Kua Lau e Sehova “Te ʼu Fuluʼi ʼUlu Fuli ʼo Tokotou ʼUlu”

“[ʼE] mole he [pasele] . . . ʼe tō ki te kele ka mole ʼiloʼi e takotou Tāmai. Kae māʼia mo te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau.”​—Mateo 10:​29, 30, MN.

1, 2. (a) He koʼe neʼe manatu ia Sopo kua līʼakina ia ia e te ʼAtua? (b) Ko te ʼu palalau ʼa Sopo, neʼe ko he fakafeagai koa kiā Sehova? Koutou fakamahino.

“ ʼE AU pāui kiā te koe, Ê ʼAtua, kae ʼe mole ke tali mai, pea ka au faikole atu, ʼe mole ke tokaga mai. Kua ke agakovi kiā te au; ʼe ke fakamamahiʼi au mo tou mālohi kātoa.” Neʼe lotomamahi ʼaupito ia te tagata ʼaē neʼe ina fai te ʼu palalau ʼaenī, pea neʼe lotomamahi tonu. Koteʼuhi neʼe kua puli fuli tona ʼu koloā, pea neʼe mamate mo tana ʼu fānau ʼi te matagi lahi, pea ʼi te lakaga leva ʼaē, kua kau ia ʼi te mahaki fakamataku. ʼE higoa te tagata ʼaia ko Sopo, pea ke feala ke ʼaoga te fakamatala ʼo tona maʼuli kiā tatou, neʼe fakamatala ʼi te Tohi-Tapu ia te ʼu ʼahiʼahi fakamataku ʼaē neʼe hoko kiā ia.​—Sopo 30:​20, 21, Today’s English Version.

² ʼE hage mai te ʼu palalau ʼa Sopo ʼe fakafeagai ki te ʼAtua, kae ʼe mole koia ia. Neʼe fakahā pe ia e Sopo ia te mamahi ʼaupito ʼaē ʼo tona loto. (Sopo 6:​2, 3) Neʼe mole ina ʼiloʼi neʼe ko Satana ʼaē neʼe tupu ai tona ʼu fihifihia, koia ʼi tana manatu neʼe kua līʼakina ia ia e te ʼAtua. Neʼe ʼui e Sopo kiā Sehova: “He koʼe koa ʼe ke fufū tou fofoga pea ʼe au hage kiā koe ko hou fili?”a​—Sopo 13:⁠24.

3. Ka hoko mai he ʼu fihifihia, koteā ʼapē takotou manatu ʼo ʼuhiga mo Sehova?

³ Ia ʼaho nei, tokolahi te hahaʼi ʼa Sehova ʼe nātou felāveʼi tuʼumaʼu mo te ʼu fihifihia ʼuhi ko te tau, te politike, te maʼuli faka sosiale, te ʼu faʼahiga tuʼutāmaki kehekehe, te mātutuʼa, te mahaki, te maʼuli masiva, pea mo te ʼu tapu ʼa te puleʼaga. Lagi mo koutou ʼe koutou lolotoga tau nei mo he ʼu fihifihia. Lagi ʼi ʼihi temi, ʼe koutou manatu ko Sehova ʼe mole ina tokagaʼi koutou. ʼE koutou ʼiloʼi lelei te ʼu palalau ʼaē iā Soane 3:16: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi.” Koia ka koutou lotomamahi kae mole koutou maʼu he fīmālie, ʼe koutou feʼekeʼaki anai: ‘ ʼE ʼofa moʼoni koa te ʼAtua kiā au? ʼE mole sio mai koa ia ki toku ʼu mamahi? ʼE tokaga mai koa kiā au?’

4. Koteā te ʼaluʼaga faigataʼa neʼe kātakiʼi e Paulo, pea ʼe feala ke malave feafeaʼi kiā tatou ia te ʼu ʼaluʼaga feiā?

⁴ Koutou fakatokagaʼi te meʼa ʼaē neʼe hoko ki te ʼapositolo ko Paulo. Neʼe ina tohi fēnei: “Neʼe tuku mai te tala ki toku kakano, ko te ʼāselo ʼa Satana, ke ina tāʼi tuʼumaʼu au, . . . Neʼe tuʼa tolu taku faikole ki te ʼAliki ke puli toku mamahi ʼaia.” Neʼe logo ia Sehova ki tana ʼu faikole, kae neʼe ina ʼui age kiā Paulo ʼe mole ina pulihi anai tona mamahi ʼaki he faitoʼo faka milakulo. Koia neʼe tonu kiā Paulo ke falala ki te mālohi ʼo te ʼAtua moʼo lagolago kiā ia ke ina kātakiʼi te ‘tala ʼaē neʼe nofo ʼi tona kakano.’b (2 Kolonito 12:​7-9, MN ) Ohage ko Paulo, ʼe lagi koutou tau mo he ʼahiʼahi. Lagi ʼe koutou manatu anai, ‘Ko te mole tokoni mai koa ʼa Sehova ki toku faigataʼaʼia heʼe mole mahino ki toku ʼaluʼaga peʼe mole tokaga pe ia kiā au?’ ʼE mole tonu ke koutou manatu feiā! ʼE tokaga ia Sehova ki tana ʼu kaugana agatonu takitokotahi, pea ʼe hā lelei te faʼahi ʼaia ʼi te ʼu palalau ʼaē neʼe fai e Sesu ki tana ʼu ʼapositolo ʼi tana ʼosi filifili ia nātou. Tou vakaʼi age muʼa peʼe fakaloto mālohiʼi feafeaʼi tatou e tana ʼu palalau ia ʼaho nei.

“ ʼAua Naʼa Koutou Manavasiʼi” Koteā Tona Tupuʼaga?

5, 6. (a) Koteā te tokoni neʼe foaki e Sesu ki tana ʼu ʼapositolo ke ʼaua naʼa nātou manavasiʼi ʼo ʼuhiga mo te ʼu meʼa ʼaē neʼe ʼamanaki hoko kiā nātou? (b) Neʼe feafeaʼi te falala ʼa Paulo ki te tokaga ʼaē ʼa Sehova kiā te ia?

⁵ Neʼe foaki e Sesu ia te ʼu mālohi makehe ki te ʼu ʼapositolo, ke nātou “puleʼi te ʼu laumālie heʼemaʼa, moʼo kapu ʼo nātou pea mo fakamālōlō te ʼu faʼahiga mahaki kehekehe pea mo te ʼu faʼahiga māʼimoa kehekehe.” ʼE mole faka ʼuhiga leva ʼe mole toe hoko anai kiā nātou he ʼu fihifihia pea mo he ʼu ʼahiʼahi. Neʼe fakahā fakatomuʼa age e Sesu te ʼu meʼa ʼaē ka hoko anai kiā nātou. Kae neʼe ina toe fakaloto mālohiʼi fēnei nātou: “ ʼAua naʼa koutou manavasiʼi kiā nātou ʼaē ʼe nātou tāmateʼi te sino ka mole feala ke nātou tāmateʼi te nefesi; kae ke koutou manavasiʼi kiā ia ʼaē ʼe feala tana fakaʼauha te nefesi pea mo te sino ʼi te Seʼeni.”​—Mateo 10:​1, 16-22, 28, MN.

⁶ Neʼe fakahā age e Sesu ia te ʼu lea fakatātā e lua ki tana kau ʼapositolo, ke feala hanatou mahino pe koʼe ʼe tonu ke mole nātou manavasiʼi. Neʼe ina ʼui fēnei kiā nātou: “ ʼE mole koa la fakatau he ʼu pasele e lua ki he foʼi piesi paʼaga e tahi ʼe mole faʼa maʼuhiga? Kae mole he tahi iā nātou ʼe tō ki te kele ka mole ʼiloʼi e takotou Tāmai. Kae māʼia mo te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau. Koia, ʼaua naʼa koutou manavasiʼi: ʼE koutou maʼuhiga lahi ake koutou ʼi he tuʼuga pasele.” (Mateo 10:​29-31, MN ) Koutou fakatokagaʼi neʼe ʼui e Sesu mokā hoko he ʼu fihifihia ʼe mole tonu ke tou mātataku kae ʼe tonu ke tou falala ko Sehova ʼe tokaga kiā tatou takitokotahi. ʼE mahino ia neʼe maʼu te taʼi falala ʼaia e te ʼapositolo ko Paulo, he neʼe ina tohi fēnei: “Kapau ʼe kau te ʼAtua mo tatou, pea ko ai ʼaē ka fakafeagai mai kiā tatou? Ia Ia ʼaē neʼe mole ina fakahāo tona ʼAlo totonu, kae neʼe ina tuku mai maʼa tatou fuli, pea he koʼe koa ʼe mole ina fakaʼaogaʼi anai ia ia moʼo foaki fuli mai te ʼu meʼa ʼaē?” (Loma 8:​31, 32, MN ) Logola te ʼu fihifihia kehekehe ʼaē ʼe tau mo koutou, kae ʼe koutou lava falala ko Sehova ʼe tokaga kiā koutou takitokotahi mo kapau ʼe koutou nonofo agatonu kiā te ia. ʼE tou mahino lelei anai ki tana tokaga ʼaē kiā tatou takitokotahi mokā tou sivisivi fakalelei te tokoni ʼaē neʼe fai e Sesu ki tana ʼu ʼapositolo.

Te Maʼuhiga ʼo Te Pasele

7, 8. (a) ʼI te temi ʼo Sesu, neʼe faka ʼuhigaʼi feafeaʼi te ʼu pasele? (b) He koʼe iā Mateo 10:29 neʼe fakaʼaogaʼi te kupu Faka Keleka ki “he ʼu pasele” ia te kupu ʼaē ʼe faka ʼuhiga ki he ʼu kiʼi manulele?

⁷ ʼE hā lelei ʼi te ʼu lea fakatātā ʼa Sesu ia te tokaga ʼaē ʼa Sehova ki Tana ʼu kaugana takitokotahi. Tou vakaʼi age muʼa te ʼuhiga ʼo te ʼu pasele. ʼI te temi ʼo Sesu, neʼe fakaʼaogaʼi te ʼu pasele ki te kai, kae neʼe fehiʼa leva te hahaʼi ki te ʼu manulele ʼaia, he neʼe nātou kai ia te ʼu ʼu gāueʼaga fulumeto. Neʼe falā nima pe te totogi ʼo te ʼu pasele e lua he neʼe mahu ʼaupito te ʼu pasele pea neʼe totogi lelei. ʼAki te totogi ʼaia neʼe feala ki he tahi ke ina toʼo ia pasele e nima, kae ko te nima pasele neʼe foaki noa, he neʼe faka ʼuhiga ʼe mole maʼuhiga!​—Luka 12:⁠6.

⁸ Tou toe vakaʼi pe neʼe lahi feafeaʼi te manulele ʼaia. Ko te pasele ʼe ko he kiʼi manulele ʼe veliveli ʼaupito. Ko te kupu Faka Keleka ʼaē neʼe fakaliliu ʼaki ‘te ʼu pasele’ iā Mateo 10:​29, ʼe faka ʼuhiga tāfito ki he ʼu kiʼi pasele. ʼE ʼasi mai, neʼe loto tāfito e Sesu ke mahino ki tana ʼu ʼapositolo neʼe ko he ʼu manulele ʼe mole faʼa maʼuhiga. ʼE ʼui fēnei ʼi te tohi: “ ʼE talanoa ia Sesu ʼo ʼuhiga mo he kiʼi manulele pea neʼe ina fakaʼaogaʼi te kupu ʼaia moʼo fakahā ia te veliveli ʼosi ʼo te manulele ʼaia!”

9. Koteā te puani maʼuhiga ʼaē neʼe fia fakahā e Sesu ʼi tana lea fakatātā ʼo ʼuhiga mo te ʼu pasele?

⁹ ʼI tana talanoa ki te ʼu pasele, neʼe fia fakahā e Sesu ia te puani maʼuhiga: Ko te meʼa ʼaē ʼe meʼa noaʼi e te tagata ʼe ko he meʼa ʼe faka maʼuhigaʼi e Sehova ʼAtua. Neʼe toe faka maʼuhigaʼi e Sesu ia te manatu ʼaia he neʼe ina ʼui ko he kiʼi pasele “ ʼe tō ki te kele” ʼe tokagaʼi anai e Sehova.c ʼE ko he ako lelei ʼaenī kiā tatou. Kapau ʼe tokaga ia Sehova ki he manulele veliveli pea mo mole faʼa maʼuhiga, pea ʼe tokaga ʼaupito age anai ia ki te ʼu mamahi ʼa he tagata ʼe kaugana kiā te ia!

10. Koteā te faka ʼuhiga ʼo te ʼui ʼaē: “[Ko] te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau”?

¹⁰ ʼO hilifaki ki tana lea fakatātā ʼaia ʼo ʼuhiga mo te ʼu pasele, neʼe toe ʼui fēnei e Sesu: “[Ko] te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau.” (Mateo 10:​30, MN ) Logola te nounou ʼo te ʼu palalau ʼaia ʼa Sesu kae ʼe loloto, heʼe ina toe faka maʼuhigaʼi tana lea fakatātā ʼaē ʼo ʼuhiga mo te ʼu pasele. ʼE fakafuafua ko totatou ʼu fuluʼi ʼulu e lauʼi 100 000. Maʼa te tokolahi, ʼe tatau fuli te fuluʼi ʼulu, pea ʼe mole he fuluʼi ʼulu ʼe tonu ke kita tokagaʼi kehe. Kae ko Sehova ʼAtua ʼe ina ʼiloʼi pea mo ina lau ia te ʼu fuluʼi ʼulu takitahi. Kapau ʼe ʼiloʼi e Sehova totatou ʼu fuluʼi ʼulu takitahi, pea ʼe mahino ia ʼe mole he meʼa ʼi totatou maʼuli ʼe pulipuli kiā te ia. Ei, ʼe ʼiloʼi e Sehova te agaaga ʼo tana ʼu kaugana takitokotahi. ʼIo, ʼe “sio [ia] ki te loto.”​—1 Samuele 16:⁠7.

11. Neʼe fakahā feafeaʼi e Tavite neʼe falala ko Sehova ʼe tokaga kiā ia?

¹¹ Neʼe lahi ʼaupito ia te ʼu fihifihia ʼo Tavite, kae neʼe falala ko Sehova ʼe tokaga kiā ia. Neʼe ina tohi fēnei: “Sehova neʼe ke sivisivi au pea ʼe ke ʼiloʼi au. Neʼe ke ʼiloʼi te temi ʼaē ʼe au heka ai, pea mo te temi ʼaē ʼe au tuʼu ai. Neʼe ke tokaga mai mamaʼo ki taku manatu.” (Pesalemo 139:​1, 2) ʼO feiā mo koutou, ʼe feala hakotou tui papau ko Sehova ʼe ina ʼiloʼi lelei ia koutou. (Selemia 17:10) ʼAua naʼa koutou manatu ʼe mole tokagaʼi koutou e Sehova, ia ia ʼaē ʼe sio kiā meʼa fuli!

“[Ke Ke] ʼAi Toku ʼu Loʼimata Ki Tau Meʼa ʼUtu Vai”

12. ʼE tou ʼiloʼi feafeaʼi ko Sehova ʼe ina ʼiloʼi lelei te ʼu fihifihia ʼaē ʼe tau mo tana hahaʼi?

¹² ʼE ʼiloʼi e Sehova tana ʼu kaugana takitokotahi, pea ʼe ina toe ʼiloʼi lelei foki mo tonatou ʼu fihifihia. Ohage la, ʼi te temi ʼaē neʼe fakapōpulaʼi ai te kau Iselaele, neʼe ʼui fēnei e Sehova kiā Moisese: “Neʼe au sio tonu ki te maʼuli mamahi ʼo taku hahaʼi ʼi Esipito pea neʼe au logo ki tanatou tagi ʼuhi ko nātou ʼaē neʼe nātou faka gāueʼi nātou, heʼe au ʼiloʼi lelei te ʼu mamahi ʼaē ʼe tau mo nātou.” (Ekesote 3:7) ʼI meʼa fakaloto fīmālie hatatou ʼiloʼi mokā tou tau mo he ʼu faigataʼaʼia, ʼe sio ifo ia Sehova ki totatou mamahi pea ʼe ina logoʼi tatatou ʼu tagi! Pea ʼe malave moʼoni ki tona loto totatou ʼu mamahi.

13. ʼE tou ʼiloʼi feafeaʼi ko Sehova ʼe ʼofa moʼoni ki tana ʼu kaugana?

¹³ ʼE ʼiloga ʼi tana ʼu felogoi mo te kau Iselaele, ko Sehova ʼe tokaga kiā nātou ʼaē ʼe kaumeʼa mo ia. Logola tonatou maʼuli mamahi ʼuhi ko tanatou ʼu talagataʼa, kae neʼe ʼui fēnei e Isaia ʼo ʼuhiga mo Sehova: “Lolotoga tonatou ʼu mamahi, neʼe toe mamahi ai mo ia.” (Isaia 63:9) ʼE feala ke koutou tui papau ʼi tokotou ʼuhiga kaugana agatonu ʼa Sehova, ka koutou mamahi, pea ʼe toe mamahi mo Sehova. ʼE mole koa la ko he faʼahi ʼe ina uga ai koutou ke mole koutou mātataku mokā koutou tau mo he fihifihia pea ke koutou haga kaugana kiā te ia?​—1 Petelo 5:6, 7.

14. Neʼe feafeaʼi ia te ʼu ʼaluʼaga, ʼi te lolotoga ʼo te temi ʼaē neʼe tohi ai ia te Pesalemo 56?

¹⁴ Ko te Hau ko Tavite neʼe faka tui ko Sehova ʼe tokaga pea mo ʼofa kiā te ia, heʼe ʼasi te faʼahi ʼaia ʼi te Pesalemo 56, ʼaē neʼe ina tohi lolotoga te temi ʼaē neʼe feholaʼaki ai ʼuhi ko tona fia matehi e te Hau ko Saulo. Neʼe hola ia Tavite ki Kate, kae neʼe mataku naʼa puke ia ia e te kau Filisitini mo kapau ʼe nātou ʼiloʼi ia ia. Neʼe ina tohi fēnei: “ ʼI te temi fuli pe neʼe fia puke au e toku ʼu fili, heʼe tokolahi ia nātou ʼe nātou tauʼi au ʼaki he aga fiatuʼu.” Koia ʼi te ʼu tuʼutāmaki ʼaia neʼe hoko kiā te ia, neʼe falala ia Tavite kiā Sehova. Neʼe ina ʼui fēnei: “ ʼI te ʼaho kātoa ʼe nātou fakafihiʼi tuʼumaʼu taku ʼu gāue; ko tanatou ʼu manatu fuli ʼe fakafeagai kiā te au.”​—Pesalemo 56:​2, 5.

15. (a) ʼE faka ʼuhiga feafeaʼi te kole ʼaē ʼa Tavite kiā Sehova ke ina ʼai tona ʼu loʼimata ki he meʼa ʼutu vai peʼe ki he tohi? (b) Ka tou tau mo he fihifihia ʼe feala ke vaivai ai tatatou tui, koteā ʼaē ʼe tou tui moʼoni kiai?

¹⁵ Pea neʼe tohi e Tavite te ʼu palalau ʼaenī ʼi te Pesalemo 56:8: “Neʼe ko koe totonu ʼaē neʼe ke tala, ʼe au liliu anai ko he tahi ʼe feholaʼaki. ʼAi toku ʼu loʼimata ki tau meʼa ʼutu vai. ʼE mole nātou tuʼu koa la ʼi tau tohi?” ʼE lagi malave ʼi ʼotatou loto ia te tokaga ʼofa ʼaia ʼa Sehova! Ka tou tau mo he mamahi, ʼe lagi tou tagi kiā Sehova. Māʼiape la mo Sesu ʼaē neʼe ko te tagata haohaoa neʼe tagi kiā Sehova. (Hepeleo 5:7) Neʼe falala mālohi ia Tavite ko Sehova ʼe sio ifo kiā te ia pea ʼe ina tokagaʼi tona mamahi, ohage pe ʼe ina taupau tona ʼu loʼimata ʼi hana meʼa ʼutu vai peʼe ina tohi ʼi hana tohi.d ʼE lagi koutou manatu ʼe fonu ʼaupito anai ia te meʼa ʼutu vai ʼaia peʼe ko te tohi ʼaia ʼi ʼokotou loʼimata. Kae ʼaua naʼa koutou tuʼania, heʼe fakapapau fēnei mai ʼi te Tohi-Tapu: “Ko Sehova ʼe ōvi ia nātou ʼaē ʼe lavea ʼonatou loto pea ʼe ina hāofaki ia nātou ʼaē ʼe mafasia tonatou ʼatamai.”​—Pesalemo 34:⁠18.

Tou Liliu Ko He Kaumeʼa Lelei ʼo Te ʼAtua

16, 17. (a) ʼE tou ʼiloʼi feafeaʼi ko Sehova ʼe tokaga ki te ʼu fihifihia ʼaē ʼe tau mo tana hahaʼi? (b) Koteā ʼaē neʼe fai e Sehova ke feala ki te hahaʼi ke nātou kaumeʼa mo ia?

¹⁶ ʼE ko he pilivilesio kiā tatou hatatou atolasio ki he ʼAtua ʼe ina lau ‘te ʼu fuluʼi ʼulu fuli ʼo totatou ʼulu,’ heʼe mahino mai ko te ʼAtua ʼe tokaga pea mo ʼofa kiā tatou. Logola ʼe kei tonu ke tou fakatalitali ki te mālama foʼou ke pulihi ai te ʼu mamahi fuli, kae ʼi te temi nei ʼe fai e Sehova ia te meʼa taulekaleka maʼa tana hahaʼi. Neʼe tohi fēnei e Tavite: “ ʼE kaumeʼa ia Sehova mo nātou ʼaē ʼe manavasiʼi kiā te ia, ʼo toe feiā mo tana fuakava, ʼe ina fakahā age kiā nātou.”​—Pesalemo 25:⁠14.

¹⁷ ʼE lagi mata faigataʼa kiā tatou te ʼui ʼaē ʼe feala ke tou ‘kaumeʼa mo Sehova.’ Kae ko Sehova ʼe ina fakaafe te hahaʼi ʼaē ʼe manavasiʼi kiā te ia ke nātou ʼōmai ki tona falelā. (Pesalemo 15:​1-5) Pea koteā ʼaē ʼe fai e Sehova maʼa tana kau fakaafe ʼaia? Neʼe ʼui e Tavite, ʼe ina fakahā age kiā nātou ia tana fuakava. ʼE falala ia Sehova kiā nātou ʼaia, pea ʼe ina fakahā age tana “meʼa fakalilo” ki tana ʼu polofeta ke feala hanatou ʼiloʼi ia tana ʼu fakatuʼutuʼu pea mo te ʼu meʼa ʼaē ʼe tonu ke nātou fai moʼo mulimuli ki tana ʼu fakatuʼutuʼu ʼaia.​—Amosi 3:⁠7.

18. ʼE tou ʼiloʼi feafeaʼi ʼe loto e Sehova ke tou kaumeʼa mo ia?

¹⁸ ʼE ko he meʼa fakafiafia hatatou ʼiloʼi, logola totatou ʼuhiga agahala, ʼe tou lava kaumeʼa mo te Māʼoluga ʼAupito, ia Sehova ʼAtua. Pea ʼe fakaloto mālohiʼi tatou e Sehova ke tou kaumeʼa mo ia. ʼE ʼui ʼi te Tohi-Tapu: “Koutou fakaovi ki te Atua pea e fakaovi atu anai kia koutou.” (Sakopo 4:8) ʼE loto e Sehova ke tou kaumeʼa mo ia. Pea ki te faʼahi ʼaia, neʼe kua ina fai te ʼu fakatuʼutuʼu moʼo faka fealagia hatatou kaumeʼa mo ia. Ko te sākilifisio faitotogi ʼa Sesu neʼe ina faka fealagia ke tou kaumeʼa mo te ʼAtua Māfimāfi. ʼE ʼui ʼi te Tohi-Tapu: “E tou ofa, koteuhi nee uluaki ofa ia kia tatou.”​—1 Soane 4:⁠19.

19. Ko te faʼa kātaki ʼe ina fakamālohiʼi feafeaʼi tatatou ʼu felogoi ʼaē mo Sehova?

¹⁹ Ka tou kātakiʼi totatou ʼu fihifihia, pea ʼe tou fakamālohiʼi ai tatatou fakakaumeʼa ʼaē mo Sehova. Neʼe tohi fēnei e te tisipulo ko Sakopo: “Ke fai e te faʼa kātaki hana gāue kātoa, ke feala hakotou kātoa pea mo haohaoa ia faʼahi fuli, ʼo mole puli ia koutou he meʼa.” (Sakopo 1:​4, MN ) Ko te “gāue” fea ʼaē ʼe feala ai ke tou kātoa ʼi tatatou kātakiʼi ia te ʼu fihifihia? ʼE tou manatuʼi te ‘tala ʼaē neʼe nofo ʼi te kakano’ ʼo Paulo. Koteā ʼaē neʼe hoko kiā ia ʼi tana faʼa kātaki? Neʼe ʼui fēnei e Paulo ʼo ʼuhiga mo tona ʼu ʼahiʼahi: “ ʼE lelei age haku fiameʼameʼa ʼo ʼuhiga mo toku ʼu vaivaiʼaga, ke fakamalumalu au e te mālohi ʼo Kilisito ohage ko he falelā. Koia ʼe au fiafia ʼi te ʼu vaivaiʼaga, ʼi te ʼu leakovi, ʼi te ʼu mamahi, ʼi te ʼu fakataga pea mo te ʼu faigataʼaʼia, ʼuhi ko Kilisito. Heʼe ʼi te temi ʼaē ʼe au vaivai ai, ʼe ko te temi ʼaia ʼaē ʼe au mālohi ai.” (2 Kolonito 12:​9, 10, MN ) Neʼe ʼiloʼi e Paulo ʼe foaki age anai e Sehova ia te mālohi ʼaē ʼe ʼaoga kiā ia​—“te mālohi ʼaē ʼe laka age ʼi te mālohi māhani”​—ke feala ai hana kātakiʼi tona ʼu mamahi. Koia ʼaē neʼe toe mālohi ai tana fakakaumeʼa mo Kilisito pea mo Sehova ʼAtua.​—2 Kolonito 4:​7, MN; Filipe 4:​11-13.

20. He koʼe ʼe tou falala ko Sehova ʼe tokoni mai anai pea mo fakaloto fīmālie anai kiā tatou mokā ʼe tou tau mo ni ʼu fihifihia?

²⁰ ʼE lagi tuku e Sehova ke hoko tokotou ʼu fihifihia. Koia tou manatuʼi tana fakapapau kiā nātou ʼaē ʼe nātou manavasiʼi kiā te ia: “E mole au tukunoa anai koe, pea e mole au liaki anai koe.” (Hepeleo 13:5) ʼE koutou lava maʼu te tokoni pea mo te fakaloto fīmālie ʼaia, heʼe kua lau e Sehova “te ʼu fuluʼi ʼulu fuli ʼo tokotou ʼulu.” ʼE sio ki takotou faʼa kātaki, pea ʼe mahino ki tokotou mamahi. ʼE tokaga moʼoni ia kiā koutou, pea ʼe mole ‘galo anai kiā ia takotou ʼu gāue pea mo tokotou ʼofa ʼaē ki tona huafa.’​—Hepeleo 6:⁠10.

[Kiʼi nota]

ʼE Kei Koutou Manatuʼi Koa?

• Ko te ʼu ʼaluʼaga fea ʼaē ʼe lava ʼui ai e he tahi kua līʼakina ia ia e te ʼAtua?

• Koteā te ako ʼe tou tāʼofi ʼi te ʼu lea fakatātā ʼa Sesu ʼo ʼuhiga mo te ʼu pasele pea mo te lau ʼo totatou ʼu fuluʼi ʼulu?

• Koteā te faka ʼuhiga ʼo te ʼai ʼo te ʼu loʼimata ki te “meʼa ʼutu vai” ʼa Sehova peʼe ki tana “tohi”?

• E feafeaʼi hatatou ‘kaumeʼa mo Sehova’?

[Paki ʼo te pasina 22]

He koʼe neʼe mole toʼo e Sehova ia te ‘tala ʼaē neʼe nofo ʼi te kakano’ ʼo Paulo?

[Paki ʼo te pasina 23]

Koteā te ako ʼe tou lava tāʼofi ʼi te lea fakatātā ʼa Sesu ʼo ʼuhiga mo te ʼu pasele?

[Haʼuʼaga ʼo te paki]

© J. Heidecker/VIREO

[Paki ʼo te pasina 25]

Kapau ʼe tou lau tuʼumaʼu te Tohi-Tapu, pea ʼe tou tui papau anai ko te ʼAtua ʼe tokaga kiā tatou takitokotahi