakaloto mālohiʼi e Tavite ʼihi ke nātou toe agaʼofa pe foki. Ko te tali ki te faʼahi ʼaia neʼe maʼuhiga: he neʼe lahi te aulo, te siliva, te kapa, te ukamea, pea mo te ʼu maka matalelei. “ ʼAki tonatou loto katoa,” ko te hahaʼi neʼe nātou fai “te ʼu mōlaga ʼaki he lotolelei kia Sehova.”—1 Fakamatala 22:5; 29:1-9.

⁶ ʼAki te ʼu meʼa ʼofa ʼaia, neʼe fakahā ai e te kau Iselaelite te toe fakafetaʼi lahi ki te tauhi kia Sehova. ʼAki te agavaivai neʼe fēnei te faikole ʼa Tavite: “Ko ai ʼau pea koteā taku hahaʼi, ke mātou maʼu aipe he mālohi moʼo fai ʼo te taʼi ʼu mōlaga ʼaia ʼaki he lotolelei?” Koteā tona tupuʼaga? “Heʼe ko meʼa fuli ʼe haʼu mai ia te koe pea ʼe haʼu mai tou nima te ʼu meʼa ʼaē neʼe mātou foaki atu kia te koe. . . Ko ʼau, ʼi toku faʼahi, ʼi te faitotonu ʼo toku loto, neʼe ʼau mōlagaʼi atu kia te koe te ʼu meʼa fuli ʼaia ʼaki he lotolelei.”—1 Fakamatala 29:14, 17.

7. Koteā te fakatokaga ʼe tou ako mai te temi ʼo Amosi?

⁷ Kae, ko te ʼu telepi ʼo Iselaele neʼe mole hoholo atu tanatou fakamuʼamuʼa ʼi tonatou ʼatamai pea mo tonatou ʼu loto, te tauhi ʼaē kia Sehova. ʼI te hiva sēkulō ʼo totatou temi, ko te tahi koga ʼo Iselaele neʼe faka lākahalaʼi ʼuhi ko tana lotonoa ʼi te faʼahi fakalaumālie. ʼO ʼuhiga mo te ʼu telepi e hogofulu ʼo te puleʼaga ʼo Iselaele ʼi te potu tokelau, neʼe ʼui fēnei e Sehova ʼaki ia Amosi: “Malaʼia ia nātou ʼaē ʼe nātou maʼu te fīmālie ʼi Sione pea mo nātou ʼaē ʼe nātou tuku tanatou falala ki te moʼuga ʼo Samalia!” Neʼe talanoa ʼo ʼuhiga mo nātou ohage ko ni tagata “ ʼe nātou momoe ʼi te ʼu moeʼaga lei . . . ʼe nātou hōlofa ʼi tonatou ʼu sofa, . . . ʼe nātou kai te ʼu akeno tagata ʼo te faga akeno pea mo te ʼu vitulo mui ʼi te ʼu ʼuhiʼi pipi ʼaē neʼe fakasino lelei; . . . ʼe nātou ʼiʼinu ʼi te ʼu ipu vino.” Kaʼe neʼe mole puipui nātou ia e tonatou ʼu koloā. Neʼe fēnei te fakatokaga ʼa te ʼAtua: “ ʼE nātou ʼolo anai ʼo nonofo ʼauhē, ʼo nātou tuʼu ki muʼa ia nātou ʼaē ʼe nonofo ʼauhē, pea ʼe tonu anai ke puli te fakafiafia fakavalevale ʼa te kau holotakoto.” ʼI te taʼu 740 ʼi muʼa ʼo totatou temi, neʼe maʼuli mamahi ia Iselaele ʼi te ʼu nima ʼo te kau Asilia. (Amosi 6:1, 4, 6, 7) Pea ki muli mai neʼe toe tō pe foki mo te puleʼaga ʼo Suta ki te mānumānu koloā.—Selemia 5:26-29.

Ko Te Fakaʼaogaʼi Lelei ʼo Te ʼu Koloā ʼi Te Temi ʼo Te Kau Kilisitiano

8. Koteā te faʼifaʼitaki lelei neʼe tuku mai e Sosefo pea mo Malia ʼo ʼuhiga mo te fakaʼaogaʼi ʼaē ʼo te ʼu koloā?

⁸ Kae, logope la te ʼaluʼaga masiva ʼo te kau kaugana ʼa te ʼAtua ki muli mai, neʼe mole ko he faʼahi ia neʼe ina fakatatāʼofi tanatou gāue fakamalotoloto ʼaē ki te tauhi moʼoni. Tou vakaʼi age muʼa ia Malia mo Sosefo. ʼO fakalogo ki te fakatotonu ʼa Sesale Aukusito, neʼe nā fagona ki te kolo ʼaē ʼo tonā famili, ʼi Petelehemi. (Luka 2:4, 5) Neʼe tupu ia Sesu ʼi te kolo ʼaia. ʼI te hili ʼo ʼaho e fāgofulu, ko Sosefo pea mo Malia neʼe nā ʼolo ki te fale lotu ʼaē ʼe tuʼu ʼi Selusalemi moʼo fai ai te mōlaga fakamaʼa ʼaē neʼe fakamaʼua ia nāua kiai. Neʼe ʼiloga tonā māsisiva, he neʼe mōlagaʼi e Malia te ʼu kiʼi misi e lua. Kae ko Malia pea mo Sosefo neʼe mole nā ʼui nāua ʼe mole nā fai he mōlaga ʼuhi ko tonā māsisiva. Kailoa ia, ʼaki te loto fakalogo neʼe nā fakaʼaogaʼi tonā ʼu kiʼi koloā ʼaē ʼe veliveli.—Levitike 12:8; Luka 2:22-24.

9-11. (a) Ko te ʼu palalau ʼa Sesu ia Mateo 22:21 ʼe ina foaki te faʼifaʼitaki fea ʼo ʼuhiga mo tatatou faʼahiga fakaʼaogaʼi ʼo te paʼaga? (b) He koʼe koa ʼe mole ko he meʼa noa te kiʼi meʼa ʼofa ʼa te fafine vitua?

⁹ Ki muli age, ko te kau Faliseo pea mo te hahaʼi ʼa Helote, neʼe nātou fia kākāʼi ia Sesu, ʼo ʼui maʼa nātou: “Koia ke ke tala mai kia mātou: Koteā tau manatu kiai? ʼE gafua koa peʼe kailoa te totogi ʼo te tukuhau ʼa te takitokotahi kia Sesale?” Neʼe hā ʼi te tali ʼa Sesu tana fakasiosio poto. ʼO talanoa pe ia ki te foʼi piesi ʼaē neʼe nātou foaki age kia te ia, neʼe fehuʼi maʼa Sesu: “Ko te paki ʼaenī ʼo ai, pea mo te meʼa ʼaē ʼe tohi ai?” Neʼe tali maʼa nātou: “ ʼO Sesale.” Neʼe ina fakaʼosi fakapotopoto tana palalau, ʼo fēnei: “Koutou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua.” (Mateo 22:17-21) Neʼe ʼiloʼi e Sesu ko te pule ʼaē neʼe haʼu ai te foʼi piesi neʼe ʼamanaki ʼo ʼuhiga mo te tukuhau ke totogi. Kae ʼi te temi ʼaia neʼe toe tokoni aipe foki ki tana kau tisipulo pea mo tona ʼu fili ke nātou mahino ʼe ko he Kilisitiano moʼoni, ʼe toe tonu pe foki ke ina liufaki “te ʼu meʼa ʼa te ʼAtua ki te ʼAtua.” ʼO kau la kiai te fakaʼaogaʼi lelei ʼo te ʼu koloā.

¹⁰ Ko te meʼa ʼo ʼuhiga mo te fagonogono ʼa Sesu ʼi te fale lotu, ʼe ina fakatātā te faʼahi ʼaia. Neʼe ina faka lākahalaʼi te kau sekelipa mānumānu ʼaē ʼe nātou ‘kai te ʼu ʼapi ʼo te hahaʼi fafine vitua.’ ʼE fakahā fēnei e Luka: “ ʼI te hiki ake ʼona mata, neʼe sio ia ki te hahaʼi maʼu meʼa ʼe nātou ʼai tanatou ʼu meʼa ʼofa ki te ʼu puha tānaki paʼaga. Pea neʼe sio ia ki te fafine vitua masiva ʼe ina ʼai kiai te ʼu kiʼi foʼi piesi e lua ʼe mole faʼa maʼuhiga, pea neʼe ʼui maʼana: ‘ ʼE ʼau tala moʼoni atu kia koutou, ko te fafine vitua ʼaenī, logope tona masiva, ka kua lahi age te meʼa ʼaē neʼe ina ʼai ia nātou fuli ʼaē. He ko nātou fuli, neʼe nātou ʼai tanatou ʼu meʼa ʼofa [neʼe toʼo] ʼi tanatou ʼu paʼaga ʼaē ʼe mole loko ʼaoga kia nātou, kaʼe ko te [fafine] ʼaenī, logope tona masiva, neʼe ina ʼai fuli te meʼa ʼaē ʼe ina maʼu.’ ” (Luka 20:46, 47; 21:1-4) Neʼe ʼui e ʼihi, ko te fale lotu neʼe teuteuʼi ʼaki te ʼu maka matalelei. Neʼe tali maʼa Sesu, ʼo fēnei: “Kaʼe ki te ʼu meʼa ʼaē ʼe koutou sisio kiai, ʼe hoko mai anai te ʼu ʼaho, ʼe mole toe tuku anai ʼi henī he maka ʼe hili ʼi he tahi maka, neʼe mole heʼeki holoʼi.” (Luka 21:5, 6) Neʼe ko he meʼa noa koa te kiʼi meʼa ʼofa ʼa te fafine vitua? Kailoa ia. Neʼe lagolago aipe ia ki te fakatuʼutuʼu ʼaē neʼe fai e Sehova ʼi te lakaga ʼaia.

¹¹ Neʼe ʼui maʼa Sesu ki tana kau tisipulo moʼoni: “ ʼE mole he tagata kaugana ʼe feala ke kaugana ki he ʼu pule e lua; koteʼuhi heʼe fehiʼa anai ia ki he tahi kaʼe ʼofa ia ki te tahi, peʼe pipiki anai ia ki he tahi kaʼe ina vaʼiganoaʼi ia te tahi. ʼE mole feala hakotou kaugana ki te ʼAtua pea mo te ʼu koloā.” (Luka 16:13) Koia, ʼe lava feafeaʼi anai koa hatatou fakahā ʼe tou fakafuafua lelei ʼi tatatou fakaʼaogaʼi totatou ʼu koloā?

Ko Te ʼu Tagata Tauhi ʼApi Agatonu

12-14. (a) Ko te kau Kilisitiano ʼe ko he ʼu tagata tauhi ʼapi ʼo te ʼu koloā feafeaʼi? (b) Ko te ʼu ʼaluʼaga feafeaʼi ʼaē ʼe foaki fakahagatonu ai ia ʼaho nei e te hahaʼi ʼa Sehova tanatou gāue fakatagata tauhi ʼapi? (c) ʼE haʼu koa maifea te paʼaga ʼaē moʼo lagolago ki te gāue ʼa te ʼAtua?

¹² ʼI te temi ʼaē ʼe tou foaki ai totatou maʼuli kia Sehova, ʼe tou ʼui fakahagatonu ko meʼa fuli ʼe tou maʼu, totatou ʼu koloā fuli, ʼaʼana. Koia, ʼe tonu anai ke feafeaʼi tatatou fakaʼaogaʼi te ʼu meʼa ʼaē ʼe tou maʼu? ʼI tana talanoa ki te gāue faka Kilisitiano ʼi te kokelekasio, neʼe tohi fēnei e te Tēhina ko C. T. Russell, ko te ʼuluaki pelesita ʼo te Sosiete Watch Tower: “ ʼE tonu ke tahi mahino ki te hahaʼi takitokotahi neʼe hinoʼi ia ia e te ʼAliki ko he tagata tauhi ʼapi ʼo ʼuhiga mo tona temi, ko he tagata tauhi ʼapi ʼo ʼuhiga mo te malave ʼo tana gāue ki niʼihi, ko he tagata tauhi ʼapi ʼo ʼuhiga mo tana paʼaga, pea ʼe tonu kia ia ke ina fakaʼaogaʼi te ʼu taleta ʼaia ki te kolōlia ʼo te Pule ʼaki tona mālohi katoa.”—The New Creation, pasina 342.

¹³ ʼE ʼui fēnei ia 1 Kolonito 4:2: “Ko te meʼa ʼaē ʼe kumi ʼo ʼuhiga mo te faʼahi ʼaia ʼi te ʼu tagata tauhi ʼapi, ʼe ko he tagata ʼe maʼu ʼe agatonu.” ʼI tona ʼuhiga kautahi faka malamanei, ko te kau Fakamoʼoni ʼa Sehova ʼe nātou faiga ke nātou maʼuliʼi te fakamatalatala ʼaia, ʼo nātou fakaʼaogaʼi lahi tonatou temi ʼi te minisitelio faka Kilisitiano mokā ʼe feala, pea mo nātou fakatuputupu lelei tonatou ʼu fealagia faiakonaki. Pea tahi ʼaē, ko te kau gāue lotolelei ʼaē ʼe fakalogo ki te taki ʼo te Komite Laga Fale fakakolo, ʼe nātou foaki fakalelei tonatou temi, tonatou mālohi, pea ʼe nātou popoto ʼi te laga ʼo te ʼu fale fono matalelei ke fai ai te tauhi. ʼAki te ʼu meʼa fuli ʼaia, ko Sehova ʼe loto fiafia aipe.

¹⁴ ʼE maʼu koa maifea te paʼaga ʼaē moʼo lagolago ki te toe gāue faiakonaki pea mo laga fale ʼaia? Mai te hahaʼi ʼe nātou foaki ʼaki he lotolelei, ohage pe ko tona fai ʼaē ʼi te ʼu ʼaho ʼo te laga ʼaē ʼo te tapenakulo. ʼE tou kau takitokotahi koa ki te gāue ʼaia? ʼE tou fakahā koa ʼaki tatatou faʼahiga fakaʼaogaʼi ʼaē ʼo totatou ʼu koloā ʼe tou faka maʼuhigaʼi ʼaupito te gāue ʼa Sehova? ʼO ʼuhiga mo te paʼaga, tou liliu ko ni ʼu tagata tauhi ʼapi agatonu.

Ko Te Fakatuʼutuʼu Agaʼofa

15, 16. (a) Neʼe fakahā feafeaʼi e te kau Kilisitiano ʼo te temi ʼo Paulo tanatou agaʼofa? (b) ʼE tonu anai ke tou faka ʼuhiga feafeaʼi tatatou talanoa ʼaenī?

¹⁵ Neʼe faitohi te ʼapositolo ko Paulo ʼo ʼuhiga mo te agaʼofa ʼa te kau Kilisitiano ʼi Masetonia pea mo Akai. (Loma 15:26) Logope la mo nātou totonu neʼe nātou mamahi lahi, neʼe mole fakatuatuai tanatou kau ʼaē ki te tokoni ki tonatou ʼu tēhina. ʼE mahalo pe neʼe fakaloto mālohiʼi e Paulo te kau Kilisitiano ʼo Kolonito ke nātou foaki mo he loto katoa, ke nātou foaki tanatou ʼu meʼa ʼofa ʼi tanatou ʼu paʼaga ʼaē ʼe mole loko ʼaoga kia nātou moʼo tokoni ki te ʼu faigataʼaʼia ʼa ʼihi. ʼE mole he tahi ʼe feala ke ina tukugakoviʼi ia Paulo ʼe kaihaʼa. Neʼe ina tohi fēnei: “Koia, ʼo ʼuhiga mo te meʼa ʼaia, ko ʼaē ʼe ina to fakaveliveli ʼe ina toe utu fakaveliveli anai, pea ko ʼaē ʼe ina to fakalahi ʼe ina toe utu fakalahi anai. Ke tahi fai pe ki te meʼa kua ina fakatotonu ʼi tona loto, ʼo mole fai ʼaki he lotomamahi peʼe ʼaki he fakakinau, heʼe ʼofa te ʼAtua ki ʼaē ʼe ina foaki ʼaki he loto fiafia.”—2 Kolonito 8:1-3, 14; 9:5-7, 13.

¹⁶ Ko te ʼu meʼa ʼaē ʼe foaki fakaʼofa e ʼotatou ʼu tēhina pea mo te hahaʼi ʼaē ʼe fia logo ki te gāue ʼo te Puleʼaga faka malamanei, ʼe ko he fakamoʼoni ʼaia ia ʼaho nei ʼo tanatou faka maʼuhigaʼi te pilivilesio ʼaia. Kae, ohage pe ko tona fakamanatuʼi age e Paulo ki te kau Kolonito, ʼe lelei anai kia tatou ke tou faka ʼuhigaʼi te talanoa ʼaia ohage ko he fakamanatu.

17. Koteā te fakatuʼutuʼu ki te foaki meʼa ʼofa neʼe fakaloto mālohiʼi e Paulo ke fai, pea ʼe feala koa ke fai te meʼa ʼaia ia ʼaho nei?

¹⁷ Neʼe uga e Paulo te ʼu tēhina ke nātou fai he fakatuʼutuʼu ʼo ʼuhiga mo tanatou foaki meʼa ʼofa. Neʼe ina ʼui fēnei: “Ke koutou tahi tokaga ʼi te ʼuluaki ʼaho ʼo te vāhaʼa ʼo tuku keheʼi he meʼa ʼi tona ʼapi, ʼo mulimuli pe ki tona fealagia.” (1 Kolonito 16:1, 2) Ko te meʼa ʼaia ʼe feala ko he faʼifaʼitaki kia tatou pea mo tatatou ʼu fānau ʼo ʼuhiga mo tatatou ʼu meʼa ʼofa, peʼe tou fai ki te kokelekasio peʼe fakahagatonu ki te filiale ʼo te Sosiete Watch Tower ʼaē ʼe ōvi mai. Ko te taumatuʼa misionea neʼe hinoʼi ke ʼolo ʼo fai faka mafola ʼi te kolo ʼo te Potu Hahake ʼo Afelika, neʼe nā fakaafe te hahaʼi ʼaē ʼe fia logo ke nātou ʼōmai kia nāua ke nātou ako fakatahi te Tohi-Tapu. ʼI te fakaʼosi ʼo te ʼuluaki fono ʼaia, ko te ʼu misionea ʼaia neʼe nā ʼolo ʼo momono fakafūfū te ʼu kiʼi foʼi piesi ki te puha ʼe tohi ai “Te ʼu meʼa ʼofa ki te gāue ʼo te Puleʼaga.” Ko ʼihi ʼi te fono neʼe nātou toe fai te meʼa ʼaia. Ki muli age, ʼi te kua faʼufaʼu e te hahaʼi foʼofoʼou ʼaia te kokelekasio faka Kilisitiano, neʼe ʼalu te taupau fakakolo ki te kokelekasio ʼaia pea neʼe ina fakatokagaʼi te fai hoholo ʼo tanatou ʼu meʼa ʼofa.—Pesalemo 50:10, 14, 23.

18. ʼE lava feafeaʼi hakita tokoni ki totatou ʼu tēhina ʼe nofo ʼi te mamahi?

¹⁸ ʼE tou toe maʼu pe foki te pilivilesio ʼaē ke tou fakaʼaogaʼi totatou ʼu koloā moʼo tokoni kia nātou neʼe tō ki ai te ʼu tuʼutāmaki ʼaē ʼo te kele, ʼo toe feiā aipe kia nātou ʼaē ʼe nonofo ʼi te ʼu koga meʼa ʼe hoko ai te tau. ʼE ko he meʼa fakafiafia neʼe tou lau ʼo ʼuhiga mo te ʼu meʼa ʼofa neʼe momoli ki te Eulopa ʼo te Potu Hahake ʼuhi ko te fihifihia faka ekonomike pea mo faka politike ʼaē neʼe tau mo te potu ʼaia ʼo te kele! Ko te ʼu meʼa ʼofa pea mo te paʼaga neʼe fakahā ʼaki ai te agaʼofa ʼo totatou ʼu tēhina pea mo tanatou tokoni kia nātou ʼe fakaʼofaʼofa.b—2 Kolonito 8:13, 14.

19. Koteā te ʼu meʼa maʼuhiga ʼe feala ke tou fai moʼo tokoni kia nātou ʼaē ʼe gāue ʼi te minisitelio ʼi te temi fuli pe?

¹⁹ ʼE tou faka māʼoluga ʼaupito te gāue ʼo totatou ʼu tēhina ʼaē ʼe gāue ʼi te temi fuli pe ohage ko ni ʼu pionie, ko ni ʼu taupau feʼaluʼaki, ko he kau misionea, pea mo he kau Petelite lotolelei. ʼO mulimuli pe ki ʼotatou ʼu fealagia, e lagi feala pe ke tou foaki he tokoni fakakoloa kia nātou. Ohage la, mokā ʼe ʼaʼahi tokotou kokelekasio e te taupau fakakolo, e lagi feala pe ke koutou fakaafe ke moe ʼi tokotou ʼapi, ke kai mo koutou, peʼe ko he tokoni ki te totogi ʼo tana ʼu feʼaluʼaki. ʼE mole haganoa tatatou Tāmai ʼaē ʼe ʼi selo ki te taʼi agaʼofa ʼaia heʼe ina loto ke gaohi fakalelei tana kau kaugana. (Pesalemo 37:25) Kua hili nei kiai te ʼu taʼu, ko te tēhina neʼe ina fakaafe ki tona ʼapi te taupau feʼaluʼaki pea mo tona ʼohoana. ʼI te temi ʼaē neʼe tutuʼu ai te taumatuʼa ke nā ʼolo ki te fono gāue ʼi te pōʼuli, neʼe foaki age e te tēhina kia nāua te sila. ʼI loto ʼo te sila neʼe tuku ai te falā (ʼe fakatatau ki te tola U.S. e tahi), pea mo te palalau ʼaenī neʼe tohi ai: “Ko he tī, peʼe ko he lite penisini pe e 3,78.” ʼE ko he loto fakafetaʼi neʼe fakahā ʼaki te agavaivai ʼaia!

20. Koteā te pilivilesio pea mo te maʼua ʼaē ʼe mole tou loto ke tou lotonoa kiai?

²⁰ ʼI te faʼahi fakalaumālie, ko te hahaʼi ʼa Sehova ʼe tapuakina! ʼE tou maʼu te kātoaga fakalaumālie ʼi ʼa tatatou ʼu fakatahitahi, ʼaē ʼe tou maʼu ai tatatou ʼu tohi faka Tohi-Tapu foʼou, te ʼu akonaki lelei, pea mo te ʼu tokoni ʼaoga. ʼAki te lahi ʼo totatou loto fakafetaʼi ʼo ʼuhiga mo tatatou ʼu tapuakina fakalaumālie, ʼe mole galo ia tatou totatou pilivilesio pea mo totatou maʼua ʼaē ke tou foaki he paʼaga ke fakaʼaogaʼi moʼo fakahaʼele te ʼu meʼa ʼo te Puleʼaga ʼa te ʼAtua ʼi te malamanei.

‘Koutou Fai Hokotou ʼu Kaumeʼa ʼAki Te ʼu Koloā Heʼe Faitotonu’

21, 22. Koteā anai te meʼa ka ʼamanaki ke hoko ki “te ʼu koloā heʼe faitotonu,” ʼo fakamaʼua ai kia tatou ke tou fai teā ʼi te temi nei?

²¹ ʼIo, ʼe lahi ʼaupito te ʼu faʼahiga ʼaluʼaga ke tou fakahā ai, ko te tauhi kia Sehova ʼe tuʼulaga ʼuluaki ʼi totatou maʼuli, pea ʼe ko hona faʼahiga fakahā fakalelei ʼe ko hatatou muliʼi te tokoni ʼaenī ʼa Sesu: “Koutou fai hokotou ʼu kaumeʼa ʼaki te ʼu koloā heʼe faitotonu, koteʼuhi ke hoko mai la te temi ʼaē ʼe puli ai te ʼu koloā ʼaia, pea ʼe feala ke nātou tali koutou ʼi te ʼu nofoʼaga heʼegata.”—Luka 16:9.

²² Koutou fakatokagaʼi, ko Sesu neʼe talanoa ki te mole fakahoko ʼo te faʼahi ʼaia e te ʼu koloā heʼe faitotonu. ʼIo, ʼe aʼu mai anai te ʼaho ʼaē ʼe liliu ai leva anai te paʼaga ʼo te tuʼu ʼaenī ʼo vaʼiganoa. Neʼe fakakikite fēnei e Esekiele: “ ʼE nātou lī anai tanatou paʼaga ki te ʼu ala, pea ko tanatou aulo ʼe liliu anai ko he meʼa ʼe fakatupu fakalialia. ʼE mole ko tanatou paʼaga pea mo tanatou aulo ʼaē ʼe feala anai ke hāofaki ai nātou ʼi te ʼaho ʼo te hāūhāū ʼo Sehova.” (Esekiele 7:19) ʼO aʼu ki te temi ʼaē ʼe hoko ai te meʼa ʼaia, ʼe tonu ke tou agapoto pea mo fakapotopoto ʼi tatatou faʼahiga fakaʼaogaʼi ʼaē ʼo tatatou ʼu koloā. Koia ʼe mole tou fakahemala anai mo kapau ʼe tou tokagaʼi te fakatokaga ʼaenī ʼa Sesu: “Kapau neʼe mole koutou agatonu ʼo ʼuhiga mo te ʼu koloā heʼe faitotonu, ko ai ʼaē ka ina tuku atu anai ke koutou taupau te koloā ʼaē ʼe moʼoni? . . . ʼE mole feala hakotou kaugana ki te ʼAtua pea mo te ʼu koloā.”—Luka 16:11-13.

23. Koteā anai te meʼa ʼe tonu ke tou fakaʼaogaʼi fakapotopoto, pea koteā anai totatou fakapale?

²³ Koia, tou taupau maʼu te ʼu fakamanatu ʼaia, ʼo tuku ki muʼa ʼi totatou maʼuli te tauhi kia Sehova pea mo tou fakaʼaogaʼi fakapotopoto totatou ʼu koloā. Koia ʼe feala ke tou taupau maʼu tatatou felogoi mo Sehova pea mo Sesu, ʼaē ʼe nā fakapapau mai ʼi te temi ʼaē ʼe mole maʼu ai te paʼaga ʼe nā tali anai tatou ʼi “te ʼu nofoʼaga heʼegata,” ʼaki te ʼamanaki ʼo he maʼuli heʼegata ʼi te Puleʼaga ʼi selo peʼe ko te palatiso ʼi te kele.—Luka 16:9.

[Nota ʼi te lalo pasina]

ʼE Kei Koutou Manatuʼi Koa?

◻ Neʼe koteā te tali ʼa Iselaele ki te fakaafe ʼa Sehova ʼaē ke lagolago ki te laga ʼo te tapenakulo?

◻ He koʼe ko te meʼa ʼofa ʼa te fafine vitua neʼe mole ko he meʼa noa?

◻ Koteā te maʼua ʼe tau mo te kau Kilisitiano ʼo ʼuhiga mo tanatou faʼahiga fakaʼaogaʼi ʼaē ʼo tonatou ʼu koloā?

◻ ʼE lava feafeaʼi ke ʼaua naʼa tou fakahemala ʼi tatatou fakaʼaogaʼi ʼo te paʼaga?

[Paki ʼo te pasina 15]

Ko te meʼa ʼofa ʼa te fafine vitua, logope la tona veliveli, neʼe mole ko he meʼa noa

[Paki ʼo te ʼu pasina 16, 17]

Ko tatatou ʼu meʼa ʼofa ʼe lagolago ki te gāue faka malamanei ʼo te Puleʼaga