ʼE Tokaga Mai Koa Te ʼAtua Kiā Au?

Te ʼu tali ʼaē ʼe fai māhani:

▪ “Ko te ʼAtua ʼe maʼuhiga fau ke feala ai hana tokagaʼi toku ʼu faigataʼaʼia.”

▪ “ ʼI taku ia manatu, ʼe mole tokaga mai ia kiā au.” Koteā ʼaē neʼe ʼui e Sesu?

▪ “ ʼE mole koa lā fakatau he ʼu misi e nima ki he ʼu foʼi piesi paʼaga e lua ʼe mole faʼa maʼuhiga? Kae ʼe mole he tahi iā nātou ʼaia ʼe galo iā muʼa ʼo te ʼAtua. Kae māʼia mo te ʼu fuluʼi ʼulu ʼo tokotou ʼulu kua ʼosi kātoa ʼi te lau. ʼAua naʼa kotou manavasiʼi; ʼe kotou maʼuhiga lahi ake koutou ʼi he faga misi tokolahi.” (Luka 12:6, 7) ʼE mahino papau ia, neʼe akoʼi e Sesu ko te ʼAtua ʼe tokaga ia kiā tātou.

▪ “ ʼAua naʼa kotou hoha ʼo ʼui maʼa koutou: ‘Koteā he meʼa kā tou kai?’ peʼe: ‘Koteā he meʼa kā tou ʼinu?’ peʼe: ‘Koteā he meʼa kā tou kofu ʼaki?’ Heʼe ko te ʼu meʼa fuli ʼaia ʼe kumi fakamānumānu e te ʼu puleʼaga. Kae ʼiloʼi pē e takotou Tamai ʼaē ʼe ʼi selō, ʼe ʼaoga kiā koutou te ʼu meʼa fuli ʼaia.” (Mateo 6:31, 32) Neʼe tui papau ia Sesu ʼe ʼiloʼi e te ʼAtua te ʼu meʼa ʼaē ʼe ʼaoga kiā tātou takitokotahi.

ʼE ʼUI fakalelei ʼi te Tohi-Tapu ko te ʼAtua ʼe tokaga kiā tātou. (Pesalemo 55:22; 1 Petelo 5:7) Kapau koia ʼaia, pea he koʼē ʼe tou tau mo te ʼu tuʼuga mamahi iā ʼaho nei? Kapau ko te ʼAtua ʼe ʼofa pea mo māfimāfi, he koʼē ʼe mole ina fai he puleʼaki moʼo fakagata ia te mamahi?

Ke feala hatatou tali ki te ʼu fehuʼi ʼaia, ʼe ʼi ai te faʼahi ʼe mole ʼiloʼi e te hahaʼi tokolahi, ʼaē ʼe ko Satana te Tēvolo ʼaē ʼe pule ʼi te mālamanei agakovi. ʼI te temi ʼaē neʼe ina fakahalaʼi ai Sesu, neʼe fia foaki age e Satana kiā ia te ʼu puleʼaga fuli ʼo te mālamanei, ʼo ina ʼui fēnei: “ ʼE au foaki atu anai kiā te koe te pule kātoa ʼaenī pea mo te kolōlia ʼo te ʼu puleʼaga fuli ʼaenī, he neʼe foaki mai kiā te au, pea ʼe au foaki ki ʼaē ʼe au loto ki ai.”—Luka 4:5-7.

Neʼe liliu feafeaʼi ia Satana ʼo pule ki te mālamanei? ʼI te temi ʼaē neʼe fakalogo ai tatatou ʼu ʼuluaki mātuʼa, ia Atama mo Eva, kiā Satana pea mo nā lītuʼa ki te fakatotonu ʼa te ʼAtua, ʼi tona fakahagatonu, neʼe nā fili ai ia Satana ke pule kiā nāua. Talu mai ia te agatuʼu ʼaia, ko Sehova ʼAtua neʼe faʼa kātaki ʼo ina tuku he temi ke hā ai te mole he fua lelei ʼo te pule ʼa Satana. ʼE mole fakakinauʼi e Sehova te hahaʼi ke natou tauhi kiā te ia, kae ʼe ina tuku mai pē ia te faigamālie ke tou toe liliu kiā te ia.—Loma 5:10.

Ko te ʼAtua ʼe tokaga kiā tātou, ko tona tupuʼaga lā ʼaia ʼo tana fai he ʼu fakatuʼutuʼu ke fakaʼāteaina tātou e Sesu mai te pule ʼa Satana. Kua ovi mai pē te temi ʼaē kā haga ai anai ia Sesu ʼo “maumauʼi ia ia ʼaē ʼe ina maʼu te puleʼaki moʼo fakatupu te mate, ia te Tēvolo.” (Hepeleo 2:14) ʼI tana fai te faʼahi ʼaia, ʼe ina “maumauʼi [anai] te ʼu gāue ʼa te Tēvolo.”—1 Soane 3:8.

ʼE toe fakatuʼu anai ia te Palatiso ʼi te kele nei. ʼI te temi ʼaia, ko te ʼAtua “ ʼe ina holoholoʼi anai te ʼu loʼimata fuli pē ʼi [te ʼu] mata [ʼo te hahaʼi], pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea [ʼe] puli [anai] ia.”—Fakahā 21:4, 5.a

[Nota]

[Paki ʼo te pasina 8]

ʼE toe fakatuʼu anai ia te Palatiso ʼi te kele nei