Neʼe Nātou Fai Te Finegalo ʼo Sehova

Ko He ʼu Meʼa ʼOfa Moʼo Fakahaʼele Ki Muʼa Te Tauhi Maʼa

NEʼE sio mata te kau Iselaele ki te mālohi ʼaē neʼe fakaʼaogaʼi e Sehova moʼo hāofaki tana hahaʼi. Neʼe nātou sisio ki te ava ʼo te Tai Kula, ʼo feala ai tanatou fakalaka ʼi he kele kua mamaha pea mo nātou hāo mai te kau solia Esipito. ʼI te tahi kauvai ʼo te tai, neʼe nātou mamata mai mamaʼo ki te toe mapeʼe ifo ʼo te tai ki te kau solia ʼaē neʼe nātou tuli nātou. Neʼe hāofaki ai e Sehova tonatou maʼuli!​—Ekesote 14:21-​31.

Kae meʼa fakaʼofaʼofa foki, he neʼe mole fakafetaʼi ʼihi kau Iselaele ki te meʼa ʼaē neʼe fai e tonatou ʼAtua. ʼI te nofo ʼa Moisese ʼi te moʼuga ʼo Sinai, neʼe nātou foaki tanatou ʼu meʼa aulo kia Alone ke ina faʼu ʼaki he fakatātā ke nātou tauhi kiai. ʼI te liliu mai ʼa Moisese, neʼe ina maʼu ai te hahaʼi agatuʼu ʼaia ʼe lolotoga kakai, mo ʼiʼinu, mo memeʼe, pea mo tuʼutuli ia muʼa ʼo te ʼuhiʼi pipi aulo! ʼI te fakatotonu ʼa Sehova, neʼe matehi ai te toko 3 000​—neʼe lagi ko nātou ʼaē neʼe nātou ʼuluaki fakatuʼutuʼu te agatuʼu ʼaia. ʼI te ʼaho ʼaia, neʼe maʼu ai e te hahaʼi ʼa te ʼAtua te ako maʼuhiga ʼo ʼuhiga mo te maʼua ʼaē ke nātou tauhi ʼāteaina pe kia Sehova.​—Ekesote 32:​1-6, 19-​29.

Hili pe te meʼa ʼaia, pea neʼe teuteu Moisese ke ina fakahoko te fakatotonu ʼa te ʼAtua ke ina laga te tapenakulo, ko he fale fehikitaki ki te tauhi. Moʼo fai te gāue ʼaia, ʼe ʼaoga anai he tuʼuga meʼa gāue pea mo he kau gāue faiva. ʼE maʼu anai ʼifea te ʼu meʼa ʼaia? Pea koteā te ʼaoga ʼo te fakamatala faka Tohi-Tapu ʼaia kia tatou?

ʼE Nātou Foaki Tonatou ʼu Koloā Pea Mo Tanatou Poto

ʼAki ia Moisese, neʼe fakatotonu e Sehova ki te kau Iselaele: “Koutou toʼo iō koutou he koloā maʼa Sehova. Ko te tagata fuli pe ʼe lotolelei kiai, ke ina ʼaumai ohage ko he meʼa ʼofa maʼa Sehova.” Ko te faʼahiga meʼa ʼofa feafeaʼi? Neʼe talanoa ia Moisese ki te aulo, mo te siliva, mo te kapa, mo te ʼu kauʼi filo, mo te ʼu kie, mo te ʼu kiliʼi manu, mo te papa, pea mo te ʼu maka maʼugataʼa.​—Ekesote 35:​5-9.

Neʼe feʼauga te ʼu koloā ʼa te kau Iselaele moʼo fai te ʼu meʼa ʼofa ʼaia. Koutou manatuʼi, ʼi tanatou mavae ʼi Esipito, neʼe nātou ʼave mo nātou he aulo pea mo he siliva, ʼo feiā mo te tuʼuga mutuʼi meʼa. Ei, “neʼe nātou kaihaʼa fuli te ʼu meʼa ʼa te kau Esipito.”a (Ekesote 12:35, 36) ʼI muʼa atu, neʼe lotolelei te kau Iselaele ke nātou fakaʼaogaʼi tonatou ʼu koloā moʼo faʼu ʼaki he fakatātā ki te tauhi hala. ʼE mole tonu koa la ke feiā tonatou loto, ke nātou fai he ʼu meʼa ʼofa moʼo fakahaʼele ki muʼa te tauhi moʼoni?

Koutou fakatokagaʼi, neʼe mole ʼui e Moisese pe ko te fia ʼaē neʼe tonu ke nātou tahi foaki, pea neʼe mole ina fia fakaufiufi he tahi ke lahi tana meʼa ʼofa. Kae neʼe ina pāui “te tagata fuli ʼaē ʼe lotolelei kiai.” ʼE mahino ia, neʼe ʼiloʼi e Moisese ʼe mole ʼaoga anai ke ina fakakinauʼi te hahaʼi ʼa te ʼAtua. Neʼe falala ʼe nātou foaki anai ia meʼa fuli ʼaē ʼe nātou lavaʼi.​—Vakaʼi ia 2 Kolonito 8:​10-​12.

Kae ko te gāue ʼaia, ʼe mole gata pe anai ki te foaki ʼo he ʼu meʼa gāue. Neʼe toe folafola fēnei ia Sehova ki te kau Iselaele: “Ke ʼōmai mai ia koutou ia nātou fuli ʼaē ʼe poto ʼonatou loto, pea ke nātou fai ia meʼa fuli ʼaē neʼe fakatotonu e Sehova.” Ei, ʼe ʼaoga anai he kau gāue faiva ki te gāue ʼaia. Ko “te ʼu faʼahiga poto gāue fuli pe”​—te gāue papa, mo te gāue ukamea, pea mo te gāueʼi ʼo te aulo​—ʼe ʼaoga anai moʼo fakahoko te gāue ʼaia. ʼE mahino ia, ʼe takitaki anai e Sehova te faiva ʼa te kau gāue, pea ʼe ko ia ʼaē ka vikiʼi anai ki te lava lelei ʼo te gāue ʼaia.​—Ekesote 35:​10, 30-​35; 36:​1, 2.

Neʼe tali lelei e te kau Iselaele te fakaafe ʼaē ke nātou foaki tonatou ʼu koloā pea mo tonatou poto. ʼE ʼui fēnei e te Tohi-Tapu: “Neʼe nātou ʼōmai ai, ia nātou fuli ʼaē neʼe uga e ʼonatou ʼu loto, pea neʼe nātou fetuku mai, ia nātou fuli ʼaē neʼe uga e tonatou ʼatamai, te meʼa ʼofa kia Sehova ʼo ʼuhiga mo te gāue ʼaē ki te fale fehikitaki mo te tauhi ʼaē ʼe fai ai pea mo te ʼu mutuʼi meʼa taputapu. Pea neʼe nātou haga ʼōmai, te hahaʼi tagata pea mo te hahaʼi fafine, ia nātou fuli ʼaē neʼe lelei tonatou loto.”​—Ekesote 35:21, 22.

Tona ʼAoga Kia Tatou

Ia ʼaho nei, ʼe fakahoko te toe gāue fai faka mafola ʼo te logo lelei ʼo te Puleʼaga ʼa te ʼAtua ʼaki he ʼu meʼa ʼofa. ʼI te agamāhani, ko te ʼu meʼa ʼofa ʼaia ʼe ko te falā. ʼI te tahi ʼu ʼaluʼaga, ʼe fakaʼaogaʼi e te ʼu tēhina mo tuagaʼane Kilisitiano tanatou ʼu faiva ʼi te gāue ʼaē ko te laga ʼo te ʼu Fale ʼo te Puleʼaga, mo te ʼu Fale Fakatahi, pea mo te ʼu filiale. ʼE toe ʼi ai mo te gāue ʼaē ʼe fai ʼi te ʼu Petele kehekehe e teau tupu ʼi te malamanei katoa, ʼaē ʼe ʼaoga kiai te ʼu faʼahiga poto kehekehe. Ko nātou fuli ʼaia ʼaē neʼe nātou lotolelei ke nātou fai te ʼu meʼa ʼofa ʼaia, ʼe feala hanatou tui papau ʼe mole galoʼi anai e Sehova tanatou gāue kinakina!​—Hepeleo 6:​10.

ʼE toe moʼoni te faʼahi ʼaia ʼo ʼuhiga mo te gāue ʼaē ʼe tou fai takitokotahi ʼi te minisitelio faka Kilisitiano. ʼE fakaloto mālohiʼi ia tatou fuli ke tou fakaʼaogaʼi fakapotopoto totatou temi ke tou kau mālohi ʼi te gāue fai faka mafola. (Mateo 24:14; Efeso 5:​15-​17) ʼE fai e ʼihi te faʼahi ʼaia ʼo nātou gāue pionie ʼi te temi katoa. ʼUhi ko tonatou ʼaluʼaga, ʼe mole feala ki ʼihi ke nātou fakaʼaogaʼi he temi lahi feiā ki te minisitelio ohage ko te kau pionie. Kae ʼe toe leleiʼia foki e Sehova ia nātou ʼaia. Ohage ko te ʼu koloā ʼaē neʼe foaki ki te laga ʼo te tapenakulo, ʼe mole fakaʼui mai e Sehova pe ko te fia ʼaē ʼe tonu ke kita foaki age kia te ia. Kae ko te meʼa ʼaē ʼe ina fakamaʼua mai kia tatou, ko te tauhi kia te ia ʼaki totatou loto katoa, mo totatou nefesi katoa, mo totatou ʼatamai katoa, pea mo totatou mālohi katoa. (Maleko 12:30) Kapau ʼe tou fai te faʼahi ʼaia, pea ʼe tou ʼiloʼi papau ʼe ina fakapale anai tatou ʼuhi ko te ʼu meʼa ʼofa ʼaē ʼe tou fai moʼo fakahaʼele ki muʼa te tauhi moʼoni.​—Hepeleo 11:6.

[Nota ʼi te lalo pasina]