ʼE Koutou Maʼuhiga Kia Mata ʼo Te ʼAtua!

“Neʼe ʼau ʼofa kia te koe ʼaki te ʼofa ʼe mole hona gataʼaga. Ko te tupuʼaga la ʼaia ʼo taku fakalalataʼi koe ʼaki te lotoʼofa.”—Selemia 31:3.

1. E feafeaʼi te kehekehe ʼo te aga ʼaē ʼa Sesu ki te hahaʼi ʼi tona temi pea mo ʼaē ʼa te kau Faliseo?

NEʼE feala pe ʼi tona ʼu mata ke nātou sisio ki tana loto tokaga. Ko te tagata ʼaia, ko Sesu, neʼe mole tatau ia mo te kau takitaki lotu; neʼe loto tokaga ia. Neʼe ʼofa mamahi ki te hahaʼi he “neʼe nātou ʼāhua pea mo mavetevete, ohage he faga ōvi ʼe mole honatou tagata tauhi.” (Mateo 9:36) Neʼe lau foki ko he kau tauhi ōvi ʼe ʼofa, ʼe nātou fakafofoga he ʼAtua ʼofa mo loto manavaʼofa. Kae neʼe mole hoko he meʼa feiā ia, neʼe nātou faka ʼuhigaʼi pe te hahaʼi ohage ko he hahaʼi maveuveu—pea mo malaʼia!a (Soane 7:47-49; vakaʼi ia Esekiele 34:4.) ʼE ʼiloga lelei, ko te taʼi agavale ʼaia, ko he aga ʼe mole fakatafito ki te Tohi-Tapu neʼe ko he meʼa ia ʼe kehe mo te manatu ʼa Sehova ki tana hahaʼi. Neʼe ʼui maʼana ki tona fenua ko Iselaele: “Neʼe ʼau ʼofa kia te koe ʼaki he ʼofa ʼe mole hona gataʼaga.”—Selemia 31:3.

2. Neʼe feafeaʼi te fakalotoʼi e te ʼu kaugā fagona e toko tolu ʼo Sopo ke manatu ia neʼe mole hona ʼaoga kia mata ʼo te ʼAtua?

² Kae, ʼe mahino ia ko te kau Faliseo neʼe mole ko nātou ʼaē neʼe ʼuluaki faigaʼi ke nātou fakalotoʼi te kau ōvi ʼofaina ʼa Sehova ʼe mole honatou ʼaoga. Koutou fakatokagaʼi te faʼifaʼitaki ʼa Sopo. Kia Sehova neʼe faitotonu ia pea mole hana lākahala, kae ki te ʼu “tagata fakaloto fīmālie” e toko tolu neʼe nātou ʼui ko Sopo neʼe ko he tagata ʼaposita aga heʼeʼaoga pea mo agakovi ʼe mate anai ʼo mole ina tuku he suvenia neʼe maʼuli moʼoni. Neʼe nātou tala fakahagatonu ko te ʼAtua ʼe mole tokaga pe la ki te faitotonu ʼa Sopo, heʼe māʼiape la mo te ʼAtua ʼe mole falala ki tana kau ʼaselo totonu pea ʼi tana manatu pe la ko te lagi ʼe heʼemaʼa!—Sopo 1:8; 4:18; 15:15, 16; 18:17-19; 22:3.

3. Koteā te ʼu puleʼaki ʼe fakaʼaogaʼi e Satana ia ʼaho nei moʼo fakalotoʼi te hahaʼi ke nātou manatu ʼe mole honatou ʼaoga pea ʼe mole ʼofainaʼi nātou ia?

³ Ia ʼaho nei, ʼe kei fakaʼaogaʼi pe e Satana te ‘puleʼaki fakakākā’ ʼaia moʼo fakalotoʼi te hahaʼi ke nātou manatu ʼe mole ʼofainaʼi nātou pea ʼe mole honatou ʼaoga. (Efesi 6:11, nota ʼi te lalo pasina) ʼE moʼoni te faʼahi ʼaia, ʼe ina tautau fakalalataʼi te hahaʼi ʼaki tana haga ʼo ʼeke tanatou fiatuʼu. (2 Kolonito 11:3) Kae ʼe toe fiafia foki ʼi tana puleʼi te ʼuhiga fakaʼapaʼapa ʼa te hahaʼi vaivavai. ʼE hoko tāfito te faʼahi ʼaia ʼi te ʼu “ ʼaho fakamuli” pea mo maʼuhiga ʼaenī. Tokolahi ia ʼaho nei ʼe nātou tutupu ʼi te ʼu famili ʼe mole kei maʼu ai te “ ʼofa”; tokolahi ʼe nātou felāveʼi ʼi te ʼaho fuli mo nātou ʼaē ʼe aga nekenekea, mo manatu pe kia nātou, pea mo logogataʼa. (2 Timoteo 3:1-5) Ko te ʼu taʼu ʼaē neʼe felāveʼi ai ʼihi mo te gaohi koviʼi, mo te fakapalatahi, te loto fehiʼa, te heʼe faitotonu, ʼe feala ke nātou manatu ʼe mole kei ʼi ai honatou ʼaoga pea ʼe mole ʼofainaʼi nātou ia. Neʼe tohi fēnei e te tagata: “ ʼE mole ʼau logoʼi ʼe ʼau ʼofa peʼe ʼofainaʼi ʼau e hina tahi. ʼI taku manatu ʼe faigataʼa haku faka tui ko te ʼAtua ʼe tokaga kia meʼa fuli ʼo ʼuhiga mo ʼau.”

4, 5. (a) He koʼe ko te manatu ʼaē ʼe mole he ʼaoga ʼe fakafeagai ki te Tohi-Tapu? (b) He koʼe koa ko tatatou faka tui ʼaē ʼe mole he ʼuhiga ʼo ʼatatou ʼu faiga ʼe ko he ikuʼaga fakatupu tuʼutāmaki?

⁴ Ko te manatu ʼaē ʼe mole hokita ʼaoga ʼe fakatupu kovi ki te moʼoni ʼo te Folafola ʼa te ʼAtua, te akonaki ʼo ʼuhiga mo te totogi. (Soane 3:16) Kapau neʼe fai e te ʼAtua te toe totogi māʼoluga—te maʼuli maʼuhiga ʼo tona ʼAlo totonu—moʼo foaki kia tatou he fealagia ke tou maʼuʼuli heʼegata, ʼe mahino ia ʼE ʼofa ia kia tatou; ʼe mahino ia ʼe tou maʼuhiga ki ʼOna ʼu mata!

⁵ Pea tahi ʼaē meʼa, ʼe ko he meʼa fakaloto vaivai hakita logoʼi ʼe mole leleiʼia tatou e te ʼAtua, ʼe mole pe la he meʼa ʼi ʼatatou ʼu faiga ʼe maʼuhiga! (Vakaʼi ia Tāʼaga Lea 24:10.) ʼAki te manatu ʼaia ʼe mole lelei, tatau aipe mo he fakaloto mālohi ʼe fai ʼaki he lotolelei, neʼe fai moʼo tokoni kia tatou ke ʼāsili age tatatou kaugana ki te ʼAtua ʼi te ʼu faʼahi ʼaē ʼe fealagia ai, ʼe feala ki ʼihi ke nātou logoʼi ohage ko he tautea. E lagi ʼe feala ke tou manatu ia tatou totonu pe, ko he faʼahiga meʼa pe ʼe tou fai ʼe mole feʼauga ia.

6. Koteā te faitoʼo lelei moʼo fakamālōlōʼi ni ʼu manatu ʼe mole lelei ʼo ʼuhiga mo tatou totonu pe?

⁶ Kapau ʼe koutou logoʼi he ʼu manatu feiā ʼe mole lelei, ʼaua naʼa koutou lotovaivai. Tokolahi ia tatou ʼi ʼihi temi ʼe mole lelei ʼatatou ʼu manatu ʼo ʼuhiga pe mo kita totonu. Pea ke koutou manatuʼi, ko te Folafola ʼa te ʼAtua neʼe tohi moʼo “fakatotonuʼi ʼo te ʼu meʼa fuli” pea mo “holoʼi ʼo he ʼu tule.” (2 Timoteo 3:16; 2 Kolonito 10:4) Neʼe tohi e te ʼapositolo ko Soane, ʼo fēnei: “ ʼAki te meʼa ʼaia ʼe tou ʼiloʼi ai anai ko tatou ʼe tou ʼi te moʼoni, pea ʼe tou fakafimālie anai totatou loto ʼi ʼona muʼa, ʼo ʼuhiga mo meʼa fuli ʼe tautea kiai tatou e totatou loto, heʼe ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.” (1 Soane 3:19, 20) Koia tou fakatokagaʼi age muʼa, te ʼu faʼahi e tolu ʼe akoʼi ai tatou e te Tohi-Tapu ki totatou maʼuhiga ʼaē kia Sehova.

ʼE Tou Maʼuhiga Kia Sehova

7. Neʼe feafeaʼi te akoʼi e Sesu te kau Kilisitiano fuli ʼo ʼuhiga mo tonatou maʼuhiga ʼaē kia mata ʼo te ʼAtua?

⁷ ʼUluaki, ko te Tohi-Tapu ʼe ina akoʼi fakahagatonu mai, ʼe tou tahi maʼu tona maʼuhiga kia mata ʼo te ʼAtua. Neʼe ʼui maʼa Sesu: “ ʼE mole koa la fakatau he ʼu misi e nima ki he ʼu foʼi piesi paʼaga e lua ʼe mole hona maʼuhiga? Kaʼe ʼe mole he tahi ia nātou ʼaia ʼe galo ia muʼa ʼo te ʼAtua. Kaʼe māʼia mo te ʼu fuluʼi ʼulu ʼo tokotou ʼulu kua ʼosi katoa ʼi te lau. ʼAua naʼa koutou manavasiʼi; ʼe koutou maʼuhiga lahi ake koutou ʼi he faga misi tokolahi.” (Luka 12:6, 7) ʼI te ʼu ʼaho ʼaia, ko te misi neʼe ko te ʼu manulele totogi lelei neʼe fakatau moʼo kai, kae mole he tahi ia nātou neʼe tukunoa e tona Tupuʼaga. Koia ko te tafitoʼaga kua fakatuʼu: ki te tagata—ʼaē ʼe maʼuhiga ʼaupito age ia—ko te ʼAtua ʼe ina ʼiloʼi ia meʼa fuli pe. ʼE hage pe ko te ʼu fuluʼi ʼulu ʼo tokotou ʼulu neʼe lau takitahi pe!

8. He koʼe ʼe ko he manatu tonu ia te ʼui ʼaē ko Sehova ʼe feala ke ina lau te ʼu fuluʼi ʼulu ʼo totatou ʼu ʼulu?

⁸ ʼE lau koa te ʼu fuluʼi ʼulu? Kapau ʼe koutou lotolotolua ʼo ʼuhiga mo te faʼahi ʼo te lea fakatātā ʼa Sesu ʼe mole moʼoni, koutou fakatokagaʼi age: ʼe manatuʼi lelei e te ʼAtua tana kau kaugana agatonu ke feala ai ke ina fakatuʼuake nātou—ʼo ina toe fakatupu nātou ʼaki pe tanatou ʼu agaaga fuli, ʼo kau ai tonatou code génétique faigataʼa pea mo te ʼu suvenia ʼo tonatou maʼuli katoa pea mo te ʼu meʼa ʼaē neʼe hoko. Ko te lau ʼo totatou ʼu fuluʼi ʼulu (ʼaē ʼe fakafuafua ʼe hohomo ʼo lauʼi 100 000) ʼe ko he meʼa noa ia mokā fakatatau kiai!—Luka 20:37, 38.

ʼE Tou Maʼuhiga Feafeaʼi Koa Kia Sehova?

9. (a) Koteā te ʼu kalitate ʼaē ʼe fakafuafua e Sehova? (b) He koʼe koa ʼi takotou manatu ko te ʼu taʼi kalitate ʼaia ʼe maʼuhiga kia te ia?

⁹ Lua, ʼe akoʼi tatou e te Tohi-Tapu pe koteā ʼaē ʼe leleiʼia e Sehova ia tatou. Ko tona fakanounou, ʼe ina leleiʼia totatou ʼu kalitate ʼaoga pea mo ʼatatou ʼu faiga. Ko te Hau ko Tavite neʼe ina ʼui fēnei ki tona foha ko Salomone: “Ko Sehova ʼe ina sivi te ʼu loto fuli pea ʼe ina ʼiloʼi te ʼu faleleʼaga fuli pe ʼo te ʼu fakakaukau.” (1 Fakamatala 28:9) ʼI te kumi e te ʼAtua te ʼu loto ʼo te tagata ʼe lauʼi miliale ʼi te mālama agamālohi ʼaenī, ʼi te mālama fonu ʼi te loto fehiʼa, ʼe mahino ia ʼe ko he meʼa fakafiafia kia te ia mokā ina maʼu he loto ʼe ʼofa ki te tokalelei, ki te moʼoni, pea mo te faitotonu! (Vakaʼi ia Soane 1:47; 1 Petelo 3:4.) Koteā te meʼa ʼe hoko ʼi te temi ʼaē ʼe maʼu ai e te ʼAtua he loto ʼe fonu ʼaki te ʼofa kia te ia, pea mo kumi ke ina ʼiloʼi ia ia pea mo vahevahe te ʼatamai mālama ʼaia mo niʼihi? Ia Malakia 3:16, ʼe ʼui mai e Sehova ʼe logo kia nātou ʼaē ʼe palalau mo ʼihi ʼo ʼuhiga mo ia ʼo toe feiā pe ʼe ʼi ai te “tohi fakamanatu” ʼo ʼuhiga mo “nātou [fuli] ʼaē ʼe manavasiʼi kia Sehova pea mo nātou ʼaē ʼe manatu ki tona huafa.” Ko te ʼu taʼi kalitate ʼaia ʼe maʼuhiga kia te ia!

10, 11. (a) ʼE lava feafeaʼi ki ʼihi hanatou mole tokagaʼi te fakamoʼoni ʼaē ko Sehova ʼe ina faka maʼuhigaʼi tanatou ʼu kalitate lelei? (b) ʼE hā feafeaʼi mai ʼi te faʼifaʼitaki ʼa Abijah ko Sehova ʼe ina faka maʼuhigaʼi te ʼu kalitate lelei ʼi te ʼu faʼahi fuli?

¹⁰ Kae ko he loto ʼe mole lelei ʼo ʼuhiga mo kita totonu ʼe feala pe ke fakafefeka ki te fakamoʼoni ʼaē ʼo totatou maʼuhiga kia mata ʼo te ʼAtua. Ko te loto ʼaia ʼe feala pe ke manatu fakalogologo fēnei, ‘ ʼE ʼi ai pe ʼihi ʼe faiva age nātou ʼi te ʼu kalitate ʼaenī ia ʼau. ʼE fakahemala ia Sehova mo kapau ʼe ina fakatatau ʼau ki niʼihi!’ ʼE mole fakatatau e Sehova tana kau kaugana, pea ʼe mole aga fefeka ia, peʼe mo ina fai ni ʼu lekula ʼe fefeka. (Kalate 6:4) ʼE sio ia ki te ʼu loto ʼaki te toe poto lahi, pea ʼe ina fakafuafua te ʼu kalitate lelei ʼi tonatou ʼu ʼaluʼaga fuli.

¹¹ Ohage la, ʼi te temi ʼaē neʼe fakatuʼutuʼu ai Sehova ʼe tonu ke fakaʼauha te puleʼaga faka ʼaposita katoa ʼo te Hau ko Selopoame, ke pulihi ohage ko he “ ʼotaʼota,” neʼe Ina fakatotonu pe ko te tokotahi, ko Abijah ʼi te ʼu foha ʼo te hau, ke fai hona ʼavaifo fakalelei. Koteā tona tupuʼaga? “Ia ia tokotahi pe neʼe maʼu ai te meʼa lelei ʼo ʼuhiga mo Sehova, te ʼAtua ʼo Iselaele.” (1 Hau 14:10, 13) Neʼe faka ʼuhiga koa ko Abijah neʼe ko he tagata atolasio agatonu ʼa Sehova? Kailoa ia, he neʼe mate ohage pe ko nātou ʼaē ʼo tona loto fale ʼaē neʼe agakovi. (Teutalonome 24:16) Kae, neʼe fakafuafua e Sehova te “meʼa lelei” ʼaē neʼe sio kiai ʼi te loto ʼo Abijah pea mo ina mulimuli pe kiai. ʼE ʼui fēnei e te tohi Matthew Henry’s Commentary on the Whole Bible: “ ʼI te faʼahi pe ʼaē ʼe ʼi ai he kiʼi meʼa lelei feiā, ʼe ʼiloʼi anai: ko te ʼAtua ʼaē ʼe ina kumi te ʼu kalitate lelei ia tatou ʼe mahino pe kia ia, māʼiape la mokā ko he kiʼi meʼa lelei ʼe veliveli, pea ʼe fakafiafia aipe ia.” Kae ʼaua naʼa galo mo kapau ʼe maʼu e te ʼAtua tatau aipe peʼe veliveli he faʼahiga kalitate lelei ia koutou, ʼe feala ke ina fakatuputupu ʼo mulimuli pe ki takotou faiga ʼaē ke koutou kaugana agatonu kia te ia.

12, 13. (a) ʼE fakahā feafeaʼi e te Pesalemo 139:3 te haga ʼaē ʼa Sehova ʼo fakafuafua tatatou ʼu faiga? (b) ʼE feala ke faka ʼuhiga feafeaʼi te ʼui ʼaē ko Sehova ʼe ina sivisivi fakalelei tatatou ʼu gāue?

¹² ʼE fakafuafua e Sehova tatatou ʼu faiga ʼo mulimuli pe kiai. Ia Pesalemo 139:1-3, ʼe tou lau fēnei: “Sehova neʼe ke sivisivi ʼau pea ʼe ke ʼiloʼi ʼau. Ko koe, ʼe ke ʼiloʼi te temi ʼaē ʼe ʼau nofo ai ki lalo, pea mo te temi ʼaē ʼe ʼau tuʼu ai, neʼe ke ʼiloʼi mai mamaʼo taku manatu. Mokā ʼau folau pea mokā ʼau takoto, kua ke fakafuafua pe, pea ko ʼaku ʼu ala fuli kua ke māhani pe kiai.” Koia ʼe ʼiloʼi lelei pe e Sehova te ʼu gāue fuli ʼaē ʼe tou fai. Kae ʼe fakalaka maumau te mālama ʼa Sehova. ʼI te faka Hepeleo ko te talanoa ʼaē “ko ʼaku ʼu ala fuli kua ke māhani pe kiai” ʼe toe feala pe ke fakaliliu “ke ke taupau taku ʼu ala” peʼe “fakapelepeleʼi taku ʼu ala fuli.” (Vakaʼi ia Mateo 6:19, 20.) Kae ʼe lava feafeaʼi koa he fakapelepeleʼi e Sehova ʼo tatatou ʼu ala mo kapau ʼe mole tou haohaoa pea mo tou agahala?

¹³ Tahi meʼa maʼuhiga, ʼi te manatu ʼa ʼihi kau ako, ʼi te temi ʼaē neʼe tohi ai e Tavite ko Sehova neʼe ina “fua” tana ʼu folau pea mo tona ʼu temi mālōlō, ʼi tona fakaliliu faka Hepeleo neʼe faka ʼuhiga moʼo “vaheʼi kehe” peʼe moʼo “toʼo.” Neʼe ʼui fēnei e te tohi: “ ʼE faka ʼuhiga . . . ko te toʼo kehe te ʼu gaʼasi vao fuli, kae tuku pe te fulumeto katoa—ʼo tuku kehe te meʼa fuli ʼaē ʼe maʼuhiga. Koia ʼe faka ʼuhiga ʼi henī ko te ʼAtua, mo kapau ʼe feala ke ʼui feiā, neʼe ina toʼo ia ia. . . . Neʼe ina toʼo kehe te gaʼasi vao fuli, pea neʼe sio ki te ʼu meʼa ʼaē ʼe toe, tona ʼaluʼaga pea mo tona ʼuhiga moʼoni.” Ko te loto ʼe mole lelei kia kita totonu pe ʼe feala ke ina toʼo te ʼu meʼa ʼaē ʼe tou fai ʼi hona ʼaluʼaga fakafeagai, ʼo mole ina maʼu te manavaʼofa ʼi tana fakatonutonuʼi tatou ʼo ʼuhiga mo ni ʼu hala ʼāfea pea mo ina tekeʼi he ʼu meʼa neʼe fakahoko ʼe mole honatou ʼuhiga. Kae ko Sehova ʼe ina fakamolemole ʼatatou ʼu agahala mo kapau ʼe tou fakahemala fakamalotoloto pea mo tou faiga fakamālohi ke ʼaua naʼa tou toe fai te ʼu hala ʼaia. (Pesalemo 103:10-14; Gāue 3:19) ʼE ina tokagaʼi pea mo manatuʼi ʼatatou ʼu gāue lelei. ʼIo, ʼe ina manatuʼi te ʼu gāue ʼaia ʼi te temi fuli pe ʼaē ʼe tou nofo agatonu ai kia te ia. Kia ia, ʼe ko he aga heʼe faitotonu te galoʼi ʼo te ʼu gāue lelei, pea ko ia ʼe mole heʼe faitotonu ia ʼi he temi!—Hepeleo 6:10.

14. Koteā ʼaē ʼe hā ʼaki mai ko Sehova ʼe ina fakafuafua tatatou gāue ʼi te minisitelio faka Kilisitiano?

¹⁴ Koteā koa te ʼu gāue lelei ʼaē ʼe maʼuhiga ki te ʼAtua? ʼE faka maʼuhigaʼi e te ʼAtua teitei pe te ʼu meʼa fuli ʼe tou fai ʼaki tatatou faʼifaʼitakiʼi tona ʼAlo ko Sesu Kilisito. (1 Petelo 2:21) Pea ʼe mahino ia ko te gāue maʼuhiga ʼaupito, ko te faka mafola ʼo te logo lelei ʼo te Puleʼaga ʼo te ʼAtua. Ia Loma 10:15, ʼe tou lau fēnei: “ ʼE matalelei te ʼu vae ʼo nātou ʼaē ʼe nātou fagonogono te logo lelei ʼo te ʼu meʼa lelei!” Logope la ʼaē ʼe mole lava ke faka ʼuhigaʼi moʼoni ko ʼotatou ʼu vaʼe ʼe hage ʼe “matalelei,” ko te kupu ʼaenī neʼe fakaʼaogaʼi e Paulo ʼe tatau mo te kupu ʼaē neʼe fakaʼaogaʼi ʼi te fakaliliu faka Keleka ʼo te Septante moʼo fakamahinohino ʼo ʼuhiga mo Lepeka, Lasele, pea mo Sosefo—ia nātou toko tolu ʼaia neʼe fakatokagaʼi ʼo ʼuhiga mo tonatou matalelei. (Senesi 26:7; 29:17; 39:6) Koia ko tatatou kau ʼaē ki te gāue ʼo totatou ʼAtua, ko Sehova, ʼe ko he meʼa matalelei pea mo maʼuhiga ʼaupito ki ʼona ʼu mata.—Mateo 24:14; 28:19, 20.

15, 16. He koʼe ʼe fakafuafua e Sehova tatatou faʼa kātaki, pea ʼe faka maʼuhigaʼi feafeaʼi te faʼahi ʼaia e te ʼu palalau ʼa te Hau ko Tavite ia Pesalemo 56:8?

¹⁵ Ko te tahi kalitate ʼe fakafuafua e te ʼAtua ʼe ko tatatou faʼa kātaki. (Mateo 24:13) Koutou manatuʼi, ʼe loto ia Satana ke koutou situʼa kia Sehova. Ko te ʼaho fuli pe ʼaē ʼe koutou nofo agatonu ai kia Sehova ʼe ko he tahi ʼaia ʼaho ke tokoni kia koutou ke koutou tali ki te ʼu loi ʼa Satana. (Tāʼaga Lea 27:11) ʼI ʼihi temi ko te faʼa kātaki ʼe faigataʼa. Ko te mahaki, te ʼu mamahi ʼuhi ko te paʼaga, te ʼu lotomamahi ʼo ʼuhiga mo te ʼu meʼa ʼaē ʼi te loto, pea mo te tahi ʼu fihifihia ʼe feala pe ʼi he ʼaho ko he faigataʼaʼia. Ko te tauʼi ʼo te ʼu faigataʼaʼia ʼaki te faʼa kātaki ʼe maʼuhiga ʼaupito kia Sehova. Koia la ʼaē neʼe kole ai e te Hau ko Tavite kia Sehova ke ʼai ʼona ʼu loʼimata ki te “taga kiliʼi manu” fakatātā, ʼo ina fehuʼi ʼaki he loto falala, “ ʼE mole tuku koa la nātou ʼi tau tohi?” (Pesalemo 56:8) Ei, ko Sehova ʼe ina faka maʼuhigaʼi pea mo manatuʼi te ʼu loʼimata fuli pea mo te mamahi ʼaē ʼe tou ʼutakiʼi moʼo taupau tatatou agatonu ʼaē kia te ia. Ko te ʼu loʼimata pea mo te mamahi ʼe toe maʼuhiga pe foki ki ʼona ʼu mata.

¹⁶ ʼI tana sio ki ʼotatou ʼu kalitate lelei ʼaupito pea mo ʼatatou ʼu faiga, ʼe ʼiloga ia ko Sehova ʼe ina maʼu te meʼa maʼuhiga ʼaupito ia tatou fuli pe! Logope la te ʼu faʼahiga meʼa ʼe fai e Satana kia tatou, ko Sehova ʼe sio kia tatou ʼe tou maʼuhiga pea ko he koga ʼo “te ʼu meʼa ʼaē ʼe manakoʼia ʼo te ʼu puleʼaga fuli” pea mo maʼuhiga.—Asea 2:7.

Te Meʼa ʼAē Neʼe Fai e Sehova Moʼo Fakahā Tona ʼOfa

17. He koʼe koa ko te sakilifisio faitotogi ʼa Kilisito ʼe tonu ke ina fakalotoʼi tatou ke tou tui ko Sehova pea mo Sesu ʼe nā ʼoʼofa kia tatou ʼi totatou ʼuhigaʼi tagata?

¹⁷ Tolu, e lahi te fakahā e Sehova tona ʼofa ʼaē kia tatou. ʼE mahino papau ia, ko te sakilifisio faitotogi ʼo Kilisito ʼe ko te tali mālohi ʼaupito ki te fasituʼu ʼa Satana ʼaē ʼo ʼuhiga mo tatou ʼe mole hotatou ʼaoga pea mole ʼofainaʼi tatou. ʼE mole tonu ʼi he temi ke galo ia tatou ko te mate tūgaki ʼa Sesu ʼaē ʼi te pou fakamamahi ʼe ko te toe tūgaki lahi ʼaupito ʼaia e tahi neʼe ʼutaki e Sehova ʼi tana sio ki te mate ʼo tona ʼAlo ʼofaina, neʼe ko he fakamoʼoni ʼo tonā ʼofa kia tatou. Pea tahi ʼaē, ko te ʼofa ʼaia ʼe faka ʼuhiga kia tatou takitokotahi. Ko te meʼa ʼaia neʼe manatuʼi e te ʼapositolo ko Paulo, ʼo ina tohi fēnei ai: “Ko te ʼAlo ʼo te ʼAtua . . . neʼe ʼofa kia te ʼau pea mo ina foaki ia ia ʼuhi ko ʼau.”—Kalate 2:20.

18. E feafeaʼi te haga ʼaē ʼa Sehova ʼo taki tatou kia Kilisito?

¹⁸ Neʼe fakahā e Sehova tona ʼofa kia tatou ʼaki tana tokoniʼi tatou takitokotahi ke tou fakaʼaogaʼi te ʼu lelei ʼo te sakilifisio ʼo Kilisito. Neʼe ʼui fēnei e Sesu ia Soane 6:44: “ ʼE mole lava ki he tagata ke haʼu kia te ʼau gata pe mokā ko te Tāmai, ʼaē neʼe ina fekauʼi mai ʼau, ʼe ina taki mai kia te ia.” ʼAki te gāue faka mafola, ʼaē ʼe tuku mai kia tatou takitokotahi, pea mo tona laumālie maʼoniʼoni, ʼaē ʼe fakaʼaogaʼi e Sehova moʼo tokoni kia tatou ke tou mahino pea mo tou maʼuliʼi te ʼu moʼoni fakalaumālie logope totatou ʼu gataʼaga pea mo totatou ʼu hala, ʼe taki e Sehova ia tatou takitokotahi ki tona ʼAlo pea mo te ʼamanaki ʼo he maʼuli heʼegata. Koia ʼe feala ai kia Sehova ke ina ʼui ʼo ʼuhiga mo tatou te meʼa ʼaē neʼe ina ʼui kia Iselaele: “Neʼe ʼau ʼofa kia te koe ʼaki he ʼofa ʼe mole hona gataʼaga. Ko te tupuʼaga la ʼaia ʼo taku fakalalataʼi koe ʼaki te lotoʼofa.”—Selemia 31:3.

19. He koʼe koa ʼe tonu ke fakalotoʼi tatou e te pilivilesio ʼo te faikole ʼo ʼuhiga mo te ʼofa ʼaē ʼa Sehova kia tatou?

¹⁹ Kae lagi ʼaki te pilivilesio ʼaē ʼo te faikole, ʼaē ʼe tou ʼiloʼi ai te ʼofa ʼo Sehova ʼi hona ʼaluʼaga ʼāteaina pe. ʼE ina fakaafe ia tatou fuli ke tou “faikole tuʼumaʼu” kia te ia. (1 Tesalonika 5:17) ʼE fakalogo! ʼE higoa pe foki la ia “Ko Ia ʼaē ʼe fagono ki te faikole.” (Pesalemo 65:2) Neʼe mole ina tuku ifo te gāue ʼaia ki he tahi age, māʼiape la tona ʼAlo totonu. Koutou fakakaukau age muʼa: Ko te Tupuʼaga ʼo te ʼatulaulau ʼe ina fakaloto mālohiʼi tatou ke tou fakaōvi age kia te ia ʼaki te faikole, ʼaki he palalau fakahagatonu. ʼE toe feala pe foki ki ʼakotou ʼu kolekole ke nātou uga Sehova ke ina fai he meʼa māʼiape la neʼe mole tonu ke ina fai.—Hepeleo 4:16; Sake 5:16; vakaʼi ia Isaia 38:1-16.

20. He koʼe koa ko te ʼofa ʼa te ʼAtua ʼe mole ko he takuʼaki ke tou faka maʼuhigaʼi ia tatou pea mo tou manatu pe kia kita?

²⁰ ʼE tonu anai ki he Kilisitiano ʼe mole ia ia te aga fakapotopoto ke ina maʼu he fakamoʼoni feiā ʼo ʼuhiga mo te ʼofa pea mo te tokaga ʼa te ʼAtua ohage ko he meʼa moʼo takuʼaki ʼo hana sio kia ia totonu ʼe maʼuhiga age logope la ʼi tana manatu ʼe mole feiā ia. Neʼe tohi e Paulo fēnei: “Koteʼuhi, ʼaki te ʼofa heʼe tau ʼaē neʼe tuku mai kia te ʼau, ʼe ʼau ʼui atu kia koutou takitokotahi ke ʼaua naʼa lahi fau te fakafuafua ʼo koutou ʼo fakalaka ʼi te fua māhani; kae ko te fakafuafua ʼaē ke feala he maʼu ʼo te fakapotopoto, ʼo tahi mulimuli pe ki te faʼahiga tui ʼaē neʼe tuku age ki ai.” (Loma 12:3) Koia ʼi tatatou fakafiafia ʼi te ʼofa ʼo totatou Tāmai ʼe ʼi selo, tou fakapotopoto pea mo tou manatuʼi ko te manavaʼofa ʼaia ʼo te ʼAtua ʼe heʼe tau.—Vakaʼi ia Luka 17:10.

21. Koteā te loi fakasatana ʼaē ʼe tonu ke tou tekeʼi tuʼumaʼu, pea koteā te moʼoni fakaʼatua ʼaē ʼe tonu ke tou fakakaukauʼi tuʼumaʼu?

²¹ Tou tahi fai te meʼa ʼaē ʼe tou fealagia kiai moʼo tekeʼi te ʼu manatu fuli ʼa Satana ʼaē ʼe ina fakahā ʼi te mālama ʼāfea ʼaenī ka fakaʼauha. ʼE kau foki te līaki ʼo te manatu ʼaē ʼe mole hotatou ʼaoga peʼe mole ʼofainaʼi tatou. Kapau ko te maʼuli ʼi te tuʼu ʼaenī neʼe ina akoʼi koutou ke koutou faka ʼuhigaʼi pe ia koutou totonu ohage ko he fihifihia lahi ʼaē ʼe māʼiape ki te toe ʼofa ʼo te ʼAtua ʼe mole lava ke ina tekeʼi, peʼe ko ʼakoutou ʼu gāue lelei ʼe māʼiape la ʼe mole hona ʼuhiga ke fakatokagaʼi e tona ʼu mata, peʼe ko ʼakoutou ʼu agahala ʼe lahi fau ia ke mole feala ke fakamolemole e te mate ʼo tona ʼAlo maʼuhiga, neʼe ko he loi neʼe fai atu kia koutou. Koutou situʼa ki te ʼu loi ʼaia ʼaki te manatu fakalialia ʼaē ʼe tau mo nātou! Tou taupau ʼi te temi fuli pe ʼi totatou ʼatamai te ʼu palalau ʼaē mai te ʼAtua ʼa te ʼapositolo ko Paulo ia Loma 8:38, 39: “ ʼE ʼau ʼiloʼi fakapapau ʼe mole ʼi ai he mate, he maʼuli, he kau ʼaselo, he ʼu puleʼaga, mo he ʼu meʼa ʼo te temi nei, mo he ʼu meʼa ʼo te temi ka haʼu, mo he mālohi, mo he māʼoluga, mo he loloto, mo he tahi age meʼa ʼe ina faʼa fakamavae anai tatou mai te ʼofa ʼo te ʼAtua, ʼaē ʼe ia Kilisito Sesu totatou ʼAliki.”

[Nota ʼi te lalo pasina]

Koteā Takotou Manatu?

◻ He koʼe koa neʼe faigaʼi e Satana ke ina fakalotoʼi tatou ke tou manatu ʼe mole hotatou ʼaoga pea ʼe mole ʼofainaʼi tatou?

◻ Neʼe feafeaʼi te akoʼi ʼo tatou e Sesu ko Sehova ʼe ina fakafuafua ia tatou fuli pe?

◻ E feafeaʼi hatatou ʼiloʼi ko Sehova ʼe ina faka maʼuhigaʼi totatou ʼu kalitate lelei?

◻ ʼE lava feafeaʼi hatatou ʼiloʼi papau ko Sehova ʼe ina faka maʼuhigaʼi ʼatatou ʼu faiga?

◻ Neʼe fakamoʼoni feafeaʼi e Sehova tona ʼofa ʼaē kia tatou ʼi totatou ʼuhigaʼi tagata?

[Paki ʼo te pasina 13]

ʼE tokagaʼi pea mo manatuʼi e Sehova ia nātou ʼaē ʼe nātou manatuʼi tona huafa